2 Mose 40:1-38

  • Ashĩ sɔlemɔ buu lɛ ama shi (1-33)

  • Yehowa anunyam lɛ yi sɔlemɔ buu lɛ obɔ (34-38)

40  Ni Yehowa kɛɛ Mose akɛ:  “Klɛŋklɛŋ nyɔɔŋ lɛ nɔ klɛŋklɛŋ gbi lɛ nɔ lɛ, shĩi sɔlemɔ buu lɛ, ni ji kpee buu lɛ oma shi.+  Okɛ Odaseyeli adeka lɛ ama mli,+ ní okɛ pateeshɛŋ+ lɛ atsĩ Adeka lɛ hiɛ.  Okɛ okpɔlɔ+ lɛ ayama mli, ní oto enibii lɛ yɛ nɔ, ní okɛ kanetso+ lɛ ayama mli, ní osu ekanei lɛ.+  No sɛɛ lɛ, okɛ shika tsuru tsofa-kɛ-ŋma afɔleshaa latɛ+ lɛ ama Odaseyeli adeka lɛ hiɛ, ní okɛ sɔlemɔ buu lɛ shinaa lɛ naa pateeshɛŋ lɛ awo naa.+  “Okɛ shãa afɔle afɔleshaa latɛ+ lɛ ama sɔlemɔ buu lɛ, ni ji kpee buu lɛ, shinaa lɛ naa,  ní okɛ okpolu lɛ ama kpee buu lɛ kɛ afɔleshaa latɛ lɛ teŋ, ní okɛ nu awo mli.+  No sɛɛ lɛ, feemɔ kpo+ lɛ kɛbɔle sɔlemɔ buu lɛ he, ní okɛ kpo lɛ shinaa lɛ naa pateeshɛŋ+ lɛ awo naa.  Enɛ sɛɛ lɛ, ŋɔɔ mufɔɔ mu+ lɛ ni okɛfɔ sɔlemɔ buu lɛ kɛ emli nibii lɛ fɛɛ mu,+ ní ofee sɔlemɔ buu lɛ kɛ emli nibii lɛ fɛɛ krɔŋkrɔŋ, koni efee nɔ krɔŋkrɔŋ. 10  Fɔɔ shãa afɔle afɔleshaa latɛ lɛ kɛ ehe nibii lɛ fɛɛ mu, ní ofee afɔleshaa latɛ lɛ krɔŋkrɔŋ, koni etsɔ afɔleshaa latɛ ni yɔɔ krɔŋkrɔŋ fe fɛɛ.+ 11  Ní ofɔ okpolu lɛ kɛ enɔmaanɔ lɛ mu, ní ofee lɛ krɔŋkrɔŋ. 12  “No sɛɛ lɛ, hã Aaron kɛ ebihii lɛ aba kpee buu lɛ shinaa lɛ naa, ní okɛ nu afɔflɔ amɛhe.+ 13  Ní okɛ atadei krɔŋkrɔŋi+ lɛ awo Aaron, ní ofɔ lɛ mu+ ni ofee lɛ krɔŋkrɔŋ, koni esɔmɔ akɛ osɔfo ehã mi. 14  No sɛɛ lɛ, hã ebihii lɛ aba, ní okɛ atadei kakadaji awo amɛ.+ 15  Fɔɔ amɛ mu tamɔ bɔ ni ofɔ amɛtsɛ mu lɛ nɔŋŋ,+ koni amɛsɔmɔ akɛ osɔfoi amɛhã mi, ni amɛmufɔɔ nɛɛ hewɔ lɛ, osɔfoyeli lɛ baatsɔ amɛnɔ daa yɛ amɛyinɔi lɛ amli.”+ 16  Mose fee bɔ ni Yehowa fã lɛ lɛ fɛɛ.+ Nakai pɛpɛɛpɛ efee. 17  Afi ni ji enyɔ lɛ mli klɛŋklɛŋ nyɔɔŋ lɛ nɔ klɛŋklɛŋ gbi lɛ nɔ lɛ, ashĩ sɔlemɔ buu lɛ ama shi.+ 18  Be ni Mose shĩɔ sɔlemɔ buu lɛ emaa shi lɛ, ekɛ enɔdaamɔnii ni fɔji yɔɔ mli+ lɛ shwie shi, ekɛ mplaŋi+ lɛ mamɔ nɔ, ekɛ emlibelemɔnii+ lɛ hɔlɔ mli, ni ekɛ ekulashiŋi lɛ mamɔ shi. 19  Elɛɛ mama lɛ mli+ eha sɔlemɔ buu lɛ nɔ, ni ekɛ mama lɛ nɔhaanɔ+ lɛ ha nɔ, tamɔ bɔ ni Yehowa fã Mose lɛ pɛpɛɛpɛ. 