2 Mose 23:1-33

  • Yiŋkpɛi ni ajaje atsɔɔ Israelbii lɛ (1-19)

    • Nɔ ni kɔɔ anɔkwayeli kɛ jalɛ nifeemɔi ahe (1-9)

    • Nɔ ni kɔɔ hejɔɔmɔ gbii kɛ gbii juji ahe (10-19)

  • Ŋwɛibɔfo ko tsɔɔ Israel gbɛ (20-26)

  • Shikpɔŋ ni akɛhã kɛ ehusui (27-33)

23  “Kaagbɛ sane ni bɛ mli oshwã.+ Kaafee ohe odasefonyo fɔŋ ni no hã okɛ mɔ fɔŋ fee ekome.+  Kaanyiɛ mɛi pii asɛɛ ni oyafee efɔŋ, ni kaadi mɛi pii asɛɛ ni oyaye odase* ni baahã otsɔ jalɛ sane hiɛ obu shi.  Kaakwɛ hiɛiaŋ kɛ́ aaye ohiafo sane.+  “Kɛ́ ona ohenyɛlɔ tsina loo eteji ní edu gbɛ lɛ, kpalamɔ lɛ oyahã lɛ.+  Kɛ́ ona mɔ ko ni nyɛɔ bo teji ní egbee shi ní ejatsu kã enɔ lɛ, kaashi lɛ otee. Ye obua lɛ ni ejie kooloo lɛ.+  “Kaatsɔ ohiafo ni yɔɔ nyɛteŋ lɛ sane hiɛ obu shi kɛ́ aaye esane.+  “Tsi ohe kɛje sane ni ejaaa ni akɛfɔ̃ɔ mɔ nɔ he* kwraa, ni kaagbe mɔ ni efeko nɔ ko, ni kaagbe jalɔ hu, ejaakɛ mibuŋ mɔ fɔŋ lɛ akɛ jalɔ.*+  “Kaahe nyɔɔŋnii, ejaakɛ nyɔɔŋnii hãa mɛi kpoɔ nɔ ni ja,* ni ebaanyɛ ehã jalɔi awie wiemɔi ni ejaaa.+  “Kaawa gbɔ yi. Nyɛle bɔ ni gbɔtsɔmɔ* ji hã, ejaakɛ nyɛ hu nyɛyatsɔmɔ gbɔi yɛ Ejipt shikpɔŋ lɛ nɔ.+ 10  “Afii ekpaa odu nii* yɛ oshikpɔŋ lɛ nɔ, ni obua enɔ nibaa nii lɛ anaa oto.+ 11  Shi afi ni ji kpawo lɛ nɔ lɛ, kaadu nii yɛ shikpɔŋ lɛ nɔ, hã ekã shi efolo, ni omaŋbii lɛ ateŋ ohiafoi lɛ baaye enɔ yibii lɛ, ni nɔ ni amɛbaashi lɛ, ŋa mli kooloi lɛ baaye. Nakai nɔŋŋ ofee wain ŋmɔ kɛ oliv ŋmɔ ni oyɔɔ lɛ. 12  “Tsu onitsumɔ gbii ekpaa; shi gbi ni ji kpawo lɛ nɔ lɛ, kaatsu nii, bɔ ni afee ni otsina* kɛ oteji ajɔɔ amɛhe, ni onyɔŋ yoo bi kɛ gbɔ awo amɛtsui.+ 13  “Nyɛkwɛa ni nyɛfea nibii fɛɛ ni mikɛɛ nyɛ lɛ,+ ni nyɛkatsĩa nyɔŋmɔi krokomɛi agbɛ́ii atã; akanu yɛ nyɛnaa* tete.+ 14  “Ye gbi jurɔ shii etɛ yɛ afi mli ohã mi.+ 15  Ye Blodo Ni Ashikishaŋ-sha* Bɛ Mli Gbi Jurɔ lɛ.+ Ye blodo ni ashikishaŋ-sha bɛ mli gbii kpawo, tamɔ bɔ ni mifã bo lɛ, yɛ be ni ato yɛ Abib* nyɔɔŋ+ lɛ nɔ lɛ mli, ejaakɛ nakai be lɛ mli oshi Ejipt. Mɔ ko mɔ ko akabapue yɛ mihiɛ kɛ edɛ̃ folo.+ 16  Agbɛnɛ hu, ye onitsumɔ lɛ mli klɛŋklɛŋ yibii, ni ji nibii ni odu yɛ ŋmɔ mli lɛ he Nikpamɔ Gbi Jurɔ* lɛ;+ ni oye Nibii Anaabuamɔ Gbi Jurɔ* lɛ yɛ afi lɛ naagbee, be ni obuaa onitsumɔ lɛ mli yibii lɛ anaa kɛjɛɔ ŋmɔ mli lɛ.+ 17  Daa afi lɛ, ohii lɛ fɛɛ abapue yɛ Nuŋtsɔ Yehowa hiɛ shii etɛ.+ 18  “Okɛ ashikishaŋ-sha* nii ko kwraa akafata mifɔle lɛ lá lɛ he okɛbahã. Ni kooloi afɔ ni akɛhãa akɛ afɔle yɛ migbii juji lɛ anɔ lɛ, kaahã je miitsɛre nɔ. 19  “Okɛ oshikpɔŋ lɛ nɔ nibaa nii lɛ amli klɛŋklɛŋ yibii ni hi fe fɛɛ lɛ aba Yehowa, o-Nyɔŋmɔ lɛ shĩa lɛ.+ “Okɛ abotiabi ko nyɛ fufɔ mli nu akahoo abotiabi lɛ.+ 20  “Miitsu bɔfo ko kɛnyiɛ ohiɛ,+ ní ebu ohe yɛ gbɛ lɛ nɔ, ní ekɛ bo ayashɛ he ni misaa mito lɛ.+ 21  Hã ojwɛŋmɔ ahi enɔ, ni obo egbee toi. Kaatse ehiɛ atua, ejaakɛ ekɛ nyɛtɔmɔi* lɛ ekeŋ nyɛ,+ ejaakɛ migbɛ́i kã enɔ. 22  Shi kɛ́ obo egbee toi kɛmɔ shi ni ofee nibii fɛɛ ni mikɛɔ lɛ, no lɛ, manyɛ ohenyɛlɔi lɛ, ni matsĩ mɛi ni teɔ shi woɔ bo lɛ anaa. 23  Ni mibɔfo lɛ baanyiɛ ohiɛ, ni ekɛ bo baaya he ni Amorbii kɛ Hitbii kɛ Perizbii kɛ Kanaanbii kɛ Hivbii kɛ Yebusbii lɛ yɔɔ lɛ, ni makpãtã amɛhiɛ.+ 24  Kaakoto amɛnyɔŋmɔi lɛ, ni kaahã akɔne oyiŋ ni osɔmɔ amɛ, ni kaakase amɛnifeemɔi lɛ hu.+ Shi moŋ kuumɔ amɛ, ni ojwara amɛwɔŋ tɛi lɛ.+ 25  Nyɛsɔmɔa Yehowa, nyɛ-Nyɔŋmɔ lɛ,+ ni ebaajɔɔ oniyenii* kɛ onu nɔ.+ Majie hela kɛaaje nyɛteŋ.+ 26  Yei ni yɔɔ oshikpɔŋ lɛ nɔ lɛ amusu sharakeŋ ni amɛtsɔmɔŋ kenei hu,+ mahã owala sɛɛ atsɛ.* 27  “Mahã mihe ŋmiŋmi atsɔ hiɛ amɔmɔ amɛ dani obaayashɛ amɛŋɔɔ,+ ni mahã maji fɛɛ ni okɛbaakpe lɛ ajijaa, ni mahã ohenyɛlɔi lɛ fɛɛ ajo onaa foi.*+ 28  Mahã amɛhao,* dani obaayashɛ amɛŋɔɔ,+ ni no baahã Hivbii kɛ Kanaanbii kɛ Hitbii lɛ ajo onaa foi.+ 29  Mishwieŋ amɛ kɛjeŋ ohiɛ yɛ afi kome mli, koni shikpɔŋ lɛ akakã shi efolo, ní kooloi awuiyelɔi ayi bafa amɛwo bo.+ 30  Mashwie amɛ kɛaaje ohiɛ fiofio kɛyashi oyi baafa ní obaaŋɔ shikpɔŋ lɛ.+ 31  “Mahã ohusu lɛ ajɛ Ŋshɔ Tsuru lɛ naa kɛyashi Filistibii lɛ aŋshɔ lɛ naa, kɛ agbɛnɛ hu, kɛjɛ ŋa lɛ nɔ kɛyashi Faa* lɛ naa;+ ejaakɛ mikɛ shikpɔŋ lɛ nɔ bii lɛ baawo odɛŋ, ni obaashwie amɛ kɛaaje ohiɛ.+ 32  Okɛ amɛ loo amɛnyɔŋmɔi lɛ akakpaŋ kpaŋmɔ ko.+ 33  Amɛkahi oshikpɔŋ lɛ nɔ, koni amɛkahã ofee esha oshi mi. Kɛ́ osɔmɔ amɛnyɔŋmɔi lɛ, bɔ fɛɛ bɔ ni fee lɛ, no baatsɔ bo tsɔne.”+

