2 Samuel 20:1-26

  • Sheba tse atua; Yoab gbe Amasa (1-13)

  • Atiu Sheba ni afo eyitso (14-22)

  • Mɛi ni David kɛtsu nii yɛ enɔyeli lɛ mli (23-26)

20  Shi nuu ko yɛ ni atsɛɔ lɛ Sheba,+ ni ji Bikri, Benyaminnyo lɛ, binuu, ni eji sanetsɛ. Ekpã tɛtɛrɛmantɛrɛ*+ ni ekɛɛ: “Wɔbɛ gbɛfaŋnɔ ko yɛ David mli, ni wɔbɛ gboshinii ko hu yɛ Yishai binuu lɛ mli.+ Israel, mɔ fɛɛ mɔ aya enyɔŋmɔi lɛ aŋɔɔ!”*+ 2  Kɛkɛ ni Israel hii lɛ fɛɛ je David sɛɛ ni amɛyanyiɛ Sheba, Bikri binuu lɛ sɛɛ;+ shi Yuda hii lɛ kpɛtɛ amɛmaŋtsɛ lɛ he, kɛjɛ Yordan kɛyashi Yerusalem.+ 3  Be ni David bashɛ eshĩa* lɛ yɛ Yerusalem lɛ,+ maŋtsɛ lɛ ŋɔ ehemɛi* nyɔŋma ni eshi yɛ sɛɛ koni amɛkwɛ shĩa lɛ,+ ni ekɛ amɛ yato shĩa ko mli ni ehole bulɔi eto amɛnɔ. Ehãa amɛ niyenii, shi ekɛ amɛ náaa bɔlɛ.+ Yei nɛɛ hi shi oookɛɛ okulafoi, tsɛbelɛ amɛyɛ wu ni hiɛ kã, ni amɛhi shĩa lɛ mli ni ahãaa amɛje kpo aahu kɛyashi amɛgboi. 4  Agbɛnɛ maŋtsɛ lɛ kɛɛ Amasa+ akɛ: “Yaabua Yuda hii lɛ anaa kɛba, yɛ biɛ gbii etɛ mli, ni bo hu oba.” 5  No hewɔ lɛ, Amasa tee koni eyabua Yuda naa, shi esɛɛ yagbala shi fe be ni ato ahã lɛ lɛ. 6  Kɛkɛ ni David kɛɛ Abishai+ akɛ: “Sheba,+ Bikri binuu lɛ baanyɛ afee wɔ efɔŋ fe nɔ ni Absalom fee lɛ po.+ No hewɔ lɛ, ŋɔɔ onuŋtsɔ tsuji lɛ ni otiu lɛ, koni ekaya maji ni atswa gbogboi awo amɛhe lɛ eko mli ni ejo foi.” 7  No hewɔ lɛ, Yoab+ hii lɛ, kɛ Keretifoi lɛ, kɛ Peletifoi+ lɛ, kɛ hii kãkãlɔi lɛ fɛɛ je kpo kɛnyiɛ esɛɛ; amɛshi Yerusalem ni amɛtiu Sheba, Bikri binuu lɛ. 8  Be ni amɛbɛŋkɛ Gibeon+ tɛ agbo lɛ he lɛ, Amasa+ kɛ amɛ bakpe. No mli lɛ, Yoab wo etawuu atade lɛ, ni eŋmɔ klante yɛ ehɛ yɛ ehebo mli. Be ni etsi kɛba hiɛ lɛ, klante lɛ je ehe egbee shi. 9  Yoab bi Amasa akɛ: “Minyɛmi nuu, oyɛ jogbaŋŋ lo?” Kɛkɛ ni Yoab kɛ eninejurɔ mɔ Amasa tsɛŋ oookɛɛ eyaashɔ enaa. 10  No mli lɛ, Amasa hiɛ bɛ ehe nɔ yɛ klante ni Yoab hiɛ lɛ he, ni Yoab kɛ klante lɛ tsu emusuŋ,+ ni emlinii je kpo eshwie shi. Ehe ehiaaa ni ekɛtsu lɛ shii enyɔ dani egbo; shi kome lɛ kɛkɛ fa. Kɛkɛ ni Yoab kɛ enyɛmi nuu Abishai tiu Sheba, Bikri binuu lɛ. 11  Yoab oblahii lɛ ateŋ mɔ kome damɔ emasɛi ni ekɛɛ akɛ: “Mɔ fɛɛ mɔ ni yɔɔ Yoab gbɛfaŋ kɛ mɔ fɛɛ mɔ ni yɔɔ David gbɛfaŋ lɛ, anyiɛ Yoab sɛɛ!” 12  No mli fɛɛ lɛ, Amasa kã shi eepele yɛ elá lɛ mli yɛ gbɛ lɛ teŋ. Be ni nuu lɛ na akɛ mɛi lɛ fɛɛ bawaa kɛdamɔɔ shi lɛ, ewó Amasa kɛje gbɛ lɛ nɔ kɛtee ŋa lɛ mli. Kɛkɛ ni ekɛ mama ko ha enɔ, ejaakɛ ena akɛ mɔ fɛɛ mɔ ni bashɛɔ ehe lɛ, waa kɛdamɔɔ shi. 13  Be ni ewó lɛ kɛje gbɛ lɛ nɔ lɛ sɛɛ lɛ, hii lɛ fɛɛ nyiɛ Yoab sɛɛ kɛtiu Sheba,+ Bikri binuu lɛ. 14  Sheba yatsɔ Israel wekui lɛ fɛɛ amli kɛtee Abel-bet-maaka.