2 Mose 37:1-29
37 No sɛɛ lɛ, Bezalel+ kɛ akasia tso kpɛ Adeka+ lɛ. Ekɛlɛ ji ninetalɔi* enyɔ kɛ fã, elɛɛmɔ ji ninetalɔ kome kɛ fã, ni ekwɔlɛ ji ninetalɔ kome kɛ fã.+
2 Ekɛ shika tsuru krɔŋŋ ha emli kɛ ehe fɛɛ kɛkpe, ni ekɛ shika tsuru ye sãma kɛbã naa kɛkpe.+
3 No sɛɛ lɛ, ekɛ shika tsuru fee gai ejwɛ ewo he yɛ enaji ejwɛ lɛ ayiteŋgbɛ, gai enyɔ yɛ afã kome, ni gai enyɔ hu yɛ afã kroko lɛ.
4 No sɛɛ lɛ, egbɔ akasia tsei, ni ekɛ shika tsuru ha he.+
5 Ni ekɛ tsei lɛ hɔlɔ gai ni yɔɔ Adeka lɛ koŋ biɛ kɛ biɛ lɛ amli, koni akɛwó Adeka lɛ.+
6 Ekɛ shika tsuru krɔŋŋ fee adeka lɛ naanɔ lɛ.+ Ekɛlɛ ji ninetalɔi enyɔ kɛ fã, ni elɛɛmɔ ji ninetalɔ kome kɛ fã.+
7 Kɛkɛ ni ekɛ hamlɛ tswia shika tsuru kɛfee kerubim+ enyɔ yɛ naanɔ+ lɛ nɔ, yɛ naagbeehei enyɔ lɛ fɛɛ.
8 Kerub kome yɛ naagbeehe kome, ni kerub kroko lɛ yɛ naagbeehe kroko lɛ. Efee kerubim lɛ yɛ naanɔ lɛ nɔ, yɛ naagbeehei enyɔ lɛ fɛɛ.
9 Kerubim enyɔ lɛ egbɛ amɛfijiaŋ kɛtee ŋwɛigbɛ, ni amɛfiji lɛ eha naanɔ lɛ nɔ.+ Kerub kome hiɛ miikwɛ ekroko lɛ hiɛ, ni amɛmamɔ amɛhiɛiaŋ shi kɛmiikwɛ naanɔ lɛ nɔ.+
10 Agbɛnɛ, ekɛ akasia tso kpɛ okpɔlɔ lɛ.+ Ekɛlɛ ji ninetalɔi enyɔ, elɛɛmɔ ji ninetalɔ kome, ni ekwɔlɛ ji ninetalɔ kome kɛ fã.+
11 Ni ekɛ shika tsuru krɔŋŋ ha he, ni ekɛ shika tsuru ye sãma kɛbã naa kɛkpe.
12 No sɛɛ lɛ, egbɔ tso fɛtɛfɛtɛ ní lɛɛmɔ ji dɛ̃ lɛɛmɔ* kome kɛbã okpɔlɔ lɛ naa kɛkpe, ni ekɛ shika tsuru ye sãma kɛbã tso fɛtɛfɛtɛ lɛ naa kɛkpe.
13 Enɛ sɛɛ lɛ, ekɛ shika tsuru fee gai ejwɛ ewo okpɔlɔ lɛ he, ekɛ gai lɛ wo okpɔlɔ lɛ koji ejwɛ lɛ, he ni naji ejwɛ lɛ yɔɔ lɛ.
14 Gai lɛ bɛŋkɛ tso fɛtɛfɛtɛ lɛ, ni nomɛi amli akɛ tsei ni akɛbaawó okpɔlɔ lɛ baahɔlɔ.
15 Ni egbɔ akasia tsei lɛ ní akɛbaawó okpɔlɔ lɛ, ni ekɛ shika tsuru ha he.
16 No sɛɛ lɛ, ekɛ shika tsuru krɔŋŋ fee nibii kɛhã okpɔlɔ lɛ—ekãi lɛ, ekɔɔpoi lɛ, kɛ etsɛnsii kɛ ekɔɔpoi wuji ni akɛfɔseɔ dãa afɔlei lɛ.+
17 Ni ekɛ shika tsuru krɔŋŋ fee kanetso+ lɛ. Ekɛ hamlɛ tswia shika tsuru lɛ kɛfee kanetso lɛ. Eshishi lɛ kɛ eteŋtso lɛ kɛ ekɔɔpoi lɛ kɛ ekpɔbii lɛ kɛ efɔfɔii lɛ fɛɛ feɔ kanetso muu lɛ.+
