2 Mose 19:1-25

  • Sinai Gɔŋ lɛ he (1-25)

    • Israel baatsɔ osɔfoi ni ji maŋtsɛmɛi (5, 6)

    • Afee maŋbii lɛ krɔŋkrɔŋ koni amɛkɛ Nyɔŋmɔ ayakpe (14, 15)

19  Yɛ nyɔɔŋ ni ji etɛ lɛ nɔ kɛjɛ be ni Israelbii lɛ shi Ejipt shikpɔŋ lɛ nɔ lɛ, amɛbashɛ Sinai ŋa lɛ nɔ yɛ nakai gbi lɛ nɔ nɔŋŋ.*  Amɛfã kɛjɛ Refidim+ ni amɛba Sinai ŋa lɛ nɔ, ni amɛbɔ nsara yɛ ŋa lɛ nɔ. Israel bɔ nsara yɛ jɛmɛ, yɛ gɔŋ lɛ hiɛ.+  Ni Mose kwɔ kɛtee anɔkwa Nyɔŋmɔ lɛ ŋɔɔ, ni Yehowa tsɛ lɛ kɛjɛ gɔŋ lɛ nɔ+ ekɛɛ: “Nɔ ni okɛɛ Yakob shĩa lɛ, ni ojaje otsɔɔ Israelbii lɛ nɛ,  ‘Nyɛ diɛŋtsɛ nyɛna nɔ ni mifee Ejiptbii lɛ.+ Mifee nakai bɔ ni afee ni mawó nyɛ, tamɔ bɔ ni okropɔŋ wóɔ ebii yɛ efiji anɔ lɛ, koni mikɛ nyɛ aba miŋɔɔ.+  Agbɛnɛ, kɛ́ nyɛbaabo migbee toi kɛmɔ shi, ni nyɛbaaye mikpaŋmɔ lɛ nɔ lɛ, no lɛ, bɔ fɛɛ bɔ ni fee lɛ, nyɛbaatsɔ minii ni mishwɛɛɛ he kwraa yɛ maji fɛɛ ateŋ,+ ejaakɛ shikpɔŋ lɛ fɛɛ lɛ, minɔ ni.+  Nyɛbaatsɔmɔ osɔfoi ni ji maŋtsɛmɛi* kɛ jeŋmaŋ krɔŋkrɔŋ nyɛhã mi.’+ Enɛɛmɛi ji nɔ ni okɛɛ Israelbii lɛ.”  No hewɔ lɛ, Mose tee eyatsɛ Israel onukpai lɛ ni ekɛɛ amɛ nibii nɛɛ fɛɛ ni Yehowa efã lɛ akɛ ekɛɛ amɛ lɛ.+  No sɛɛ lɛ, Israelbii lɛ fɛɛ kɛ gbee kome kɛɛ akɛ: “Nibii fɛɛ ni Yehowa ewie lɛ, wɔbaafee.”+ Amrɔ nɔŋŋ lɛ, Mose tee eyakɛɛ Yehowa nɔ ni Israelbii lɛ wie lɛ.  Ni Yehowa kɛɛ Mose akɛ: “Naa! Miiba oŋɔɔ yɛ atatu kpii mli, koni kɛ́ mikɛ bo wie lɛ, Israelbii lɛ anu ní amɛhe bo hu amɛye* be fɛɛ be.” Kɛkɛ ni Mose kɛɛ Yehowa nɔ ni Israelbii lɛ wie lɛ. 10  Ni Yehowa kɛɛ Mose akɛ: “Yaa maŋbii lɛ aŋɔɔ ni oyafee amɛ krɔŋkrɔŋ ŋmɛnɛ kɛ wɔ́, ní ohã amɛfɔ amɛtadei ahe. 11  Ni amɛsaa amɛhe amɛto gbi ni ji etɛ lɛ, ejaakɛ gbi ni ji etɛ lɛ nɔ lɛ, Yehowa baakpeleke shi kɛba Sinai Gɔŋ lɛ nɔ yɛ maŋbii lɛ fɛɛ ahiɛ. 12  Foo husui owo gɔŋ lɛ he fɛɛ kɛtsĩ maŋbii lɛ anaa, ni okɛɛ amɛ akɛ, ‘Nyɛkwɛa ni ahia koni nyɛkakwɔa gɔŋ lɛ, ni nyɛkataa ehusu lɛ hu he. Mɔ fɛɛ mɔ ni baata gɔŋ lɛ he lɛ, bɔ fɛɛ bɔ ni fee lɛ, abaagbe lɛ. 13  Mɔ ko mɔ ko kɛ enine akata nakai mɔ lɛ he, shi moŋ, abaatswia lɛ tɛi loo akɛ nɔ ko baatsu emli.* Kooloo ni jio, gbɔmɔ ni jio, akahã ehi wala mli.’+ Shi kɛ́ akpã tɛtɛrɛmantɛrɛ*+ lɛ, amɛba gɔŋ lɛ he.” 14  Ni Mose kpeleke shi kɛjɛ gɔŋ lɛ nɔ kɛba maŋbii lɛ aŋɔɔ, ni efee amɛ krɔŋkrɔŋ, ni amɛfɔ amɛtadei lɛ ahe.