+ Bikribii lɛ bua amɛhe naa, ni amɛ hu amɛbanyiɛ esɛɛ. 15  Yoab kɛ ehii lɛ ba* ni amɛbawo lɛ ka yɛ Abel-bet-maaka ni amɛbua sũ naa kɛfee kpoku amɛwo maŋ lɛ he, ejaakɛ atsa sũ ni afee lɛ tamɔ gɔŋ kɛbɔle maŋ lɛ. No sɛɛ lɛ, Yoab hii lɛ bɔi maŋ lɛ gbogbo lɛ shishi tsaa koni amɛtsi amɛgbee shi. 16  Kɛkɛ ni yoo ko ni hiɛ kã shi bo etsɛ kɛjɛ maŋ lɛ mli* akɛ: “Nyɛboa toi, nyɛ hii, nyɛboa toi! Nyɛfainɛ nyɛkɛa Yoab akɛ, ‘Ba biɛ ni mikɛ bo awie.’” 17  No hewɔ lɛ, etsi ebɛŋkɛ yoo lɛ, ni yoo lɛ bi lɛ akɛ: “Bo ji Yoab lɛ?” Ekɛɛ yoo lɛ akɛ: “Hɛɛ, mi ni.” Kɛkɛ ni yoo lɛ kɛɛ lɛ akɛ: “Bo otsulɔ wiemɔi lɛ atoi.” Yoab kɛɛ: “Miibo toi.” 18  Yoo lɛ wie kɛtsa nɔ akɛ: “Blema lɛ, nɔ ni akɛɔ nɔŋŋ ji, ‘Aya Abel ni ayabi,’ ni no akɛgbeɔ sane lɛ naa. 19  Midamɔ Israelbii ni sumɔɔ toiŋjɔlɛ ni yeɔ anɔkwa lɛ anajiaŋ. Ootao okpãtã maŋ ni tamɔ bii anyɛ yɛ Israel lɛ hiɛ. Mɛni hewɔ esa akɛ ofite* Yehowa gboshinii+ lɛ?” 20  Yoab kɛɛ akɛ: “Ebaŋ lɛ nakai kɔkɔɔkɔ akɛ mafite maŋ lɛ ni makpãtã hiɛ. 21  Jeee nakai kwraa ji sane lɛ. Shi moŋ, nuu ko ni atsɛɔ lɛ Sheba,+ ni ji Bikri ni jɛ Efraim gɔji+ lɛ anɔ lɛ binuu lɛ etse Maŋtsɛ David hiɛ atua.* Kɛ́ nyɛjie nuu kome nɛɛ nyɛhã mi lɛ, maje maŋ lɛ he maya.” Kɛkɛ ni yoo lɛ kɛɛ Yoab akɛ: “Naa! Abaafɔ̃ eyitso kɛtsɔ gbogbo lɛ nɔ ahã bo!” 22  Kɛkɛ ni yoo hiɛshikalɔ lɛ tee mɛi lɛ fɛɛ aŋɔɔ amrɔ nɔŋŋ ni amɛfo Sheba, Bikri binuu lɛ yitso ni amɛfɔ̃ amɛhã Yoab. Kɛkɛ ni ekpã tɛtɛrɛmantɛrɛ* lɛ, ni amɛshi maŋ lɛ he, ni mɔ fɛɛ mɔ tee eshĩa;+ ni Yoab ku esɛɛ etee maŋtsɛ lɛ ŋɔɔ yɛ Yerusalem. 23  Agbɛnɛ Yoab ji mɔ ni kwɛɔ Israel asraafoi lɛ fɛɛ anɔ;+ Benaia,+ Yehoiada+ binuu lɛ ji mɔ ni kwɛɔ Keretifoi lɛ kɛ Peletifoi lɛ anɔ.+ 24  Adoram+ ji mɔ ni kwɛɔ mɛi ni anyɛɔ amɛnɔ kɛhã nitsumɔ lɛ anɔ; Yehoshafat,+ Ahilud binuu lɛ ji saji aŋmalalɔ. 25  Sheva ji woloŋmalɔ; Zadok+ kɛ Abiatar+ ji osɔfoi. 26  Ni Ira, Yairnyo lɛ hu batsɔ sɔɔlɔ nukpa* kɛhã David.

Shishigbɛ Niŋmaa

Shishitsɔɔmɔi komɛi kɛɔ akɛ, “aya emama tsũi lɛ amli.”
Hebri sht. ŋm., “akolonto.”
Loo “emaŋtsɛ shĩa.”
Hebri sht. ŋm., “Amɛba.”
Loo “kɛjɛ maŋ lɛ gbogbo lɛ nɔ.”
Hebri sht. ŋm., “omi.”
Hebri sht. ŋm., “ewó enine nɔ eshi Maŋtsɛ David.”
Hebri sht. ŋm., “akolonto.”
Hebri sht. ŋm., “batsɔ osɔfo.”