18 Kanetso lɛ teŋtso lɛ egbála niji ekpaa, niji etɛ yɛ afã kome, ni niji etɛ hu yɛ afã kroko lɛ.
19 Kɔɔpoi etɛ ni afee lɛ tamɔ almond fɔfɔii yɛ niji ni yɔɔ afã kome lɛ eko fɛɛ eko he, ni kpɔbii kɛ fɔfɔii hu yɛ amɛhe bɔ ni kɛ́ kpɔ ba lɛ, kɛkɛ lɛ fɔfɔi eba; ni kɔɔpoi etɛ ni afee lɛ tamɔ almond fɔfɔii yɛ niji ni yɔɔ afã kroko lɛ hu eko fɛɛ eko he, ni kpɔbii kɛ fɔfɔii hu yɛ amɛhe bɔ ni kɛ́ kpɔ ba lɛ, kɛkɛ lɛ fɔfɔi eba. Nɛkɛ ji bɔ ni afee yɛ niji ekpaa lɛ ni kanetso lɛ teŋtso lɛ egbála lɛ fɛɛ ahe.
20 Ni kɔɔpoi ejwɛ ni afee lɛ tamɔ almond fɔfɔii yɛ kanetso lɛ teŋtso lɛ he, ni kpɔbii kɛ fɔfɔii hu yɛ he bɔ ni kɛ́ kpɔ ba lɛ, kɛkɛ lɛ fɔfɔi eba.
21 Kpɔ yɛ klɛŋklɛŋ niji enyɔ ni teŋtso lɛ egbála yɛ biɛ kɛ biɛ lɛ ashishi, ni kpɔ yɛ niji enyɔ ni nyiɛ sɛɛ lɛ ashishi, ni kpɔ yɛ niji enyɔ kroko ni nyiɛ sɛɛ lɛ hu ashishi, nakai eyɔɔ yɛ niji ekpaa lɛ ni kanetso lɛ teŋtso lɛ egbála lɛ fɛɛ ashishi.
22 Akɛ hamlɛ tswia shika tsuru krɔŋŋ kɛfee kpɔbii lɛ kɛ niji lɛ kɛ kanetso muu lɛ fɛɛ, ni etsɔ nɔ muu kome.
23 Ni ekɛ shika tsuru krɔŋŋ fee ekanei kpawo+ lɛ kɛ enibɛɛnii* lɛ kɛ elajeenii lɛ.
24 Shika tsuru krɔŋŋ talɛnta* kome ekɛfee kanetso lɛ kɛ ehe nibii lɛ fɛɛ.
25 Agbɛnɛ, ekɛ akasia tso fee tsofa-kɛ-ŋma+ afɔleshaa latɛ lɛ. Efee lɛ koji ejwɛ ní fɛɛ yeɔ egbɔ, ekɛlɛ ji ninetalɔ kome, elɛɛmɔ ji ninetalɔ kome, ni ekwɔlɛ ji ninetalɔi enyɔ. Ekolontoi lɛ mamɔ nɔ, ni fɛɛ lɛ, nɔ muu kome ni.+
26 Ekɛ shika tsuru krɔŋŋ ha he, enɔ kɛ ehe fɛɛ kɛkpe kɛ ekolontoi lɛ ahe, ni ekɛ shika tsuru ye sãma kɛbã naa kɛkpe.
27 Ekɛ shika tsuru fee gai enyɔ ewo he yɛ nɔ ni akɛbã naa lɛ shishigbɛ, yɛ ekoŋ biɛ kɛ biɛ, koni akɛ tsei ní akɛbaawó lɛ ahɔlɔ mli.
28 No sɛɛ lɛ, egbɔ akasia tsei lɛ, ni ekɛ shika tsuru ha he.
29 Agbɛnɛ hu, efee mufɔɔ mu krɔŋkrɔŋ lɛ,+ kɛ tsofa-kɛ-ŋma krɔŋŋ lɛ,+ afutu lɛ jogbaŋŋ.*
Shishigbɛ Niŋmaa
^ Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
^ Aaafee sɛntimitai 7.4 (iŋtsii 2.9). Kwɛmɔ Saji Krokomɛi B14 lɛ.
^ Loo “ebɛɛlei.”
^ Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
^ Loo “tamɔ nɔ ni mufeelɔ ko fee.”
