2 Kronika 29:1-36

  • Hezekia batsɔ Yuda maŋtsɛ (1, 2)

  • Hezekia hã afee tsakemɔi (3-11)

  • Afee sɔlemɔ shĩa lɛ krɔŋkrɔŋ (12-19)

  • Ato sɔlemɔ shĩa lɛ he gbɛjianɔ ekoŋŋ (20-36)

29  Be ni Hezekia+ batsɔ maŋtsɛ lɛ, no mli lɛ, eye afii 25, ni eye nɔ afii 29 yɛ Yerusalem. Atsɛɔ emami Abiya, Zakaria biyoo lɛ.+  Etee nɔ efee nɔ ni ja yɛ Yehowa hiɛ+ tamɔ bɔ ni etsɛ David fee lɛ pɛpɛɛpɛ.+  Yɛ enɔyeli lɛ klɛŋklɛŋ afi lɛ mli, yɛ klɛŋklɛŋ nyɔɔŋ lɛ nɔ lɛ, egbele Yehowa shĩa lɛ shinai lɛ, ni esaa amɛ.+  Kɛkɛ ni etsɛ osɔfoi lɛ kɛ Levibii lɛ ni ebua amɛ naa yɛ he ko kpataa ni yɔɔ bokãgbɛ.  Ni ekɛɛ amɛ akɛ: “Nyɛboa mi toi, nyɛ Levibii. Agbɛnɛ, nyɛfea nyɛhe krɔŋkrɔŋ,+ ni nyɛfea Yehowa, nyɛtsɛmɛi a-Nyɔŋmɔ lɛ shĩa lɛ hu krɔŋkrɔŋ, ni nyɛjiea nɔ fɛɛ nɔ ni he tseee lɛ kɛjea he krɔŋkrɔŋ lɛ.+  Ejaakɛ wɔtsɛmɛi lɛ etɔ̃ ni amɛfee efɔŋ yɛ Yehowa, wɔ-Nyɔŋmɔ lɛ hiɛ.+ Amɛje esɛɛ ni amɛjie amɛhiɛ kɛje Yehowa sɔlemɔ buu lɛ he ni amɛtsɔ amɛsɛɛ amɛhã lɛ.+  Agbɛnɛ hu, amɛŋamɔ ablanaa lɛ shinai lɛ,+ ni amɛgbe kanei lɛ.+ Amɛshãaa tsofa-kɛ-ŋma+ kɛ shãa afɔlei+ yɛ he krɔŋkrɔŋ lɛ amɛhãaa Israel Nyɔŋmɔ lɛ dɔŋŋ.  No hewɔ lɛ, Yehowa mlifu ba Yuda kɛ Yerusalem nɔ,+ ni ehã mɛi ahe jɔ̃ amɛhe ni amɛnaa kpɛ amɛhe yɛ amɛhewɔ, ni mɛi bo tsia* yɛ amɛhewɔ tamɔ bɔ ni nyɛ diɛŋtsɛ nyɛkɛ nyɛhiŋmɛii naa nɛɛ.+  Ni naa, akɛ klante gbe wɔtsɛmɛi lɛ,+ ni aŋɔ wɔbihii, kɛ wɔbiyei, kɛ wɔŋamɛi lɛ nom kɛtee yɛ enɛ hewɔ.+ 10  Agbɛnɛ, ekã mitsui nɔ akɛ mikɛ Yehowa, Israel Nyɔŋmɔ lɛ baakpaŋ+ koni emlifu ni naa wa lɛ aje wɔnɔ. 11  Mibii, amrɔ nɛɛ jeee be ni akɛfeɔ anihao,* ejaakɛ Yehowa ehala nyɛ koni nyɛdamɔ ehiɛ ni nyɛsɔmɔ akɛ esɔɔlɔi+ ni nyɛshã elasu afɔlei lɛ.”+ 12  Kɛkɛ ni Levibii lɛ te shi: yɛ Kohatbii+ lɛ ateŋ lɛ, Mahat, Amasai binuu lɛ, kɛ Yoel, Azaria binuu lɛ; yɛ Meraribii+ lɛ ateŋ lɛ, Kish, Abdi binuu lɛ, kɛ Azaria, Yehalelel binuu lɛ; yɛ Gershonbii+ lɛ ateŋ lɛ, Yoa, Zima binuu lɛ, kɛ Eden, Yoa binuu lɛ; 13  yɛ Elizafan bihii lɛ ateŋ lɛ, Shimri kɛ Yeuel; yɛ Asaf bihii+ lɛ ateŋ lɛ, Zakaria kɛ Matania; 14  yɛ Heman bihii+ lɛ ateŋ lɛ, Yehiel kɛ Shimei; yɛ Yedutun bihii+ lɛ ateŋ lɛ, Shemaia kɛ Uziel. 