2 Kronika 2:1-18

  • Abua nibii ni akɛbaama sɔlemɔ shĩa lɛ naa (1-18)

2  Agbɛnɛ Solomon fã ni ama shĩa ahã Yehowa gbɛ́i+ lɛ kɛ maŋtsɛ shĩa ahã emaŋtsɛyeli lɛ.+  Solomon bua hii apaafoi* 70,000, kɛ hii tɛgbalɔi 80,000 anaa yɛ gɔji lɛ anɔ,+ kɛ amɛnɔkwɛlɔi 3,600.+  Agbɛnɛ hu, Solomon tsu ni ayakɛɛ Tiro maŋtsɛ Hiram+ akɛ: “Bɔ ni ohã mitsɛ David tseneduru tsei koni ekɛma maŋtsɛ shĩa ni ehi mli lɛ, feemɔ nakai nɔŋŋ ohã mi.+  Amrɔ nɛɛ miima shĩa miihã Yehowa, mi-Nyɔŋmɔ lɛ gbɛ́i lɛ, koni ajɔɔ nɔ ahã lɛ, ni ashã tsofa-kɛ-ŋma+ yɛ ehiɛ, ni agbɛnɛ hu akɛ blodo ni eko kã eko nɔ*+ ama ehiɛ daa, ni ashã shãa afɔlei leebi kɛ gbɛkɛ,+ yɛ Hejɔɔmɔ Gbii+ lɛ, kɛ nyɔɔŋtsere hei+ lɛ, kɛ Yehowa, wɔ-Nyɔŋmɔ lɛ gbii juji+ lɛ anɔ. Enɛ ji Israel gbɛnaa kɛmiiya naanɔ.  Mibama shĩa wulu diɛŋtsɛ, ejaakɛ wɔ-Nyɔŋmɔ lɛ da fe nyɔŋmɔi krokomɛi fɛɛ.  Ni namɔ po baanyɛ ama shĩa ahã lɛ? Ejaakɛ ŋwɛii, kɛ ŋwɛii amli ŋwɛi lɛ po edaaa hãaa lɛ,+ no hewɔ lɛ, namɔ ji mi ni mama shĩa mahã lɛ? Nɔ pɛ ni manyɛ mafee ji ni mama he ko ni abaashã lasu afɔlei yɛ ehiɛ yɛ.  No hewɔ lɛ, hã mi ŋaalɔ ko ni le bɔ ni akɛ shika tsuru kɛ jwiɛtɛi kɛ akɔɔble+ kɛ dade kɛ kooloo hetsɔi ni hiɛ pɛpol kɔla kɛ kpãa tsuru kɛ kpãa bluu tsuɔ nii, ni ele bɔ ni ayeɔ sãmai hu. Ekɛ miŋaalɔi ni he esa ni mitsɛ David shi ehã mi lɛ baatsu nii yɛ Yuda kɛ Yerusalem.+  Ni ohã mi tseneduru tsei, kɛ junipa tsei,+ kɛ algum tsei+ kɛjɛ Lebanon, ejaakɛ mile akɛ otsuji lɛ le bɔ ni afolɔɔ Lebanon tsei lɛ jogbaŋŋ.+ Mitsuji lɛ kɛ otsuji lɛ baafee ekome kɛtsu nii+  koni amɛbua tsei babaoo anaa amɛhã mi, ejaakɛ mibama shĩa wulu diɛŋtsɛ. 10  Ni naa! Mahã otsuji ni baafolɔ tsei lɛ niyenii nɛɛ:+ wiiti kor* susumɔnii 20,000, barle* kor susumɔnii 20,000, wain bat* susumɔnii 20,000, kɛ mu bat susumɔnii 20,000.” 11  Kɛkɛ ni Hiram, Tiro maŋtsɛ lɛ ŋma Solomon wolo akɛ: “Akɛni Yehowa sumɔɔ ewebii lɛ hewɔ lɛ, ewó bo amɛnɔ maŋtsɛ.” 12  Ni Hiram kɛɛ: “Ajie Yehowa, Israel Nyɔŋmɔ lɛ, mɔ ni fee ŋwɛii kɛ shikpɔŋ lɛ yi, ejaakɛ ehã Maŋtsɛ David binuu ni hiɛ kã shi,+ ní yɔɔ jwɛŋmɔ kɛ niiashishinumɔ,+ ni baama shĩa ehã Yehowa kɛ shĩa ehã emaŋtsɛyeli lɛ. 13  Agbɛnɛ, miitsu Hiram-abi,+ ni ji nuu ko ni le ŋaa nitsumɔ jogbaŋŋ, ni yɔɔ niiashishinumɔ hu lɛ kɛba, 14  eji yoo ko ni jɛ Dan weku lɛ mli lɛ binuu, shi etsɛ jɛ Tiro; eyɛ nibii fɛɛ ni akɛ shika tsuru kɛ jwiɛtɛi kɛ akɔɔble kɛ dade kɛ tɛi kɛ tsei kɛ kooloo hetsɔi ni hiɛ pɛpol kɔla kɛ kpãa bluu kɛ mama kpakpa kɛ kpãa tsuru feɔ lɛ he ŋaa.+ Ebaanyɛ eye sãma fɛɛ sãma, ni ebaanyɛ etɛŋ nɔ fɛɛ nɔ ni abaakɛɛ efee lɛ.+ Ekɛ oŋaalɔi lɛ kɛ otsɛ David, ni ji minuŋtsɔ lɛ ŋaalɔi lɛ baafee ekome kɛtsu nii. 15  No hewɔ lɛ, minuŋtsɔ kɛ wiiti kɛ barle* kɛ mu kɛ wain ni ewo shi akɛ ekɛbaahã etsuji lɛ atsu kɛba.+ 16  Ni wɔbaafolɔ tsei abɔ fɛɛ ni he baahia bo lɛ yɛ Lebanon,+ ni wɔbaafimɔ ni wɔkɛbaatsɔ ŋshɔ hiɛ kɛbahã bo yɛ Yopa;+ koni ohã abahole kɛya Yerusalem.”+ 17  Kɛkɛ ni Solomon kane hii fɛɛ ni ji gbɔi ni yɔɔ Israel shikpɔŋ lɛ nɔ lɛ,+ yɛ mɛi ni etsɛ David kane lɛ sɛɛ,+ ni aná mɛi 153,600. 18  No hewɔ lɛ, ehã amɛteŋ mɛi 70,000 tsu nii akɛ apaafoi,* mɛi 80,000 tsu nii akɛ tɛgbalɔi+ yɛ gɔji lɛ anɔ, ni mɛi 3,600 kwɛ nitsulɔi lɛ anɔ.+

Shishigbɛ Niŋmaa

Loo “jatsuterelɔi.”
Ni ji, hiɛmaa blodo.
Kor kome feɔ litai 220 (kwat 200). Kwɛmɔ Saji Krokomɛi B14 lɛ.
Eji wiiti henɔ ko.
Bat kome feɔ litai 22 (gal. 5.81). Kwɛmɔ Saji Krokomɛi B14 lɛ.
Eji wiiti henɔ ko.
Loo “jatsuterelɔi.”