2 Samuel 17:1-29
17 Kɛkɛ ni Ahitofel kɛɛ Absalom akɛ: “Ofainɛ hã mahala hii 12,000 koni mate shi ni matiu David nyɔɔŋ nɛɛ mli.
2 Mayanina lɛ be ni etɔ lɛ ni ehewalɛ fɛɛ etã,*+ ni mahã ŋmiŋmi amɔ lɛ, ni mɛi fɛɛ ni kɛ lɛ yɔɔ lɛ baajo foi, ni matswa maŋtsɛ lɛ pɛ nɔ.+
3 Ni mikɛ mɛi lɛ fɛɛ baaku sɛɛ kɛba oŋɔɔ. Ja onine eshɛ nuu ni otaoɔ lɛ nɔ dani mɛi lɛ fɛɛ baaku sɛɛ kɛba oŋɔɔ. Kɛkɛ lɛ mɛi lɛ fɛɛ atoiiaŋ baajɔ amɛ.”
4 Nɔ ni ekɛɛ nɛɛ sa Absalom kɛ Israel onukpai lɛ fɛɛ ahiɛ jogbaŋŋ.
5 Shi Absalom kɛɛ akɛ: “Nyɛfainɛ, nyɛtsɛa Hushai,+ Arkinyo lɛ hu kɛbaa, koni wɔbo lɛ hu enaa wiemɔ toi.”
6 No hewɔ lɛ, Hushai ba Absalom ŋɔɔ. Kɛkɛ ni Absalom kɛɛ lɛ akɛ: “Ŋaa ni Ahitofel wo nɛ. Ani wɔkɛ eŋaawoo lɛ atsu nii lo? Kɛjeee nakai lɛ, bo hu kɛɛmɔ wɔ nɔ ni wɔfee.”
7 Kɛkɛ ni Hushai kɛɛ Absalom akɛ: “Ŋaa ni Ahitofel wo nɛɛ ehiii!”+
8 Hushai wie kɛtsa nɔ akɛ: “Bo diɛŋtsɛ ole opapa kɛ ehii lɛ, hii kãkãlɔi ji amɛ,+ ni amɛhiɛ efee laŋlaŋ* tamɔ oshishibrishi ni bii elaaje yɛ ŋa nɔ.+ Agbɛnɛ hu, opapa lɛ, tawulɔ kãkãlɔ ni,+ no hewɔ lɛ, ehiŋ mɛi lɛ ateŋ nyɔɔŋ nɛɛ mli.
9 Amrɔ nɛɛ, be nɛ eyatee yɛ tɛkploi* lɛ eko mli aloo eyatee yɛ he kroko;+ ni kɛ́ lɛ ebatutua wɔ klɛŋklɛŋ lɛ, mɛi ni baanu he lɛ baakɛɛ akɛ, ‘Aye mɛi ni nyiɛ Absalom sɛɛ lɛ nɔ kunim!’
10 Kɛ́ eba lɛ nakai lɛ, no lɛ, mɔ ni yɔɔ ekãa ni tsui tamɔ jata+ tsui lɛ po baashe gbeyei, ejaakɛ Israel fɛɛ le akɛ otsɛ lɛ, nuu kãkãlɔ ni,+ ni hii ni fata ehe lɛ hu ji hii ni yɔɔ ekãa.
11 Ŋaa ni miwoɔ nɛ: Hã abua Israel fɛɛ naa kɛba oŋɔɔ, kɛjɛ Dan kɛyashi Beer-sheba,+ tamɔ ŋshɔnaa shia,+ ni onyiɛ amɛhiɛ kɛya ta lɛ.
12 Wɔkɛ lɛ baayawu yɛ he fɛɛ he ni wɔbaana lɛ yɛ, ni wɔbaayabu enɔ tamɔ bɔ ni bɔ́ nɛɔ shwieɔ shikpɔŋ lɛ; ni amɛteŋ mɔ kome po ejeŋ mli, lɛ jio, hii ni fata ehe lɛ ateŋ mɔ ko jio.
13 Ni kɛ́ ejo foi kɛtee maŋ ko mli hu lɛ, Israel fɛɛ baaŋɔ kpãi kɛya nakai maŋ lɛ nɔ, ni wɔbaagbala maŋ lɛ kɛya jɔɔ lɛ mli aahu kɛyashi be ni anaŋ tɛ bibioo kome po yɛ jɛmɛ.”
14 Kɛkɛ ni Absalom kɛ Israel hii lɛ fɛɛ kɛɛ akɛ: “Ŋaa ni Hushai, Arkinyo lɛ wo lɛ hi+ fe ŋaa ni Ahitofel wo lɛ!” Ejaakɛ Yehowa etswa efai shi* akɛ ebaafite Ahitofel ŋaawoo kpakpa lɛ,+ koni Yehowa akpãtã Absalom hiɛ.+
15 Sɛɛ mli lɛ, Hushai kɛɛ osɔfo Zadok kɛ osɔfo Abiatar+ akɛ: “Nɛkɛ kɛ nɛkɛ ji ŋaa ni Ahitofel wo Absalom kɛ Israel onukpai lɛ, ni nɛkɛ kɛ nɛkɛ ji ŋaa ni mi hu miwo.