Shishigbɛ Niŋmaa

Loo “kaadi odase ni mɛi pii yeɔ lɛ sɛɛ ni bo hu oyaye odase.”
Hebri sht. ŋm., “Tsi ohe kɛje amale wiemɔ he.”
Loo “mibuŋ mɔ fɔŋ lɛ bem.”
Loo “nyɔɔŋnii shwilaa mɛi ni naa nii jogbaŋŋ lɛ ahiŋmɛii.”
Loo “Nyɛle bɔ ni gbɔ shihilɛ (susuma).”
Loo “dumɔwui.”
Hebri sht. ŋm., “otsinanuu.”
Hebri sht. ŋm., “nyɛdaaŋ.”
Atsɛɔ lɛ hu akɛ Otsii Agbi Jurɔ, loo Pentekoste.
Atsɛɔ lɛ hu akɛ Agbai (Mama Tsũi) Agbi Jurɔ.
Loo “nyɛmlatɔmɔi.”
Loo “oblodo.”
Loo “mahã ogbii lɛ ayi obɔ.”
Loo “mahã ohenyɛlɔi lɛ fɛɛ atsɔmɔ amɛsɛɛ amɛhã bo.”
Shishitsɔɔmɔi komɛi kɛɔ akɛ, “Mahã amɛtsui afã; Mahã ŋmiŋmi amɔmɔ amɛ.”
Ni ji, Yufrate Faa lɛ.