2 Maŋtsɛmɛi 9:1-37

  • Afɔ Yehu mu akɛ Israel maŋtsɛ (1-13)

  • Yehu gbe Yehoram kɛ Ahazia (14-29)

  • Agbe Yezebel; gbei ye eloo (30-37)

9  Kɛkɛ ni gbalɔ Elisha tsɛ gbalɔi abii* lɛ ateŋ mɔ kome ni ekɛɛ lɛ akɛ: “Okɛ otadei lɛ aŋmɔlɔ ohɛ, ni ohe afee oya ni owó mu kɛ tɔ nɛɛ ni oya Ramot-gilead.+  Kɛ́ oshɛ jɛmɛ lɛ, taomɔ Yehu,+ Nimshi binuu Yehoshafat binuu lɛ; hã ete shi yɛ enyɛmimɛi hii lɛ ateŋ ni okɛ lɛ aya sɛɛtsu lɛ mli.  No sɛɛ lɛ, wó mu kɛ tɔ lɛ, ni ofɔse oshwie eyiteŋ ni okɛɛ akɛ, ‘Nɔ ni Yehowa kɛɛ nɛ: “Miifɔ bo mu akɛ Israel maŋtsɛ.”’+ No sɛɛ lɛ, gbelemɔ shinaa lɛ ni ohe afee oya ni ojo foi kɛshi jɛmɛ.”  No hewɔ lɛ, gbalɔ lɛ sɔɔlɔ lɛ yi gbɛ koni eya Ramot-gilead.  Be ni eshɛ jɛmɛ lɛ, no mli lɛ, tatsɛmɛi lɛ tara jɛmɛ. Ekɛɛ akɛ: “Tatsɛ, miyɛ sane ko kɛhã bo.” Yehu bi akɛ: “Kɛhã wɔteŋ namɔ?” Ni ekɛɛ akɛ: “Kɛhã bo, tatsɛ Yehu.”  No hewɔ lɛ, Yehu te shi ni ebote shĩa lɛ mli; ni gbalɔ lɛ sɔɔlɔ lɛ fɔse mu lɛ eshwie Yehu yiteŋ ni ekɛɛ lɛ akɛ, “Nɔ ni Yehowa, Israel Nyɔŋmɔ lɛ kɛɛ nɛ: ‘Miifɔ bo mu koni oye Yehowa maŋ lɛ, ni ji Israel nɔ akɛ maŋtsɛ.+  Obaatswia onuŋtsɔ Ahab shĩabii lɛ nii, ni matɔ mitsuji gbalɔi lɛ kɛ Yehowa tsuji fɛɛ ni Yezebel gbe lɛ alá he owele.+  Ni Ahab shĩabii lɛ fɛɛ hiɛ baakpãtã; ni mafo nuu fɛɛ nuu* ni yɔɔ Ahab shĩa lɛ, mɛi ni abuuu lɛ po, mashɛ mafɔ̃ yɛ Israel.+  Ni mahã Ahab shĩa lɛ atsɔ tamɔ Yeroboam,+ Nebat binuu lɛ shĩa lɛ, kɛ Baasha,+ Ahiya binuu lɛ shĩa lɛ. 10  Shi Yezebel lɛ, gbei baaye lɛ yɛ shikpɔŋ ni yɔɔ Yezreel lɛ nɔ,+ ni mɔ ko mɔ ko efuŋ lɛ.’” Kɛkɛ ni egbele shinaa lɛ, ni ejo foi kɛshi jɛmɛ.+ 11  Be ni Yehu ku esɛɛ kɛtee enuŋtsɔ lɛ tsuji lɛ aŋɔɔ lɛ, amɛbi lɛ akɛ: “Ani nɔ fɛɛ nɔ yɛ jogbaŋŋ? Mɛni hewɔ sɛkɛyelɔ nɛɛ ba oŋɔɔ?” Ekɛɛ amɛ akɛ: “Bɛ nyɛle nuu nɛɛ kɛ bɔ ni ewiemɔi yɔɔ.” 12  Shi amɛkɛɛ akɛ: “Oolaka wɔ! Ofainɛ, kɛɛmɔ wɔ.” Kɛkɛ ni ekɛɛ akɛ: “Nɛkɛ kɛ nɛkɛ ji nɔ ni ekɛɛ mi, ni ewie kɛfata he akɛ, ‘Nɔ ni Yehowa kɛɛ nɛ; “Miifɔ bo mu akɛ Israel maŋtsɛ.”’”