2 Maŋtsɛmɛi 22:1-20

  • Yosia batsɔ Yuda maŋtsɛ (1, 2)

  • Gbɛtsɔɔmɔi kɛhã sɔlemɔ shĩa lɛ saamɔ (3-7)

  • Ana Mla wolo lɛ (8-13)

  • Hulda gba akɛ sane fɔŋ baaba (14-20)

22  Be ni Yosia+ batsɔ maŋtsɛ lɛ, no mli lɛ, eye afii kpaanyɔ, ni eye nɔ afii 31 yɛ Yerusalem.+ Enyɛ gbɛ́i ji Yedida, Adaia ni jɛ Bozkat+ lɛ biyoo lɛ.  Efee nɔ ni ja yɛ Yehowa hiɛ, ni enyiɛ etsɛ David gbɛi lɛ anɔ,+ ni egbáaa afã kɛyaaa ninejurɔ loo abɛku.  Yɛ Maŋtsɛ Yosia nɔyeli afi ni ji 18 lɛ nɔ lɛ, maŋtsɛ lɛ tsu Shafan ni ji woloŋmalɔ lɛ kɛtee Yehowa shĩa lɛ; Shafan tsɛ ji Azalia, ni Azalia hu tsɛ ji Meshulam.+ Ekɛɛ lɛ akɛ:  “Kwɔɔ kɛya osɔfonukpa Hilkia+ ŋɔɔ ni ohã ebua shika lɛ fɛɛ ni akɛbaa Yehowa shĩa lɛ,+ ni ji shika ni shinaanaakwɛlɔi lɛ he yɛ maŋbii lɛ adɛŋ+ lɛ anaa.  Hã amɛkɛhã mɛi ni ahala ni kwɛɔ Yehowa shĩa lɛ he nitsumɔ lɛ nɔ lɛ, koni amɛ hu amɛkɛhã mɛi ni tsuɔ nii yɛ Yehowa shĩa lɛ kɛsaa shĩa lɛ hei ni efite lɛ,*+  ni ji ŋaalɔi lɛ, tsumalɔi lɛ, kɛ gbogbotswalɔi lɛ; amɛkɛbaahé tsei kɛ tɛi ni ako koni amɛkɛsaa shĩa lɛ.+  Shi akahã amɛbabu shika ni akɛhãa amɛ lɛ he akɔntaa, ejaakɛ amɛji hii ni amuɔ afɔ̃ɔ amɛnɔ.”+  Sɛɛ mli lɛ, Hilkia ni ji osɔfonukpa lɛ kɛɛ Shafan, ni ji woloŋmalɔ+ lɛ akɛ: “Mina Mla wolo+ lɛ yɛ Yehowa shĩa lɛ.” No hewɔ lɛ, Hilkia kɛ wolo lɛ hã Shafan ni ebɔi kanemɔ.+  Kɛkɛ ni Shafan, woloŋmalɔ lɛ tee maŋtsɛ lɛ ŋɔɔ ni eyakɛɛ lɛ akɛ: “Otsuji ebua shika ni aná yɛ shĩa lɛ naa,* ni amɛkɛhã mɛi ni kwɛɔ Yehowa shĩa lɛ nitsumɔ lɛ nɔ lɛ.”+ 10  Shafan, ni ji woloŋmalɔ lɛ, kɛɛ maŋtsɛ lɛ hu akɛ: “Osɔfo Hilkia kɛ wolo+ ko ehã mi.” Kɛkɛ ni Shafan bɔi wolo lɛ kanemɔ yɛ maŋtsɛ lɛ hiɛ. 11  Be ni maŋtsɛ lɛ nu Mla wolo lɛ mli wiemɔi lɛ nɔŋŋ lɛ, egbála etadei lɛ.