2 Maŋtsɛmɛi 16:1-20

  • Ahaz batsɔ Yuda maŋtsɛ (1-6)

  • Ahaz ke Asiriabii lɛ anii koni amɛye amɛbua lɛ (7-9)

  • Ahaz fee Damasko afɔleshaa latɛ lɛ eko (10-18)

  • Ahaz gbele (19, 20)

16  Yɛ Peka, Remalia binuu lɛ nɔyeli afi ni ji 17 lɛ nɔ lɛ, Yuda maŋtsɛ Yotam binuu Ahaz+ batsɔ maŋtsɛ.  Be ni Ahaz batsɔ maŋtsɛ lɛ, no mli lɛ, eye afii 20, ni eye nɔ afii 16 yɛ Yerusalem. Efeee nɔ ni ja yɛ Yehowa, e-Nyɔŋmɔ lɛ hiɛ tamɔ bɔ ni etsɛ David fee lɛ.+  Enyiɛ Israel maŋtsɛmɛi lɛ agbɛ lɛ nɔ,+ ni ehã lɛ diɛŋtsɛ ebinuu tsɔ la mli,+ hɛɛ efee nibii ni yɔɔ nyaŋemɔ ni jeŋmaji ni Yehowa shwie yɛ Israelbii lɛ ahiɛ lɛ fee lɛ eko.+  Agbɛnɛ hu, etee nɔ eshã afɔle kɛ lasu afɔle hu yɛ hei grɔŋŋi+ lɛ, gɔŋkpɔi lɛ anɔ, kɛ tso fɛɛ tso ni ebu kusuu shishi.+  Nakai beiaŋ ni Siria maŋtsɛ Rezin kɛ Israel maŋtsɛ Peka, Remalia binuu lɛ, kwɔ kɛba koni amɛkɛ Yerusalem abawu lɛ.+ Amɛwo Ahaz he ka, shi amɛnyɛɛɛ amɛŋɔ maŋ lɛ.  Nakai beiaŋ lɛ, Siria maŋtsɛ Rezin kɛ Elat+ maŋ lɛ hã Edom ekoŋŋ, ni no sɛɛ lɛ, eshwie Yudafoi* lɛ kɛje Elat. Ni Edombii lɛ ba Elat, ni amɛhi jɛmɛ kɛbashi ŋmɛnɛ.  No hewɔ lɛ, Ahaz tsu mɛi kɛtee Asiria maŋtsɛ Tiglat-pileser+ ŋɔɔ koni ayakɛɛ lɛ akɛ: “Otsulɔ kɛ obinuu ji mi. Kwɔɔ kɛba ni obahere mi kɛje Siria maŋtsɛ lɛ kɛ Israel maŋtsɛ lɛ ní amɛba amɛmiitutua mi lɛ adɛŋ.”  Kɛkɛ ni Ahaz ŋɔ jwiɛtɛi kɛ shika tsuru ni yɔɔ Yehowa shĩa lɛ kɛ nɔ ni yɔɔ maŋtsɛ shĩa lɛ nitoohei lɛ ni ekɛtsu akɛyake Asiria maŋtsɛ lɛ.+  Kɛkɛ ni Asiria maŋtsɛ lɛ bo lɛ toi, ni ekwɔ kɛtee Damasko ni eyaŋɔ maŋ lɛ ni eŋɔ maŋbii lɛ nom kɛtee Kir,+ ni egbe Rezin.+ 10  Kɛkɛ ni Maŋtsɛ Ahaz tee Damasko ni ekɛ Asiria maŋtsɛ Tiglat-pileser yakpe yɛ jɛmɛ. Be ni ena afɔleshaa latɛ ni yɔɔ Damasko lɛ, ekɛ wolo ko ni atɛŋ afɔleshaa latɛ lɛ yɛ nɔ, ni atsɔɔ bɔ ni atsɔ afee lɛ ahã lɛ yɛ nɔ lɛ tsu ni akɛyahã osɔfo Uria.