Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Lɛ Yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Mose 5:1-23

EMLI SAJI

  • Mose kɛ Aaron tee Farao hiɛ (1-5)

  • Yiwaa lɛ mli bawa (6-18)

  • Israelbii lɛ shwa Mose kɛ Aaron (19-23)

5  Enɛ sɛɛ lɛ, Mose kɛ Aaron tee Farao ŋɔɔ ni amɛyakɛɛ lɛ akɛ: “Nɔ ni Yehowa, Israel Nyɔŋmɔ lɛ, kɛɛ nɛ, ‘Hã mimaŋ lɛ aya koni amɛyaye gbi jurɔ amɛhã mi yɛ ŋa lɛ nɔ.’”  Shi Farao kɛɛ: “Namɔ ji Yehowa,+ ní mabo egbee toi ní mahã Israel aya?+ Mileee Yehowa ko kwraa, ni agbɛnɛ hu, mihãŋ Israel aya.”+  Shi amɛkɛɛ: “Hebribii lɛ a-Nyɔŋmɔ lɛ kɛ wɔ ewie. Ofainɛ, wɔmiitao wɔfã gbɛ gbii etɛ gbɛnyiɛmɔ kɛya ŋa lɛ nɔ ni wɔyashã afɔle wɔhã Yehowa, wɔ-Nyɔŋmɔ lɛ;+ kɛjeee nakai lɛ, ekɛ hela loo klante baatutua wɔ.”  Ejipt maŋtsɛ lɛ hã amɛ hetoo akɛ: “Mose kɛ Aaron, mɛni hewɔ nyɛtaoɔ ni nyɛhã gbɔmɛi lɛ akpa nitsumɔ ni amɛtsuɔ lɛ? Nyɛkua nyɛsɛɛ nyɛyatsua nyɛnitsumɔ lɛ!”*+  Ni Farao kɛɛ kɛtsa nɔ akɛ: “Kwɛ bɔ ni shikpɔŋ lɛ nɔ bii lɛ ayi efa, ni nyɛmiitao ni amɛjɔɔ amɛhe yɛ amɛnitsumɔ lɛ mli.”  Nakai gbi lɛ nɔ nɔŋŋ lɛ, Farao fã mɛi ni nyɛɔ mɛi anɔ ní amɛtsu nii lɛ kɛ mɛi ni nyiɛɔ nitsulɔi lɛ ahiɛ* lɛ akɛ:  “Nyɛkahãa gbɔmɛi lɛ jwɛi dɔŋŋ ní amɛkɛfolɔ brikii* lɛ.+ Nyɛhãa amɛyaa ní amɛ diɛŋtsɛ amɛyatao jwɛi amɛhã amɛhe.  Shi nyɛhãa amɛfolɔa brikii* abɔ ni amɛfolɔɔ tsutsu lɛ nɔŋŋ. Nyɛkatsea nɔ nyɛhãa amɛ, ejaakɛ amɛmiifee anihao.* No hewɔ ni amɛbolɔɔ akɛ, ‘Wɔmiitao wɔya, wɔmiitao wɔyashã afɔle wɔhã wɔ-Nyɔŋmɔ lɛ!’  Nyɛhãa amɛtsua nii waa fe tsutsu lɛ, ni nyɛhãa amɛtsua nii be fɛɛ be koni amɛkabo amalei atoi.” 10  No hewɔ lɛ, mɛi ni nyɛɔ mɛi anɔ ní amɛtsu nii+ lɛ kɛ mɛi ni nyiɛɔ nitsulɔi lɛ ahiɛ lɛ tee amɛyakɛɛ gbɔmɛi lɛ akɛ: “Nɔ ni Farao kɛɛ nɛ, ‘Mihãŋ nyɛ jwɛi dɔŋŋ. 11  Nyɛ diɛŋtsɛ nyɛyaa nyɛyataoa jwɛi nyɛhãa nyɛhe yɛ he fɛɛ he ni nyɛbaaná eko yɛ, shi atseŋ nyɛnitsumɔ lɛ nɔ ahãŋ nyɛ kɔkɔɔkɔ.’” 