2 Mose 38:1-31

  • Shãa afɔle afɔleshaa latɛ lɛ (1-7)

  • Akɔɔble okpolu lɛ (8)

  • Kpo lɛ (9-20)

  • Nibii ni akɛma sɔlemɔ buu lɛ (21-31)

38  Ekɛ akasia tso fee shãa afɔle afɔleshaa latɛ lɛ. Ekoji lɛ fɛɛ yeɔ egbɔ, ekɛlɛ ji ninetalɔi* enumɔ, elɛɛmɔ ji ninetalɔi enumɔ, ni ekwɔlɛ ji ninetalɔi etɛ.+  Ni efee ekolontoi lɛ emamɔ ekoji ejwɛ lɛ anɔ. Latɛ lɛ kɛ ekolontoi lɛ fɛɛ lɛ, nɔ muu kome ni. No sɛɛ lɛ, ekɛ akɔɔble ha he.+  Enɛ sɛɛ lɛ, efee afɔleshaa latɛ lɛ he nibii lɛ fɛɛ, gogai lɛ kɛ sofii lɛ kɛ tsɛnsii lɛ kɛ fakai lɛ kɛ lajeenii lɛ. Afɔleshaa latɛ lɛ he nibii lɛ fɛɛ lɛ, akɔɔble ekɛfee.  Agbɛnɛ hu, efee looshãa dade, ni ji akɔɔble ntaŋ kɛhã afɔleshaa latɛ lɛ yɛ nɔ ni akɛbã naa lɛ shishigbɛ kɛmiibɛŋkɛ afɔleshaa latɛ lɛ teŋgbɛ.  Efee gai ejwɛ ewo ekoji ejwɛ lɛ kɛmiibɛŋkɛ akɔɔble looshãa dade lɛ he, koni akɛ tsei lɛ ahɔlɔ mli.  No sɛɛ lɛ, egbɔ akasia tsei lɛ, ni ekɛ akɔɔble ha he.  Ekɛ tsei lɛ hɔlɔ gai ni yɔɔ adeka lɛ koŋ biɛ kɛ biɛ lɛ amli koni akɛwó. Ekɛ ŋmoŋmolo fee afɔleshaa latɛ lɛ tamɔ adeka ni gbɛ kã mli.  Ni ekɛ akɔɔble fee okpolu+ lɛ kɛ ekɔɔble nɔmaanɔ lɛ; ekɛ yei ni ato amɛhe gbɛjianɔ ní amɛsɔmɔ yɛ kpee buu lɛ shinaa lɛ naa lɛ ashwishwɛi* lɛ ni fee.  No sɛɛ lɛ, efee kpo lɛ.+ Kpo lɛ he ni ye wuoyigbɛ, he ni kwɛɔ wuoyigbɛ lɛ, ekɛ klala ni alo lɛ jogbaŋŋ ninetalɔi 100 fee pateeshɛŋi kɛtsotsoro jɛmɛ.+ 10  Akulashiŋi 20 kɛ akɔɔble nɔdaamɔnii 20 ni fɔji yɔɔ mli yɛ jɛmɛ, ni akulashiŋi lɛ ahe kpoji lɛ kɛ amɛmlibɛlɛmɔnii* lɛ, jwiɛtɛi akɛfee. 11  Agbɛnɛ hu, he ni ye kooyigbɛ lɛ, pateeshɛŋ ninetalɔi 100 tsotsoro jɛmɛ. Amɛkulashiŋi 20 lɛ kɛ amɛnɔdaamɔnii 20 ni fɔji yɔɔ mli lɛ, akɔɔble akɛfee. Akulashiŋi lɛ ahe kpoji lɛ kɛ amɛmlibɛlɛmɔnii* lɛ, jwiɛtɛi akɛfee. 12  Shi he ni ye anaigbɛ lɛ, pateeshɛŋi ni tsotsoro jɛmɛ lɛ, ninetalɔi 50 ni. Akulashiŋi nyɔŋma kɛ nɔdaamɔnii nyɔŋma ni fɔji yɔɔ mli yɛ jɛmɛ, ni akulashiŋi lɛ ahe kpoji lɛ kɛ amɛmlibɛlɛmɔnii* lɛ, jwiɛtɛi akɛfee. 13  He ni ye bokãgbɛ, ni ji he ni ye kɛmiiya hulushiteehe lɛ lɛɛmɔ ji ninetalɔi 50. 14  Pateeshɛŋi ninetalɔi 15 tsotsoro kpo lɛ he agbó lɛ afã kome, ni akulashiŋi etɛ kɛ nɔdaamɔnii etɛ ni fɔji yɔɔ mli yɛ jɛmɛ. 15  Ni kpo lɛ he agbó lɛ afã kroko lɛ hu lɛ, pateeshɛŋi ninetalɔi 15 tsotsoro jɛmɛ, ni akulashiŋi etɛ kɛ nɔdaamɔnii etɛ ni fɔji yɔɔ mli yɛ jɛmɛ. 16  Klala ni alo lɛ jogbaŋŋ akɛfee pateeshɛŋi fɛɛ ni tsotsoro kpo lɛ he kɛkpe lɛ. 17  Akulashiŋi lɛ anɔdaamɔnii ni fɔji yɔɔ mli lɛ, akɔɔble akɛfee; akulashiŋi lɛ ahe kpoji lɛ kɛ amɛmlibɛlɛmɔnii* lɛ, jwiɛtɛi akɛfee; akɛ jwiɛtɛi ha akulashiŋi lɛ ayiteŋ, ni kpo lɛ he akulashiŋi lɛ fɛɛ yɛ jwiɛtɛi mlibɛlɛmɔnii.