+ 12  Kɛkɛ ni maŋtsɛ lɛ fã osɔfo Hilkia, kɛ Ahikam,+ Shafan binuu lɛ, kɛ Akbor, Mikaia binuu lɛ, kɛ Shafan, woloŋmalɔ lɛ, kɛ Asaia, maŋtsɛ lɛ tsulɔ lɛ akɛ: 13  “Nyɛyaa, nyɛyabia Yehowa nii nyɛhãa mi, kɛ maŋ lɛ, kɛ Yuda fɛɛ yɛ wiemɔi ni yɔɔ wolo nɛɛ ni ana lɛ mli lɛ naa; ejaakɛ Yehowa mli ewo la waa ewo wɔ,+ ejaakɛ wɔtsɛmɛi lɛ booo wiemɔi ni yɔɔ wolo nɛɛ mli lɛ toi, anɔkwa, amɛyeee nibii fɛɛ ni aŋmala yɛ mli yɛ wɔhe lɛ anɔ.” 14  No hewɔ lɛ, osɔfo Hilkia, kɛ Ahikam, kɛ Akbor, kɛ Shafan, kɛ Asaia tee gbalɔ yoo+ Hulda ŋɔɔ. Shalum, mɔ ni kwɛɔ atadei lɛ anɔ lɛ ŋa ji lɛ; Shalum tsɛ ji Tikwa, ni Tikwa tsɛ ji Harhas. Yerusalem Kpokpaa Hee lɛ mli Hulda yɔɔ; ni amɛkɛ lɛ yawie yɛ jɛmɛ.+ 15  Yoo lɛ kɛɛ amɛ akɛ: “Nɔ ni Yehowa, Israel Nyɔŋmɔ lɛ kɛɛ nɛ, ‘Nyɛyakɛa nuu lɛ ni tsu nyɛ miŋɔɔ lɛ akɛ: 16  “Nɔ ni Yehowa kɛɛ nɛ, ‘Mikɛ sane fɔŋ baaba maŋ nɛɛ kɛ emli bii lɛ anɔ, ni ji wiemɔi fɛɛ ni yɔɔ wolo lɛ ni Yuda maŋtsɛ lɛ kane lɛ mli lɛ.+ 17  Ejaakɛ amɛje misɛɛ ni amɛmiishã lasu afɔle amɛmiihã nyɔŋmɔi krokomɛi+ koni amɛkɛ amɛninenaa nitsumɔi+ lɛ fɛɛ awo mimli la, mimli baawo la awo maŋ nɛɛ aahu akɛ agbeŋ.’”+ 18  Shi yɛ Yuda maŋtsɛ lɛ ni tsu nyɛ koni nyɛbabi Yehowa nii lɛ gbɛfaŋ lɛ, nɔ ni nyɛkɛa lɛ nɛ, “Nɔ ni Yehowa, Israel Nyɔŋmɔ lɛ kɛɛ nɛ: ‘Wiemɔi ni onu lɛ ahewɔ lɛ, 19  otsake otsui* ni oba ohe shi+ yɛ Yehowa hiɛ yɛ nɔ ni miwie mishi maŋ nɛɛ kɛ emli bii lɛ—akɛ loomɔ baaba amɛnɔ ni mɛi anaa baakpɛ amɛhe yɛ amɛhewɔ lɛ he—ni ogbala otadei+ lɛ ni ofó yɛ mihiɛ, no hewɔ lɛ, mi hu minu oyaafo lɛ, Yehowa kɛɛ. 20  No hewɔ lɛ, mahã ogbo* yɛ toiŋjɔlɛ mli ni abaafu bo yɛ ofuuhe lɛ, ni ohiŋmɛii enaŋ sane fɔŋ ni baaba maŋ nɛɛ nɔ lɛ.’”’” Kɛkɛ ni amɛba ni amɛbabɔ maŋtsɛ lɛ amaniɛ.

Shishigbɛ Niŋmaa

Loo “hei ni egbala lɛ.”
Loo “Otsuji etsɔ shika ni aná yɛ shĩa lɛ.”
Hebri sht. ŋm., “otsui he ejɔ bɔdɔɔ.”
Hebri sht. ŋm., “mabua onaa mafata otsɛmɛi lɛ ahe.” Eji lalawiemɔ ni akɛtsuɔ nii kɛhãa gbele.