20  No sɛɛ lɛ, eŋɔ Odaseyelinɔ+ lɛ, ni ekɛwo Adeka+ lɛ mli, ni ekɛ tsei+ lɛ hɔlɔ Adeka lɛ he, ni ekɛ naanɔ+ lɛ bu Adeka lɛ naa.+ 21  Ekɛ Adeka lɛ ba sɔlemɔ buu lɛ mli, ni ekɛ pateeshɛŋ+ ni akɛtsĩɔ nii hiɛ lɛ tsĩ Odaseyeli adeka+ lɛ hiɛ, tamɔ bɔ ni Yehowa fã Mose lɛ pɛpɛɛpɛ. 22  No sɛɛ lɛ, ekɛ okpɔlɔ+ lɛ ma kpee buu lɛ mli, yɛ sɔlemɔ buu lɛ kooyigbɛ yɛ pateeshɛŋ lɛ hiɛgbɛ, 23  ni eto blodoi+ lɛ bɔ ni eko kã eko nɔ emamɔ okpɔlɔ lɛ nɔ yɛ Yehowa hiɛ, tamɔ bɔ ni Yehowa fã Mose lɛ pɛpɛɛpɛ. 24  Ekɛ kanetso+ lɛ ma kpee buu lɛ mli yɛ okpɔlɔ lɛ hiɛ, yɛ sɔlemɔ buu lɛ wuoyigbɛ. 25  Esu kanei+ lɛ yɛ Yehowa hiɛ, tamɔ bɔ ni Yehowa fã Mose lɛ pɛpɛɛpɛ. 26  No sɛɛ lɛ, ekɛ shika tsuru tsofa-kɛ-ŋma afɔleshaa latɛ+ lɛ ma kpee buu lɛ mli yɛ pateeshɛŋ lɛ hiɛ, 27  bɔ ni afee ni ashã tsofa-kɛ-ŋma+ yɛ nɔ,+ tamɔ bɔ ni Yehowa fã Mose lɛ pɛpɛɛpɛ. 28  Ni ekɛ sɔlemɔ buu lɛ shinaa lɛ naa pateeshɛŋ+ lɛ wo naa. 29  Ekɛ shãa afɔle afɔleshaa latɛ+ lɛ ma sɔlemɔ buu lɛ, ni ji kpee buu lɛ, shinaa lɛ naa, koni eshã shãa afɔle+ kɛ ŋmaa* afɔle yɛ nɔ, tamɔ bɔ ni Yehowa fã Mose lɛ pɛpɛɛpɛ. 30  No sɛɛ lɛ, ekɛ okpolu lɛ ma kpee buu lɛ kɛ afɔleshaa latɛ lɛ teŋ, ni ekɛ nu wo mli koni akɛfɔflɔ niji kɛ naji ahe.+ 31  Mose kɛ Aaron kɛ Aaron bihii lɛ kɛfɔflɔɔ amɛniji kɛ amɛnaji ahe. 32  Be fɛɛ be ni amɛbaaya kpee buu lɛ mli loo amɛbaabɛŋkɛ afɔleshaa latɛ lɛ, amɛfɔflɔɔ,+ tamɔ bɔ ni Yehowa fã Mose lɛ pɛpɛɛpɛ. 33  Naagbee lɛ, efee kpo+ lɛ ewo sɔlemɔ buu lɛ kɛ afɔleshaa latɛ lɛ he kɛkpe, ni ekɛ sɔlemɔ buu lɛ shinaa lɛ naa pateeshɛŋ lɛ wo naa.+ No hewɔ lɛ, Mose gbe nitsumɔ lɛ naa. 34  Ni atatu lɛ baha kpee buu lɛ nɔ, ni Yehowa anunyam lɛ yi sɔlemɔ buu lɛ obɔ.+ 35  Mose nyɛɛɛ kpee buu lɛ mli ebote, ejaakɛ atatu lɛ tee nɔ ehi kpee buu lɛ nɔ, ni Yehowa anunyam lɛ yi sɔlemɔ buu lɛ obɔ.+ 36  Ni Israelbii lɛ agbɛfãi lɛ fɛɛ amli lɛ, kɛ́ atatu lɛ wó ehe nɔ yɛ sɔlemɔ buu lɛ nɔ lɛ, amɛfãa kɛyaa he kroko.+ 37  Shi kɛ́ atatu lɛ wóoo ehe nɔ lɛ, no lɛ, amɛfãaa kɛyashi gbi nɔ ni ebaawó ehe nɔ.+ 38  Ejaakɛ Israelbii lɛ agbɛfãi lɛ fɛɛ amli lɛ, Yehowa atatu lɛ hiɔ sɔlemɔ buu lɛ nɔ jetsɛremɔ fɛɛ, ni gbɛkɛ mli lɛ la hiɔ nɔ, ni Israelbii lɛ fɛɛ naa.+

Shishigbɛ Niŋmaa

Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.