2 Mose 22:1-31

  • Yiŋkpɛi ni ajaje atsɔɔ Israelbii lɛ (1-31)

    • Nɔ ni kɔɔ juu he (1-4)

    • Nɔ ni kɔɔ ŋmɔshi nii ni afite he (5, 6)

    • Nɔ ni kɔɔ nɔ ko ni atoɔ najiaŋ kɛ nɔ ko nɔtsɛ he (7-15)

    • Nɔ ni kɔɔ yoo ni alakaa koni akɛ lɛ aná bɔlɛ he (16, 17)

    • Nɔ ni kɔɔ jamɔ kɛ bɔ ni esa akɛ akɛ mɛi aye jogbaŋŋ ahã he (18-31)

22  “Kɛ́ mɔ ko ju tsina loo too ni egbe loo eyahɔ̃ɔ lɛ, ekɛ tsinai enumɔ ato tsina kome ni eju lɛ najiaŋ, ni ekɛ toi ejwɛ ato too kome ni eju lɛ najiaŋ.+  (“Kɛ́ ana julɔ+ ko ni eejwa mɔ ko shinaa koni ebote mli, ni atswa lɛ nɔ ni egbo lɛ, mɔ ni gbe lɛ lɛ yeee lá yi sɔ̃.  Shi kɛ́ enɛ ba be ni hulu eje lɛ, no lɛ, mɔ ni gbe lɛ lɛ yeɔ lá yi sɔ̃.) “Julɔ* lɛ ato najiaŋ. Kɛ́ ebɛ nɔ ko lɛ, no lɛ, ahɔ̃ɔ lɛ kɛwo nɔ ni eju lɛ he nyɔmɔ.  Kɛ́ ana kooloo ni eju lɛ hiɛkãalɔ yɛ edɛŋ lɛ, tsina jio, teji jio, loo too jio lɛ, ekɛ nakai toi enyɔ ato najiaŋ.  “Kɛ́ mɔ ko ŋmɛɛ ekooloi ahe koni amɛyaye nii yɛ ŋmɔshi loo wain ŋmɔ mli, ni ehã amɛyaye mɔ kroko ŋmɔshi nii lɛ, no lɛ, ekɛ lɛ diɛŋtsɛ eŋmɔshi nii loo ewain ŋmɔ mli nii ni hi fe fɛɛ lɛ ato najiaŋ.  “Kɛ́ la je ni eyamɔ ŋmeitsei ni ehã ŋmaa* ni afimɔ lɛ keikei loo ŋmaa ni mamɔ shi loo ŋmɔ ko shã lɛ, no lɛ, mɔ ni wo la lɛ ato nɔ ni shã lɛ najiaŋ.  “Kɛ́ mɔ ko kɛ shika loo nibii hã enyɛmi gbɔmɔ koni ekɛto ehã lɛ, ni aju yɛ enyɛmi lɛ shĩa, ni ana julɔ lɛ, no lɛ, julɔ lɛ ato najiaŋ toi enyɔ.+  Kɛ́ anaaa julɔ lɛ, akɛ shĩatsɛ lɛ aba anɔkwa Nyɔŋmɔ lɛ hiɛ+ koni akwɛ akɛ lɛ ji mɔ ni ju enyɛmi lɛ nibii lɛ lo.*  Yɛ saji fɛɛ ni kɔɔ mɔ ko nɔ ko ní ebaana yɛ mɔ kroko dɛŋ lɛ he lɛ, kɛ́ eji tsina jio, teji jio, too jio, atade jio, loo nɔ fɛɛ nɔ ni elaaje jio, ni mɔ lɛ kɛɛ, ‘Mi minɔ ni!’ lɛ, no lɛ, mɛi enyɔ lɛ fɛɛ kɛ amɛsane lɛ aba anɔkwa Nyɔŋmɔ lɛ hiɛ.+ Amɛteŋ mɔ ni Nyɔŋmɔ baakɛɛ akɛ eyeɔ fɔ lɛ ato nii lɛ najiaŋ toi enyɔ ehã enyɛmi lɛ.+ 10  “Kɛ́ mɔ ko kɛ teji loo tsina loo too loo shĩa kooloo ko hã enyɛmi gbɔmɔ koni ekwɛ nɔ ehã lɛ, ni kooloo lɛ gbo loo aye lɛ awui loo amɔ lɛ shi mɔ ko mɔ ko enaaa lɛ, 11  mɔ ni akɛ nii lɛ hã lɛ lɛ akã enyɛmi lɛ kitã yɛ Yehowa hiɛ akɛ ekɛ enine etako enyɛmi lɛ nii lɛ he; ni nɔtsɛ lɛ akpɛlɛ nɔ. Mɔ ni akɛ nii lɛ hã lɛ lɛ akato nɔtsɛ lɛ najiaŋ.+ 12  Shi kɛ́ ju aju kooloo lɛ yɛ edɛŋ lɛ, no lɛ, eto nɔtsɛ lɛ najiaŋ. 13  Kɛ́ kooloo awuiyelɔ ko ni tserɛ kooloo lɛ mli lɛ, no lɛ, ekɛ kooloo lɛ gbonyo lɛ abaye odase. Ekato nɔ ko ni kooloo awuiyelɔ etserɛ mli lɛ najiaŋ. 