2 Kronika 32:1-33

  • Senakerib wo Yerusalem he gbeyei (1-8)

  • Senakerib wie eshi Yehowa (9-19)

  • Ŋwɛibɔfo ko gbe Asiria asraafoi (20-23)

  • Hezekia hela kɛ ehenɔwomɔ lɛ (24-26)

  • Nibii ni Hezekia fee kɛ egbele (27-33)

32  Nibii ni efee kɛ anɔkwa ni eye nɛɛ sɛɛ lɛ,+ Asiria maŋtsɛ Senakerib ba ni ebatutua Yuda. Ewo maji ni atswa gbogboi awo amɛhe lɛ ahe ka kɛ yiŋtoo akɛ ebaakumɔ gbogboi lɛ koni eshɔ̃ maji lɛ.+  Be ni Hezekia na akɛ Senakerib eba, ni ekpɛ eyiŋ akɛ ekɛ Yerusalem baawu ta lɛ,  ekɛ elumɛi lɛ kɛ etawulɔi lɛ tee ajina, ni ekpɛ eyiŋ akɛ ebaatsimɔ nuhiŋmɛii ni yɔɔ maŋ lɛ sɛɛ lɛ,+ ni amɛfi esɛɛ.  Abua mɛi babaoo anaa, ni amɛtsimɔ nuhiŋmɛii lɛ fɛɛ kɛ faa ni hoɔ kɛtsɔɔ shikpɔŋ lɛ nɔ lɛ, ni amɛkɛɛ: “Wɔsumɔɔɔ ni Asiria maŋtsɛmɛi lɛ baa ni amɛbanáa nu babaoo.”  Agbɛnɛ hu, efee ekãa ni etswa gbogboi ni ekumɔ lɛ fɛɛ ekoŋŋ ni etswa mɔji emamɔ nɔ, ni etswa gbogbo kroko yɛ gbogboi lɛ asɛɛ. Esaa Milo*+ lɛ hu yɛ David Maŋ lɛ mli, ni efee tawuu nii* kɛ tsɛŋi babaoo.  Kɛkɛ ni ehala tatsɛmɛi eto maŋbii lɛ anɔ, ni ebua amɛnaa yɛ maŋ lɛ agbo lɛ naa yɛ henaabuamɔhe lɛ, ni ewo amɛ hewalɛ* akɛ:  “Nyɛfea ekãa ni nyɛwajea nyɛhe. Nyɛkashea gbeyei, ni nyɛtsui akafãa hu yɛ Asiria maŋtsɛ+ lɛ kɛ mɛi babaoo ni fata ehe lɛ hewɔ, ejaakɛ mɛi ni kɛ wɔ yɔɔ lɛ ayi fa fe mɛi ni kɛ lɛ yɔɔ lɛ.+  Lɛ lɛ, heloo nine ni kɛ lɛ yɔɔ,* shi wɔ lɛ, Yehowa, wɔ-Nyɔŋmɔ lɛ ni kɛ wɔ yɔɔ koni eye ebua wɔ ni ewu wɔtai lɛ ehã wɔ.”+ Ni Yuda maŋtsɛ Hezekia wiemɔi lɛ wo maŋbii lɛ hewalɛ.+  Enɛ sɛɛ lɛ, Asiria maŋtsɛ Senakerib tsu etsuji lɛ kɛtee Yerusalem. No mli lɛ, lɛ kɛ esraafoi lɛ fɛɛ yɛ Lakish.+ Nɔ ni etsu ni ayakɛɛ Yuda maŋtsɛ Hezekia kɛ Yudeabii fɛɛ ni yɔɔ Yerusalem+ lɛ ji: 10  “Nɔ ni Asiria maŋtsɛ Senakerib kɛɛ nɛ: ‘Mɛni nɔ nyɛhiɛ kã hewɔ ni nyɛyɔɔ Yerusalem lolo be ni awo he ka lɛ?+ 11  Ani jeee lakamɔ Hezekia lakaa nyɛ koni hɔmɔ kɛ kumai agbe nyɛ hewɔ ni ekɛɔ akɛ: “Yehowa, wɔ-Nyɔŋmɔ lɛ, baajie wɔ kɛje Asiria maŋtsɛ lɛ dɛŋ” lɛ?