2 Maŋtsɛmɛi 23:1-37

  • Yosia hã afee tsakemɔi (1-20)

  • Aye Hehoo lɛ (21-23)

  • Tsakemɔi krokomɛi ni Yosia hã afee (24-27)

  • Yosia gbele (28-30)

  • Yehoahaz batsɔ Yuda maŋtsɛ (31-33)

  • Yehoiakim batsɔ Yuda maŋtsɛ (34-37)

23  Ni maŋtsɛ lɛ tsu ni ayabua Yuda kɛ Yerusalem onukpai lɛ fɛɛ anaa kɛba eŋɔɔ.+  No sɛɛ lɛ, maŋtsɛ lɛ kɛ Yuda hii lɛ kɛ Yerusalembii lɛ kɛ osɔfoi lɛ kɛ gbalɔi lɛ fɛɛ—maŋbii lɛ fɛɛ, kɛjɛ mɔ bibioo nɔ kɛyashi mɔ wulu nɔ kwɔ kɛtee Yehowa shĩa lɛ. Ekane kpaŋmɔ+ wolo+ ni ana yɛ Yehowa shĩa lɛ mli wiemɔi lɛ fɛɛ yɛ amɛtoiiaŋ.+  Maŋtsɛ lɛ yadamɔ akulashiŋ lɛ he, ni ekpaŋ kpaŋmɔ* yɛ Yehowa hiɛ+ akɛ, ebaanyiɛ Yehowa sɛɛ ni ebaaye ekitãi lɛ, kɛ ekaimɔi lɛ, kɛ emlai lɛ anɔ kɛ etsui fɛɛ kɛ esusuma* fɛɛ, ni ji akɛ ebaaye kpaŋmɔ nɛɛ mli wiemɔi ni aŋmala yɛ wolo nɛɛ mli lɛ anɔ. Ni maŋbii lɛ fɛɛ kpɛ mli akɛ amɛbaaye kpaŋmɔ lɛ nɔ.+  Kɛkɛ ni maŋtsɛ lɛ fã osɔfonukpa Hilkia,+ kɛ enanemɛi osɔfoi lɛ, kɛ shinaanaakwɛlɔi lɛ koni amɛyaloo tsɛnsii fɛɛ ni afee ahã Baal, kɛ wɔŋ tso*+ lɛ, kɛ tsɛnsii ni afee ahã nibii ni yɔɔ ŋwɛi* lɛ fɛɛ kɛje Yehowa sɔlemɔ shĩa lɛ. Kɛkɛ ni eyashã nibii nɛɛ yɛ Yerusalem agbó lɛ naa yɛ Kidron gɔŋkpɔ lɛ he, ni eloo amɛlamulu lɛ kɛtee Betel.+  No hewɔ lɛ, eshwie jeŋmaji krokomɛi lɛ anyɔŋmɔi lɛ osɔfoi lɛ, mɛi ni Yuda maŋtsɛmɛi lɛ hole amɛ koni amɛshã lasu afɔle yɛ hei grɔŋŋi ni yɔɔ Yuda maji lɛ kɛ hei ni ebɔle Yerusalem he kɛkpe lɛ, ni eshwie mɛi ni shãa lasu afɔle amɛhãa Baal, kɛ hulu lɛ, kɛ nyɔɔŋtsere lɛ, kɛ zodiak ŋulamikui lɛ, kɛ nibii ni yɔɔ ŋwɛi* lɛ fɛɛ.+  Ejie wɔŋ tso*+ lɛ kɛje Yehowa shĩa lɛ kɛtee Yerusalem klotia yɛ Kidron Jɔɔ lɛ mli, ni eyashã+ yɛ Kidron Jɔɔ lɛ mli, ni eshimɔ lɛ munyɔmunyɔ, ni eloo mulu lɛ ni ekɛshwã maŋbii lɛ afuuhei lɛ anɔ.+  Agbɛnɛ hu, ekumɔ tsũi ni yɔɔ Yehowa shĩa lɛ, ni ji he ni yei lɛ loɔ mamai ni akɛfeɔ mama gbatsũi ahãa wɔŋ tso* lɛ yɛ lɛ, ni ji tsũi ni ama ahã hii ni hãa hii krokomɛi kɛ amɛ náa bɔlɛ*+ yɛ jamɔhei lɛ.  