2 Mose 2:1-25

  • Afɔ Mose (1-4)

  • Farao biyoo lɛ ŋɔ Mose efee ebi (5-10)

  • Mose jo foi kɛtee Midian ni ekɛ Zipora bote gbalashihilɛ mli (11-22)

  • Nyɔŋmɔ nu Israelbii lɛ akɛ̃ɛmɔi lɛ (23-25)

2  Aaafee nakai be lɛ mli lɛ, nuu ko ní jɛ Levi shĩa lɛ kɛ Levi biyoo* ko bote gbalashihilɛ mli.+  Ni yoo lɛ ná musu, ni efɔ binuu. Be ni ena akɛ gbekɛ lɛ he yɛ fɛo waa lɛ, eŋɔ lɛ etee nyɔji etɛ.+  Be ni enyɛɛɛ ekɛ lɛ atee dɔŋŋ lɛ,+ ewó papiro* kɛntɛŋ,* ni ekɛ kootaa kɛ ama kpa he, ni ekɛ gbekɛ lɛ wo mli ni ekɛyama gãlãi* lɛ amli yɛ Nilo Faa lɛ naa.  Shi gbekɛ lɛ nyɛmi yoo+ damɔ sɛɛ fɛlɛŋŋ eekwɛ nɔ ni baaba enɔ.  Be ni Farao biyoo lɛ kpeleke shi kɛba Nilo lɛ naa koni ebaju ehe yɛ faa lɛ mli lɛ, etsuji yei lɛ nyiɛ Nilo lɛ toi. Ni Farao biyoo lɛ hiŋmɛi gba kɛntɛŋ lɛ nɔ yɛ gãlãi lɛ amli. Oya nɔŋŋ ni etsu enyɔŋ yoo lɛ koni eyawó kɛba.+  Be ni egbele naa lɛ, ena gbekɛ nuu lɛ, ni gbekɛ nuu lɛ miifó. Emusuŋ tsɔ lɛ yɛ gbekɛ lɛ hewɔ, shi ekɛɛ: “Hebribii lɛ abii lɛ eko nɛ.”  Kɛkɛ ni gbekɛ lɛ nyɛmi yoo lɛ kɛɛ Farao biyoo lɛ akɛ: “Ani miya ní miyatsɛ yoo ni hãa fufɔ yɛ Hebribii lɛ ateŋ kɛba koni ehã gbekɛ lɛ fufɔ ehã bo?”  Farao biyoo lɛ kɛɛ lɛ akɛ: “Yaa!” Amrɔ nɔŋŋ lɛ, gbekɛ yoo lɛ tee ni eyatsɛ gbekɛ lɛ mami kɛba.+  Kɛkɛ ni Farao biyoo lɛ kɛɛ yoo lɛ akɛ: “Wó gbekɛ nɛɛ ní oyahã lɛ fufɔ ohã mi, ni mawo bo nyɔmɔ.” No hewɔ lɛ, yoo lɛ wó gbekɛ lɛ ni eyahã lɛ fufɔ. 10  Be ni gbekɛ lɛ hiɛ fã lɛ, yoo lɛ kɛ lɛ bahã Farao biyoo lɛ, ni etsɔ ebinuu.+ Ewo lɛ Mose* ni ekɛɛ: “Ejaakɛ mijie lɛ kɛjɛ nu mli.”+ 11  Agbɛnɛ, be ni Mose bada* lɛ, eje kpo etee enyɛmimɛi lɛ aŋɔɔ koni eyakwɛ nitsumɔi ni wala ni amɛtsuɔ lɛ,+ ni ehiŋmɛi gba Ejiptnyo ko ní miiyi Hebrinyo, ni ji enyɛmimɛi lɛ ateŋ mɔ kome lɛ nɔ. 12  No hewɔ lɛ, ekwɛ biɛ kɛ biɛ, ni be ni enaaa mɔ ko lɛ, egbe Ejiptnyo lɛ ni eŋɔ lɛ etee shia lɛ mli.+ 13  Shi enɔ jetsɛremɔ lɛ, eje kpo, ni naa, Hebri hii enyɔ ní miinɔ. No hewɔ lɛ, ekɛɛ mɔ ni sane ejaaa lɛ akɛ: “Mɛni hewɔ ni oyiɔ onaanyo lɛ?”