15  Kɛkɛ ni amɛbua amɛnyɛmimɛi hii lɛ anaa, ni amɛfee amɛhe krɔŋkrɔŋ ni amɛba tamɔ bɔ ni maŋtsɛ lɛ fã yɛ Yehowa wiemɔi lɛ anaa koni amɛfee Yehowa shĩa lɛ krɔŋkrɔŋ lɛ.+ 16  Kɛkɛ ni osɔfoi lɛ bote Yehowa shĩa lɛ koni amɛyafee lɛ krɔŋkrɔŋ, ni amɛjie nɔ fɛɛ nɔ ni he tseee ni amɛna yɛ Yehowa sɔlemɔ shĩa lɛ kɛje kpo, ni amɛkɛtee Yehowa shĩa lɛ kpo lɛ nɔ.+ Kɛkɛ ni Levibii lɛ hu loo kɛje kpo, ni amɛyatsi amɛshwie Kidron Jɔɔ+ lɛ mli. 17  No hewɔ lɛ, amɛbɔi krɔŋkrɔŋ feemɔ lɛ yɛ klɛŋklɛŋ nyɔɔŋ lɛ nɔ klɛŋklɛŋ gbi lɛ nɔ, ni yɛ nyɔɔŋ lɛ nɔ gbi ni ji kpaanyɔ lɛ amɛshɛ Yehowa ablanaa lɛ nɔ.+ Amɛkɛ gbii kpaanyɔ fee Yehowa shĩa lɛ krɔŋkrɔŋ, ni yɛ klɛŋklɛŋ nyɔɔŋ lɛ nɔ gbi ni ji 16 lɛ amɛgbe naa. 18  No sɛɛ lɛ, amɛtee Maŋtsɛ Hezekia ŋɔɔ ni amɛyakɛɛ akɛ: “Wɔfee Yehowa shĩa muu lɛ fɛɛ, kɛ shãa afɔle afɔleshaa latɛ+ lɛ kɛ ehe nibii lɛ fɛɛ,+ kɛ okpɔlɔ ni akɛ blodo ni eko kã eko nɔ* lɛ shwieɔ nɔ+ lɛ kɛ ehe nibii lɛ fɛɛ krɔŋkrɔŋ. 19  Agbɛnɛ hu, nibii fɛɛ ni Maŋtsɛ Ahaz jie yɛ sɔlemɔ shĩa lɛ be ni eyeɔ nɔ, ni etɔ̃ Nyɔŋmɔ nɔ lɛ,+ wɔsaa ni wɔfee amɛ krɔŋkrɔŋ,+ ni amɛyɛ Yehowa afɔleshaa latɛ lɛ hiɛ.” 20  Ni Maŋtsɛ Hezekia te shi mra ni ebua maŋ lɛ mli lumɛi lɛ anaa, ni amɛkwɔ kɛtee Yehowa shĩa lɛ. 21  Amɛkɛ tsinahii kpawo, kɛ gwantɛŋhii kpawo, kɛ gwantɛŋhii bibii kpawo, kɛ abotiahii kpawo ba koni akɛshã esha afɔle ahã maŋtsɛyeli lɛ, jamɔhe lɛ, kɛ Yuda.+ No hewɔ lɛ, ekɛɛ osɔfoi lɛ, ni ji Aaron seshibii lɛ koni amɛkɛshã afɔle yɛ Yehowa afɔleshaa latɛ lɛ nɔ. 22  Kɛkɛ ni amɛgbe tsinai lɛ,+ ni osɔfoi lɛ ŋɔ lá lɛ ni amɛkɛshwã afɔleshaa latɛ lɛ nɔ;+ no sɛɛ lɛ, amɛgbe gwantɛŋhii lɛ ni amɛkɛ lá lɛ shwã afɔleshaa latɛ lɛ nɔ, ni amɛgbe gwantɛŋhii bibii lɛ ni amɛkɛ lá lɛ shwã afɔleshaa latɛ lɛ nɔ. 23  No sɛɛ lɛ, amɛkɛ abotiahii ni akɛbaashã esha afɔle lɛ ba maŋtsɛ lɛ kɛ asafo lɛ hiɛ ni amɛkɛ amɛniji shwie amɛnɔ. 24  Osɔfoi lɛ gbe amɛ ni amɛkɛ amɛlá lɛ shã esha afɔle yɛ afɔleshaa latɛ lɛ nɔ koni amɛkɛkpãtã amɛhã Israel fɛɛ ejaakɛ maŋtsɛ lɛ kɛɛ akɛ, esa akɛ ashã shãa afɔle lɛ kɛ esha afɔle lɛ ahã Israel fɛɛ. 25  No mli lɛ, ehã Levibii lɛ eyadamɔ Yehowa shĩa lɛ ni amɛhiɛ tsɛŋtsɛŋi, kɛ kpãa saŋkui, kɛ saŋkui,+ yɛ David kɛ Gad,+ maŋtsɛ ninalɔ lɛ, kɛ gbalɔ Natan+ famɔ lɛ naa,+ ejaakɛ Yehowa ji mɔ ni tsɔ gbalɔi lɛ anɔ ekɛ famɔ lɛ hã. 26  No hewɔ lɛ, Levibii lɛ damɔ shi ni amɛhiɛ nibii ni akɛtswaa lala ni David fee lɛ, ni osɔfoi lɛ hu hiɛ tɛtɛrɛmantɛrɛi lɛ.