16 No hewɔ lɛ, agbɛnɛ nyɛtsua oya ni ayakɛa David ni abɔ lɛ kɔkɔ akɛ: ‘Kaahi hei ni afoɔ faa lɛ yɛ lɛ, yɛ ŋa lɛ nɔ* yɛ nyɔɔŋ nɛɛ mli kɔkɔɔkɔ, shi moŋ bɔ fɛɛ bɔ ni fee lɛ foo faa lɛ, kɛjeee nakai lɛ, abaabɛɛ maŋtsɛ lɛ kɛ mɛi fɛɛ ni fata ehe lɛ ashwie.’”*+
17 No mli lɛ, Yonatan+ kɛ Ahimaaz+ yɛ En-rogel,+ ejaakɛ amɛsumɔɔɔ ni amɛboteɔ maŋ lɛ mli ni mɔ ko naa amɛ; no hewɔ lɛ, tsulɔ yoo ko tee ni eyakɛɛ amɛ ni amɛtee amɛyakɛɛ Maŋtsɛ David.
18 Shi oblanyo ko na amɛ ni eyakɛɛ Absalom. No hewɔ lɛ, amɛyi enyɔ lɛ fɛɛ he fee oya kɛtee nuu ko ni yɔɔ Bahurim+ lɛ shĩa lɛ, nuu lɛ yɛ nubu yɛ eshĩa lɛ kpo lɛ nɔ. No hewɔ lɛ, amɛbote nubu lɛ mli,
19 kɛkɛ ni nuu lɛ ŋa lɛ kɛ nɔ ko baha nubu lɛ nɔ ni ekɛ ŋmaa* ni ashi shwie nɔ; mɔ ko mɔ ko leee.
20 Absalom tsuji lɛ ba yoo lɛ ŋɔɔ yɛ eshĩa lɛ ni amɛbabi lɛ akɛ: “Nɛgbɛ Ahimaaz kɛ Yonatan yɔɔ?” Ni yoo lɛ kɛɛ akɛ: “Amɛbaho kɛtee nu lɛ he gbɛ.”+ Kɛkɛ ni hii lɛ yatao amɛ shi amɛnaaa amɛ, no hewɔ lɛ, amɛku amɛsɛɛ kɛtee Yerusalem.
21 Be ni hii lɛ etee sɛɛ lɛ, amɛje kpo kɛje nubu lɛ mli ni amɛyabɔ Maŋtsɛ David. Amɛkɛɛ lɛ akɛ: “Tee shi ni ofo faa lɛ mramra, ejaakɛ nɛkɛ kɛ nɛkɛ ji ŋaa ni Ahitofel ewo yɛ ohe.”+
22 Amrɔ nɔŋŋ ni David kɛ mɛi ni fata ehe lɛ fɛɛ te shi ni amɛfo Yordan Faa lɛ. Be ni je tsɛreɔ lɛ, no mli lɛ, amɛ fɛɛ amɛfo Yordan Faa lɛ.
23 Be ni Ahitofel na akɛ, akɛ eŋaawoo lɛ tsuuu nii lɛ, ewo teji ko nɔ nii ni etee eshĩa yɛ emaŋ.+ Be ni ekɛ gbɛtsɔɔmɔi ehã eshĩabii lɛ sɛɛ lɛ,+ ewo esɛ̃ kpãa.+ No hewɔ lɛ, egbo ni afu lɛ yɛ etsɛmɛi afuuhe lɛ.
24 Shi David tee Mahanaim,+ ni Absalom kɛ Israel hii lɛ fɛɛ fo Yordan Faa lɛ.
25 Kɛkɛ ni Absalom wó Amasa+ tatsɛ yɛ Yoab+ najiaŋ; nuu ko ni atsɛɔ lɛ Itra Israelnyo lɛ, ni kɛ Abigail,+ Nahash biyoo lɛ ná bɔlɛ lɛ, binuu ji Amasa. Abigail nyɛmi yoo ji Yoab nyɛ, Zeruia.
26 Israel kɛ Absalom babɔ nsara yɛ Gilead+ shikpɔŋ lɛ nɔ.
27 Be ni David bashɛ Mahanaim nɔŋŋ lɛ, Shobi, ni ji Nahash ni jɛ Amonbii lɛ amaŋ Raba+ lɛ binuu lɛ, kɛ Makir,+ ni ji Amiel ni jɛ Lo-debar lɛ binuu lɛ, kɛ Barzilai,+ Gileadnyo ni jɛ Rogelim lɛ
28 kɛ sai, kɛ okpolui, kɛ kukwɛii, kɛ wiiti, kɛ barle,* kɛ ashikishaŋ, kɛ ŋmaa ni ashã,* kɛ akpatramɔi, kɛ akwɛ̃i,* kɛ dumɔwui krokomɛi ni ashĩ,*
29 kɛ wo, kɛ bɔta, kɛ gwantɛŋi, kɛ tsiisi* ba. Amɛkɛ nibii nɛɛ fɛɛ bahã David kɛ mɛi ni fata ehe lɛ koni amɛye,+ ejaakɛ amɛkɛɛ: “Benɛ hɔmɔ miiye mɛi lɛ, ni etɔ amɛ ni kumai hu miiye amɛ yɛ ŋa lɛ nɔ.”+
Shishigbɛ Niŋmaa
^ Loo “ni eniji fɛɛ egbɔjɔ.”
^ Loo “amɛsusuma miijoo.”
^ Loo “bui; jɔi.”
^ Loo “Yehowa efã.”
^ Shishitsɔɔmɔi komɛi kɛɔ akɛ, “Kaahi ŋa lɛ nɔ hei ni egbi lɛ.”
^ Hebri sht. ŋm., “abaami maŋtsɛ lɛ kɛ mɛi fɛɛ ni fata ehe lɛ.”
^ Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
^ Eji wiiti henɔ ko.
^ Loo “ashĩ.”
^ Akwɛ̃i ni awieɔ he yɛ biɛ lɛ ji yɔɔ henɔ ko ni atsɛɔ lɛ yɛ Blɔfo mli akɛ lentil lɛ.
^ Loo “ashã.”
^ Hebri sht. ŋm., “tsina fufɔ; mliki.”