2 Mose 35:1-35

  • Hejɔɔmɔ Gbi lɛ he gbɛtsɔɔmɔi (1-3)

  • Oniai ni atsu kɛhã sɔlemɔ buu lɛ maa (4-29)

  • Bezalel kɛ Oholiab yimɔ obɔbɔ kɛ mumɔ lɛ (30-35)

35  Sɛɛ mli lɛ, Mose bua Israelbii lɛ fɛɛ naa kɛkpe ni ekɛɛ amɛ akɛ: “Nibii ni Yehowa efã akɛ afee nɛ:+  Gbii ekpaa akɛtsu nii, shi gbi ni ji kpawo lɛ atsɔ gbi krɔŋkrɔŋ ahã nyɛ, eji hejɔɔmɔ gbi ní nyɛkɛbaajɔɔ nyɛhe kwraa nyɛhã Yehowa.+ Mɔ fɛɛ mɔ ni baatsu nii yɛ nakai gbi lɛ nɔ lɛ, abaagbe lɛ.+  Nyɛkashɛrea la yɛ nyɛshihilɛhei lɛ eko eko mli yɛ Hejɔɔmɔ Gbi lɛ nɔ.”  Ni Mose kɛɛ Israelbii lɛ fɛɛ akɛ: “Nɔ ni Yehowa efã nɛ,  ‘Nyɛtsua onia yɛ nyɛteŋ nyɛhãa Yehowa.+ Mɔ fɛɛ mɔ ni yɔɔ he tsuijurɔ lɛ,+ ekɛ onia abahã Yehowa: shika tsuru kɛ jwiɛtɛi kɛ akɔɔble  kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa kɛ abotia hetsɔi+  kɛ gwantɛŋhii ahewoji ni awo lɛ tsofa tsuru kɛ nu mli gbei ahewoji kɛ akasia tso  kɛ mu ni akɛbaawo kanei amli kɛ balsam mu ni akɛbaafee mufɔɔ mu kɛ tsofa-kɛ-ŋma+  kɛ onike tɛi kɛ tɛi krokomɛi ni akɛbaatara efɔd lɛ+ kɛ tsitsinɔnii+ lɛ amli lɛ. 10  “Mɛi fɛɛ ni yɔɔ nyɛteŋ ni le ŋaa nitsumɔ jogbaŋŋ*+ lɛ aba ní amɛbafee nibii fɛɛ ni Yehowa efã lɛ, 11  nomɛi ji, sɔlemɔ buu* lɛ kɛ ehe nibii lɛ fɛɛ kɛ enɔhaanɔ lɛ, ekpoji* lɛ kɛ ehe mplaŋi lɛ, emlibelemɔnii lɛ, kɛ ekulashiŋi lɛ, kɛ enɔdaamɔnii ni fɔji yɔɔ mli lɛ; 12  Adeka+ lɛ kɛ ehe tsei lɛ,+ kɛ naanɔ lɛ,+ kɛ pateeshɛŋ+ ni akɛtsĩɔ nii hiɛ lɛ; 13  okpɔlɔ+ lɛ kɛ ehe tsei lɛ kɛ ehe nibii lɛ fɛɛ kɛ hiɛmaa blodo lɛ;+ 14  kanetso+ lɛ kɛ ehe nibii lɛ kɛ ekanei lɛ kɛ mu ni akɛwoɔ kanei lɛ amli kɛsuɔ lɛ;+ 15  tsofa-kɛ-ŋma afɔleshaa latɛ+ lɛ kɛ ehe tsei lɛ; mufɔɔ mu lɛ kɛ tsofa-kɛ-ŋma lɛ;+ pateeshɛŋ ni akɛbaatsĩ sɔlemɔ buu lɛ shinaa lɛ naa lɛ; 16  shãa afɔle afɔleshaa latɛ+ lɛ kɛ ehe akɔɔble looshãa dade lɛ, ehe tsei lɛ kɛ ehe nibii lɛ fɛɛ; okpolu lɛ kɛ enɔmaanɔ lɛ;+ 17  kpo lɛ he pateeshɛŋi ni baatsotsoro shi lɛ,+ ehe akulashiŋi lɛ kɛ enɔdaamɔnii ni fɔji yɔɔ mli lɛ; pateeshɛŋ ni akɛbaatsĩ kpo lɛ shinaa lɛ naa lɛ; 18  sɔlemɔ buu lɛ dadei kɛ amɛnaa piɔpiɔi* lɛ kɛ kpo lɛ he dadei kɛ amɛnaa piɔpiɔi lɛ kɛ amɛkpãi lɛ;+ 19  atadei ni alo lɛ jogbaŋŋ+ ni akɛbaasɔmɔ yɛ jamɔhe lɛ, osɔfo Aaron atadei krɔŋkrɔŋi lɛ,+ kɛ atadei ni ebihii lɛ baawo kɛsɔmɔ akɛ osɔfoi lɛ.’” 20  No hewɔ lɛ, Israelbii lɛ fɛɛ je Mose hiɛ amɛtee. 21  Kɛkɛ ni mɔ fɛɛ mɔ ni tsui tsirɛ lɛ,+ kɛ mɔ fɛɛ mɔ ni enɛ ta emli* lɛ ba ni ekɛ onia bahã Yehowa koni akɛfee kpee buu lɛ, kɛ nibii fɛɛ ni akɛbaasɔmɔ yɛ jɛmɛ lɛ, kɛ atadei krɔŋkrɔŋi lɛ. 22  Hii kɛ yei fɛɛ ba, amɛteŋ mɔ fɛɛ mɔ ba kɛ tsuijurɔ ni amɛkɛ tsitsinaatsɛɛnii* kɛ toiiaŋnii kɛ gai kɛ jwinei krokomɛi, kɛ shika tsuru nibii srɔtoi fɛɛ bahã. Amɛ fɛɛ amɛkɛ shika tsuru nibii ni amɛkɛba* lɛ bahã Yehowa.+ 23  Ni mɛi fɛɛ ni yɔɔ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa kɛ abotia hetsɔi kɛ gwantɛŋhii ahewoji ni awo lɛ tsofa tsuru kɛ nu mli gbei ahewoji lɛ kɛba ni amɛkɛbahã. 24  Mɛi fɛɛ ni miisumɔ ni amɛkɛ jwiɛtɛi kɛ akɔɔble abahã lɛ, amɛkɛbahã Yehowa akɛ onia, ni mɛi fɛɛ ni yɔɔ akasia tso ni abaanyɛ akɛtsu nitsumɔ lɛ he nɔ ko lɛ kɛba ni amɛkɛbahã. 25  Yei fɛɛ ni le ŋaa nitsumɔ jogbaŋŋ+ lɛ kɛ amɛniji tsɛ̃ kpãa,* ni amɛkɛ nɔ ni amɛtsɛ̃ lɛ ba, ni nomɛi ji: kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa. 26  Ni yei fɛɛ ni le ŋaa nitsumɔ jogbaŋŋ, ní tsui tsirɛ amɛ lɛ kɛ abotia hetsɔi lɛ tsɛ̃ kpãa. 27  Ni wekunukpai lɛ kɛ onike tɛi kɛ tɛi krokomɛi ni akɛbaatara efɔd lɛ kɛ tsitsinɔnii lɛ amli+ 28  kɛ balsam mu lɛ kɛ mu ni akɛbaawo kanei lɛ amli kɛ nɔ ni akɛbaafee mufɔɔ mu+ lɛ kɛ nɔ ni akɛbaafee tsofa-kɛ-ŋma+ lɛ ba. 29  Hii kɛ yei fɛɛ ni tsui tsirɛ amɛ lɛ kɛ nɔ ko ba koni akɛtsu nitsumɔ ni Yehowa tsɔ Mose nɔ efã akɛ atsu lɛ; Israelbii lɛ jɛ amɛsuɔmɔ mli amɛkɛ nibii nɛɛ bahã Yehowa akɛ nikeenii.+ 30  Kɛkɛ ni Mose kɛɛ Israelbii lɛ akɛ: “Naa, Yehowa ehala Bezalel, Hur binuu Uri binuu lɛ ni jɛ Yuda weku lɛ mli lɛ.+ 31  Nyɔŋmɔ kɛ emumɔ* lɛ ewo emli obɔ, ni ehã lɛ hiɛshikamɔ kɛ niiashishinumɔ kɛ nilee kɛhã ŋaa nitsumɔi srɔtoi fɛɛ, 32  koni ekɛye sãmai,* ekɛ shika tsuru kɛ jwiɛtɛi kɛ akɔɔble atsu nii, 33  ekɛfolɔ tɛi ní ekɛtara nii amli, ní agbɛnɛ hu, ekɛfee ŋaa nibii srɔtoi fɛɛ ni akɛ tsei feɔ. 34  Ni ekɛwo etsui mli koni etsɔɔ nii, lɛ kɛ Oholiab,+ Ahisamak binuu lɛ ni jɛ Dan weku lɛ mli lɛ. 35  Ekɛ nitsumɔ he ŋaalee ewo amɛmli obɔbɔ,+ koni amɛkɛtsu ŋaa nitsumɔi fɛɛ, amɛkɛlo nii amɛwo mamai amli, ni amɛkɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa alo nii, ni amɛkɛ mamaloo tsɔne hu alo nii. Hii nɛɛ baatsu nitsumɔi srɔtoi fɛɛ, ni amɛbaato nibii srɔtoi fɛɛ ahe ŋaa.