Kɛkɛ ni ejie osɔfoi lɛ fɛɛ kɛje Yuda maji lɛ amli, ni ebule hei grɔŋŋi lɛ, ni ji he ni no mli lɛ osɔfoi lɛ shãa lasu afɔle yɛ lɛ, koni akajá yɛ jɛmɛ, efee nakai kɛjɛ Geba+ kɛyashi Beer-sheba.+ Agbɛnɛ hu, ekumɔ agbói lɛ anaa hei grɔŋŋi lɛ ni yɔɔ Yoshua, ni ji maŋ lɛ onukpa lɛ agbó lɛ naa lɛ. Hei grɔŋŋi nɛɛ yɛ abɛku kɛ́ mɔ ko miibote maŋ lɛ agbó lɛ mli.  Hei grɔŋŋi osɔfoi lɛ sɔmɔɔɔ yɛ Yehowa afɔleshaa latɛ lɛ he,+ shi amɛ hu amɛyeɔ blodo ni ashikishaŋ-sha* bɛ mli lɛ eko tamɔ amɛnyɛmimɛi lɛ nɔŋŋ. 10  Agbɛnɛ hu, ebule Tofet+ ni yɔɔ Hinom Bii Lɛ Ajɔɔ* lɛ mli+ lɛ, koni mɔ ko mɔ ko akahã ebinuu loo ebiyoo tsɔ la mli ehã Molek dɔŋŋ.+ 11  Ni ehãaa okpɔŋɔi ni Yuda maŋtsɛmɛi lɛ jɔɔ nɔ amɛhã* hulu lɛ atsɔ Natan-melek, maŋtsɛ shĩa onukpa lɛ, tsũ* lɛ, ni yɔɔ ablanai lɛ anɔ lɛ mli kɛba Yehowa shĩa lɛ; ni eshã shwiilii ni ajɔɔ nɔ ahã hulu+ lɛ yɛ la mli. 12  Agbɛnɛ hu, maŋtsɛ lɛ kumɔ afɔleshaa latɛi ni Yuda maŋtsɛmɛi lɛ fee kɛma Ahaz ŋwɛi asa lɛ yiteŋ+ lɛ, kɛ afɔleshaa latɛi ni Manase fee kɛmamɔ Yehowa shĩa lɛ kpoi enyɔ lɛ anɔ lɛ.+ Ejwara fɛɛ mulumulu ni ekɛ amɛmulu lɛ shwã Kidron Jɔɔ lɛ mli. 13  Ni maŋtsɛ lɛ bule hei grɔŋŋi ni Israel maŋtsɛ Solomon mamɔ yɛ Yerusalem hiɛ yɛ Hiɛkpatamɔ Gɔŋ* lɛ wuoyi* ehã Ashtoret, Sidonbii lɛ anyɔŋmɔyoo ni yɔɔ nyaŋemɔ lɛ, kɛ Kemosh, Moabbii lɛ anyɔŋmɔ ni yɔɔ nyaŋemɔ lɛ, kɛ Milkom,+ Amonbii lɛ anyɔŋmɔ ni yɔɔ nyaŋemɔ lɛ,+ koni akajá yɛ jɛmɛ. 14  Ejwara wɔŋ tɛi lɛ dukuduku ni efolɔ wɔŋ tsei* lɛ,+ ni ekɛ gbɔmɛi awui shwie hei ni amɛmamɔ lɛ fɛɛ. 15  Agbɛnɛ hu, ekumɔ afɔleshaa latɛ ni yɔɔ Betel, ni ji he grɔŋŋ ni Yeroboam, Nebat binuu lɛ fee ni hã Israel fee esha lɛ.+ Be ni ekumɔ afɔleshaa latɛ lɛ kɛ he grɔŋŋ lɛ, eshã he grɔŋŋ lɛ, ni eshimɔ lɛ munyɔmunyɔ, ni eshã wɔŋ tso* lɛ.+ 16  Be ni Yosia tsɔ ehe ni ena fuuhei lɛ yɛ gɔŋ lɛ nɔ lɛ, ehã ayaloo wui lɛ kɛjɛ fuuhei lɛ ni abashã yɛ afɔleshaa latɛ lɛ nɔ kɛbule lɛ koni akajá yɛ jɛmɛ tamɔ bɔ ni Yehowa tsɔ anɔkwa Nyɔŋmɔ lɛ gbɔmɔ lɛ nɔ egba akɛ nibii nɛɛ baaba mli lɛ.