2 Kronika 36:1-23

  • Yehoahaz batsɔ Yuda maŋtsɛ (1-3)

  • Yehoiakim batsɔ Yuda maŋtsɛ (4-8)

  • Yehoiakin batsɔ Yuda maŋtsɛ (9, 10)

  • Zedekia batsɔ Yuda maŋtsɛ (11-14)

  • Yerusalem hiɛkpatamɔ lɛ (15-21)

  • Koresh fã koni asaa ama sɔlemɔ shĩa lɛ (22, 23)

36  Kɛkɛ ni shikpɔŋ lɛ nɔ bii lɛ mɔ Yosia binuu Yehoahaz+ ni amɛwó lɛ maŋtsɛ yɛ etsɛ sɛɛ yɛ Yerusalem.+  Be ni Yehoahaz batsɔ maŋtsɛ lɛ, no mli lɛ, eye afii 23, ni eye nɔ nyɔji etɛ yɛ Yerusalem.  Shi Ejipt maŋtsɛ lɛ hã ekpa maŋtsɛ lɛ yeli yɛ Yerusalem, ni ebi ni maŋ* lɛ abahã lɛ jwiɛtɛi talɛntai* 100 kɛ shika tsuru talɛnta kome.+  Agbɛnɛ hu, Ejipt maŋtsɛ lɛ wó Yehoahaz nyɛmi nuu Eliakim maŋtsɛ yɛ Yuda kɛ Yerusalem nɔ, ni etsake egbɛ́i ni ewo lɛ Yehoiakim; shi Neko+ mɔ enyɛmi nuu Yehoahaz ni ekɛ lɛ tee Ejipt.+  Be ni Yehoiakim+ batsɔ maŋtsɛ lɛ, no mli lɛ, eye afii 25, ni eye nɔ afii 11 yɛ Yerusalem. Etee nɔ efee efɔŋ yɛ Yehowa, e-Nyɔŋmɔ lɛ hiɛ.+  Babilon maŋtsɛ Nebukadnezar+ kwɔ kɛba ni ekɛ lɛ bawu koni ekɛ akɔɔble gboklɛi enyɔ abawo lɛ ni ekɛ lɛ aya Babilon.+  Ni Nebukadnezar loo Yehowa shĩa lɛ nibii lɛ ekomɛi kɛtee Babilon ni ekɛyawo emaŋtsɛ shĩa lɛ mli yɛ Babilon.+  Shi Yehoiakim shihilɛ mli saji krokomɛi fɛɛ, nyaŋemɔ nibii ni efee kɛ nibii gbohii krokomɛi ni efee ni ana lɛ, aŋmala yɛ Israel Maŋtsɛmɛi Awolo lɛ kɛ Yuda Maŋtsɛmɛi Awolo lɛ mli; ni ebinuu Yehoiakin baye maŋtsɛ yɛ esɛɛ.+  Be ni Yehoiakin+ batsɔ maŋtsɛ lɛ, no mli lɛ, eye afii 18, ni eye nɔ nyɔji etɛ kɛ gbii nyɔŋma yɛ Yerusalem; ni etee nɔ efee efɔŋ yɛ Yehowa hiɛ.+ 10  Afi lɛ shishijee mli* lɛ, Maŋtsɛ Nebukadnezar tsu koni abamɔ lɛ kɛba Babilon,+ koni aloo Yehowa shĩa lɛ nibii ni jara wa lɛ afata ehe kɛba.+ Ni ewó Yehoiakin tsɛ nyɛmi nuu Zedekia maŋtsɛ yɛ Yuda kɛ Yerusalem nɔ.+ 11  Be ni Zedekia+ batsɔ maŋtsɛ lɛ, no mli lɛ, eye afii 21, ni eye nɔ afii 11 yɛ Yerusalem.