2 Kronika 10:1-19

  • Israel tse Rehoboam hiɛ atua (1-19)

10  Rehoboam tee Shekem,+ ejaakɛ no mli lɛ, Israel fɛɛ eba Shekem koni amɛbawó lɛ maŋtsɛ.+  Be ni Nebat binuu Yeroboam+ nu he nɔŋŋ lɛ, Yeroboam ku esɛɛ kɛjɛ Ejipt kɛba (no mli lɛ, eyɛ Ejipt lolo ejaakɛ ejo foi yɛ Maŋtsɛ Solomon hewɔ).+  Ni amɛtsu ayatsɛ lɛ kɛba, ni Yeroboam kɛ Israel fɛɛ ba Rehoboam ŋɔɔ amɛbakɛɛ:  “Opapa hã wɔkɔɔŋtso lɛ tsii.+ Shi kɛ́ ohã nitsumɔ ni wa ni opapa hã wɔtsu lɛ fee nɔ ni waaa kɛhã wɔ, ni ohã kɔɔŋtso ni tsii ni ekɛfɔ̃ wɔnɔ lɛ fee nɔ ni etsiii lɛ, wɔbaasɔmɔ bo.”  Kɛkɛ ni ekɛɛ amɛ akɛ: “Nyɛkua nyɛsɛɛ kɛbaa miŋɔɔ yɛ gbii etɛ sɛɛ.” No hewɔ lɛ, maŋbii lɛ tee.+  Kɛkɛ ni Maŋtsɛ Rehoboam yabi ŋaawoo kɛjɛ hii onukpai ni sɔmɔ epapa Solomon akɛ eŋaawolɔi be ni eyɔɔ wala mli lɛ adɛŋ ekɛɛ: “Mɛɛ ŋaa nyɛbaawo mi yɛ bɔ ni esa akɛ mihã maŋbii nɛɛ hetoo mihã lɛ he?”  Amɛkɛɛ lɛ akɛ: “Kɛ́ ofee maŋbii nɛɛ ekpakpa ni ofee nɔ ni amɛtaoɔ lɛ ohã amɛ, ni ohã amɛ hetoo ni sa lɛ, amɛ hu amɛbaasɔmɔ bo daa.”  Shi ekɛ ŋaa ni hii onukpai lɛ wo lɛ lɛ eyatsuuu nii, ni eyabi ŋaawoo kɛjɛ oblahii ni ekɛje nɔ ni amrɔ nɛɛ amɛsɔmɔɔ lɛ lɛ adɛŋ.+  Ebi amɛ akɛ: “Mɛɛ ŋaa nyɛbaawo mi yɛ bɔ ni esa akɛ mihã maŋbii lɛ ni bakɛɛ mi akɛ, ‘Hã kɔɔŋtso ni opapa kɛfɔ̃ wɔnɔ lɛ afee nɔ ni etsiii lɛ’ hetoo lɛ he?” 10  Oblahii ni ekɛje nɔ lɛ kɛɛ lɛ akɛ: “Nɔ ni esa akɛ okɛɛ maŋbii lɛ ni bakɛɛ bo akɛ, ‘Opapa hã wɔkɔɔŋtso lɛ tsii, shi bo lɛ, hã efee nɔ ni etsiii kɛhã wɔ’ lɛ nɛ; kɛɛmɔ amɛ akɛ, ‘Miwaosɛɛkpelɔ po baati fe mipapa hɛ. 11  Mipapa kɛ kɔɔŋtso ni tsii fɔ̃ nyɛnɔ, shi mi lɛ, mahã nyɛkɔɔŋtso lɛ atsii fe no. Mipapa kɛ kpãi yi nyɛ, shi mi lɛ, mikɛ kpãi kɛ amɛhe ŋmei* baayi nyɛ.’” 12  Yeroboam kɛ maŋbii lɛ fɛɛ ba Rehoboam ŋɔɔ yɛ gbi ni ji etɛ lɛ nɔ, tamɔ bɔ ni maŋtsɛ lɛ kɛɛ akɛ: “Nyɛkua nyɛsɛɛ kɛbaa miŋɔɔ yɛ gbi ni ji etɛ lɛ nɔ” lɛ.+ 13  Shi maŋtsɛ lɛ hã amɛ hetoo ni naa wa. No hewɔ lɛ, Maŋtsɛ Rehoboam kɛ ŋaa ni hii onukpai lɛ wo lɛ lɛ eyatsuuu nii. 14  Ekɛ ŋaa ni oblahii lɛ wo lɛ lɛ moŋ tsu nii, ni ekɛɛ amɛ akɛ: “Mahã nyɛkɔɔŋtso lɛ atsii waa, ni mikɛ eko po baagbe yi. Mipapa kɛ kpãi yi nyɛ, shi mi lɛ, mikɛ kpãi kɛ amɛhe ŋmei* baayi nyɛ.” 15  No hewɔ lɛ, maŋtsɛ lɛ booo maŋbii lɛ toi, ejaakɛ anɔkwa Nyɔŋmɔ lɛ ji mɔ ni hã eba lɛ nakai,+ bɔ ni afee ni Yehowa ahã nɔ ni etsɔ Ahiya, Shilonyo lɛ nɔ ekɛɛ Yeroboam, Nebat binuu lɛ aba mli.+ 16  Shi Israelbii lɛ fɛɛ lɛ, akɛni maŋtsɛ lɛ booo amɛ toi hewɔ lɛ, amɛkɛɛ maŋtsɛ lɛ akɛ: “Mɛɛ gbɛfaŋnɔ wɔyɔɔ yɛ David mli? Wɔbɛ gboshinii ko yɛ Yishai binuu lɛ mli. Israel ee, mɔ fɛɛ mɔ aya enyɔŋmɔi lɛ aŋɔɔ. Agbɛnɛ David, kwɛmɔ bo diɛŋtsɛ oshĩa nɔ!”+ Kɛkɛ ni Israelbii lɛ fɛɛ ku amɛsɛɛ kɛtee amɛshĩai.*+ 17  Shi Rehoboam tee nɔ eye Israelbii ni yɔɔ Yuda maji lɛ amli lɛ anɔ.+ 18  Kɛkɛ ni Maŋtsɛ Rehoboam tsu Hadoram,+ ni ji mɔ ni kwɛɔ mɛi ni anyɛɔ amɛnɔ kɛhã nitsumɔ lɛ anɔ lɛ, shi Israelbii lɛ tswia lɛ tɛi ni egbo. Maŋtsɛ Rehoboam he fee oya ni ebote eshwiili lɛ mli ni ejo foi kɛtee Yerusalem.+ 19  Shi Israelbii lɛ hiɛ David shĩa lɛ hiɛ atua ni amɛtse lɛ mli aahu kɛbashi ŋmɛnɛ.

Shishigbɛ Niŋmaa

Hebri sht. ŋm., “tɛtɛɛtei; nyɔŋmɔkaakroi.”
Hebri sht. ŋm., “tɛtɛɛtei; nyɔŋmɔkaakroi.”
Hebri sht. ŋm., “kɛtee amɛmama tsũi amli.”