+ 17  Ni maŋtsɛ lɛ kɛɛ akɛ: “Mɛɛ fuuhe minaa yɛ jɛmɛ lɛ?” Kɛkɛ ni maŋ lɛ mli hii lɛ kɛɛ lɛ akɛ: “Anɔkwa Nyɔŋmɔ lɛ gbɔmɔ lɛ ni jɛ Yuda+ ni gba nibii nɛɛ ni ofee oshi Betel afɔleshaa latɛ lɛ fuuhe ni.” 18  Kɛkɛ ni ekɛɛ akɛ: “Nyɛhãa ejɔa ehe. Mɔ ko mɔ ko akata ewui lɛ ahe.” No hewɔ lɛ, amɛtaaa ewui lɛ ahe, ni amɛtaaa gbalɔ ni jɛ Samaria lɛ hu wui lɛ ahe.+ 19  Agbɛnɛ hu, Yosia jie jamɔhei ni yɔɔ hei grɔŋŋi ni yɔɔ Samaria* maji lɛ amli lɛ,+ ni ji jamɔhei ni Israel maŋtsɛmɛi lɛ mamɔ kɛwo Nyɔŋmɔ mli la lɛ, ni efee amɛ tamɔ bɔ ni efee yɛ Betel lɛ nɔŋŋ.+ 20  No hewɔ lɛ, egbe hei grɔŋŋi osɔfoi lɛ ni yɔɔ jɛmɛ lɛ fɛɛ yɛ* afɔleshaa latɛi lɛ anɔ, ni eshã gbɔmɛi awui yɛ nɔ.+ No sɛɛ lɛ, eku esɛɛ etee Yerusalem. 21  Agbɛnɛ, maŋtsɛ lɛ fã maŋbii lɛ fɛɛ akɛ: “Nyɛyea Hehoo+ nyɛhãa Yehowa, nyɛ-Nyɔŋmɔ lɛ, tamɔ bɔ ni aŋma yɛ kpaŋmɔ lɛ wolo nɛɛ mli lɛ.”+ 22  Ayeko Hehoo ko ni tamɔ enɛ dã kɛjɛ kojolɔi ni kojo Israelbii lɛ agbii lɛ amli aahu kɛyashi Israel maŋtsɛmɛi lɛ kɛ Yuda maŋtsɛmɛi lɛ agbii lɛ amli.+ 23  Shi yɛ Maŋtsɛ Yosia nɔyeli afi ni ji 18 lɛ nɔ lɛ, aye Hehoo nɛɛ ahã Yehowa yɛ Yerusalem. 24  Yosia jie mumɔi atsɛlɔi lɛ, kɛ klamɔfoi+ lɛ, kɛ terafim amagai*+ lɛ, kɛ amagai ni yɔɔ nyaŋemɔ* lɛ, kɛ nyaŋemɔ nii fɛɛ ni ana yɛ Yuda shikpɔŋ lɛ nɔ kɛ Yerusalem lɛ kɛje jɛmɛ, bɔ ni afee ni eye Mla lɛ mli wiemɔi+ lɛ ni aŋmala yɛ wolo ni osɔfo Hilkia na yɛ Yehowa shĩa+ lɛ nɔ. 25  Maŋtsɛmɛi ni tsɔ ehiɛ lɛ eko eko bɛ ni tamɔ lɛ, ni ku esɛɛ kɛba Yehowa ŋɔɔ kɛ etsui fɛɛ, kɛ esusuma* fɛɛ,+ kɛ ehewalɛ fɛɛ, yɛ nɔ ni aŋma yɛ Mose Mla lɛ mli lɛ fɛɛ naa; ni yɛ esɛɛ hu lɛ, maŋtsɛ ko baaa ni tamɔ lɛ. 26  Fɛɛ sɛɛ lɛ, Yehowa eŋmɛɛɛ emli ni wo la ewo Yuda yɛ mlilawoo nibii fɛɛ ni Manase fee kɛwo Nyɔŋmɔ mli la lɛ he.+ 27  Yehowa kɛɛ akɛ: “Majie Yuda kɛje mihiɛ+ tamɔ bɔ ni mijie Israel lɛ;+ ni makwa Yerusalem, ni ji maŋ ni mihala lɛ, kɛ shĩa ni miwie yɛ he akɛ, ‘Migbɛ́i baaya nɔ ahi jɛmɛ’+ lɛ.” 28  Shi Yosia shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli. 29  Yɛ egbii lɛ amli lɛ, Ejipt maŋtsɛ Farao Neko ba koni ebaye ebua Asiria maŋtsɛ lɛ yɛ Yufrate Faa lɛ he, ni Maŋtsɛ Yosia je kpo koni ekɛ lɛ abawu; shi be ni Neko na lɛ lɛ, egbe lɛ yɛ Megido.