12  Kɛkɛ ni gbɔmɛi lɛ gbɛ shwã Ejipt shikpɔŋ lɛ nɔ fɛɛ koni amɛyabua ŋmaa* tsei anaa kɛfee jwɛi. 13  Ni mɛi ni nyɛɔ mɛi anɔ ní amɛtsu nii lɛ tee nɔ amɛkɛɛ amɛ akɛ: “Esa akɛ nyɛteŋ mɔ fɛɛ mɔ agbe enitsumɔ naa gbi fɛɛ gbi, tamɔ be ni ahãa nyɛ jwɛi lɛ nɔŋŋ.” 14  Agbɛnɛ hu, ayi mɛi ni nyiɛɔ Israelbii lɛ ahiɛ yɛ nitsumɔ lɛ mli,+ ni ji mɛi ni Farao webii ni nyɛɔ mɛi anɔ ní amɛtsu nii lɛ ehala eto Israelbii lɛ anɔ lɛ. Amɛbi amɛ akɛ: “Mɛni hewɔ nyɛnyɛɛɛ nyɛfolɔ brikii* abɔ ni nyɛfolɔɔ tsutsu lɛ? Nyɛ kɛ ŋmɛnɛ fɛɛ lɛ, nakai eba lɛ.” 15  No hewɔ lɛ, mɛi ni nyiɛɔ Israelbii lɛ ahiɛ yɛ nitsumɔ lɛ mli lɛ tee Farao ŋɔɔ amɛkɛ lɛ yawie akɛ: “Mɛni hewɔ okɛ otsuji yeɔ yɛ nɛkɛ gbɛ nɔ? 16  Ahãaa otsuji jwɛi, kɛ̃lɛ amɛmiikɛɛ wɔ akɛ, ‘Nyɛfolɔa brikii!’* Aayi otsuji, shi tɔmɔ lɛ jɛ bo diɛŋtsɛ omaŋbii lɛ.” 17  Shi ekɛɛ: “Nyɛmiifee anihao,* nyɛmiifee anihao!*+ No hewɔ ni nyɛkɛɔ akɛ, ‘Wɔmiitao wɔya, wɔmiitao wɔyashã afɔle wɔhã Yehowa’ lɛ.+ 18  No hewɔ lɛ, agbɛnɛ nyɛyaa nyɛyatsua nii! Ahãŋ nyɛ jwɛi, shi kɛ̃lɛ nyɛfolɔa brikii* abɔ ni nyɛfolɔɔ lɛ nɔŋŋ.” 19  Kɛkɛ ni mɛi ni nyiɛɔ Israelbii lɛ ahiɛ yɛ nitsumɔ lɛ mli lɛ na akɛ amɛyɛ haomɔ kpele mli yɛ famɔ ni akɛhã akɛ: “Nyɛkatsea brikii* abɔ ni nyɛfolɔɔ daa gbi lɛ nɔ kɔkɔɔkɔ” lɛ hewɔ. 20  No sɛɛ lɛ, amɛkɛ Mose kɛ Aaron, ní no mli lɛ amɛdamɔ jɛmɛ amɛmiimɛ amɛ be ni amɛje kpo kɛjɛ Farao ŋɔɔ lɛ yakpe. 21  Amrɔ lɛ, amɛkɛɛ amɛ akɛ: “Yehowa akwɛ nyɛ ni ekojo, ejaakɛ nyɛhã wɔhe eje fu ewo Farao kɛ etsuji lɛ, ni nyɛkɛ klante ewo amɛdɛŋ koni amɛgbe wɔ.”+ 22  Kɛkɛ ni Mose tsɔ ehe ehã Yehowa ni ekɛɛ: “Yehowa, mɛni hewɔ ohã gbɔmɛi nɛɛ naa amanehulu nɛkɛ? Mɛni hewɔ otsu mi lɛ? 23  Kɛjɛ be ni mitee Farao hiɛ mikɛ lɛ yawie yɛ ogbɛ́i mli nɛɛ,+ efee gbɔmɛi nɛɛ efɔŋ fe tsutsu lɛ,+ ni ojieko omaŋ lɛ hu.”+

Shishigbɛ Niŋmaa

Loo “Nyɛkua nyɛsɛɛ kɛyaa nyɛjatsui lɛ ahe.”
Ahala mɛi ni nyiɛɔ hiɛ yɛ nitsumɔ lɛ mli nɛɛ kɛjɛ Israelbii lɛ ateŋ.
Loo “ntayai.”
Loo “ntayai.”
Loo “amɛmiijɔɔ amɛhe.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “ntayai.”
Loo “ntayai.”
Loo “nyɛmiijɔɔ nyɛhe.”
Loo “nyɛmiijɔɔ nyɛhe.”
Loo “ntayai.”
Loo “ntayai.”