2 Maŋtsɛmɛi 6:1-33

  • Elisha hã lema yitso batɛo nu hiɛ (1-7)

  • Elisha kɛ Siriabii lɛ (8-23)

    • Agbele Elisha sɔɔlɔ lɛ hiŋmɛii (16, 17)

    • Ashwila Siriabii lɛ ajwɛŋmɔ (18, 19)

  • Hɔmɔ ba Samaria ni awo he ka lɛ mli (24-33)

6  Gbalɔi abii*+ lɛ kɛɛ Elisha akɛ: “Naa! He ni wɔyɔɔ yɛ omasɛi lɛ edaaa kwraa kɛhãaa wɔ.  Ofainɛ, hã wɔya Yordan Faa lɛ naa. Nyɛhãa wɔteŋ mɔ fɛɛ mɔ ayawóa mplaŋ kome yɛ jɛmɛ ni wɔkɛfee he ko ni wɔbaanyɛ wɔhi yɛ jɛmɛ.” Ekɛɛ akɛ: “Nyɛyaa.”  Amɛteŋ mɔ kome kɛɛ akɛ: “Ofainɛ, ani obaafata otsuji lɛ ahe kɛya?” Ni ekɛɛ akɛ: “Maya.”  No hewɔ lɛ, ekɛ amɛ tee, ni amɛyashɛ Yordan Faa lɛ naa ni amɛbɔi tsei lɛ folɔmɔ.  Be ni amɛteŋ mɔ kome foɔ tso lɛ eko lɛ, lema lɛ yitso lɛ gbee nu lɛ mli, ni ebo ekɛɛ: “Ao, minuŋtsɔ, ma miyama ei!”  Ni anɔkwa Nyɔŋmɔ lɛ gbɔmɔ lɛ bi lɛ akɛ: “Nɛgbɛ egbee?” Ni etsɔɔ lɛ he ni egbee lɛ. Kɛkɛ ni efo tso ko ni eshɛ efɔ̃ jɛmɛ, ni lema lɛ yitso lɛ batɔɔ nu lɛ hiɛ.  Elisha kɛɛ akɛ: “Kɔ.” Ni ekpã enine mli ni ekɔ.  Agbɛnɛ, Siria maŋtsɛ lɛ tee koni ekɛ Israel ayawu.+ Ekɛ etsuji lɛ susu nii ahe ni etsɔɔ amɛ he ni amɛbaayabɔ nsara yɛ lɛ.  Kɛkɛ ni anɔkwa Nyɔŋmɔ lɛ gbɔmɔ+ lɛ tsu ayakɛɛ Israel maŋtsɛ lɛ akɛ: “Hã ohiɛ ahi ohe nɔ koni okatsɔ biɛ nɛɛ, ejaakɛ jɛmɛ ji he ni Siriabii lɛ baatsɔ kɛba.” 10  No hewɔ lɛ, Israel maŋtsɛ lɛ tsu ni ayabɔ ewebii ni yɔɔ he ni anɔkwa Nyɔŋmɔ lɛ gbɔmɔ lɛ ebɔ lɛ kɔkɔ akɛ ekatsɔ lɛ. Etee nɔ ebɔ maŋtsɛ lɛ kɔkɔ, ni maŋtsɛ lɛ eyatsɔɔɔ jɛmɛ; jeee shi kome pɛ eyatsɔɔɔ jɛmɛ, efee nakai nɔ ni fe shii enyɔ.+ 11  Enɛ hã Siria maŋtsɛ lɛ mli fu,* no hewɔ lɛ, etsu ayatsɛ etsuji lɛ kɛba ni ekɛɛ amɛ akɛ: “Nyɛkɛa mi! Wɔteŋ namɔ yɔɔ Israel maŋtsɛ lɛ gbɛfaŋ?” 12  Kɛkɛ ni etsuji lɛ ateŋ mɔ kome kɛɛ akɛ: “Minuŋtsɔ maŋtsɛ, wɔteŋ mɔ ko mɔ ko bɛ egbɛfaŋ! Elisha, gbalɔ ni yɔɔ Israel lɛ ji mɔ ni kɛɔ Israel maŋtsɛ lɛ nibii ni owieɔ yɛ osɛɛtsu lɛ mli lɛ.”