+ 12  Etee nɔ efee efɔŋ yɛ Yehowa, e-Nyɔŋmɔ lɛ hiɛ. Ni ebaaa ehe shi yɛ gbalɔ Yeremia,+ mɔ ni Yehowa kɛ ewiemɔi tsɔ enɔ lɛ hiɛ. 13  Etse Maŋtsɛ Nebukadnezar,+ mɔ ni hã ekã Nyɔŋmɔ kitã lɛ hu hiɛ atua, ni efee ehe kuɛŋtilɔ ni ekpiliŋ etsui ni ekuuu esɛɛ kɛbaaa Yehowa, Israel Nyɔŋmɔ lɛ ŋɔɔ. 14  Osɔfoi lɛ ateŋ onukpai lɛ kɛ maŋbii lɛ fɛɛ fee efɔŋ kpele, amɛfee nyaŋemɔ nibii ni jeŋmaji lɛ feɔ lɛ fɛɛ eko, ni amɛbule Yehowa shĩa+ ni efee lɛ krɔŋkrɔŋ yɛ Yerusalem lɛ. 15  Yehowa, amɛtsɛmɛi a-Nyɔŋmɔ lɛ tee nɔ etsu mɛi kɛtee amɛŋɔɔ shii abɔ koni ebɔ amɛ kɔkɔ, ejaakɛ no mli lɛ, emusuŋ miitsɔ lɛ yɛ ewebii lɛ kɛ eshihilɛhe lɛ he. 16  Shi amɛtee nɔ amɛye mɛi ni anɔkwa Nyɔŋmɔ lɛ tsu lɛ ahe fɛo,+ ni amɛbuuu ewiemɔi lɛ akɛ nɔ ko,+ ni amɛli egbalɔi lɛ+ kɛyashi ehiii amɛ tsamɔ dɔŋŋ, ni Yehowa mli wo la ewo ewebii lɛ.+ 17  Kɛkɛ ni ehã Kaldeabii+ lɛ amaŋtsɛ lɛ ba ni ekɛ amɛ bawu, ni ekɛ klante+ gbe amɛblahii lɛ yɛ sɔlemɔ shĩa lɛ tsũ lɛ mli;+ emusuŋ etsɔɔɔ lɛ yɛ oblanyo loo oblayoo,* mɔ ni egbɔ loo mɔ ni bɛ hewalɛ he.+ Nyɔŋmɔ kɛ nɔ fɛɛ nɔ wo edɛŋ.+ 18  Kɛkɛ ni eloo anɔkwa Nyɔŋmɔ lɛ shĩa lɛ nibii lɛ fɛɛ, ewulu jio, bibioo jio, kɛ Yehowa shĩa lɛ jwetrii lɛ kɛ maŋtsɛ lɛ kɛ elumɛi lɛ ajwetrii lɛ fɛɛ, eloo nɔ fɛɛ nɔ kɛtee Babilon.+ 19  Ekɛ la shã anɔkwa Nyɔŋmɔ lɛ shĩa lɛ,+ ni ekumɔ Yerusalem gbogboi lɛ eshwie shi,+ ni ekɛ la shã emɔji lɛ fɛɛ, ni ekpãtã nɔ fɛɛ nɔ ni jara wa lɛ hiɛ.+ 20  Ni eŋɔ mɛi ni je klante lɛ naa lɛ nom kɛtee Babilon,+ ni amɛtsɔmɔ tsuji amɛhã lɛ+ kɛ ebihii lɛ kɛyashi Persia maŋtsɛyeli lɛ bɔi nɔyeli,+ 21  enɛ ba lɛ nakai koni nɔ ni Yehowa tsɔ Yeremia nɔ ewie lɛ aba mli,+ kɛyashi shikpɔŋ lɛ baaye ehejɔɔmɔ gbii lɛ egbe naa.+ Yɛ gbii fɛɛ ni ekã shi amaŋfɔ lɛ mli lɛ, eeye hejɔɔmɔ gbi, kɛyashi afii 70 lɛ baashɛ.+ 22  Bɔ ni afee ni nɔ ni Yehowa tsɔ Yeremia+ nɔ ewie lɛ aba mli lɛ, yɛ Persia maŋtsɛ Koresh+ nɔyeli afi ni ji klɛŋklɛŋ lɛ nɔ lɛ, Yehowa tsirɛ Persia maŋtsɛ Koresh* koni ehã ashiɛ yɛ emaŋtsɛyeli lɛ mli fɛɛ, ni eŋma efɔ̃ shi+ hu akɛ: 23  “Nɔ ni Persia maŋtsɛ Koresh kɛɛ nɛ, ‘Yehowa, ŋwɛii a-Nyɔŋmɔ lɛ kɛ shikpɔŋ lɛ nɔ maŋtsɛyelii lɛ fɛɛ ehã mi,+ ni efã mi ni miyama shĩa mihã lɛ yɛ Yerusalem yɛ Yuda.+ Emaŋbii lɛ ateŋ mɔ fɛɛ mɔ ni yɔɔ nyɛteŋ lɛ, Yehowa, e-Nyɔŋmɔ lɛ, afata ehe koni ekwɔ kɛya.’”+

Shishigbɛ Niŋmaa

Loo “shikpɔŋ.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Ebaanyɛ efee akɛ, kɛjɛ March kɛmiimɔ April mli.
Loo “oblayoo fro.”
Hebri sht. ŋm., “Yehowa tee Persia maŋtsɛ Koresh mumɔ shi.”