+ 13  Kɛkɛ ni amɛteŋ mɔ fɛɛ mɔ he fee oya ni ekɔ etade, ni ekɛha atrakpoi lɛ anɔ ehã lɛ,+ ni amɛkpã tɛtɛrɛmantɛrɛ* amɛkɛɛ: “Yehu etsɔ maŋtsɛ!”+ 14  Kɛkɛ ni Yehu,+ Nimshi binuu Yehoshafat binuu lɛ, kpaŋ Yehoram yi nɔ. No mli lɛ, Yehoram kɛ Israel fɛɛ miibu yɛ Ramot-gilead+ yɛ Siria maŋtsɛ Hazael+ hewɔ. 15  Sɛɛ mli lɛ, Maŋtsɛ Yehoram ku esɛɛ kɛba Yezreel+ koni ebatsa pilamɔ ni Siriabii lɛ pila lɛ be ni ekɛ Siria maŋtsɛ Hazael yawu lɛ.+ Yehu kɛɛ akɛ: “Kɛ́ nyɛyɛ migbɛfaŋ lɛ,* no lɛ, nyɛkahãa mɔ ko mɔ ko joa foi kɛjeɔ maŋ lɛ mli ni eyabɔɔ amaniɛ nɛɛ yɛ Yezreel.” 16  Kɛkɛ ni Yehu ta eshwiili lɛ mli ni etee Yezreel, ejaakɛ no mli lɛ, Yehoram kã jɛmɛ ni epila, ni Yuda maŋtsɛ Ahazia ekpeleke shi kɛtee jɛmɛ koni eyasara Yehoram. 17  Be ni bulɔ lɛ damɔ mɔɔ lɛ yiteŋ yɛ Yezreel lɛ, ena Yehu kɛ ehii babaoo lɛ ni amɛmiiba. Amrɔ nɔŋŋ ni ekɛɛ akɛ: “Miina hii babaoo.” Yehoram kɛɛ akɛ: “Tsɛ okpɔŋɔnɔtalɔ ko ni otsu lɛ ni ekɛ amɛ ayakpe, ni ohã ebi amɛ akɛ, ‘Ani nyɛmiiba yɛ toiŋjɔlɛ mli?’” 18  No hewɔ lɛ, okpɔŋɔnɔtalɔ lɛ tee ni ekɛ Yehu yakpe ni ekɛɛ akɛ: “Nɔ ni maŋtsɛ lɛ kɛɛ nɛ, ‘Ani ooba yɛ toiŋjɔlɛ mli?’” Shi Yehu kɛɛ akɛ: “Kɛ́ miiba yɛ toiŋjɔlɛ mli lɛ, ohe sane ko? Dɔɔ ohe ni onyiɛ misɛɛ!” Kɛkɛ ni bulɔ lɛ kɛɛ akɛ: “Mɔ ni atsu lɛ eyashɛ amɛŋɔɔ, shi ekuuu esɛɛ.” 19  No hewɔ lɛ, etsu okpɔŋɔnɔtalɔ ni ji enyɔ, ni be ni eyashɛ amɛŋɔɔ lɛ ekɛɛ akɛ: “Nɔ ni maŋtsɛ lɛ kɛɛ nɛ, ‘Ani ooba yɛ toiŋjɔlɛ mli lo?’” Shi Yehu kɛɛ akɛ: “Kɛ́ miiba yɛ toiŋjɔlɛ mli lɛ, ohe sane ko? Dɔɔ ohe ni onyiɛ misɛɛ!” 