+ 18  Akɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ lo pateeshɛŋ ni akɛtsĩɔ kpo lɛ shinaa lɛ naa lɛ. Ekɛlɛ ji ninetalɔi 20, ni ekwɔlɛ ji ninetalɔi 5, ekɛ kpo lɛ he pateeshɛŋi ni tsotsoro shi lɛ fɛɛ hiɛ kwɔlɛ kome.+ 19  Amɛkulashiŋi ejwɛ kɛ amɛnɔdaamɔnii ejwɛ ni fɔji yɔɔ mli lɛ, akɔɔble akɛfee. Amɛhe kpoji kɛ amɛmlibɛlɛmɔnii* lɛ, jwiɛtɛi akɛfee, ni akulashiŋi lɛ ayiteŋ lɛ, akɛ jwiɛtɛi eha amɛhe. 20  Sɔlemɔ buu lɛ dadei kɛ amɛnaa piɔpiɔi* lɛ, kɛ kpo lɛ he dadei kɛ amɛnaa piɔpiɔi lɛ fɛɛ lɛ, akɔɔble akɛfee.+ 21  Nibii ni nyiɛ sɛɛ nɛɛ ji nibii ni akɛma sɔlemɔ buu lɛ, ni ji Odaseyeli sɔlemɔ buu lɛ,+ ni Mose fã Levibii ni tsuɔ nii yɛ osɔfo Aaron binuu Itamar+ shishi lɛ akɛ amɛbu nibii nɛɛ anaa;+ amɛ amɛnitsumɔ ni. 22  Bezalel,+ Hur binuu Uri binuu lɛ ni jɛ Yuda weku lɛ mli lɛ fee nibii fɛɛ ni Yehowa fã Mose lɛ. 23  Mɔ ni fata ehe ji, Oholiab,+ Ahisamak binuu lɛ ni jɛ Dan weku lɛ mli lɛ, mɔ ni ji ŋaalɔ ni le bɔ ni aloɔ nii awoɔ mama mli, ni agbɛnɛ hu, enyɛɔ ekɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa loɔ nii lɛ. 24  Shika tsuru fɛɛ ni akɛtsu he krɔŋkrɔŋ lɛ he nitsumɔ lɛ fɛɛ lɛ ji shika tsuru ni akɛhã akɛ fɔ̃ɔ afɔle lɛ,+ ni fɛɛ feɔ talɛntai* 29 kɛ shekeli* 730 yɛ shekel ni akɛtsuɔ nii yɛ he krɔŋkrɔŋ lɛ naa.* 25  Ni jwiɛtɛi ni maŋbii ni aŋmala amɛgbɛ́ii lɛ kɛba ji, talɛntai 100 kɛ shekeli 1,775 yɛ shekel ni akɛtsuɔ nii yɛ he krɔŋkrɔŋ lɛ naa.* 26  Mɔ fɛɛ mɔ ni eye kɛjɛ afii 20 kɛyaa ni aŋma egbɛ́i lɛ kɛ shekel fã ba,+ yɛ shekel ni akɛtsuɔ nii yɛ he krɔŋkrɔŋ lɛ naa,* ni mɛi* nɛɛ fɛɛ ayifalɛ ji 603,550.+ 27  He krɔŋkrɔŋ lɛ he nɔdaamɔnii ni fɔji yɔɔ mli, kɛ pateeshɛŋ* lɛ he nɔdaamɔnii ni fɔji yɔɔ mli lɛ fɛɛ feɔ talɛntai 100; nɔdaamɔnii 100 ni fɔji yɔɔ mli lɛ feɔ talɛntai 100, ni tsɔɔ akɛ, nɔdaamɔnɔ fɛɛ nɔdaamɔnɔ ni fɔlɔ yɔɔ mli lɛ, akɛ talɛnta kome fee.+ 28  Ejɛ jwiɛtɛi shekeli 1,775 lɛ mli efee akulashiŋi lɛ ahe kpoji lɛ, ni eha akulashiŋi lɛ ayiteŋ, ni ekɛ fɛɛ tsara. 29  Akɔɔble ni akɛbake* lɛ ji talɛntai 70 kɛ shekeli 2,400. 30  Enɛ ekɛfee kpee buu lɛ shinaa lɛ naa nɔdaamɔnii ni fɔji yɔɔ mli lɛ, akɔɔble afɔleshaa latɛ lɛ kɛ emli akɔɔble looshãa dade lɛ, afɔleshaa latɛ lɛ he nibii lɛ fɛɛ, 31  kpo lɛ he nɔdaamɔnii ni fɔji yɔɔ mli lɛ, nɔdaamɔnii ni fɔji yɔɔ mli ni yɔɔ kpo lɛ shinaa lɛ naa lɛ, kɛ agbɛnɛ hu, sɔlemɔ buu lɛ dadei kɛ amɛnaa piɔpiɔi* lɛ fɛɛ kɛ dadei kɛ amɛnaa piɔpiɔi lɛ fɛɛ+ ni yɔɔ kpo lɛ he kɛkpe lɛ.

