2 Maŋtsɛmɛi 4:1-44

  • Elisha hã yoo okulafo lɛ mu lɛ fee pii (1-7)

  • Shunam yoo ko fee Elisha gbɔ (8-16)

  • Ajwere yoo lɛ kɛ binuu; ebinuu lɛ gbo (17-31)

  • Elisha tee gbekɛ nuu lɛ shi (32-37)

  • Elisha jie pɔizin yɛ niyenii mli (38-41)

  • Elisha hã blodo fee pii (42-44)

4  Gbalɔi abii*+ lɛ ateŋ mɔ kome ŋa bafó eshwie Elisha nɔ ekɛɛ: “Miwu, ni ji otsulɔ lɛ egbo, ni ole jogbaŋŋ akɛ otsulɔ she Yehowa gbeyei ewala gbii abɔ fɛɛ.+ Agbɛnɛ mɔ ko ni wɔhiɛ lɛ nyɔmɔ eba koni ebamɔmɔ mibii enyɔ lɛ fɛɛ kɛya akɛ enyɔji.”  Kɛkɛ ni Elisha bi yoo lɛ akɛ: “Mɛni otaoɔ mafee mahã bo? Kɛɛmɔ mi, mɛni oyɔɔ yɛ shĩa?” Yoo lɛ kɛɛ akɛ: “Otsulɔ bɛ nɔ ko nɔ ko kwraa yɛ shĩa akɛ ja mu gbɛ́*+ kome.”  Kɛkɛ ni ekɛɛ yoo lɛ akɛ: “Yaa agbó lɛ naa, ni oyabi okutsoŋbii lɛ ni amɛhã bo gbɛ́i, gbɛ́i ni nɔ ko bɛ mli. Bi koni ahã bo gbɛ́i babaoo.  No sɛɛ lɛ, yaa ni oyaŋa oshinaa lɛ owo bo kɛ obihii lɛ ayi. Tsɔ mu lɛ owo gbɛ́i lɛ fɛɛ amli, ni kɛ́ eko yi lɛ, kɛma afã.”  No hewɔ lɛ, yoo lɛ shi lɛ etee. Kɛkɛ ni yoo lɛ ŋa shinaa lɛ ewo ekɛ ebihii lɛ ayi; ni ebihii lɛ holeɔ gbɛ́i lɛ amɛhãa lɛ ni etsɔɔ mu lɛ ewoɔ mli.+  Be ni gbɛ́i lɛ fɛɛ yimɔ lɛ, ekɛɛ ebihii lɛ ateŋ mɔ kome akɛ: “Wó gbɛ́ lɛ eko kɛba.”+ Shi ebinuu lɛ kɛɛ lɛ akɛ: “Gbɛ́i lɛ etã.” Kɛkɛ ni mu lɛ sɛɛ fo.+  No hewɔ lɛ, yoo lɛ ba ni ebakɛɛ anɔkwa Nyɔŋmɔ lɛ gbɔmɔ lɛ, ni anɔkwa Nyɔŋmɔ lɛ gbɔmɔ lɛ kɛɛ lɛ akɛ: “Yaa ni oyahɔ̃ɔ mu lɛ ni okɛwo onyɔmɔ lɛ, koni bo kɛ obihii lɛ kɛ nɔ ni baashwɛ lɛ akwɛ nyɛhe.”  Gbi ko lɛ, Elisha tee Shunem,+ he ni hiɛnaanɔ yoo ko yɔɔ lɛ, ni yoo lɛ kpa lɛ fai koni ebaye nii yɛ eŋɔɔ.+ Be fɛɛ be ni ebaatsɔ jɛmɛ kɛho lɛ, eyayeɔ nii yɛ yoo lɛ ŋɔɔ.  No hewɔ lɛ, yoo lɛ kɛɛ ewu akɛ: “Mina akɛ nuu nɛɛ ni baa biɛ daa lɛ, Nyɔŋmɔ gbɔmɔ krɔŋkrɔŋ ni. 10  Ofainɛ, hã wɔfee tsũ fioo ko yɛ wɔtsũ lɛ yiteŋ+ ni wɔkɛ saatso, kɛ okpɔlɔ, kɛ sɛi, kɛ kanetso ama mli. Kɛkɛ lɛ, be fɛɛ be ni ebaaba wɔŋɔɔ lɛ, ebaanyɛ ehi jɛmɛ.”