2 Mose 1:1-22
1 Agbɛnɛ, Israel bihii ní kɛ Yakob ba Ejipt lɛ agbɛ́ii nɛ; amɛteŋ mɔ fɛɛ mɔ kɛ eshĩabii:+
2 Ruben kɛ Simeon kɛ Levi kɛ Yuda;+
3 Isakar kɛ Zebulon kɛ Benyamin;
4 Dan kɛ Naftali; Gad kɛ Asher.+
5 Ni mɛi* fɛɛ ní afɔ ahã Yakob* ji mɛi* 70, shi no mli lɛ Yosef yɛ Ejipt momo.+
6 Sɛɛ mli lɛ, Yosef bagbo,+ ni enyɛmimɛi lɛ fɛɛ kɛ nakai yinɔbii lɛ fɛɛ hu bagboi.
7 Ni Israelbii* lɛ fɔfɔɔ ni amɛyi bɔi famɔ waa, ni amɛtee nɔ amɛná hewalɛ waa diɛŋtsɛ, ni amɛshwere oyayaayai, no hewɔ lɛ, amɛyi shikpɔŋ lɛ nɔ obɔ.+
8 Be ni be shwie mli lɛ, maŋtsɛ hee ko ní leee Yosef baye Ejipt nɔ.
9 No hewɔ lɛ, ekɛɛ emaŋbii lɛ akɛ: “Naa! Israelbii lɛ ayi fa ni amɛhe wa kwraa fe wɔ.+
10 Nyɛhãa wɔkɛ amɛ ayea yɛ ŋaa* mli. Kɛjeee nakai lɛ, amɛbaaya nɔ amɛshwere, ni kɛ́ ta ko ba lɛ, amɛbaayafata wɔhenyɛlɔi lɛ ahe kɛwu amɛshi wɔ, ni amɛbaashi maŋ lɛ mli.”
11 No hewɔ lɛ, amɛhole nitsumɔ nɔkwɛlɔi* amɛto amɛnɔ koni amɛkɛ nitsumɔi ni wala awa amɛ yi,+ ni amɛmamɔ maji ní akɛbaafee nitoohei amɛhã Farao, ni maji nɛɛ ji Pitom kɛ Raamses.+
12 Shi babaoo ní amɛwaa amɛ yi lɛ, babaoo ní amɛshwereɔ ní amɛyaa nɔ amɛgbɛɔ amɛshwãa ji no, no hewɔ lɛ, gbeyei kpele mɔmɔ amɛ yɛ Israelbii lɛ ahewɔ.+
13 Enɛ hewɔ lɛ, Ejiptbii lɛ nyɛ Israelbii lɛ anɔ akɛ nyɔji koni amɛtsu nitsumɔ ni wa.+
14 Amɛhã shihilɛ je amɛtsine, ejaakɛ amɛhã amɛkpɔtɔ sũ ni amɛfolɔ brikii,* ni amɛtsu ŋmɔshi nitsumɔi srɔtoi fɛɛ ní nyɔji tsuɔ lɛ. Hɛɛ, amɛhã amɛtsu nitsumɔi srɔtoi fɛɛ ní nyɔji tsuɔ lɛ yɛ shihilɛi ní mli wawai amli.+
15 Sɛɛ mli lɛ, Ejipt maŋtsɛ lɛ kɛ Hebri yei ní atsɛɔ amɛ Shifra kɛ Pua, ní fɔɔ mɛi lɛ wie,
16 ni ekɛɛ amɛ akɛ: “Kɛ́ nyɛmiifɔ Hebri yei lɛ,+ nyɛkwɛa bi ni amɛfɔ* lɛ; kɛ́ nuu ni lɛ, nyɛgbea lɛ, shi kɛ́ yoo ni lɛ, ehi shi.”
17 Shi yei ní fɔɔ mɛi lɛ yashe anɔkwa Nyɔŋmɔ lɛ gbeyei, ni amɛfeee nɔ ni Ejipt maŋtsɛ lɛ kɛɛ amɛ lɛ. Shi moŋ, amɛbaa gbekɛbii hii lɛ awala yi.+
18 Sɛɛ mli lɛ, Ejipt maŋtsɛ lɛ tsɛ yei ní fɔɔ mɛi lɛ, ni ebi amɛ akɛ: “Mɛni hewɔ nyɛbaa gbekɛbii hii lɛ awala yi lɛ?”
19 Yei ní fɔɔ mɛi lɛ kɛɛ Farao akɛ: “Hebri yei lɛ tamɔɔɔ Ejipt yei lɛ. Amɛ lɛ, amɛyɛ kamkam, ni be ni yoo ní fɔɔ mɔ lɛ baakɛɛ eshɛɔ amɛŋɔɔ lɛ, amɛfɔ momo.”
20 No hewɔ lɛ, Nyɔŋmɔ kɛ yei nɛɛ ní fɔɔ mɛi lɛ ye jogbaŋŋ, ni gbɔmɛi lɛ ayi tee nɔ efa, ni amɛhe bawa waa.
21 Ni akɛni yei ní fɔɔ mɛi lɛ yashe anɔkwa Nyɔŋmɔ lɛ gbeyei hewɔ lɛ, sɛɛ mli lɛ edro amɛ wekui.
22 Naagbee lɛ, Farao fã emaŋbii lɛ fɛɛ akɛ: “Binuu fɛɛ binuu ní Hebribii lɛ baafɔ lɛ, nyɛshɛa lɛ nyɛfɔ̃a Nilo Faa lɛ mli, shi nyɛbaa biyoo fɛɛ biyoo wala yi.”+
Shishigbɛ Niŋmaa
^ Loo “susumai.”
^ Hebri sht. ŋm., “ní jɛ Yakob shuɔ mli.”
^ Loo “susumai.”
^ Hebri sht. ŋm., “Israel bihii.”
^ Loo “hiɛtɛ̃ɛ.”
^ Loo “onukpai ni hãa atsuɔ nitsumɔ dɛŋdɛŋ.”
^ Loo “ntayai.”
^ Hebri sht. ŋm., “ni nyɛna amɛ yɛ fɔmɔ sɛi lɛ nɔ.”