+ 14  Kɛkɛ ni ekɛɛ: “Namɔ wó bo wɔnɔ lumɔ kɛ kojolɔ? Ani ootao ogbe mi tamɔ ogbe Ejiptnyo lɛ?”+ Agbɛnɛ, Mose she gbeyei ni ekɛɛ: “Ekã shi faŋŋ akɛ, anu sane lɛ he!” 15  Kɛkɛ ni Farao nu sane lɛ he, ni eka akɛ ebaagbe Mose; shi Mose jo foi yɛ Farao hiɛ ni etee eyahi Midian+ shikpɔŋ lɛ nɔ, ni eyata nubu ko he. 16  No mli lɛ, Midian osɔfo+ lɛ yɛ biyei kpawo, ni amɛba koni amɛbasha nu amɛwo nunumɔnii lɛ amli obɔbɔ koni amɛpapa toi lɛ anu. 17  Shi tookwɛlɔi lɛ bashwie amɛ yɛ jɛmɛ, tamɔ bɔ ni amɛfɔɔ feemɔ lɛ. Kɛkɛ ni Mose te shi ni eye ebua yei lɛ,* ni ehã amɛtoi lɛ nu. 18  Be ni amɛba amɛpapa Reuel*+ ŋɔɔ yɛ shĩa lɛ, ebo ekɛɛ: “Te fee tɛŋŋ ni ŋmɛnɛ lɛ nyɛba shĩa mra nɛkɛ?” 19  Amɛhã hetoo akɛ: “Ejiptnyo+ ko here wɔ yɛ tookwɛlɔi lɛ adɛŋ, ni esha nu po ehã wɔ, ni ehã toi lɛ nu.” 20  Ekɛɛ ebiyei lɛ akɛ: “Shi nɛgbɛ lɛ yɔɔ? Mɛni hewɔ nyɛshi nuu lɛ yɛ jɛmɛ lɛ? Nyɛyatsɛa lɛ kɛbaa koni ekɛ wɔ abaye nii.” 21  No sɛɛ lɛ, Mose kpɛlɛ akɛ ebaahi nuu lɛ ŋɔɔ, ni nuu lɛ kɛ ebiyoo Zipora+ hã Mose gbãla. 22  Sɛɛ mli lɛ, yoo lɛ fɔ binuu, ni Mose wo lɛ Gershom,*+ ejaakɛ ekɛɛ, “Mitsɔ gbɔ yɛ maŋsɛɛ shikpɔŋ nɔ.”+ 23  Be kplaŋŋ* sɛɛ lɛ, Ejipt maŋtsɛ lɛ bagbo,+ shi Israelbii lɛ tee nɔ amɛkɛ̃mɔ yɛ nyɔŋ ní ayeɔ amɛ lɛ hewɔ, ni amɛbolɔ yɛ amɛwerɛ ní eho amɛhe lɛ hewɔ,* ni bolɔmɔ ní amɛbolɔɔ daa koni abaye abua amɛ yɛ nyɔŋ ni ayeɔ amɛ lɛ hewɔ lɛ yashɛ anɔkwa Nyɔŋmɔ lɛ ŋɔɔ.+ 24  Sɛɛ mli lɛ, Nyɔŋmɔ nu amɛkɛ̃ɛmɔ lɛ,+ ni Nyɔŋmɔ kai kpaŋmɔ ni ekɛ Abraham kɛ Isak kɛ Yakob kpaŋ lɛ.+ 25  No hewɔ lɛ, Nyɔŋmɔ kwɛ Israelbii lɛ; ni Nyɔŋmɔ gbala ejwɛŋmɔ kɛba amɛshihilɛ lɛ nɔ.

Shishigbɛ Niŋmaa

Loo “seshinyo.”
Eji pamplo henɔ ko ni kwɛ̃ɔ yɛ hei ni nu yɔɔ.
Loo “adeka.”
Gãlã ji jwɛi henɔ ko ni tamɔ shɛ̃, ní kwɛ̃ɔ yɛ hei ni nu taa loo fai atoi. Kwɛmɔ Wiemɔi Titrii Amligbalamɔ lɛ.
Eshishi ji, “Ajie Lɛ,” ni tsɔɔ akɛ, ahere eyiwala kɛjɛ nu mli.
Loo “be ni Mose he waa.”
Loo “efã yei lɛ ahe.”
Ni ji, Yetro.
Eshishi ji, “Mɔ Ko Ní Eyato Gbɔ Yɛ Jɛmɛ.”
Hebri sht. ŋm., “Gbii babaoo.”
Loo “ni amɛfó amɛkɛɛkɛɛ amɛnaa nii.”