14  “Shi kɛ́ mɔ ko yama enyɛmi gbɔmɔ ko kooloo, ni aye kooloo lɛ awui loo egbo be ni nɔtsɛ lɛ bɛ kooloo lɛ he lɛ, mɔ ni yama kooloo lɛ ato najiaŋ. 15  Kɛ́ nɔtsɛ lɛ yɛ kooloo lɛ he lɛ, no lɛ, ekato najiaŋ. Kɛ́ haimɔ ayahai lɛ, no lɛ, shika lɛ ni akɛhai lɛ ji najiaŋtoo nii lɛ. 16  “Kɛ́ nuu ko laka oblayoo fro ni abiko eshi kɛhã gbalashihilɛ,* ni ekɛ lɛ ná bɔlɛ lɛ, no lɛ, ewo eyi nyɔmɔ koni etsɔ eŋa.+ 17  Kɛ́ yoo lɛ papa ekpɛlɛɛɛ kɔkɔɔkɔ akɛ ekɛ lɛ baahã nuu lɛ, no lɛ, nuu lɛ awo shika abɔ ni awoɔ kɛbiɔ yoo shi lɛ. 18  “Kaaŋmɛ yoo ŋkunyaayelɔ ko gbɛ ni ehi wala mli.+ 19  “Mɔ fɛɛ mɔ ni kɛ kooloo náa bɔlɛ lɛ, bɔ fɛɛ bɔ ni fee lɛ, agbe lɛ.+ 20  “Mɔ fɛɛ mɔ ni shãa afɔle ehãa nyɔŋmɔ kroko yɛ Yehowa sɛɛ lɛ, akpãtã ehiɛ.+ 21  “Kaafee gbɔ ko niseniianii, ni kaawa lɛ yi hu,+ ejaakɛ nyɛ hu nyɛyatsɔmɔ gbɔi yɛ Ejipt shikpɔŋ lɛ nɔ.+ 22  “Nyɛkawaa yoo okulafo ko loo gbekɛ ko ni bɛ tsɛ* yi.+ 23  Kɛ́ owa lɛ yi, ni ebolɔ etsɛ mi lɛ, no lɛ, bɔ fɛɛ bɔ ni fee lɛ, mabo ebolɔmɔ lɛ toi;+ 24  ni mimli baawo la, ni mikɛ klante baagbe nyɛ, ni nyɛŋamɛi baatsɔmɔ okulafoi, ni nyɛbii lɛ hu baatsɔmɔ gbekɛbii ni bɛ tsɛmɛi.* 25  “Kɛ́ ofa mimaŋbii lɛ ateŋ ohiafo ko* ni kɛ bo yɔɔ lɛ shika lɛ, kaafee onii tamɔ shikafalɔ* owo lɛ. Kaahe lɛ shika lɛ he kpa.+ 26  “Kɛ́ ohe onyɛmi gbɔmɔ mama akɛ awabatoo nɔ* kɛhã nɔ ni ebafa lɛ,+ okɛku sɛɛ oyahã lɛ dani hulu anyɔ shi. 27  Ejaakɛ no pɛ ji ehehaanɔ, mama ni ekɛhaa ehe;* mɛni ekɛbaawɔ?+ Kɛ́ ebolɔ etsɛ mi lɛ, bɔ fɛɛ bɔ ni fee lɛ, mabo lɛ toi, ejaakɛ mɔbɔnalɔ* ji mi.+ 28  “Kaalomɔ* Nyɔŋmɔ,+ ni kaalomɔ omaŋbii lɛ ateŋ onukpa* ko hu.+ 29  “Kɛ́ oŋmɔshi nii lɛ ba babaoo, ni obui* lɛ hu yimɔ kɛteke nɔ lɛ, kaashashao shi akɛ okɛ eko baashã afɔlei.+ Okɛ obihii lɛ ateŋ kromɔ lɛ ahã mi.+ 30  Nakai nɔŋŋ ofee yɛ otsinai kɛ otoi akromɔbii lɛ ahe:+ Kooloo lɛ ahi enyɛ ŋɔɔ gbii kpawo. Gbi ni ji kpaanyɔ lɛ nɔ lɛ, okɛ lɛ abahã mi.+ 31  “Nyɛfea nyɛhe mɛi krɔŋkrɔŋi nyɛhãa mi,+ ni nyɛkayea kooloo ni kooloo awuiyelɔ ko etserɛ emli yɛ ŋa nɔ lɛ loo.+ Nyɛshɛrɛa nyɛshwiea nyɛhãa gbei lɛ.

Shishigbɛ Niŋmaa

Julɔ nɛɛ ji mɔ ni awie ehe yɛ kuku 1 lɛ mli lɛ.
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “koni akwɛ akɛ enine etako enyɛmi lɛ nibii lɛ ahe lo.”
Loo “atsɛko ehe baa.”
Loo “awusã.”
Loo “awusãi.”
Loo “mɔ ko ni efi lɛ.”
Loo “mɔ ko ni faa shika ni eheɔ he kpa.”
Loo “akɛ shiŋmɛɛnɔ.”
Hebri sht. ŋm., “ekɛhaa ehewolo nɔ.”
Loo “drolɔ.”
Loo “Kaajɛ.”
Loo “nɔyelɔ.”
Ni ji, bui ni aŋaa mu kɛ wain yɛ mli lɛ.