2 Mose 21:1-36

  • Yiŋkpɛi ni ajaje atsɔɔ Israelbii lɛ (1-36)

    • Nɔ ni kɔɔ Hebri nyɔji ahe (2-11)

    • Nɔ ni kɔɔ naanyo gbɔmɔ ni afeɔ lɛ yiwalɛ nii he (12-27)

    • Nɔ ni kɔɔ kooloi ahe (28-36)

21  “Yiŋkpɛi* ní ojaje otsɔɔ Israelbii lɛ nɛ:+  “Kɛ́ ohé Hebri nuu akɛ nyɔŋ lɛ,+ ebaasɔmɔ akɛ nyɔŋ afii ekpaa, shi yɛ afi ni ji kpawo lɛ mli lɛ, ebaaye ehe ní ewooo nyɔmɔ ko kwraa.+  Kɛ́ nuu lɛ kome pɛ ba lɛ, ekome pɛ ebaaya. Kɛ́ eyɛ ŋa lɛ, no lɛ, eŋa lɛ kɛ lɛ aya.  Kɛ́ enuŋtsɔ hã lɛ ŋa, ni eŋa lɛ fɔ bihii loo biyei ehã lɛ lɛ, eŋa lɛ kɛ ebii lɛ baatsɔ enuŋtsɔ lɛ nɔ, ni ekome pɛ ebaaya.+  Shi kɛ́ nyɔŋ lɛ kɛɛ doo akɛ, ‘Miisumɔ minuŋtsɔ lɛ, kɛ miŋa, kɛ mibii lɛ; misumɔɔɔ ni maye mihe’ lɛ,+  no lɛ, enuŋtsɔ lɛ kɛ lɛ aba anɔkwa Nyɔŋmɔ lɛ hiɛ. Kɛkɛ lɛ, enuŋtsɔ lɛ kɛ lɛ baaba shinaa lɛ loo shinaatso lɛ he, ni ekɛ dade kɛ enaa piɔpiɔ* baagbu etoi, ni ebaatsɔ enyɔŋ ewala gbii abɔ fɛɛ.  “Kɛ́ nuu ko hɔ̃ɔ ebiyoo akɛ nyɔŋ lɛ, yoo lɛ tsɔŋ gbɛ ni nyɔŋ nuu tsɔɔ nɔ eyeɔ ehe lɛ nɔ eye ehe.  Kɛ́ yoo lɛ nuŋtsɔ lɛ náaa yoo lɛ he miishɛɛ ni ehãaa yoo lɛ atsɔ ehemɔ,* shi eetao ehɔ̃ɔ lɛ ehã mɔ kroko lɛ,* no lɛ, nuu lɛ bɛ hegbɛ akɛ ehɔ̃ɔ lɛ ehãa maŋsɛɛnyo, ejaakɛ elaka yoo lɛ.  Kɛ́ eŋɔ nyɔŋ yoo lɛ ehã ebinuu akɛ eŋa lɛ, no lɛ, ekɛ yoo lɛ aye tamɔ biyoo. 10  Kɛ́ eyaŋɔ yoo kroko hu akɛ eŋa lɛ, no lɛ, ekatse klɛŋklɛŋ ŋa lɛ niyenii, ehehaa nii, kɛ egbalashihilɛ gbɛnaa nii*+ lɛ nɔ. 11  Kɛ́ efeee nibii etɛ nɛɛ ehãaa lɛ lɛ, no lɛ, yoo lɛ aye ehe ni eya, ni aheŋ lɛ shika ko kwraa. 12  “Mɔ fɛɛ mɔ ni tswaa gbɔmɔ ko nɔ, ní mɔ lɛ gboɔ lɛ, lɛ hu agbe lɛ.+ 13  Shi kɛjeee gbɛ eje egbe mɔ lɛ, ni anɔkwa Nyɔŋmɔ lɛ ŋmɛ gbɛ ni eba lɛ nakai lɛ, mato he ko mahã bo ni ejo foi kɛya jɛmɛ.+ 14  Kɛ́ mɔ ko mli fu enyɛmi gbɔmɔ waa ni eje gbɛ egbe lɛ lɛ,+ no lɛ, kɛ́ eyɛ mifɔleshaa latɛ lɛ he tete po lɛ, amɔ lɛ ni agbe lɛ.+ 15  Mɔ fɛɛ mɔ ni gbaa epapa loo emami ma lɛ,* agbe lɛ.+ 16  “Kɛ́ mɔ ko ju gbɔmɔ,+ ni ehɔ̃ɔ lɛ loo ana mɔ lɛ yɛ edɛŋ lɛ,+ agbe lɛ.+ 17  “Mɔ fɛɛ mɔ ni lomɔɔ* epapa loo emami lɛ, agbe lɛ.+ 18  “Kɛ́ hii miibé ni mɔ kome kɛ tɛ tswa mɔ kroko lɛ loo ema lɛ atswɛrɛ* ni mɔ lɛ gbooo, shi eka saa mli lɛ, nɔ ni afee nɛ: 19  Kɛ́ enyɛ ete shi ni ekɛ tso nyiɛ kɛje kpo lɛ, no lɛ, mɔ ni tswa lɛ nii lɛ baaye ehe, agbalaŋ etoi. Be ni mɔ ni epila lɛ kɛtsuuu nii lɛ aahu kɛyashi be ni ehe baawa lɛ kwraa lɛ he nyɔmɔ kɛkɛ ebaawo. 20  “Kɛ́ mɔ ko kɛ tso tswa enyɔŋ nuu loo enyɔŋ yoo, ni egbo yɛ enine naa lɛ, agbala etoi.