+ 11  Osɔfo Uria+ kwɛ gbɛtsɔɔmɔi fɛɛ ni Maŋtsɛ Ahaz kɛtsu kɛjɛ Damasko lɛ nɔ, ni ema afɔleshaa latɛ+ lɛ. Osɔfo Uria ma afɔleshaa latɛ lɛ egbe naa dani Maŋtsɛ Ahaz ku esɛɛ kɛjɛ Damasko eba. 12  Be ni maŋtsɛ lɛ ku esɛɛ kɛjɛ Damasko eba ni ena afɔleshaa latɛ lɛ, etee afɔleshaa latɛ lɛ he ni eyashã afɔle yɛ nɔ.+ 13  Ni etee nɔ eshã shãa afɔlei kɛ ŋmaa* afɔlei yɛ afɔleshaa latɛ lɛ nɔ; agbɛnɛ hu, efɔse edãa afɔlei lɛ eshwie nɔ, ni ekɛ enaanyobɔɔ afɔlei lɛ alá lɛ hu shwã nɔ. 14  Ni akɔɔble afɔleshaa latɛ+ lɛ ni ma Yehowa hiɛ yɛ shĩa lɛ hiɛ yɛ lɛ diɛŋtsɛ efɔleshaa latɛ lɛ kɛ Yehowa shĩa lɛ teŋ lɛ, ejie kɛje jɛmɛ ni ekɛyama lɛ diɛŋtsɛ efɔleshaa latɛ lɛ kooyigbɛ. 15  Maŋtsɛ Ahaz wo osɔfo Uria+ kitã akɛ: “Shãa afɔlei nɛɛ fɛɛ yɛ afɔleshaa latɛ wulu lɛ nɔ: leebi shãa afɔle lɛ,+ kɛ gbɛkɛnaashi ŋmaa afɔle+ lɛ, kɛ maŋtsɛ lɛ shãa afɔle lɛ, kɛ eŋmaa afɔle lɛ, kɛ maŋbii lɛ fɛɛ ashãa afɔlei lɛ, kɛ amɛŋmaa afɔlei lɛ, kɛ amɛdãa afɔlei lɛ. Agbɛnɛ hu, okɛ shãa afɔlei lɛ alá lɛ fɛɛ kɛ afɔlei krokomɛi lɛ alá lɛ fɛɛ ashwã afɔleshaa latɛ wulu lɛ nɔ. Shi akɔɔble afɔleshaa latɛ lɛ, makwɛ nɔ ni mikɛbaafee.” 16  Ni osɔfo Uria fee nibii fɛɛ ni Maŋtsɛ Ahaz wo lɛ kitã yɛ he lɛ.+ 17  Agbɛnɛ hu, Maŋtsɛ Ahaz folɔ nu shwiilii lɛ ahe mlihɔlɔmɔnii tɛtrɛbii+ lɛ amli, ni ejie okpolui lɛ kɛje nu shwiilii lɛ amli,+ ni ewó nu taŋki ni atsɛɔ lɛ Ŋshɔ lɛ ni ma akɔɔble tsinahii lɛ anɔ lɛ,+ ni ekɛma tɛi ni akɛká shikpɔŋ lɛ nɔ.+ 18  Gbɛ ni aha yiteŋ ni afee yɛ shĩa lɛ mli ni atsɔɔ nɔ yɛ Hejɔɔmɔ Gbi lɛ nɔ lɛ, kɛ gbɛ ni maŋtsɛ lɛ tsɔɔ nɔ ni yɔɔ agbó lɛ naa lɛ, etsɔ ehiɛ kɛje Yehowa shĩa lɛ ewo he kroko yɛ Asiria maŋtsɛ lɛ hewɔ. 19  Ahaz shihilɛ mli saji krokomɛi fɛɛ, nɔ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli.+ 20  Kɛkɛ ni Ahaz gbo* ni afu lɛ yɛ etsɛmɛi lɛ amasɛi yɛ David Maŋ lɛ mli; ni ebinuu Hezekia*+ baye maŋtsɛ yɛ esɛɛ.

Shishigbɛ Niŋmaa

Loo “Yuda hii.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “kɛ etsɛmɛi lɛ yawɔ.”
Eshishi ji, “Yehowa Wajeɔ Mɔ.”