2 Maŋtsɛmɛi 7:1-20

  • Elisha gba akɛ hɔmɔ lɛ sɛɛ baafo (1, 2)

  • Ana niyenii yɛ Siriabii nsara ni amɛjo foi amɛshi lɛ mli (3-15)

  • Elisha gbalɛ lɛ ba mli (16-20)

7  Kɛkɛ ni Elisha kɛɛ akɛ: “Nyɛboa Yehowa wiemɔ toi. Nɔ ni Yehowa kɛɛ nɛ: ‘Wɔ́ aaafee nɛkɛ be mli yɛ Samaria agbó lɛ naa* lɛ, abaahɔ̃ɔ ashikishaŋ kpakpa sia* susumɔnɔ kome shekel* kome, ni abaahɔ̃ɔ barle* sia susumɔnii enyɔ shekel kome.’”+  Kɛkɛ ni asafoiatsɛ lɛ ni maŋtsɛ lɛ kɛ ehiɛ fɔ̃ɔ enɔ lɛ kɛɛ anɔkwa Nyɔŋmɔ lɛ gbɔmɔ lɛ akɛ: “Kɛji Yehowa aaagbele agbói anaa yɛ ŋwɛi po, ani enɛ* baanyɛ aba mli?”+ Kɛkɛ ni Elisha kɛɛ akɛ: “Obaana kɛ ohiŋmɛii,+ shi oyeŋ eko.”+  No mli lɛ, kpitiyelɔi ejwɛ komɛi yɛ maŋ lɛ agbó lɛ naa,+ ni amɛkɛɛkɛɛ amɛhe akɛ: “Mɛni hewɔ wɔbaatara biɛ kɛyashi be ni wɔbaagboi?  Kɛ́ wɔkɛɛ akɛ, ‘Nyɛhãa wɔyaa maŋ lɛ mli,’ be ni hɔmɔ lɛ yɛ maŋ lɛ mli lolo lɛ,+ no lɛ wɔbaagboi yɛ jɛmɛ. Ni kɛ́ wɔtara biɛ hu, wɔbaagboi kɛ̃. No hewɔ lɛ, nyɛhãa wɔyaa Siriabii lɛ nsara lɛ mli. Kɛ́ amɛgbeee wɔ lɛ, wɔbaahi wala mli, shi kɛ́ amɛgbe wɔ lɛ, belɛ wɔbaagboi.”  Ni gbɛkɛnaashi be ni duŋ miiwo lɛ, amɛte shi koni amɛyabote Siriabii lɛ nsara lɛ mli. Be ni amɛshɛ Siriabii lɛ nsara lɛ naa lɛ, amɛnaaa mɔ ko mɔ ko yɛ jɛmɛ.  Ejaakɛ no mli lɛ, Yehowa ehã Siria asraafoi lɛ enu ta shwiilii agbɛɛmɔ kɛ okpɔŋɔi anajiashi gbɛɛmɔ, kɛ asraafoi babaoo ahe.+ No hewɔ lɛ, amɛkɛɛkɛɛ amɛhe akɛ: “Naa! Israel maŋtsɛ lɛ eyabɔ Hitbii lɛ amaŋtsɛmɛi kɛ Ejiptbii lɛ amaŋtsɛmɛi lɛ apaa koni amɛkɛ wɔ abawu!”  Amrɔ nɔŋŋ ni amɛte shi gbɛkɛnaashi be ni duŋ miiwo lɛ, ni amɛjo foi, ni amɛshi amɛmama tsũi lɛ, kɛ okpɔŋɔi lɛ, kɛ tejii lɛ, kɛ nsara muu lɛ fɛɛ tamɔ bɔ ni eyɔɔ lɛ, ni amɛjo foi koni amɛbaa amɛwala yi.*  Be ni kpitiyelɔi nɛɛ shɛ nsara lɛ naa lɛ, amɛbote mama tsũi lɛ eko mli, ni amɛye nii ni amɛnu nii. Amɛloo jwiɛtɛi, kɛ shika tsuru, kɛ atadei yɛ jɛmɛ ni amɛtee ni amɛkɛyato. Kɛkɛ ni amɛku amɛsɛɛ ni amɛyabote mama tsũ kroko mli ni amɛloo nibii yɛ jɛmɛ hu, ni amɛtee ni amɛkɛyato.  Kɛkɛ ni amɛkɛɛkɛɛ amɛhe akɛ: “Nɔ ni wɔfeɔ lɛ ejaaa. Ŋmɛnɛ gbi nɛɛ sane kpakpa gbi ni! Kɛ́ wɔfee diŋŋ* ni wɔmɛ kɛyashi je tsɛre lɛ, no lɛ wɔsa toigbalamɔ. Nyɛhãa wɔyaa amrɔ nɔŋŋ ni wɔyabɔa amaniɛ yɛ maŋtsɛ lɛ shĩa lɛ.” 10  No hewɔ lɛ, amɛtee ni amɛyatsɛ maŋ lɛ agbonaakwɛlɔi lɛ, ni amɛbɔ amɛ amaniɛ akɛ: “Wɔtee Siriabii lɛ nsara lɛ mli, shi mɔ ko mɔ ko bɛ jɛmɛ—wɔnuuu mɔ ko mɔ ko kwraa he. Okpɔŋɔi lɛ kɛ tejii lɛ pɛ shi aŋmɔlɔ yɛ jɛmɛ, ni mama tsũi lɛ hu yɛ bɔ ni amɛyɔɔ lɛ nɔŋŋ.” 11  