20  Kɛkɛ ni bulɔ lɛ kɛɛ akɛ: “Eyashɛ amɛŋɔɔ, shi ekuuu esɛɛ, ni amɛtatsɛ lɛ miiwo shwiili lɛ foi tamɔ bɔ ni Yehu, Nimshi nabi* lɛ, woɔ shwiili foi lɛ, ejaakɛ ewoɔ shwiili foi tamɔ sɛkɛyelɔ.” 21  Ni Yehoram kɛɛ akɛ: “Nyɛkɛ okpɔŋɔ lɛ aŋmɔa shwiili lɛ!” Ni amɛkɛ okpɔŋɔ lɛ ŋmɔ eta shwiili lɛ, ni Israel maŋtsɛ Yehoram kɛ Yuda maŋtsɛ Ahazia+ je kpo, ni mɔ fɛɛ mɔ ta eshwiili* mli, koni amɛkɛ Yehu ayakpe. Amɛkɛ lɛ kpe yɛ Nabot,+ Yezreelnyo lɛ shikpɔŋ lɛ nɔ. 22  Be ni Yehoram na Yehu nɔŋŋ lɛ, ekɛɛ akɛ: “Yehu, ani ooba yɛ toiŋjɔlɛ mli?” Shi Yehu kɛɛ akɛ: “Gbii abɔ ni onyɛ Yezebel+ miibɔ ajwamaŋ* ni eeye ŋkunyaa+ hu nɛɛ, te aaafee tɛŋŋ ni toiŋjɔlɛ aaahi shi lɛ?” 23  Oya nɔŋŋ ni Yehoram dɔ eshwiili lɛ koni ejo foi, ni ekɛɛ Ahazia akɛ: “Ahazia, atsɔ̃ wɔ akpa!” 24  Kɛkɛ ni Yehu kɔ egãi lɛ ni etsɛ̃ ni gãimlibi lɛ yatsu Yehoram kɔɔji ateŋ, ni etsɔ etsui mli kɛje kpo, ni Yehoram gbee shi yɛ eta shwiili lɛ mli. 25  Kɛkɛ ni ekɛɛ Bidkar, esafoiatsɛ lɛ akɛ: “Wó lɛ ni oshɛ lɛ ofɔ̃ Nabot, Yezreelnyo lɛ shikpɔŋ lɛ nɔ.+ Kaimɔ akɛ, mi kɛ bo fɛɛ tara shwiilii amli* kɛnyiɛ epapa Ahab sɛɛ be ni Yehowa diɛŋtsɛ wie wiemɔi nɛɛ eshi lɛ akɛ:+ 26  ‘“Gbii abɔ ni nyɛ lɛ, mina Nabot lá+ kɛ ebii lɛ alá lɛ,” Yehowa kɛɛ, “mato bo najiaŋ+ yɛ shikpɔŋ nɛɛ nɔŋŋ nɔ,” Yehowa kɛɛ.’ No hewɔ lɛ, agbɛnɛ wó lɛ ni oshɛ lɛ ofɔ̃ shikpɔŋ lɛ nɔ tamɔ bɔ ni Yehowa ewie lɛ.”+ 27  Be ni Yuda maŋtsɛ Ahazia+ na nɔ ni yaa nɔ lɛ, ejo foi kɛtsɔ gbɛ ni kã abɔɔ shĩa lɛ he lɛ nɔ kɛtee. (Sɛɛ mli lɛ, Yehu tiu lɛ ni ekɛɛ akɛ: “Nyɛtswaa lɛ hu nɔ!” No hewɔ lɛ, amɛtswa lɛ nɔ yɛ shwiili lɛ mli be ni ekwɔɔ kɛyaa Gur ni yɔɔ Ibleam+ masɛi lɛ. Shi etee nɔ ejo foi kɛtee Megido ni eyagbo yɛ jɛmɛ. 28  Kɛkɛ ni etsuji lɛ wó lɛ amɛfɔ̃ shwiili mli ni amɛkɛ lɛ tee Yerusalem, ni amɛyafu lɛ yɛ egbonyobu lɛ mli yɛ etsɛmɛi lɛ amasɛi yɛ David Maŋ+ lɛ mli. 29  Ahazia+ batsɔ Yuda maŋtsɛ yɛ Yehoram, Ahab binuu lɛ nɔyeli afi ni ji 11 lɛ nɔ.) 30  Be ni Yehu tee Yezreel+ lɛ, Yezebel+ nu akɛ eba jɛmɛ. No hewɔ lɛ, ekɛ pɛnte diŋ kpa ehiŋmɛii asɛɛ,* ni esaa eyitsɔi ni eyabu samfɛlɛ lɛ naa eekwɛ. 