2 Kronika 8:1-18

  • Nibii krokomɛi ni Solomon fee (1-11)

  • Ato jamɔ yɛ sɔlemɔ shĩa lɛ he gbɛjianɔ (12-16)

  • Solomon meelei lɛ (17, 18)

8  Yɛ afii 20 ni Solomon kɛma Yehowa shĩa lɛ, kɛ lɛ diɛŋtsɛ emaŋtsɛ shĩa lɛ sɛɛ lɛ,+  Solomon tswa maji ni Hiram+ kɛhã lɛ lɛ ekoŋŋ ni Solomon hã Israelbii lɛ yahi jɛmɛ.  Agbɛnɛ hu, Solomon tee Hamat-zoba ni eyaye amɛnɔ kunim.  Kɛkɛ ni etswa gbogbo ewo Tadmor he* yɛ ŋa lɛ nɔ, ni etswa gbogbo ewo maji fɛɛ ni eto shishi yɛ Hamat+ ni ekɛ nibii toɔ mli+ lɛ he.  Agbɛnɛ hu, Solomon tswa Gɔŋnɔgbɛ Bet-horon+ kɛ Jɔɔŋgbɛ Bet-horon,*+ ni ji maji ni atswa gbogboi awo amɛhe, ni ata amɛnaa agbói kɛ amɛsɛɛ adabaŋi* lɛ,  ni etswa gbogbo ewo Baalat+ kɛ maji ni ekɛ nibii toɔ mli lɛ fɛɛ, shwiilii amaji lɛ,+ okpɔŋɔnɔtaralɔi amaji lɛ, kɛ nɔ fɛɛ nɔ ni Solomon sumɔɔ akɛ ema yɛ Yerusalem, yɛ Lebanon, kɛ agbɛnɛ hu yɛ shikpɔji fɛɛ ni yɔɔ eshishi lɛ mli lɛ ahe.  Shi Hitbii lɛ kɛ Amorbii lɛ kɛ Perizbii lɛ kɛ Hivbii lɛ kɛ Yebusbii+ lɛ ateŋ mɛi fɛɛ ni shwɛ ni fataaa Israelbii lɛ ahe lɛ,+  amɛseshibii ni shwɛ yɛ shikpɔŋ lɛ nɔ lɛ—ni ji mɛi ni Israelbii lɛ kpãtãaa amɛhiɛ lɛ+—Solomon nyɛ amɛnɔ kɛhã nitsumɔ kɛbashi ŋmɛnɛ.+  Shi Solomon efeee Israelbii lɛ ateŋ mɔ ko mɔ ko nyɔŋ koni etsu nii ehã lɛ,+ shi moŋ amɛji etawulɔi kɛ etsuji kɛ elumɛi kɛ esafoiatsɛmɛi kɛ eshwiilii kɛ ekpɔŋɔnɔtaralɔi lɛ anɔkwɛlɔi.+ 10  Ayɛ nɔkwɛlɔi anɔ onukpai 250 ni kwɛɔ Maŋtsɛ Solomon nitsumɔ lɛ nɔ, ni ji mɛi ni kwɛɔ mɛi lɛ anɔ.+ 11  Agbɛnɛ hu, Solomon kɛ Farao biyoo+ lɛ jɛ David Maŋ lɛ mli ni ekɛ lɛ kwɔ kɛba shĩa ni Solomon ema ehã lɛ lɛ mli,+ ejaakɛ ekɛɛ akɛ: “Eyɛ mli akɛ miŋa ni moŋ shi esaaa akɛ ehiɔ Israel maŋtsɛ David shĩa lɛ mli, ejaakɛ he fɛɛ he ni akɛ Yehowa Adeka lɛ ema lɛ yɛ krɔŋkrɔŋ.”+ 12  Kɛkɛ ni Solomon shã shãa afɔlei+ ehã Yehowa yɛ afɔleshaa latɛ+ ni ema ehã Yehowa yɛ ablanaa+ lɛ hiɛ lɛ nɔ. 13  Efee nɔ ni afeɔ daa gbi lɛ ni eshã afɔlei tamɔ bɔ ni Mose fã ni afee yɛ Hejɔɔmɔ Gbii,+ kɛ nyɔɔŋtsere hei,+ kɛ gbii juji etɛ ni ayeɔ daa afi,+ ni ji Blodo Ni Ashikishaŋ-sha* Bɛ Mli Gbi Jurɔ+ lɛ, kɛ Otsii Agbi Jurɔ+ lɛ, kɛ Agbai Agbi Jurɔ+ lɛ nɔ lɛ. 14  Agbɛnɛ hu eto osɔfoi lɛ anaa kuikui+ yɛ amɛnitsumɔi lɛ anaa tamɔ bɔ ni etsɛ David wo mla lɛ, ni eto Levibii lɛ hu anaa yɛ amɛnitsumɔi lɛ anaa, koni amɛjie Nyɔŋmɔ yi,+ ni amɛsɔmɔ yɛ osɔfoi lɛ ahiɛ tamɔ bɔ ni afeɔ daa gbi lɛ, ni eto agbonaakwɛlɔi lɛ hu anaa yɛ kuikui amli kɛhã agbói srɔtoi lɛ,+ ejaakɛ nakai ji bɔ ni David, anɔkwa Nyɔŋmɔ lɛ gbɔmɔ lɛ fã ni afee. 15  Ni amɛgbaaa afã kɛjeee famɔ ni maŋtsɛ lɛ kɛhã osɔfoi lɛ kɛ Levibii lɛ he yɛ sane ko sane ko mli loo yɛ nitoohei lɛ ahe. 16  No hewɔ lɛ, Solomon to enitsumɔi lɛ fɛɛ ahe gbɛjianɔ jogbaŋŋ,* kɛjɛ gbi ni ato Yehowa shĩa lɛ faneshi lɛ shishi+ kɛyashi gbi ni agbe nitsumɔ lɛ fɛɛ naa. No hewɔ lɛ, ama Yehowa shĩa lɛ agbe naa.+ 17  Nakai beiaŋ ni Solomon tee Ezion-geber+ kɛ Elot+ ni yɔɔ ŋshɔ lɛ naa yɛ Edom shikpɔŋ lɛ nɔ lɛ.+ 18  Hiram+ kɛ meelei kɛ hii ni le ŋshɔ hiɛ nitsumɔ waa tsu lɛ diɛŋtsɛ etsuji kɛtee kɛyahã Solomon. Amɛfata Solomon tsuji lɛ ahe kɛtee Ofir+ ni amɛyaloo shika tsuru+ talɛntai* 450 kɛjɛ jɛmɛ ni amɛkɛbahã Maŋtsɛ Solomon.+

Shishigbɛ Niŋmaa

Loo “etswa Tadmor ekoŋŋ.”
Loo “Etswa gbogbo ewo Gɔŋnɔgbɛ Bet-horon kɛ Jɔɔŋgbɛ Bet-Horon he ekoŋŋ.”
Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
Loo “Solomon gbe enitsumɔi lɛ fɛɛ anaa.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.