Amrɔ nɔŋŋ ni agbonaakwɛlɔi lɛ bo amɛtsɛ mɛi, ni ayabɔ amaniɛ yɛ maŋtsɛ lɛ shĩa lɛ mli. 12  Amrɔ nɔŋŋ ni maŋtsɛ lɛ te shi nyɔɔŋ ni ekɛɛ etsuji lɛ akɛ: “Nyɛfainɛ, nyɛhãa makɛa nyɛ nɔ ni Siriabii lɛ eto amɛyiŋ akɛ amɛbaafee wɔ. Amɛle akɛ hɔmɔ miiye wɔ,+ no hewɔ lɛ, amɛshi nsara lɛ mli amɛyatee amɛhe yɛ ŋa lɛ nɔ, ni nɔ ni amɛkɛɔ ji ‘Amɛbaaje kpo yɛ maŋ lɛ mli, ni wɔbaamɔmɔ amɛ hiɛkãalɔi ni wɔbaabote maŋ lɛ mli.’”+ 13  Kɛkɛ ni etsuji lɛ ateŋ mɔ kome kɛɛ akɛ: “Ofainɛ, hã hii komɛi kɛ okpɔŋɔi ni eshwɛ yɛ maŋ lɛ mli lɛ ateŋ enumɔ aya. Naa! Nɔ ni baaba amɛnɔ lɛ no nɔŋŋ baaba Israelbii fɛɛ ni eshwɛ yɛ maŋ lɛ mli lɛ anɔ. Ni naa! Amɛhiɛ baakpãtã tamɔ Israelbii fɛɛ ni hiɛ ekpãtã momo lɛ nɔŋŋ. Nyɛhãa wɔtsua amɛ ni amɛya ni amɛyakwɛ.” 14  No hewɔ lɛ, amɛŋɔ shwiilii enyɔ kɛ amɛnaa okpɔŋɔi, ni maŋtsɛ lɛ tsu amɛ kɛtee Siriabii lɛ nsara lɛ mli ekɛɛ: “Nyɛyaa ni nyɛyakwɛa.” 15  Ni amɛtiu amɛ kɛyashi Yordan Faa lɛ naa tɔ̃ɔ, ni gbɛ lɛ nɔ fɛɛ eyi kɛ atadei kɛ tsɛnsii ni Siriabii lɛ shɛrɛ shwie be ni ŋmiŋmi mɔmɔ amɛ ni amɛjo foi lɛ. Mɛi ni atsu lɛ ku amɛsɛɛ kɛba ni amɛbabɔ maŋtsɛ lɛ amaniɛ. 16  Kɛkɛ ni maŋbii lɛ tee ni amɛyaha nibii ni yɔɔ Siriabii lɛ nsara lɛ mli lɛ, ni enɛ hã ahɔ̃ɔ ashikishaŋ kpakpa sia susumɔnɔ kome shekel kome, ni ahɔ̃ɔ barle* sia susumɔnii enyɔ shekel kome, tamɔ bɔ ni Yehowa ewie lɛ.+ 17  No mli lɛ, maŋtsɛ lɛ kɛ asafoiatsɛ ko ni ekɛ ehiɛ fɔ̃ɔ enɔ lɛ eto agbó lɛ naa, shi maŋbii lɛ naanaa enɔ yɛ agbó lɛ naa ni egbo, tamɔ bɔ ni anɔkwa Nyɔŋmɔ lɛ gbɔmɔ lɛ kɛɛ maŋtsɛ lɛ be ni maŋtsɛ lɛ kpeleke shi kɛba eŋɔɔ lɛ pɛpɛɛpɛ. 18  Nɔ ni anɔkwa Nyɔŋmɔ lɛ gbɔmɔ lɛ kɛɛ maŋtsɛ lɛ, nakai pɛpɛɛpɛ eba mli, ekɛɛ akɛ: “Wɔ́ aaafee nɛkɛ be mli yɛ Samaria agbó lɛ naa lɛ, abaahɔ̃ɔ ashikishaŋ kpakpa sia susumɔnɔ kome shekel kome, ni abaahɔ̃ɔ barle* sia susumɔnii enyɔ shekel kome.”+ 19  Shi no mli lɛ, asafoiatsɛ lɛ kɛɛ anɔkwa Nyɔŋmɔ lɛ gbɔmɔ lɛ akɛ: “Kɛji Yehowa aaagbele agbói anaa yɛ ŋwɛi po, ani nɔ ko tamɔ nɛkɛ* baanyɛ aba mli?” Kɛkɛ ni Elisha kɛɛ akɛ: “Obaana kɛ ohiŋmɛii, shi oyeŋ eko.” 20  Nakai pɛpɛɛpɛ eba mli yɛ enɔ, ejaakɛ maŋbii lɛ naanaa enɔ yɛ agbó lɛ naa ni egbo.

Shishigbɛ Niŋmaa

Loo “Samaria jaji lɛ anɔ.”
Sia kome feɔ litai 7.33 (kwat 6.66). Kwɛmɔ Saji Krokomɛi B14 lɛ.
Shekel kome feɔ gram 11.4 (oz t 0.367). Kwɛmɔ Saji Krokomɛi B14 lɛ.
Eji wiiti henɔ ko.
Hebri sht. ŋm., “wiemɔ nɛɛ.”
Loo “amɛkɛbaa amɛsusumai ayi.”
Loo “wɔshashao shi.”
Eji wiiti henɔ ko.
Eji wiiti henɔ ko.
Hebri sht. ŋm., “wiemɔ ni tamɔ nɛkɛ.”