+ 13  Ekɛɛ akɛ: “Nyɛyaa ni nyɛyataoa he ni eyɔɔ koni matsu ni ayamɔ lɛ kɛba.” Sɛɛ mli lɛ, abakɛɛ lɛ akɛ: “Eyɛ Dotan.”+ 14  Amrɔ nɔŋŋ ni etsu okpɔŋɔi kɛ ta shwiilii kɛ asraafoi babaoo kɛtee jɛmɛ; amɛyashɛ jɛmɛ nyɔɔŋ ni amɛbɔle maŋ lɛ. 15  Be ni anɔkwa Nyɔŋmɔ lɛ gbɔmɔ lɛ sɔɔlɔ lɛ hiɛ tsɛ̃ mra ni eje kpo lɛ, ena akɛ asraafoi kɛ okpɔŋɔi kɛ ta shwiilii ebabɔle maŋ lɛ. Amrɔ nɔŋŋ ni sɔɔlɔ lɛ kɛɛ Elisha akɛ: “Ao, minuŋtsɔ! Mɛni wɔbaafee?” 16  Shi Elisha kɛɛ akɛ: “Kaashe gbeyei!+ Ejaakɛ mɛi ni kɛ wɔ yɔɔ lɛ ayi fa fe mɛi ni kɛ amɛ yɔɔ lɛ.”+ 17  Kɛkɛ ni Elisha sɔle ekɛɛ: “Yehowa ee, ofainɛ gbelemɔ ehiŋmɛii koni ena nii.”+ Amrɔ nɔŋŋ ni Yehowa gbele sɔɔlɔ lɛ hiŋmɛii ni ena nii, ni naa! gɔji lɛ anɔ fɛɛ eyi kɛ la okpɔŋɔi kɛ la shwiilii*+ kɛbɔle Elisha he kɛkpe.+ 18  Be ni Siriabii lɛ kpeleke shi kɛba Elisha ŋɔɔ lɛ, esɔle ehã Yehowa ekɛɛ: “Ofainɛ, hã mɛi* nɛɛ ashwila.”+ No hewɔ lɛ, eshwila amɛ tamɔ bɔ ni Elisha bi lɛ pɛpɛɛpɛ. 19  Kɛkɛ ni Elisha kɛɛ amɛ akɛ: “Jeee gbɛ lɛ nɛ, ni jeee maŋ lɛ hu nɛ. Nyɛnyiɛa misɛɛ, ni manyiɛ nyɛhiɛ kɛya nuu ni nyɛtaoɔ lɛ lɛ ŋɔɔ.” Ni enyiɛ amɛhiɛ kɛtee Samaria.+ 20  Be ni amɛyashɛ Samaria lɛ, Elisha kɛɛ akɛ: “Yehowa ee, gbelemɔ amɛhiŋmɛii koni amɛna nii.” Ni Yehowa gbele amɛhiŋmɛii, ni amɛna akɛ amɛyɛ Samaria maŋ lɛ teŋ. 21  Be ni Israel maŋtsɛ lɛ na amɛ lɛ, ebi Elisha akɛ: “Mitsɛ, migbe amɛ, migbe amɛ lo?” 22  Shi Elisha kɛɛ akɛ: “Kaagbe amɛ. Ani obaagbe mɛi ni okɛ oklante kɛ ogãi eŋɔ amɛ nom lɛ? Hã amɛ niyenii ni amɛye kɛ nu ni amɛnu+ ni amɛku amɛsɛɛ kɛya amɛnuŋtsɔ lɛ ŋɔɔ.” 23  No hewɔ lɛ, eŋmɛ amɛ okpɔlɔ kpele, ni amɛye ni amɛnu, ni no sɛɛ lɛ, ewo amɛ gbɛ koni amɛku amɛsɛɛ kɛya amɛnuŋtsɔ lɛ ŋɔɔ. Ni kɛjɛ no sɛɛ lɛ, Siria+ ojotswalɔi ata baaa Israel shikpɔŋ lɛ nɔ dɔŋŋ. 24  No sɛɛ lɛ, Ben-hadad ni ji Siria maŋtsɛ lɛ bua esraafoi* lɛ fɛɛ anaa ni amɛkwɔ kɛtee ni amɛyawo Samaria he ka.