+ 15  Ekɛɛ maŋbii lɛ akɛ: “Nyɛsaa nyɛhe nyɛtoa gbi ni ji etɛ lɛ. Nyɛtsia nyɛhe kɛjea bɔlɛnamɔ he.”* 16  Gbi ni ji etɛ lɛ nɔ leebi lɛ, nugbɔ shimɔ ni sarawai gbála, ni atatu kpii+ baha gɔŋ lɛ nɔ, ni anu tɛtɛrɛmantɛrɛ* gbɛɛmɔ ni naa wa waa diɛŋtsɛ, ni maŋbii lɛ fɛɛ ni yɔɔ nsara lɛ mli lɛ ahe bɔi kpokpomɔ.+ 17  Agbɛnɛ, Mose kɛ maŋbii lɛ je kpo kɛjɛ nsara lɛ mli koni amɛkɛ anɔkwa Nyɔŋmɔ lɛ ayakpe, ni amɛyadamɔ gɔŋ lɛ shishi. 18  Sinai Gɔŋ lɛ fɛɛ je lasu, ejaakɛ Yehowa kpeleke shi kɛba gɔŋ lɛ nɔ yɛ la mli;+ ni gɔŋ lɛ lasu lɛ miite shi kɛmiiya ŋwɛi tamɔ flɔnɔɔ* mli lasu, ni gɔŋ muu lɛ fɛɛ miihoso waa diɛŋtsɛ.+ 19  Be ni tɛtɛrɛmantɛrɛ* lɛ yaa nɔ egbɛɔ waa lɛ, Mose wie, ni anɔkwa Nyɔŋmɔ lɛ here lɛ nɔ.* 20  No hewɔ lɛ, Yehowa kpeleke shi kɛba Sinai Gɔŋ lɛ nɔ yɛ gɔŋ lɛ yiteŋ. Kɛkɛ ni Yehowa tsɛ Mose akɛ eba gɔŋ lɛ yiteŋ, ni Mose kwɔ kɛtee.+ 21  Agbɛnɛ, Yehowa kɛɛ Mose akɛ: “Kpelekemɔ shi kɛya ni oyabɔ maŋbii lɛ kɔkɔ akɛ, amɛkaka akɛ amɛbaatsi amɛbɛŋkɛ Yehowa ni amɛkwɛ lɛ, ejaakɛ kɛ́ amɛfee nakai lɛ, amɛteŋ mɛi babaoo ahiɛ baakpãtã. 22  Ni ohã hii ni sɔmɔɔ akɛ osɔfoi ni baa Yehowa ŋɔɔ daa lɛ afee amɛhe krɔŋkrɔŋ, koni Yehowa akatswia amɛ nii.”+ 23  Ni Mose kɛɛ Yehowa akɛ: “Maŋbii lɛ nyɛŋ amɛkwɔ kɛba Sinai Gɔŋ lɛ nɔ, ejaakɛ obɔ wɔ kɔkɔ momo akɛ, ‘Foo husu owo gɔŋ lɛ he, ni ofee gɔŋ lɛ krɔŋkrɔŋ.’”+ 24  Kɛ̃lɛ, Yehowa kɛɛ lɛ akɛ: “Kpelekemɔ shi kɛya, ni oku osɛɛ oba ekoŋŋ, ni kɛ́ ooba lɛ, okɛ Aaron aba, shi kaahã osɔfoi lɛ kɛ maŋbii lɛ ka akɛ amɛbaakwɔ kɛba Yehowa ŋɔɔ, koni ekatswia amɛ nii.”+ 25  No hewɔ lɛ, Mose kpeleke shi kɛtee maŋbii lɛ aŋɔɔ ni eyakɛɛ amɛ.

Shishigbɛ Niŋmaa

Eeenyɛ efee akɛ, wiemɔ ni ji “yɛ nakai gbi lɛ nɔ nɔŋŋ” lɛ tsɔɔ akɛ amɛyashɛ jɛmɛ yɛ gbi ni amɛshi Refidim lɛ nɔ nɔŋŋ.
Loo “maŋtsɛyeli ni enɔ maŋtsɛmɛi ji osɔfoi.”
Loo “ní amɛná hemɔkɛyeli yɛ bo hu omli.”
Loo “abaatsɛ̃ lɛ gãi.”
Hebri sht. ŋm., “gwantɛŋnuu akolonto.”
Hebri sht. ŋm., “Nyɛkayaa yoo ko ŋɔɔ.”
Hebri sht. ŋm., “akolonto.”
Ni ji, flɔnɔɔ ní akɛshãa brik kɛ kã kɛ gbɛ́ kɛ sũ nibii krokomɛi.
Hebri sht. ŋm., “akolonto.”
Hebri sht. ŋm., “ni anɔkwa Nyɔŋmɔ lɛ gbee here lɛ nɔ.”