Shishigbɛ Niŋmaa

Blɔfo mli lɛ, “pɛpol.”
Hebri sht. ŋm., “Mɛi fɛɛ ni tsui hiɛ kã shi.”
Kpoji ni akɛtsu nii yɛ biɛ lɛ ji dadei bibii komɛi ni adɔrɔ amɛnaabu tamɔ kpoŋ.
Eji mama tsũ ko ni Israelbii lɛ já Nyɔŋmɔ yɛ mli ni anyɛɔ ajieɔ kɛyaa he kroko; bei komɛi lɛ, atsɛɔ lɛ hu akɛ kpee buu.
Loo “shiŋmlii.” Shiŋmli ji dade loo tso kɛ enaa piɔpiɔ ni akaa awoɔ shikpɔŋ.
Loo “kɛ mɔ fɛɛ mɔ ni emumɔ tsirɛ lɛ.”
Eeenyɛ efee akɛ, eji hewulamɔ dade bibioo ko ni akɛtsɛɔ atade mli.
Loo “ni amɛkɛba akɛ afɔle ni afɔ̃ɔ.”
Blɔfo mli lɛ, “pɛpol.”
Blɔfo mli lɛ, “pɛpol.”
“Kpãatsɛ̃mɔ” ji gbɛ ni atsɔɔ nɔ akɛ nibii tamɔ odoŋti kɛ kooloo hetsɔi feɔ kpãa ni akɛfeɔ mama.
Hebri sht. ŋm., “Ekɛ Nyɔŋmɔ mumɔ.”
Loo “ekɛto nibii ahe ŋaa.”
Blɔfo mli lɛ, “pɛpol.”