2 Mose 13:1-22

  • Kromɔbi fɛɛ kromɔbi ni ji nuu lɛ, Yehowa nɔ ni (1, 2)

  • Blodo Ni Ashikishaŋ-sha Bɛ Mli Gbi Jurɔ (3-10)

  • Atu kromɔbi fɛɛ kromɔbi ni ji nuu ahã Nyɔŋmɔ (11-16)

  • Ahã Israel kɛ ehiɛ tsɔɔ Ŋshɔ Tsuru lɛ naa gbɛ (17-20)

  • Atatu kɛ la ni damɔ shi jaŋŋ (21, 22)

13  Yehowa kɛ Mose wie ekoŋŋ ekɛɛ:  “Feemɔ kromɔbi fɛɛ kromɔbi ni ji nuu* yɛ Israelbii lɛ ateŋ lɛ krɔŋkrɔŋ ohã mi.* Nuu fɛɛ nuu ni abaafɔ klɛŋklɛŋ lɛ, gbɔmɔ jio, kooloo jio, minɔ ni.”+  Kɛkɛ ni Mose kɛɛ Israelbii lɛ akɛ: “Nyɛkaia nɛkɛ gbi nɛɛ, ni ji gbi nɔ ni nyɛje Ejipt,+ nyɔŋyeli shĩa lɛ, ejaakɛ nineshiwalɛ Yehowa kɛjie nyɛ kɛje biɛ.+ No hewɔ lɛ, nyɛkayea ashikishaŋ-sha* nii ko kwraa.  Nyɛmiije Ejipt ŋmɛnɛ gbi nɛɛ, yɛ Abib nyɔɔŋ lɛ nɔ.*+  Kɛ́ Yehowa kɛ nyɛ yashɛ Kanaanbii kɛ Hitbii kɛ Amorbii kɛ Hivbii kɛ Yebusbii lɛ ashikpɔŋ+ ní ekã nyɛtsɛmɛi lɛ kitã akɛ ekɛbaahã nyɛ lɛ nɔ,+ shikpɔŋ ni mliki kɛ wo hoɔ yɛ nɔ lɛ,+ no lɛ, nyɛyaa nɔ nyɛyea gbi jurɔ nɛɛ yɛ nyɔɔŋ nɛɛ nɔ.  Nyɛyea blodo ni ashikishaŋ-sha* bɛ mli gbii kpawo,+ ni gbi ni ji kpawo lɛ nɔ lɛ, nyɛyea gbi jurɔ nyɛhãa Yehowa.  Gbii kpawo lɛ amli lɛ, nyɛyea blodo ni ashikishaŋ-sha* bɛ mli;+ akana ashikishaŋ-sha nii ko kwraa yɛ nyɛŋɔɔ,+ ni akana ashikishaŋ-sha hu yɛ nyɛkpokpaa lɛ nɔ fɛɛ.*  Ni okɛɛ obi* yɛ nakai gbi lɛ nɔ akɛ, ‘Nɔ ni Yehowa fee ehã mi be ni mishiɔ Ejipt lɛ hewɔ mifeɔ enɛ lɛ.’+  Ni enɛ atsɔ tamɔ okadi ko ni fi onine, kɛ kaimɔ nɔ yɛ ohiɛnaa,*+ koni Yehowa mla lɛ akã odaaŋ, ejaakɛ nineshiwalɛ Yehowa kɛjie bo kɛje Ejipt. 10  Ye mla nɛɛ nɔ daa afi, yɛ ebe ni ato lɛ mli.+ 11  “Kɛ́ Yehowa kɛ bo yashɛ Kanaanbii lɛ ashikpɔŋ ní ekã bo kɛ otsɛmɛi lɛ kitã akɛ ekɛbaahã bo lɛ nɔ lɛ,+ 12  jɔɔmɔ kromɔbi fɛɛ kromɔbi ni ji nuu,* kɛ lɛɛ kooloi ni obaaná lɛ hu akromɔ bihii fɛɛ anɔ ohã Yehowa. Hii lɛ, Yehowa nii ni.+ 13  Teji kromɔbi fɛɛ kromɔbi lɛ, okɛ too akpɔ̃ lɛ, ni kɛ́ okpɔ̃ɔɔ lɛ lɛ, no lɛ, kuu ekuɛŋ. Ni obinuu fɛɛ obinuu ni ji kromɔ lɛ, kpɔ̃ lɛ.+ 14  “Kɛji obi* aaabi bo wɔsɛɛ ko akɛ, ‘Mɛni ji gbi jurɔ nɛɛ shishi?’ lɛ, no lɛ, kɛɛmɔ lɛ akɛ, ‘Nineshiwalɛ Yehowa kɛjie wɔ kɛje Ejipt, kɛje nyɔŋyeli shĩa lɛ.+ 15  Be ni Farao kɛ kuɛŋtimɔ ekpɛlɛɛɛ ni wɔya lɛ,+ Yehowa gbe kromɔbi fɛɛ kromɔbi ni yɔɔ Ejipt shikpɔŋ lɛ nɔ lɛ, kɛjɛ gbɔmɔ kromɔbi nɔ kɛyashi kooloo kromɔbi nɔ.+ No hewɔ ni mikɛ bihii fɛɛ ni ji kromɔbii* lɛ hãa Yehowa akɛ afɔle, ni mikpɔ̃ɔ mibihii fɛɛ ni ji kromɔbii lɛ.’ 16  Enɛ atsɔ tamɔ okadi ko ni fi onine, kɛ yitsofiinɔ yɛ ohiɛnaa,*+ ejaakɛ nineshiwalɛ Yehowa kɛjie wɔ kɛje Ejipt.” 17  Agbɛnɛ, be ni Farao ŋmɛɛ maŋ lɛ he ní amɛya lɛ, Nyɔŋmɔ kɛ amɛ tsɔɔɔ gbɛ ni tsɔɔ Filistibii lɛ ashikpɔŋ lɛ nɔ lɛ nɔ, eyɛ mli moŋ akɛ jɛmɛ gbɛ lɛ jekɛɛɛ. Ejaakɛ Nyɔŋmɔ kɛɛ: “Kɛ́ maŋ lɛ kɛ ta yakpe lɛ, ekolɛ amɛbaatsake amɛjwɛŋmɔ ni amɛbaaku amɛsɛɛ kɛya Ejipt.” 18  No hewɔ lɛ, Nyɔŋmɔ hã gbɔmɛi lɛ lɔgɔ shi kɛyatsɔ ŋa ni kã Ŋshɔ Tsuru lɛ naa lɛ nɔ.+ Shi Israelbii lɛ shi Ejipt shikpɔŋ lɛ nɔ akɛ mɛi ni ato amɛhe gbɛjianɔ jogbaŋŋ, oookɛɛ asraafoi akui. 19  Mose loo Yosef wui lɛ hu kɛtee, ejaakɛ Yosef hã Israelbii lɛ kã lɛ kitã ni yɔɔ hiɛdɔɔ, ekɛɛ: “Bɔ fɛɛ bɔ ni fee lɛ, Nyɔŋmɔ baagbala ejwɛŋmɔ kɛba nyɛnɔ, ni nyɛloa miwui lɛ kɛjea biɛ kɛyaa.”+ 20  Amɛyi mli kɛjɛ Sukot ni amɛyabɔ nsara yɛ Etam, yɛ ŋa lɛ naa gbɛ. 21  Kɛ́ je tsɛre lɛ, Yehowa nyiɛɔ amɛhiɛ yɛ atatu ni damɔ shi jaŋŋ mli yɛ gbɛ lɛ nɔ,+ ni kɛ́ je na lɛ, enyiɛɔ amɛhiɛ yɛ la ni damɔ shi jaŋŋ mli koni no ahã amɛ kane, bɔ ni afee ni amɛnyɛ amɛnyiɛ be ni je etsɛre kɛ be ni je ena.+ 22  Kɛ́ je tsɛre lɛ, atatu ni damɔ shi jaŋŋ lɛ ejeee Israelbii lɛ ahiɛ, ni kɛ́ je na hu, la ni damɔ shi jaŋŋ lɛ ejeee amɛhiɛ.+

Shishigbɛ Niŋmaa

Hebri sht. ŋm., “kromɔbi fɛɛ kromɔbi ni gbeleɔ musu fɛɛ musu naa.”
Loo “Jɔɔmɔ kromɔbi fɛɛ kromɔbi ni ji nuu yɛ Israelbii lɛ ateŋ lɛ nɔ ohã mi.”
Hebri sht. ŋm., “nyɛhusui lɛ amli.”
Hebri sht. ŋm., “obinuu.”
Hebri sht. ŋm., “yɛ ohiŋmɛii ateŋ.”
Hebri sht. ŋm., “mɔ fɛɛ mɔ ni gbeleɔ musu naa.”
Hebri sht. ŋm., “obinuu.”
Hebri sht. ŋm., “nɔ fɛɛ nɔ ni gbeleɔ musu naa.”
Hebri sht. ŋm., “yɛ ohiŋmɛii ateŋ.”