Shishigbɛ Niŋmaa

Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
Ni ji, dade ashwishwɛi ni asha hiɛ jogbaŋŋ.
Loo “gai srɔtoi” ni akɛbɛlɛɔ nii amli.
Loo “gai srɔtoi” ni akɛbɛlɛɔ nii amli.
Loo “gai srɔtoi” ni akɛbɛlɛɔ nii amli.
Loo “gai srɔtoi” ni akɛbɛlɛɔ nii amli.
Blɔfo mli lɛ, “pɛpol.”
Loo “gai srɔtoi” ni akɛbɛlɛɔ nii amli.
Loo “shiŋmlii.” Shiŋmli ji dade loo tso kɛ enaa piɔpiɔ ni akaa awoɔ shikpɔŋ.
Blɔfo mli lɛ, “pɛpol.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Shekel kome feɔ gram 11.4 (oz t 0.367). Kwɛmɔ Saji Krokomɛi B14 lɛ.
Loo “yɛ shekel krɔŋkrɔŋ lɛ naa.”
Loo “yɛ shekel krɔŋkrɔŋ lɛ naa.”
Loo “yɛ shekel krɔŋkrɔŋ lɛ naa.”
Loo “hii.”
Ni ji, pateeshɛŋ ni yɔɔ He Krɔŋkrɔŋ Fe Fɛɛ lɛ hiɛ lɛ.
Loo “akɛbahã akɛ fɔ̃ɔ afɔle.”
Loo “shiŋmlii.” Shiŋmli ji dade loo tso kɛ enaa piɔpiɔ ni akaa awoɔ shikpɔŋ.