*+ 21  Shi kɛ́ ehi shi gbi kome loo gbii enyɔ lɛ, akagbala enuŋtsɔ lɛ toi,* ejaakɛ enuŋtsɔ lɛ shika akɛhé lɛ. 22  “Kɛ́ hii miinɔ ni amɛyapila yoohɔlɔ ko, ni efɔ be ni ebe shɛko,*+ shi gbele* ko jɛɛɛ mli kɛbaaa lɛ, mɔ ni hã sane nɛɛ ba lɛ awo nyɔmɔ ni yoo lɛ wu kɛbaafɔ̃ enɔ lɛ; ni ewo nyɔmɔ nɛɛ yɛ bɔ ni kojolɔi lɛ baatsɔɔ lɛ naa.+ 23  Shi kɛ́ gbele ko jɛ mli kɛba lɛ, no lɛ, okɛ wala ato wala* najiaŋ,+ 24  okɛ hiŋmɛi ato hiŋmɛi najiaŋ, okɛ nyanyɔŋ ato nyanyɔŋ najiaŋ, okɛ nine ato nine najiaŋ, okɛ nane ato nane najiaŋ,+ 25  okɛ shãa ato shãa najiaŋ, okɛ pilamɔ ato pilamɔ* najiaŋ, okɛ atswɛrɛ ato atswɛrɛ najiaŋ. 26  “Kɛ́ mɔ ko gba enyɔŋ nuu hiŋmɛi nɔ ma loo enyɔŋ yoo hiŋmɛi nɔ ma ni efite hiŋmɛi lɛ, eŋmɛɛ nyɔŋ lɛ he ni eya kɛto ehiŋmɛi ni efite lɛ najiaŋ.+ 27  Ni kɛ́ efã enyɔŋ nuu loo enyɔŋ yoo nyanyɔŋ lɛ, eŋmɛɛ nyɔŋ lɛ he ni eya kɛto enyanyɔŋ ni efã lɛ najiaŋ. 28  “Kɛ́ tsina shi nuu ko loo yoo ko, ni mɔ lɛ gbo lɛ, atswia tsina lɛ tɛi ni agbe lɛ,+ ni akaye eloo; shi tsinatsɛ lɛ baaye ehe ni agbalaŋ etoi. 29  Shi kɛ́ tsina ko fɔɔ mɔ shimɔ, ni abɔ tsinatsɛ lɛ kɔkɔ shi ewooo tsina lɛ tsuŋ, ni egbe nuu ko loo yoo ko lɛ, atswia tsina lɛ tɛi, ni agbe tsinatsɛ lɛ hu. 30  Kɛ́ akɛ nyɔmɔ ko fɔ̃ enɔ koni ewo kɛkpɔ̃ ehe lɛ,* no lɛ, ewo nyɔmɔ fɛɛ nyɔmɔ ni akɛbaafɔ̃ enɔ lɛ kɛkpɔ̃ ewala.* 31  Kɛ́ tsina lɛ shi mɔ ko binuu loo biyoo lɛ, akɛ tsinatsɛ lɛ aye yɛ yiŋkpɛɛ* nɛɛ naa. 32  Kɛ́ tsina lɛ shi nyɔŋ nuu loo nyɔŋ yoo ko lɛ, tsinatsɛ lɛ ahã nyɔŋ lɛ nuŋtsɔ lɛ shekeli* 30, ni atswia tsina lɛ tɛi ni agbe lɛ. 33  “Kɛ́ mɔ ko gbele bu ko naa efɔ̃ shi loo etsa bu ko ni etsĩii nɔ, ni tsina loo teji ko yagbee mli lɛ, 34  bu lɛ tsɛ lɛ baato najiaŋ.+ Ebaawo nyɔmɔ lɛ ehã koolootsɛ lɛ, ni kooloo ni egbo lɛ baatsɔ enɔ. 35  Kɛ́ mɔ ko tsina pila mɔ kroko tsina ni egbo lɛ, no lɛ, amɛhɔ̃ɔ tsina ni hiɛ kã lɛ ni amɛja shika lɛ; amɛja kooloo ni egbo lɛ hu. 36  Aloo kɛ́ ale akɛ tsina lɛ fɔɔ mɔ shimɔ ni tsinatsɛ lɛ wooo lɛ tsuŋ lɛ, no lɛ, ekɛ tsina ato tsina najiaŋ, ni ekɔ nɔ ni egbo lɛ.

Shishigbɛ Niŋmaa

Loo “Kojomɔi.”
Loo “fitii.”
Hebri sht. ŋm., “shi eetao abakpɔ̃ lɛ lɛ.”
Ni ji, bɔlɛnamɔ.
Loo “Mɔ fɛɛ mɔ ni yiɔ epapa loo emami lɛ.”
Loo “Mɔ fɛɛ mɔ ni tsɛɔ efɔŋ ehãa.”
Shishitsɔɔmɔi komɛi kɛɔ akɛ, “ekɛ nitsumɔ dade ko tswa lɛ.”
Loo “atɔ nyɔŋ lɛ he owele.”
Loo “akatɔ nyɔŋ lɛ he owele.”
Hebri sht. ŋm., “ni yoo lɛ bii lɛ je kpo.”
Loo “oshãra wulu.”
Loo “okɛ susuma ato susuma.”
Loo “okɛ fala ato fala.”
Loo “Kɛ́ aahe lɛ kpatamɔ nii lɛ.”
Loo “esusuma.”
Loo “kojomɔ.”
Shekel kome feɔ gram 11.4 (oz t 0.367). Kwɛmɔ Saji Krokomɛi B14 lɛ.