2 Maŋtsɛmɛi 3:1-27

  • Yehoram batsɔ Israel maŋtsɛ (1-3)

  • Moab tse Israel hiɛ atua (4-25)

  • Aye Moab nɔ kunim (26, 27)

3  Yehoram,+ Ahab binuu lɛ batsɔ Israel maŋtsɛ yɛ Samaria yɛ Yuda maŋtsɛ Yehoshafat nɔyeli afi ni ji 18 lɛ nɔ, ni eye nɔ afii 12.  Etee nɔ efee efɔŋ yɛ Yehowa hiɛ, shi eshɛɛɛ efɔŋ ni epapa kɛ emami fee lɛ, ejaakɛ ejie Baal wɔŋ tɛ ni epapa fee lɛ.+  Shi efee eshai ni Yeroboam, Nebat binuu lɛ hã Israel fee lɛ nɔŋŋ.*+ Ekpaaa nakai eshai lɛ feemɔ.  No mli lɛ, Mesha, Moab maŋtsɛ lɛ lɛɔ gwantɛŋi, ni ebahãa Israel maŋtsɛ lɛ gwantɛŋbii 100,000 kɛ gwantɛŋhii ni akuko amɛhetsɔi 100,000 akɛ nikeenii.*  Be ni Ahab gbo nɔŋŋ lɛ,+ Moab maŋtsɛ lɛ tse Israel maŋtsɛ lɛ hiɛ atua.+  No hewɔ lɛ, Maŋtsɛ Yehoram je kpo kɛjɛ Samaria yɛ nakai beiaŋ ni ebua Israel fɛɛ naa.  Agbɛnɛ hu, etsu kɛtee Yuda maŋtsɛ Yehoshafat ŋɔɔ akɛ: “Moab maŋtsɛ lɛ etse mihiɛ atua. Ani obaafata mihe koni wɔkɛ Moab ayawu?” Ni Yehoshafat kɛɛ akɛ: “Mikɛ bo baaya.+ Mi kɛ bo fɛɛ lɛ, gbɔmɛi kome ji wɔ. Mimaŋbii lɛ kɛ omaŋbii lɛ hu lɛ, gbɔmɛi kome ni. Ni mikpɔŋɔi kɛ okpɔŋɔi lɛ fɛɛ lɛ, ekome ni.”+  Kɛkɛ ni ebi akɛ: “Nɛgbɛ wɔtsɔ kɛya?” Ni ekɛɛ: “Gbɛ ni yaa Edom ŋa lɛ nɔ lɛ nɔ.”  Kɛkɛ ni Israel maŋtsɛ lɛ kɛ Yuda maŋtsɛ lɛ kɛ Edom+ maŋtsɛ lɛ yi gbɛ. Be ni amɛbɔle shi aahu gbii kpawo lɛ, amɛnáaa nu amɛhã amɛsraafoi lɛ kɛ kooloi ni amɛkɛnyiɛ lɛ. 10  Kɛkɛ ni Israel maŋtsɛ lɛ kɛɛ akɛ: “Mɛɛ oshãrai asane nɛ! Yehowa ebua wɔ, maŋtsɛmɛi etɛ nɛɛ anaa koni ekɛ wɔ abawo Moab maŋtsɛ lɛ dɛŋ!” 11  Ni Yehoshafat bi akɛ: “Ani Yehowa gbalɔ ko bɛ biɛ ni wɔbaanyɛ wɔtsɔ enɔ wɔbi Yehowa nii?”+ Ni Israel maŋtsɛ lɛ tsuji lɛ ateŋ mɔ kome kɛɛ akɛ: “Elisha,+ Shafat binuu lɛ, mɔ ni no mli lɛ etsɔɔ nu eshwieɔ Elia niji anɔ lɛ* yɛ biɛ.”+ 12  Kɛkɛ ni Yehoshafat kɛɛ akɛ: “Yehowa wiemɔ lɛ kɛ lɛ yɛ.” No hewɔ lɛ, Israel maŋtsɛ lɛ kɛ Yehoshafat kɛ Edom maŋtsɛ lɛ kpeleke shi kɛtee eŋɔɔ. 13  Ni Elisha bi Israel maŋtsɛ lɛ akɛ: “Mɛni hewɔ oba miŋɔɔ?*+ Yaa otsɛ gbalɔi lɛ kɛ onyɛ gbalɔi lɛ aŋɔɔ.”+ Shi Israel maŋtsɛ lɛ kɛɛ lɛ akɛ: “Kaakɛɛ nakai, ejaakɛ Yehowa ji mɔ ni ebua wɔ, maŋtsɛmɛi etɛ nɛɛ anaa koni ekɛ wɔ abawo Moab dɛŋ.” 14  Kɛkɛ ni Elisha kɛɛ akɛ: “Gbii abɔ ni Yehowa, taiatsɛ lɛ, mɔ ni misɔmɔɔ* lɛ hiɛ kã nɛɛ, kɛjeee Yuda maŋtsɛ Yehoshafat+ ni mihiɛ gboɔ lɛ kulɛ, mikwɛŋ ohiɛ ni mifoŋ odaaŋ po.+ 15  Agbɛnɛ, nyɛtaoa saŋkutswalɔ*+ nyɛhãa mi.” Be ni saŋkutswalɔ lɛ bɔi saŋku lɛ tswaa nɔŋŋ lɛ, Yehowa mumɔ lɛ* ba Elisha nɔ.