+ 11  Gbi ko lɛ, Elisha ba jɛmɛ, ni etee tsũ lɛ ni yɔɔ tsũ lɛ yiteŋ lɛ mli koni eyakã shi. 12  Kɛkɛ ni ekɛɛ Gehazi,+ esɔɔlɔ lɛ akɛ: “Tsɛ Shunam+ yoo lɛ ohã mi.” No hewɔ lɛ, eyatsɛ lɛ, ni yoo lɛ badamɔ Elisha hiɛ. 13  Kɛkɛ ni Elisha kɛɛ Gehazi akɛ: “Ofainɛ, kɛɛmɔ yoo lɛ akɛ, ‘Ogbo deŋme kɛfee enɛ fɛɛ ohã wɔ.+ Mɛni osumɔɔ ni afee ahã bo?+ Ani oyɛ nɔ ko ni obaasumɔ ni mikɛ maŋtsɛ+ lɛ loo tatsɛ lɛ ayawie he ahã bo?’” Shi yoo lɛ kɛɛ lɛ akɛ: “Miyɛ mi diɛŋtsɛ mimaŋbii ateŋ.” 14  Ni Elisha bi akɛ: “No hewɔ lɛ, mɛni abaanyɛ afee ahã yoo nɛɛ?” Kɛkɛ ni Gehazi kɛɛ akɛ: “Ebɛ binuu ko,+ ni ewu hu egbɔ.” 15  Oya nɔŋŋ ni Elisha kɛɛ akɛ: “Tsɛ yoo lɛ kɛba.” No hewɔ lɛ, Gehazi tsɛ yoo lɛ kɛba ni yoo lɛ badamɔ shinaa lɛ naa. 16  Kɛkɛ ni Elisha kɛɛ yoo lɛ akɛ: “Wɔsɛɛ afi benɛ, obaahiɛ binuu yɛ odɛŋ.”+ Shi yoo lɛ kɛɛ lɛ akɛ: “Dabi, minuŋtsɔ! Anɔkwa Nyɔŋmɔ lɛ gbɔmɔ ji bo, no hewɔ lɛ, kaalaka otsulɔ.” 17  Shi yoo lɛ baná musu, ni be ni eshɛ be ni akɛ lɛ wie lɛ nɔ afi pɛpɛɛpɛ lɛ efɔ binuu, tamɔ bɔ ni Elisha kɛɛ lɛ lɛ. 18  Gbekɛ lɛ bada ni gbi ko lɛ etee etsɛ ŋɔɔ; no mli lɛ, etsɛ yɛ nikpalɔi lɛ amasɛi. 19  Etee nɔ ekɛɛ etsɛ akɛ: “Miyitso ei, miyitso!” Kɛkɛ ni etsɛ kɛɛ sɔɔlɔ lɛ akɛ: “Wó lɛ oyahã enyɛ.” 20  No hewɔ lɛ, ewó lɛ eyahã enyɛ, ni eta enyɛ shuɔ nɔ kɛyashi shwane, ni egbo.+ 21  Ni yoo lɛ kwɔ kɛtee ŋwɛitsu lɛ nɔ ni ekɛ lɛ yafɔ̃ anɔkwa Nyɔŋmɔ lɛ gbɔmɔ lɛ saatso lɛ nɔ,+ ni eje kpo ni eŋa shinaa lɛ ewo gbekɛ lɛ yi. 22  Ni etsɛ ewu ni ekɛɛ lɛ akɛ: “Ofainɛ, hã mi sɔɔlɔi lɛ ateŋ mɔ kome kɛ tejii lɛ ekome koni masha foi kɛya anɔkwa Nyɔŋmɔ lɛ gbɔmɔ lɛ ŋɔɔ maba.” 23  Shi ewu lɛ bi lɛ akɛ: “Mɛni hewɔ oyaa eŋɔɔ ŋmɛnɛ? Bɛ ŋmɛnɛ jeee nyɔɔŋtsere hee+ loo hejɔɔmɔ gbi?” Shi yoo lɛ kɛɛ akɛ: “Naagba ko bɛ.” 24  No hewɔ lɛ, ewo teji lɛ nɔ nii ni ekɛɛ esɔɔlɔ lɛ akɛ: “Wo lɛ foi. Kaanyiɛ blɛoo ja mikɛɛ bo dã.” 25  No hewɔ lɛ, etee anɔkwa Nyɔŋmɔ lɛ gbɔmɔ lɛ ŋɔɔ yɛ Karmel Gɔŋ lɛ nɔ. Be ni anɔkwa Nyɔŋmɔ lɛ gbɔmɔ lɛ na yoo lɛ miiba yɛ shɔŋŋ lɛ, oya nɔŋŋ ni ekɛɛ Gehazi, esɔɔlɔ lɛ akɛ: “Naa! Shunam yoo lɛ baa yɛ jɛmɛ lɛ. 26  Ofainɛ, sha foi ni okɛ lɛ ayakpe ni obi lɛ akɛ, ‘Oyɛ jogbaŋŋ lo? Owu yɛ jogbaŋŋ lo? Obi lɛ hu yɛ jogbaŋŋ lo?’” Ni yoo lɛ kɛɛ akɛ: “Wɔ fɛɛ wɔyɛ jogbaŋŋ.” 