2 Samuel 5:1-25

  • Awó David maŋtsɛ yɛ Israel fɛɛ nɔ (1-5)

  • Aŋɔ Yerusalem (6-16)

    • Zion, David Maŋ lɛ (7)

  • David ye Filistibii lɛ anɔ kunim (17-25)

5  Be ko sɛɛ lɛ, Israel wekui lɛ fɛɛ ba David ŋɔɔ yɛ Hebron+ ni amɛbakɛɛ akɛ: “Naa! Oheloo kɛ lá* ji wɔ.+  Be ko ni eho be ni Saul ji wɔmaŋtsɛ lɛ, bo ji mɔ ni nyiɛɔ Israel hiɛ kɛyaa ta.*+ Ni Yehowa kɛɛ bo akɛ: ‘Bo obaakwɛ mimaŋ Israel, ni obaatsɔ Israel hiɛnyiɛlɔ.’”+  No hewɔ lɛ, Israel onukpai lɛ fɛɛ ba maŋtsɛ lɛ ŋɔɔ yɛ Hebron, ni Maŋtsɛ David kɛ amɛ kpaŋ kpaŋmɔ+ yɛ Hebron yɛ Yehowa hiɛ. Kɛkɛ ni amɛfɔ David mu ni amɛwó lɛ Israel nɔ maŋtsɛ.+  Be ni David batsɔ maŋtsɛ lɛ, no mli lɛ eye afii 30, ni eye nɔ afii 40.+  Eye Yuda nɔ afii 7 kɛ nyɔji 6 yɛ Hebron, ni eye Israel kɛ Yuda fɛɛ nɔ afii 33 yɛ Yerusalem.+  Ni maŋtsɛ lɛ kɛ ehii lɛ yi mli akɛ amɛmiiya Yerusalem koni amɛkɛ Yebusbii+ ni yɔɔ shikpɔŋ lɛ nɔ lɛ ayawu. Amɛtswa David mpoa akɛ: “Onyɛŋ oba biɛ kɔkɔɔkɔ! Shwilafoi kɛ akpaketsɛmɛi lɛ po baawo bo foi.” Amɛyiŋ fɛɛ lɛ, ‘David nyɛŋ aba biɛ.’+  Shi David ŋɔ Zion mɔɔ lɛ ni ŋmɛnɛ lɛ atsɛɔ lɛ, David Maŋ+ lɛ.  No hewɔ lɛ, nakai gbi lɛ, David kɛɛ akɛ: “Mɛi ni yaatutua Yebusbii lɛ atsɔ fɔlɔ ni nu tsɔɔ mli yɛ shikpɔŋ lɛ shishi lɛ mli koni amɛyagbe ‘akpakei kɛ shwilafoi’ ni David* nyɛɔ lɛ!” Enɛ hewɔ awieɔ akɛ: “Shwilafoi kɛ akpakei lɛ boteŋ shĩa lɛ mli kɔkɔɔkɔ” lɛ.  Kɛkɛ ni David yahi mɔɔ lɛ mli, ni atsɛ lɛ* akɛ, David Maŋ; ni David tswatswaa gbogboi kɛ nibii krokomɛi kɛbɔle he kɛkpe, kɛjɛ Milo*+ lɛ he kɛba emligbɛ.+ 10  No hewɔ lɛ, David tee nɔ ená hewalɛ,+ ni Yehowa Nyɔŋmɔ, taiatsɛ lɛ, kɛ lɛ yɛ.+ 11  Hiram,+ Tiro maŋtsɛ lɛ, tsu mɛi kɛtee David ŋɔɔ, ni ehã akɛ tseneduru tsei,+ kɛ kapintafoi, kɛ tɛ gbogbotswalɔi hu tee ni amɛyama maŋtsɛ shĩa amɛhã David.+ 12  Ni David na akɛ Yehowa ehã emaŋtsɛyeli lɛ edamɔ shi shiŋŋ yɛ Israel nɔ,+ ni ewó emaŋtsɛyeli lɛ nɔ gojoo+ yɛ Nyɔŋmɔ maŋ Israel hewɔ.