+ 25  No hewɔ lɛ, hɔmɔ ni naa wa+ ba Samaria, ni amɛwo Samaria he ka aahu akɛ ahɔ̃ɔ teji yitso+ jwiɛtɛi kapɛji 80, ni ahɔɔ okpo wamɔ kab* susumɔnɔ kome mlijai ejwɛ mli ekome jwiɛtɛi kapɛji 5. 26  Be ni Israel maŋtsɛ lɛ nyiɛ gbogbo lɛ nɔ kɛhoɔ lɛ, yoo ko bo ekɛɛ maŋtsɛ lɛ akɛ: “Ao, minuŋtsɔ maŋtsɛ, ye obua wɔ!” 27  Ni ekɛɛ yoo lɛ akɛ: “Kɛ́ Yehowa yeee ebuaaa bo lɛ, nɛgbɛ majɛ maye mabua bo? Kɛjɛ ŋmaagbeemɔhe lɛ, aloo kɛjɛ bu ni aŋaa wain loo mu yɛ mli lɛ mli?” 28  Maŋtsɛ lɛ bi yoo lɛ akɛ: “Mɛni feɔ bo?” Yoo lɛ hã hetoo akɛ: “Yoo nɛɛ kɛɛ mi akɛ, ‘Okɛ obinuu lɛ aba ni wɔye lɛ ŋmɛnɛ, koni wɔ lɛ wɔye mi hu mibinuu lɛ.’+ 29  No hewɔ lɛ, wɔhoo mibinuu lɛ ni wɔye lɛ.+ Enɔ jetsɛremɔ lɛ, mikɛɛ yoo lɛ akɛ, ‘Okɛ obinuu lɛ aba ni wɔye lɛ.’ Shi ekɛ ebinuu lɛ yatee.” 30  Be ni maŋtsɛ lɛ nu yoo lɛ wiemɔi lɛ nɔŋŋ lɛ, egbala etadei lɛ.+ Be ni etsɔ gbogbo lɛ nɔ kɛho lɛ, maŋbii lɛ na akɛ ebu kpekpe yɛ etadei lɛ ashishi.* 31  Kɛkɛ ni ekɛɛ akɛ: “Nyɔŋmɔ kɛ mi aye ni ekɛ mi aye ekoŋŋ kɛji mifooo Elisha, Shafat binuu lɛ yitso ŋmɛnɛ!”+ 32  Elisha ta eshĩa lɛ, ni onukpai lɛ hu tara emasɛi. Maŋtsɛ lɛ tsu mɔ ko kɛtsɔ ehiɛ, shi dani mɔ ni atsu lɛ baashɛ shi lɛ, Elisha kɛɛ onukpai lɛ akɛ: “Nyɛna akɛ gbɔmɔgbelɔ bi+ nɛɛ etsu koni abafo miyitso? Nyɛhiɛ ahia nyɛhe nɔ koni kɛ́ mɔ ni atsu lɛ ba lɛ, nyɛŋa shinaa lɛ ni nyɛpiŋ sɛɛ. Ani jeee enuŋtsɔ lɛ najiashi gbɛɔ yɛ esɛɛ lɛ?” 33  Be ni ekɛ amɛ wieɔ lolo lɛ, mɔ ni atsu lɛ ba eŋɔɔ, ni maŋtsɛ lɛ kɛɛ akɛ: “Sane fɔŋ nɛɛ jɛ Yehowa ŋɔɔ. Mɛni hewɔ mɔ esa akɛ maya nɔ mamɛ Yehowa?”

Shishigbɛ Niŋmaa

Eeenyɛ efee akɛ, akɛ wiemɔ ni ji “gbalɔi abii” lɛ tsuɔ nii kɛhãa mɛi ni yaa skul ni akɛtsɔɔ gbalɔi anii, loo akɛtsuɔ nii kɛhãa gbalɔi akuu ko.
Hebri sht. ŋm., “Enɛ hã Siria maŋtsɛ lɛ tsui mli fu.”
Loo “ta shwiilii.”
Loo “jeŋmaŋ.”
Hebri sht. ŋm., “ensara.”
Kab kome feɔ litai 7.33 (kwat 6.66). Kwɛmɔ Saji Krokomɛi B14 lɛ.
Loo “ebu kpekpe yɛ shishi yɛ ehewolo nɔ.”