+ 12  Ani jeee Hezekia nɛɛ nɔŋŋ jie nyɛ-Nyɔŋmɔ lɛ hei grɔŋŋi*+ lɛ kɛ nyɛ-Nyɔŋmɔ lɛ afɔleshaa latɛi+ lɛ, ni ekɛɛ Yuda kɛ Yerusalem fɛɛ akɛ: “Nyɛkotoa shi yɛ afɔleshaa latɛ kome hiɛ, ni no nɔ nyɛshãa lasu afɔlei yɛ” lɛ?+ 13  Ani nyɛleee nɔ ni mi kɛ mitsɛmɛi lɛ fee shikpɔji lɛ anɔ bii lɛ fɛɛ lɛ?+ Ani jeŋmaji ni yɔɔ shikpɔŋ lɛ nɔ lɛ anyɔŋmɔi lɛ nyɛ amɛjie amɛshikpɔji lɛ kɛje midɛŋ?+ 14  Jeŋmaji fɛɛ ni mitsɛmɛi lɛ kpãtã amɛhiɛ lɛ anyɔŋmɔi lɛ ateŋ namɔ nyɛ ejie ewebii lɛ kɛje midɛŋ? Ani nyɛ lɛ, nyɛ-Nyɔŋmɔ lɛ baanyɛ ajie nyɛ kɛje midɛŋ?+ 15  No hewɔ lɛ, nyɛkahãa Hezekia malea etsɔa nyɛ ni elakaa nyɛ nɛkɛ!+ Nyɛkahea lɛ nyɛyea, ejaakɛ jeŋmaŋ ko jeŋmaŋ ko loo maŋtsɛyeli ko maŋtsɛyeli ko nyɔŋmɔ nyɛko ejie ewebii lɛ yɛ midɛŋ loo mitsɛmɛi lɛ adɛŋ. Te tɛŋŋ ni nyɛ-Nyɔŋmɔ lɛ aaanyɛ nyɛ ejie yɛ midɛŋ lɛ?’”+ 16  Etsuji lɛ po wie nɔ ni fe nakai amɛshi Yehowa, anɔkwa Nyɔŋmɔ lɛ, kɛ Hezekia, anɔkwa Nyɔŋmɔ lɛ tsulɔ lɛ. 17  Esaa eŋmala woji+ kɛjɛ́ Yehowa, Israel Nyɔŋmɔ lɛ,+ ni ewie eshi lɛ akɛ: “Bɔ ni jeŋmaji ni yɔɔ shikpɔŋ lɛ nɔ lɛ anyɔŋmɔi lɛ nyɛɛɛ ajie amɛwebii lɛ yɛ midɛŋ lɛ,+ nakai nɔŋŋ Hezekia Nyɔŋmɔ lɛ nyɛŋ ajie ewebii lɛ yɛ midɛŋ.” 18  Amɛtee nɔ amɛkɛ Yerusalembii ni yɔɔ gbogbo lɛ nɔ lɛ wie yɛ Yudafoi lɛ awiemɔ lɛ mli kɛ gbee ni wa koni amɛkɛwo amɛhe gbeyei ni amɛhã amɛtsui afã, bɔ ni afee ni amɛshɔ̃ maŋ lɛ.+ 19  Amɛwie amɛshi Yerusalem Nyɔŋmɔ lɛ tamɔ bɔ ni amɛwie amɛshi shikpɔŋ lɛ nɔ bii lɛ anyɔŋmɔi ni ji gbɔmɛi aninenaa nitsumɔi kɛkɛ lɛ nɔŋŋ. 20  Shi Maŋtsɛ Hezekia kɛ gbalɔ Yesaia,+ Amoz binuu lɛ tee nɔ amɛsɔle yɛ enɛ he, ni amɛfó amɛtsɛ Nyɔŋmɔ yɛ ŋwɛi koni ebaye ebua amɛ.+ 21  Kɛkɛ ni Yehowa tsu ŋwɛibɔfo ko ni eyagbe tawulɔ kãkãlɔ fɛɛ tawulɔ kãkãlɔ,+ kɛ hiɛnyiɛlɔ fɛɛ hiɛnyiɛlɔ, kɛ tatsɛ fɛɛ tatsɛ ni yɔɔ Asiria maŋtsɛ lɛ nsara lɛ mli lɛ, no hewɔ lɛ, Asiria maŋtsɛ lɛ ku esɛɛ kɛtee lɛ diɛŋtsɛ eshikpɔŋ lɛ nɔ kɛ hiɛgbele. Sɛɛ mli lɛ, ebote enyɔŋmɔ lɛ jamɔhe* lɛ, ni jɛmɛ lɛ diɛŋtsɛ ebihii lɛ ekomɛi kɛ klante yagbe lɛ yɛ.