27  Be ni ebashɛ anɔkwa Nyɔŋmɔ lɛ gbɔmɔ lɛ masɛi yɛ gɔŋ lɛ nɔ lɛ, oya nɔŋŋ ni emɔmɔ anɔkwa Nyɔŋmɔ lɛ gbɔmɔ lɛ naji amli.+ Kɛkɛ ni Gehazi ba koni ebatsi yoo lɛ kɛya sɛɛ, shi anɔkwa Nyɔŋmɔ lɛ gbɔmɔ lɛ kɛɛ lɛ akɛ: “Shi lɛ, ejaakɛ ehao waa,* ni Yehowa kɛtee mi, ni ekɛko mi.” 28  Kɛkɛ ni yoo lɛ bi Elisha akɛ: “Ani mibaba binuu yɛ minuŋtsɔ dɛŋ? Ani mikɛɛɛ bo akɛ: ‘Kaalaka mi’?”+ 29  Oya nɔŋŋ ni Elisha kɛɛ Gehazi akɛ: “Okɛ otadei lɛ aŋmɔlɔ ohɛ,+ ni okɔ midɛhiɛmɔtso lɛ ohiɛ odɛŋ ni oya. Kɛ́ okɛ mɔ ko kpe lɛ, kaaŋa lɛ; ni kɛ́ mɔ ko hu ŋa bo lɛ, kaahere lɛ nɔ. Yaa ni okɛ midɛhiɛmɔtso lɛ ayafɔ̃ gbekɛ nuu lɛ hiɛ.” 30  Kɛkɛ ni gbekɛ nuu lɛ nyɛ lɛ kɛɛ akɛ: “Gbii abɔ ni Yehowa hiɛ kã ni bo hu ohiɛ* kã nɛɛ, mishiŋ bo kɔkɔɔkɔ.”+ No hewɔ lɛ, Elisha te shi ni ekɛ yoo lɛ fɛɛ tee. 31  Shi Gehazi tsɔ amɛhiɛ ni ekɛ dɛhiɛmɔtso lɛ yafɔ̃ gbekɛ nuu lɛ hiɛ, shi enuuu gbee ko, ni gbekɛ nuu lɛ tsiii ehe hu.+ No hewɔ lɛ, Gehazi ku esɛɛ ni ekɛ Elisha yakpe ni ekɛɛ Elisha akɛ: “Gbekɛ nuu lɛ eteee shi.” 32  Be ni Elisha bote shĩa lɛ mli lɛ, gbekɛ nuu lɛ kã esaatso lɛ nɔ ni egbo.+ 33  Ebote tsũ lɛ mli ni eŋa shinaa lɛ ewo ekɛ gbekɛ nuu lɛ yi ni esɔle ehã Yehowa.+ 34  Kɛkɛ ni ekwɔ saatso lɛ, ni eho ekã gbekɛ nuu lɛ nɔ, ni Elisha kɛ enaabu bu gbekɛ nuu lɛ naabu nɔ, ni ekɛ ehiŋmɛii bu gbekɛ nuu lɛ hiŋmɛii nɔ, ni ekɛ edɛ̃ fɔ̃ gbekɛ nuu lɛ dɛŋ ni ebu gbekɛ nuu lɛ nɔ, ni gbekɛ nuu lɛ he bɔi dɔɔ.+ 35  Ete shi ni enyiɛ kɛtee kɛba yɛ shĩa lɛ mli, ni ekwɔ saatso lɛ ni eyabu gbekɛ nuu lɛ nɔ ekoŋŋ. Gbekɛ nuu lɛ tsine shii kpawo, kɛkɛ ni gbekɛ nuu lɛ gbele ehiŋmɛii.+ 36  Kɛkɛ ni Elisha tsɛ Gehazi ni ekɛɛ lɛ akɛ: “Tsɛ Shunam yoo lɛ kɛba.” No hewɔ lɛ, eyatsɛ yoo lɛ, ni yoo lɛ ba Elisha ŋɔɔ. Ni Elisha kɛɛ lɛ akɛ: “Baawó obinuu lɛ.”