2 Kronika 14:1-15

  • Abiya gbele (1)

  • Asa batsɔ Yuda maŋtsɛ (2-8)

  • Asa ye Etiopiabii 1,000,000 anɔ kunim (9-15)

14  Kɛkɛ ni Abiya gbo,* ni afu lɛ yɛ David Maŋ+ lɛ mli; ni ebinuu Asa baye maŋtsɛ yɛ esɛɛ. Egbii lɛ amli lɛ, toiŋjɔlɛ ba shikpɔŋ lɛ nɔ* afii nyɔŋma.  Asa fee nɔ ni hi kɛ nɔ ni ja yɛ Yehowa, e-Nyɔŋmɔ lɛ hiɛ.  Ejie afɔleshaa latɛi ni afee ahã nyɔŋmɔi krokomɛi+ lɛ kɛ hei grɔŋŋi lɛ, ni ekumɔ wɔŋ tɛi lɛ,+ ni efolɔ wɔŋ tsei lɛ.*+  Agbɛnɛ hu, ekɛɛ Yudabii lɛ koni amɛtao Yehowa, amɛtsɛmɛi a-Nyɔŋmɔ lɛ sɛɛ gbɛ, ni amɛye Mla lɛ kɛ kitã lɛ nɔ.  No hewɔ lɛ, ejie hei grɔŋŋi lɛ kɛ tsofa-kɛ-ŋmashãa latɛi lɛ kɛje Yuda maji lɛ fɛɛ amli,+ ni yɛ enɔyeli lɛ shishi lɛ, toiŋjɔlɛ ba maŋtsɛyeli lɛ mli.  Eto maji kɛ amɛhe gbogboi+ ejaakɛ toiŋjɔlɛ yɛ shikpɔŋ lɛ nɔ, ni mɔ ko mɔ ko kɛ lɛ wuuu ta yɛ nakai afii lɛ amli, ejaakɛ Yehowa hã lɛ toiŋjɔlɛ.+  Ekɛɛ Yudabii lɛ akɛ: “Nyɛhãa wɔtoa maji nɛɛ ni wɔtswa gbogboi wɔwo amɛhe, ni wɔmamɔ mɔji yɛ amɛnɔ,+ ni wɔtara amɛnaa agboi* ni wɔkɛ adabaŋi* awo agbói lɛ asɛɛ. Shikpɔŋ lɛ kã shi kɛhã wɔ lolo ejaakɛ wɔtao Yehowa, wɔ-Nyɔŋmɔ lɛ sɛɛ gbɛ. Wɔtao lɛ, ni ehã wɔhe ejɔ wɔ yɛ he fɛɛ he.” No hewɔ lɛ, amɛtotoi maji lɛ.+  Asa yɛ hii asraafoi 300,000 ni jɛ Yuda ni hiɛɔ tsɛŋi wuji kɛ akpɔlɔi. Ni yɛ Benyamin hu lɛ, eyɛ tawulɔi kãkãlɔi 280,000 ni hiɛɔ tsɛŋi bibii* kɛ gãii.*+  Sɛɛ mli lɛ, Zera, Etiopianyo lɛ kɛ hii asraafoi 1,000,000 kɛ shwiilii 300 ba koni ekɛ amɛ abawu.+ Be ni Zera shɛ Maresha+ lɛ, 10  Asa je kpo koni ekɛ amɛ ayawu, ni Yudabii lɛ bua amɛhe naa kɛhã ta yɛ Zefata Jɔɔ lɛ mli yɛ Maresha. 11  Ni Asa bo etsɛ Yehowa, e-Nyɔŋmɔ+ lɛ ni ekɛɛ: “Yehowa, onyɛɔ oyeɔ obuaa mɛi fɛɛ, mɛi pii jio, mɛi fioo jio, mɛi ni he wa jio, mɛi ni he waaa jio.+ Ao Yehowa, wɔ-Nyɔŋmɔ, ye obua wɔ, ejaakɛ bo onɔ wɔkɛ wɔhiɛ fɔ̃ɔ,*+ ni ogbɛ́i mli wɔba yɛ koni wɔkɛ mɛi pii nɛɛ abawu.+ Ao Yehowa, bo ji wɔ-Nyɔŋmɔ. Kaahã gbɔmɔ adesa* ye onɔ.”+ 12  No hewɔ lɛ, Yehowa ye Etiopiabii lɛ anɔ kunim yɛ Asa kɛ Yudabii lɛ ahiɛ, ni Etiopiabii lɛ jo foi.+ 13  Asa kɛ ewebii lɛ tiu amɛ aahu kɛtee Gerar+ tɔ̃ɔ, ni amɛgbegbee Etiopiabii lɛ kɛyashi amɛ fɛɛ amɛgboi, ejaakɛ Yehowa kɛ esraafoi lɛ fee amɛ butuu. No sɛɛ lɛ, amɛloo ta mli nii babaoo diɛŋtsɛ kɛtee. 14  Agbɛnɛ hu, amɛtswia maji fɛɛ ni bɔle Gerar lɛ nii, ejaakɛ Yehowa hã gbeyei mɔmɔ amɛ; ni amɛloo nibii ni yɔɔ maji lɛ fɛɛ amli kɛtee, ejaakɛ nibii babaoo yɛ maji lɛ amli. 15  Amɛtutua mɛi ni lɛɔ kooloi lɛ amama tsũi lɛ hu, ni amɛloo toi kɛ afukpɔŋɔi babaoo, ni no sɛɛ lɛ, amɛku amɛsɛɛ kɛtee Yerusalem.

Shishigbɛ Niŋmaa

Loo “kɛ etsɛmɛi lɛ yawɔ.”
Loo “shikpɔŋ lɛ nɔ jɔ.”
Hebri sht. ŋm., “agbói nta.”
Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
Tsɛŋ bibioo ko ni gãitsɛlɔi fɔɔ hiɛmɔ.
Hebri sht. ŋm., “ni dɔrɔɔ gãii.”
Hebri sht. ŋm., “bo wɔkpasaa.”
Loo “Kaahã gbɔmɔ ni gboɔ.”