+ 13  David ŋɔ hemɛi*+ kɛ ŋamɛi krokomɛi yɛ Yerusalem be ni ejɛ Hebron kɛba lɛ, ni afɔ bihii kɛ biyei krokomɛi ahã David.+ 14  Mɛi ni afɔ ahã lɛ yɛ Yerusalem lɛ agbɛ́ii nɛ: Shamua kɛ Shobab kɛ Natan+ kɛ Solomon+ 15  kɛ Ibhar kɛ Elishua kɛ Nefeg kɛ Yafia 16  kɛ Elishama kɛ Eliada kɛ Elifelet. 17  Be ni Filistibii lɛ nu akɛ afɔ David mu ni awó lɛ Israel nɔ maŋtsɛ lɛ,+ Filistibii lɛ fɛɛ kwɔ kɛbatao David.+ Be ni David nu he lɛ, ekpeleke shi kɛtee mɔɔ lɛ mli.+ 18  Kɛkɛ ni Filistibii lɛ ba, ni amɛbagbɛ amɛshwã Refaim Jɔɔ+ lɛ mli. 19  David bi Yehowa nii+ akɛ: “Mikwɔ kɛya ni mikɛ Filistibii lɛ ayawu lo? Ani okɛ amɛ baawo midɛŋ?” Ni Yehowa kɛɛ David akɛ: “Kwɔɔ kɛya, ejaakɛ mikɛ Filistibii lɛ baawo odɛŋ kɛ̃.”+ 20  No hewɔ lɛ, David ba Baal-perazim, ni ebagbe amɛ yɛ jɛmɛ. Kɛkɛ ni ekɛɛ akɛ: “Yehowa egbá kɛtsɔ mihenyɛlɔi+ lɛ ateŋ yɛ mihiɛ tamɔ nu ni eje ŋa gbáa lɛ.” No hewɔ ni etsɛ jɛmɛ akɛ Baal-perazim*+ lɛ. 21  Filistibii lɛ shi amɛmagai lɛ yɛ jɛmɛ, ni David kɛ ehii lɛ loo kɛtee. 22  Sɛɛ mli lɛ, Filistibii lɛ kwɔ kɛba ekoŋŋ, ni amɛbagbɛ amɛshwã Refaim Jɔɔ+ lɛ mli fɛɛ. 23  David bi Yehowa nii, shi Nyɔŋmɔ kɛɛ akɛ: “Kaakwɔ kɛtee tɛ̃ɛ. Shi lɔgɔmɔ kɛyaje amɛsɛɛgbɛ, ni otutua amɛ yɛ baka tsei lɛ ahiɛ. 24  Ni kɛ́ onu gbɛɛmɔ yɛ baka tsei lɛ ayiteŋ tamɔ najiashi gbɛɛmɔ lɛ, no lɛ, ohe afee oya, ejaakɛ Yehowa eje kpo kɛtsɔ ohiɛ koni eyagbe Filistibii lɛ asraafoi lɛ.” 25  No hewɔ lɛ, David fee tamɔ bɔ ni Yehowa efã lɛ lɛ pɛpɛɛpɛ, ni egbe Filistibii+ lɛ kɛjɛ Geba+ aahu kɛtee Gezer+ tɔ̃ɔ.

Shishigbɛ Niŋmaa

Loo “Oheloo kɛ wu.”
Hebri sht. ŋm., “bo okɛ Israel yaa ni okɛ amɛ baa.”
Loo “David susuma.”
Shishitsɔɔmɔi komɛi kɛɔ akɛ, “ni etsɛ lɛ.”
Eji Hebri wiemɔ ko ni tsɔɔ nɔ ko ni abua naa tamɔ gɔŋ.
Eshishi ji, “Mɔ Ni Gbáa Kɛtsɔɔ Mli.”