+ 22  No hewɔ lɛ, Yehowa here Hezekia kɛ Yerusalembii lɛ kɛje Asiria maŋtsɛ Senakerib kɛ mɛi krokomɛi fɛɛ adɛŋ, ni ehã amɛhe jɔ amɛ yɛ he fɛɛ he. 23  Ni mɛi babaoo bake Yehowa nii yɛ Yerusalem, ni amɛbake Yuda maŋtsɛ Hezekia hu nibii kpakpai,+ ni kɛjɛ no sɛɛ lɛ, jeŋmaji lɛ fɛɛ bu lɛ waa. 24  Nakai gbii lɛ amli lɛ, hela ko mɔ Hezekia waa ni eehe egbo, ni esɔle ehã Yehowa,+ ni ebo esɔlemɔ lɛ toi ni ehã lɛ okadi ko.+ 25  Shi Hezekia efeee nɔ ko kɛtsɔɔɔ akɛ ehiɛ esɔ ekpakpa ni afee lɛ lɛ, moŋ lɛ ewó ehe nɔ yɛ etsui mli, no hewɔ lɛ, Nyɔŋmɔ mli fu lɛ kɛ Yuda kɛ Yerusalem. 26  Shi Hezekia ba ehe shi yɛ ehe nɔ ni ewó yɛ etsui mli lɛ hewɔ,+ lɛ kɛ Yerusalembii lɛ fɛɛ, ni no hewɔ lɛ, Yehowa gbalaaa amɛtoi* yɛ Hezekia gbii lɛ amli.+ 27  Ni Hezekia ná nii babaoo kɛ anunyam kpele;+ ni emamɔ nitoohei+ koni ekɛ jwiɛtɛi, kɛ shika tsuru, kɛ ojarawatɛi, kɛ balsam mu, kɛ tsɛŋi kɛ nibii fɛɛ ni jara wa ato jɛmɛ. 28  Emamɔ nitoohei hu koni ekɛ ŋmaa,* kɛ wain hee, kɛ mu ato mli, ni agbɛnɛ hu emamɔ kooloi srɔtoi atsũi kɛ toi atsũi fɛɛ. 29  Eto maji babaoo, ni ená kooloi, kɛ toi, kɛ tsinai babaoo, ejaakɛ Nyɔŋmɔ hã ená nii babaoo diɛŋtsɛ. 30  Hezekia ji mɔ ni tsĩ Gihon+ Faa lɛ gɔŋnɔgbɛ nuhiŋmɛi lɛ,+ ni egba gbɛ tɛ̃ɛ ehã nu lɛ kɛtee David Maŋ+ lɛ anaigbɛ, ni Hezekia ye omanye yɛ nɔ fɛɛ nɔ ni etsu lɛ mli. 31  Shi be ni atsu Babilon lumɛi lɛ atsuji lɛ koni amɛbabi lɛ okadi+ lɛ ni ba yɛ shikpɔŋ lɛ nɔ+ lɛ he sane lɛ, anɔkwa Nyɔŋmɔ lɛ shi ekome koni ekɛka lɛ ekwɛ+ koni ena nɔ fɛɛ nɔ ni yɔɔ etsui mli.+ 32  Shi Hezekia shihilɛ mli saji krokomɛi fɛɛ, kɛ bɔ ni ejie suɔmɔ ni tsakeee kpo lɛ,+ aŋmala yɛ gbalɔ Yesaia, Amoz binuu lɛ ninai lɛ amli,+ yɛ Yuda Maŋtsɛmɛi Awolo lɛ kɛ Israel Maŋtsɛmɛi Awolo lɛ mli.+ 33  Kɛkɛ ni Hezekia gbo* ni afu lɛ yɛ gɔŋkpɔ ni akwɔɔ kɛyaa David bihii lɛ afuuhe lɛ nɔ.+ Yuda kɛ Yerusalembii lɛ fɛɛ wo ehiɛ nyam be ni egbo lɛ. Ni ebinuu Manase baye maŋtsɛ yɛ esɛɛ.

Shishigbɛ Niŋmaa

Eji Hebri wiemɔ ko ni tsɔɔ nɔ ko ni abua naa tamɔ gɔŋ.
Loo “tawuu nii ni afɔ̃ɔ.”
Hebri sht. ŋm., “ekɛ amɛtsui wie.”
Loo “adesa hewalɛ ni eyɔɔ.”
Hebri sht. ŋm., “ehei grɔŋŋi.”
Loo “sɔlemɔ shĩa.”
Hebri sht. ŋm., “Yehowa mlifu lɛ baaa amɛnɔ.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “kɛ etsɛmɛi lɛ yawɔ.”