31  Be ni Yehu tsɔɔ agbó lɛ mli kɛboteɔ mli lɛ, Yezebel kɛɛ akɛ: “Ani nɔ fɛɛ nɔ tee nɔ jogbaŋŋ kɛhã Zimri, mɔ ni gbe enuŋtsɔ lɛ lo?”+ 32  Ni Yehu wó ehiɛ nɔ ekwɛ samfɛlɛ lɛ naa, ni ebi akɛ: “Namɔ yɔɔ migbɛfaŋ? Namɔ?”+ Amrɔ nɔŋŋ ni maŋtsɛ shĩa onukpai enyɔ loo etɛ mamɔ amɛhiɛ shi ni amɛkwɛ lɛ. 33  Yehu kɛɛ akɛ: “Nyɛshɛa lɛ nyɛfɔ̃a shikpɔŋ!” No hewɔ lɛ, amɛshɛ Yezebel amɛfɔ̃ shikpɔŋ, ni elá lɛ eko yakpa gbogbo lɛ kɛ okpɔŋɔi lɛ ahe, ni Yehu okpɔŋɔi lɛ naanaa Yezebel nɔ. 34  No sɛɛ lɛ, ebote mli ni eyaye nɔ ko ni enu nɔ ko. Ni ekɛɛ akɛ: “Nyɛfainɛ, nyɛyawóa yoo ni alomɔ nɛɛ ni nyɛyafua lɛ. Ejaakɛ maŋtsɛ biyoo ni.”+ 35  Shi be ni amɛtee koni amɛyafu Yezebel lɛ, amɛnaaa ehe nɔ ko nɔ ko, akɛ ja eyitsoŋoŋo kɛ enaji kɛ edɛ̃ kɔkɔ kɛkɛ.+ 36  Be ni amɛku amɛsɛɛ ni amɛbakɛɛ Yehu lɛ, ekɛɛ akɛ: “Enɛ ehã Yehowa wiemɔ ni etsɔ etsulɔ Elia, Tishbinyo lɛ nɔ ewie lɛ eba mli+ akɛ, ‘Gbei baaye Yezebel heloo yɛ shikpɔŋ ni yɔɔ Yezreel lɛ nɔ.+ 37  Ni Yezebel gbonyo baatsɔ tamɔ kooloi afei yɛ shikpɔŋ ni yɔɔ Yezreel lɛ nɔ, koni mɔ ko akayoo lɛ ni ekɛɛ akɛ: “Yezebel nɛ.”’”

Shishigbɛ Niŋmaa

Eeenyɛ efee akɛ, akɛ wiemɔ ni ji “gbalɔi abii” lɛ tsuɔ nii kɛhãa mɛi ni yaa skul ni akɛtsɔɔ gbalɔi anii, loo akɛtsuɔ nii kɛhãa gbalɔi akuu ko.
Hebri sht. ŋm., “mɔ fɛɛ mɔ ni shamɔɔ eshwieɔ gbogbo he.” Wiemɔ ni Hebribii wieɔ kɛgbeɔ hii ahe guɔ.
Hebri sht. ŋm., “akolonto.”
Loo “Kɛ́ nyɛkɛ mi kpãa gbee lɛ; Kɛ́ nyɛsusuma kɛ mi kpãa gbee lɛ.”
Hebri sht. ŋm., “binuu.”
Loo “eta shwiili.”
Loo “omami Yezebel miijá amaga.”
Loo “okpɔŋɔi anɔ.”
Loo “ekɛ nii kpa ehiŋmɛii asɛɛ.”