+ 30  No hewɔ lɛ, etsuji lɛ kɛ shwiili wó egbonyo lɛ kɛjɛ Megido ni amɛkɛ lɛ ba Yerusalem, ni amɛfu lɛ yɛ efuuhe lɛ. Kɛkɛ ni shikpɔŋ lɛ nɔ bii lɛ mɔ Yosia binuu Yehoahaz ni amɛfɔ lɛ mu ni amɛwó lɛ maŋtsɛ yɛ etsɛ sɛɛ.+ 31  Be ni Yehoahaz+ batsɔ maŋtsɛ lɛ, no mli lɛ, eye afii 23, ni eye nɔ nyɔji etɛ yɛ Yerusalem. Emami gbɛ́i ji Hamutal,+ Yeremia ni jɛ Libna lɛ biyoo lɛ. 32  Efee efɔŋ yɛ Yehowa hiɛ tamɔ bɔ ni etsɛmɛi lɛ fee lɛ pɛpɛɛpɛ.+ 33  Farao Neko+ wo lɛ tsuŋ yɛ Ribla+ yɛ Hamat shikpɔŋ lɛ nɔ koni ekaye nɔ yɛ Yerusalem, ni ebi ni maŋ* lɛ abahã lɛ jwiɛtɛi talɛntai* 100 kɛ shika tsuru talɛnta kome.+ 34  Agbɛnɛ hu, Farao Neko wó Yosia binuu Eliakim maŋtsɛ yɛ etsɛ Yosia sɛɛ ni etsake egbɛ́i ni ewo lɛ Yehoiakim; shi emɔ Yehoahaz ni ekɛ lɛ tee Ejipt,+ ni sɛɛ mli lɛ Yehoahaz gbo yɛ jɛmɛ.+ 35  Yehoiakim kɛ jwiɛtɛi kɛ shika tsuru lɛ hã Farao, shi ehã maŋbii* lɛ tsu too koni enyɛ ená jwiɛtɛi ni Farao biɔ lɛ ehã lɛ. Ehe jwiɛtɛi kɛ shika tsuru kɛjɛ shikpɔŋ lɛ nɔ bii lɛ adɛŋ yɛ bɔ ni agbá ahã mɔ fɛɛ mɔ lɛ naa koni ekɛhã Farao Neko. 36  Be ni Yehoiakim+ batsɔ maŋtsɛ lɛ, no mli lɛ, eye afii 25, ni eye nɔ afii 11 yɛ Yerusalem.+ Atsɛɔ emami Zebida, ni eji Pedaia ni jɛ Ruma lɛ biyoo. 37  Etee nɔ efee efɔŋ yɛ Yehowa hiɛ+ tamɔ bɔ ni etsɛmɛi lɛ fee lɛ pɛpɛɛpɛ.+

Shishigbɛ Niŋmaa

Loo “ekpaŋ ekoŋŋ.”
Loo “ŋwɛi asraafoi.”
Loo “ŋwɛi asraafoi.”
Loo “hii ni kɛ hii krokomɛi náa bɔlɛ.”
Kwɛmɔ Wiemɔi Titrii Amligbalamɔ lɛ, “Gehena.”
Hebri sht. ŋm., “Yuda maŋtsɛmɛi lɛ kɛhã.”
Loo “niyelihe.”
Ni ji, Oliv Gɔŋ lɛ, titri lɛ he ni yɔɔ wuoyigbɛ kwraa lɛ ni atsɛɔ lɛ hu akɛ Mlifu Gɔŋ lɛ.
Hebri sht. ŋm., “ninejurɔgbɛ.” Ni ji, wuoyi kɛ́ mɔ ko hiɛ miikwɛ bokã.
Loo “ekɛ hei grɔŋŋi osɔfoi lɛ ni yɔɔ jɛmɛ lɛ fɛɛ shã afɔle yɛ . . . .”
Loo “shĩa nyɔŋmɔi; shĩa amagai.”
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Loo “shikpɔŋ.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Loo “shikpɔŋ.”