+ 27  Kɛkɛ ni Hezekia fã koni ashã shãa afɔle lɛ yɛ afɔleshaa latɛ lɛ nɔ.+ Be ni abɔi shãa afɔle lɛ shãa lɛ, abɔi Yehowa lala lɛ lamɔ, ni abɔi tɛtɛrɛmantɛrɛi lɛ hu akpamɔ yɛ nibii ni akɛtswaa lala ni Israel maŋtsɛ David fee lɛ famɔ naa. 28  Ni be ni aláa lala lɛ ni akpãa tɛtɛrɛmantɛrɛi lɛ, asafo muu lɛ fɛɛ kula shi—ni afee enɛ aahu kɛyashi ashã shãa afɔle lɛ agbe naa. 29  Ni be ni amɛgbe afɔleshaa lɛ naa nɔŋŋ lɛ, maŋtsɛ lɛ kɛ mɛi fɛɛ ni fata ehe lɛ kula shi ni amɛjá Nyɔŋmɔ. 30  Ni Maŋtsɛ Hezekia kɛ lumɛi lɛ kɛɛ Levibii lɛ koni amɛkɛ David kɛ Asaf,+ ninalɔ lɛ, wiemɔi lɛ ajie Yehowa yi.+ No hewɔ lɛ, amɛkɛ miishɛɛ babaoo jie eyi, ni amɛkula shi ni amɛjá Nyɔŋmɔ. 31  Kɛkɛ ni Hezekia kɛɛ akɛ: “Amrɔ nɛɛ ni nyɛfee nyɛhe krɔŋkrɔŋ nyɛhã Yehowa nɛɛ, nyɛbaa ni nyɛkɛ afɔlei kɛ shidaa afɔlei abaa Yehowa shĩa lɛ.” No hewɔ lɛ, asafo lɛ kɛ afɔlei kɛ shidaa afɔlei bɔi baa, ni mɔ fɛɛ mɔ ni tsui tsirɛɔ lɛ lɛ baa ebashãa shãa afɔlei.+ 32  Shãa afɔlei ni asafo lɛ kɛba lɛ ayifalɛ ji tsinai 70, kɛ gwantɛŋhii 100, kɛ gwantɛŋhii bibii 200—amɛkɛ enɛɛmɛi fɛɛ shã shãa afɔle amɛhã Yehowa+ 33  ni amɛkɛ tsinai 600 kɛ toi 3,000 shã afɔlei krɔŋkrɔŋi lɛ. 34  Shi osɔfoi lɛ ayi faaa bɔ ni amɛbaanyɛ shãa afɔlei lɛ fɛɛ ahe woji amɛkpɔlɔ, no hewɔ lɛ amɛnyɛmimɛi Levibii lɛ baye amɛbua amɛ+ kɛyashi agbe nitsumɔ lɛ naa, kɛ agbɛnɛ hu kɛyashi osɔfoi lɛ fɛɛ fee amɛhe krɔŋkrɔŋ,+ ejaakɛ Levibii lɛ hiɛ yɛ amɛhe nɔ* fe osɔfoi lɛ akɛ amɛbaafee amɛhe krɔŋkrɔŋ. 35  Agbɛnɛ hu, shãa afɔlei lɛ kɛ naanyobɔɔ afɔlei lɛ ahe fɔi lɛ,+ kɛ dãa afɔlei ni fata shãa afɔlei lɛ ahe+ lɛ fa babaoo.+ Bɔ ni fee ni ato sɔɔmɔ yɛ Yehowa shĩa lɛ shishi ekoŋŋ lɛ nɛ.* 36  No hewɔ lɛ, Hezekia kɛ maŋbii lɛ fɛɛ ná miishɛɛ yɛ nɔ ni anɔkwa Nyɔŋmɔ lɛ eto shishi ehã maŋbii lɛ hewɔ,+ ejaakɛ enɛ fɛɛ ba oya.

Shishigbɛ Niŋmaa

Hebri sht. ŋm., “kpã bɛlɛ.”
Loo “akɛjɔɔ he; akɛfeɔ anyagba; akɛfeɔ hejɔ̃.”
Ni ji, hiɛmaa blodo.
Hebri sht. ŋm., “atsui ja.”
Loo “Bɔ ni fee ni asaa sɔɔmɔ ato yɛ Yehowa shĩa lɛ nɛ.”