+ 16  Ekɛɛ akɛ, “Nɔ ni Yehowa kɛɛ nɛ: ‘Nyɛgbáa gɔɔtai yɛ jɔɔ* nɛɛ mli fɛɛ, 17  ejaakɛ nɔ ni Yehowa kɛɛ nɛ: “Kɔɔyɔɔ ko etswaŋ, ni nugbɔ ko hu enɛŋ; shi nu baayi jɔɔ* nɛɛ mli obɔ,+ ni nyɛbaanu emli nu lɛ eko, nyɛ, kɛ kooloi ni nyɛlɛɔ lɛ kɛ nyɛkooloi ni tereɔ jatsui lɛ fɛɛ.”’ 18  Enɛ lɛ, nɔ ko bibioo ni kɛhã Yehowa,+ ni ekɛ Moab hu baawo nyɛdɛŋ.+ 19  Nyɛfitea maŋ fɛɛ maŋ ni atswa gbogbo awo he+ kɛ maŋ kpakpa fɛɛ maŋ kpakpa, nyɛfoa tso kpakpa fɛɛ tso kpakpa nyɛfɔ̃a shi, nyɛtsimɔa nuhiŋmɛi fɛɛ nuhiŋmɛi, ni nyɛkɛ tɛi afitea shikpɔŋ kpakpa fɛɛ shikpɔŋ kpakpa.”+ 20  Ni leebi lɛ, be ni eshɛ be ni akɛshãa leebi ŋmaa* afɔle+ lɛ, nu jɛ Edom gbɛ kɛba trukaa, ni nu lɛ yi shikpɔŋ lɛ nɔ fɛɛ obɔ. 21  Moabbii lɛ fɛɛ nu akɛ maŋtsɛmɛi lɛ eba koni amɛkɛ amɛ abawu, no hewɔ lɛ, amɛbua hii fɛɛ ni baanyɛ ta aya* lɛ anaa, ni amɛyadamɔ maŋ lɛ husu lɛ naa. 22  Be ni amɛte shi leebi maŋkpa lɛ, no mli lɛ, hulu lɛ miikpɛ yɛ nu lɛ nɔ, shi kɛhã Moabbii lɛ ni yɔɔ afã kroko lɛ, nu lɛ etsu tamɔ lá. 23  No hewɔ lɛ, Moabbii lɛ kɛɛ akɛ: “Naa lá! Ekã shi faŋŋ akɛ, maŋtsɛmɛi lɛ kɛ klante egbegbee amɛhe. No hewɔ lɛ, agbɛnɛ Moabbii, nyɛyaloa ta mli nii!”+ 24  Be ni amɛba Israelbii lɛ nsara lɛ mli lɛ, Israelbii lɛ te shi ni amɛbɔi Moabbii lɛ gbee, ni amɛjo foi yɛ Israelbii lɛ ahiɛ.+ Israelbii lɛ tiu Moabbii lɛ kɛtee Moab, ni amɛgbegbee Moabbii lɛ kɛnyiɛ gbɛ lɛ nɔ aahu kɛtee. 25  Amɛfite maji lɛ fɛɛ, ni mɔ fɛɛ mɔ fɔ̃ tɛ ewo shikpɔŋ kpakpa fɛɛ shikpɔŋ kpakpa nɔ, ni tɛi lɛ yimɔ shikpɔji kpakpai lɛ fɛɛ anɔ obɔbɔ; amɛtsimɔ nuhiŋmɛii lɛ fɛɛ,+ ni amɛfolɔ tsei kpakpai lɛ fɛɛ amɛshwie shi.+ Ni Kir-hareset+ gbogboi ni akɛ tɛi etswa lɛ pɛ eshwɛ ni mamɔ shi, ni asraafoi ni fɔ̃ɔ akromia lɛ bɔle lɛ ni amɛkumɔ amɛshwie shi. 26  Be ni Moab maŋtsɛ lɛ na akɛ aye amɛnɔ kunim atã lɛ, ehala hii 700 ni hiɛɔ klante efata ehe koni amɛgbá kɛbote ta lɛ mli kɛyanina Edom maŋtsɛ lɛ;+ shi amɛyanyɛɛɛ. 27  No hewɔ lɛ, Moab maŋtsɛ lɛ kɛ ebinuu, ni ji ekromɔbi lɛ, mɔ ni baaye maŋtsɛ yɛ esɛɛ lɛ, shã shãa afɔle+ yɛ gbogbo lɛ nɔ. Ni mlifu ni naa wa ba Israelbii lɛ anɔ, no hewɔ lɛ, Israelbii lɛ shi lɛ ni amɛku amɛsɛɛ kɛtee amɛshikpɔŋ lɛ nɔ.

Shishigbɛ Niŋmaa

Loo “ekpɛtɛ eshai ni Yeroboam, Nebat binuu lɛ hã Israel fee lɛ nɔŋŋ he.”
Eeenyɛ efee akɛ, “nikeenii” nɛɛ ji maŋ too ko ni Israel maŋtsɛ lɛ biɔ yɛ amɛdɛŋ.
Loo “mɔ ni no mli lɛ eji Elia tsulɔ lɛ.”
Hebri sht. ŋm., “Mɛni yɔɔ mi kɛ bo yɔɔ?”
Hebri sht. ŋm., “mɔ ni midamɔɔ ehiɛ.”
Loo “lalatswalɔ.”
Loo “nine lɛ.”
Loo “nujɔɔ.”
Loo “nujɔɔ.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “mɛi fɛɛ ni fĩɔ bɛlti.”