+ 37  Ni yoo lɛ bote tsũ lɛ mli ni ekula shi yɛ Elisha naji anaa ni ekoto lɛ, kɛkɛ ni ewó ebinuu lɛ ni eje kpo. 38  Be ni Elisha ku esɛɛ etee Gilgal lɛ, no mli lɛ, hɔmɔ yɛ shikpɔŋ lɛ nɔ.+ Gbalɔi abii*+ lɛ tara shi yɛ ehiɛ ni Elisha kɛɛ esɔɔlɔ+ lɛ akɛ: “Okɛ kukwɛi wulu lɛ ama la nɔ, ni ohoo wonu ohã gbalɔi abii lɛ.” 39  No hewɔ lɛ, amɛteŋ mɔ kome tee ŋa lɛ nɔ koni eyatao bai, ni eyana ŋa nɔ tsene tɔ tso ko ni etse tsene tɔi lɛ eko yɛ nɔ ewo etade lɛ mli. Kɛkɛ ni eku esɛɛ eba ni ebafolɔ ewo kukwɛi ni akɛhoɔ wonu lɛ mli, tsɛbelɛ eleee nɔ yibii ni eyatse lɛ. 40  Sɛɛ mli lɛ, amɛtsɔ eko amɛhã hii lɛ koni amɛye, shi be ni amɛkɛ wonu lɛ eko sa amɛnaa nɔŋŋ lɛ, amɛbolɔ akɛ: “Ao, anɔkwa Nyɔŋmɔ lɛ gbɔmɔ, gbele yɛ kukwɛi lɛ mli.” Ni amɛnyɛɛɛ amɛye. 41  No hewɔ lɛ, ekɛɛ amɛ akɛ: “Nyɛhãa mi ashikishaŋ* fioo ko.” Be ni ekɛwo kukwɛi lɛ mli egbe naa lɛ, ekɛɛ akɛ: “Nyɛhãa amɛ eko ni amɛyea.” Ni anaaa nɔ ko fɔŋ ko yɛ kukwɛi lɛ mli dɔŋŋ.+ 42  Ni nuu ko jɛ Baal-shalisha+ kɛba, ni ebahã anɔkwa Nyɔŋmɔ lɛ gbɔmɔ lɛ blodoi 20 ni akɛ barle* klɛŋklɛŋ yibii+ ni atse lɛ ni fee, kɛ ŋmaa* kotoku kome.+ Kɛkɛ ni Elisha kɛɛ akɛ: “Kɛhã mɛi lɛ koni amɛye.” 43  Shi Elisha sɔɔlɔ lɛ kɛɛ akɛ: “Te mafee tɛŋŋ mikɛ enɛ ama hii 100 hiɛ lɛ?”+ Kɛkɛ ni Elisha kɛɛ lɛ akɛ: “Kɛhã mɛi lɛ ni amɛye, ejaakɛ Yehowa ekɛɛ akɛ, ‘Amɛbaaye ni eko baashwɛ.’”+ 44  Kɛkɛ ni ekɛyahã mɛi lɛ, ni amɛye ni eko shwɛ,+ tamɔ bɔ ni Yehowa ewie lɛ.

Shishigbɛ Niŋmaa

Eeenyɛ efee akɛ, akɛ wiemɔ ni ji “gbalɔi abii” lɛ tsuɔ nii kɛhãa mɛi ni yaa skul ni akɛtsɔɔ gbalɔi anii, loo akɛtsuɔ nii kɛhãa gbalɔi akuu ko.
Loo “gbɛ́ kɛ ekuɛ kakadaŋŋ.”
Loo “ejaakɛ esusuma miijoo yɛ emli.”
Loo “osusuma hiɛ.”
Eeenyɛ efee akɛ, akɛ wiemɔ ni ji “gbalɔi abii” lɛ tsuɔ nii kɛhãa mɛi ni yaa skul ni akɛtsɔɔ gbalɔi anii, loo akɛtsuɔ nii kɛhãa gbalɔi akuu ko.
Loo “mamu.”
Eji wiiti henɔ ko.
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.