2 Maŋtsɛmɛi 13:1-25

  • Yehoahaz batsɔ Israel maŋtsɛ (1-9)

  • Yehoash batsɔ Israel maŋtsɛ (10-13)

  • Elisha ka Yehoash ekwɛ akɛ ehiɛ edɔ lo (14-19)

  • Elisha gbele lɛ; ewui lɛ hã nuu ko ni egbo te shi (20, 21)

  • Elisha naagbee gbalɛ lɛ ba mli (22-25)

13  Yɛ Yuda maŋtsɛ Yehoash,+ Ahazia+ binuu lɛ nɔyeli afi ni ji 23 lɛ nɔ lɛ, Yehoahaz, Yehu+ binuu lɛ batsɔ Israel maŋtsɛ yɛ Samaria, ni eye nɔ afii 17.  Etee nɔ efee efɔŋ yɛ Yehowa hiɛ, ni efee esha ni Yeroboam, Nebat binuu lɛ hã Israel fee lɛ.+ Etsiii ehe kɛjeee he.  No hewɔ lɛ, Yehowa mli wo Israel la+ waa,+ ni ekɛ amɛ wo Siria maŋtsɛ Hazael+ kɛ Ben-hadad,+ Hazael binuu lɛ dɛŋ yɛ amɛgbii lɛ amli fɛɛ.  Be ko sɛɛ lɛ, Yehoahaz kpa Yehowa fai koni ena lɛ mɔbɔ, ni Yehowa bo lɛ toi, ejaakɛ ena bɔ ni Siria maŋtsɛ lɛ wa Israelbii lɛ ayi lɛ.+  No hewɔ lɛ, Yehowa hã Israelbii lɛ kpɔ̃lɔ+ ko koni ejie amɛ kɛje Siriabii lɛ adɛŋ, ni Israelbii lɛ hi shi yɛ amɛshĩai amli tamɔ tsutsu lɛ.*  (Shi amɛtsiii amɛhe kɛjeee esha ni Yeroboam shĩa lɛ hã Israel fee lɛ he.+ Amɛtee nɔ amɛfee esha nɛɛ,* ni wɔŋ tso*+ lɛ tee nɔ ema Samaria.)  Yehoahaz asraafoi lɛ ateŋ okpɔŋɔnɔtaralɔi 50, shwiilii 10, kɛ asraafoi 10,000 ni nyiɛɔ amɛnane nɔ pɛ shwɛ, ejaakɛ Siria maŋtsɛ lɛ ekpãtã amɛteŋ mɛi babaoo ahiɛ,+ ni enaanaa amɛnɔ ni efee amɛ tamɔ ŋmaagbeemɔ beiaŋ mulu.+  Yehoahaz shihilɛ mli saji krokomɛi fɛɛ, nibii ni efee kɛ enitsumɔi wuji lɛ, aŋmala yɛ Israel maŋtsɛmɛi ayinɔsaji awolo lɛ mli.  Kɛkɛ ni Yehoahaz gbo,* ni afu lɛ yɛ Samaria;+ ni ebinuu Yehoash baye maŋtsɛ yɛ esɛɛ. 10  Yɛ Yuda maŋtsɛ Yehoash+ nɔyeli afi ni ji 37 lɛ nɔ lɛ, Yehoash, Yehoahaz binuu lɛ, batsɔ Israel maŋtsɛ yɛ Samaria, ni eye nɔ afii 16. 11  Etee nɔ efee efɔŋ yɛ Yehowa hiɛ, etsiii ehe kɛjeee eshai fɛɛ ni Yeroboam, Nebat binuu lɛ, hã Israel fee lɛ he.+ Etee nɔ efee eshai nɛɛ.* 12  Yehoash shihilɛ mli saji krokomɛi fɛɛ, nibii ni efee kɛ enitsumɔi wuji lɛ, kɛ bɔ ni ekɛ Yuda maŋtsɛ Amazia wu lɛ,+ aŋmala yɛ Israel maŋtsɛmɛi ayinɔsaji awolo lɛ mli. 13  Kɛkɛ ni Yehoash gbo,* ni Yeroboam*+ bata emaŋtsɛ sɛi lɛ nɔ. Ni afu Yehoash yɛ Samaria yɛ Israel maŋtsɛmɛi lɛ amasɛi.+ 14  Eba mli akɛ, be ni hela ni baagbe Elisha+ lɛ mɔ lɛ lɛ, Yehoash, Israel maŋtsɛ lɛ, kpeleke shi kɛba Elisha ŋɔɔ ni ebafó eshwie enɔ ekɛɛ: “Mitsɛ, mitsɛ! Naa! Israel shwiili lɛ kɛ ekpɔŋɔnɔtaralɔi lɛ!”+ 15  Kɛkɛ ni Elisha kɛɛ lɛ akɛ: “Kɔ gãi kɛ gãimlibii.” No hewɔ lɛ, ekɔ gãi kɛ gãimlibii. 16  Kɛkɛ ni ekɛɛ Israel maŋtsɛ lɛ akɛ: “Okɛ onine amɔ gãi lɛ mli.” No hewɔ lɛ, ekɛ enine mɔ mli, no sɛɛ lɛ, Elisha kɛ eniji shwie maŋtsɛ lɛ niji anɔ. 17  Kɛkɛ ni Elisha kɛɛ akɛ: “Gbelemɔ samfɛlɛ ni kwɛɔ bokãgbɛ lɛ.” Ni egbele. Elisha kɛɛ akɛ: “Tsɛ̃ gãi lɛ!” Ni etsɛ̃ gãi lɛ. Agbɛnɛ Elisha kɛɛ akɛ: “Naa Yehowa kunimyeli* gãimlibi lɛ, kunimyeli* gãmlibi ni baaye Siria nɔ kunim lɛ!” Obaatswia Siria nii* yɛ Afek+ kɛyashi obaakpãtã amɛhiɛ kwraa.” 18  Elisha wie kɛtsa nɔ akɛ: “Kɔlɔmɔ gãimlibii lɛ,” ni ekɔlɔ. Kɛkɛ ni ekɛɛ Israel maŋtsɛ lɛ akɛ: “Okɛtswia shikpɔŋ.” No hewɔ lɛ, ekɛtswia shikpɔŋ shii etɛ ni ekpa. 19  Kɛkɛ ni anɔkwa Nyɔŋmɔ lɛ gbɔmɔ lɛ mli fu ni ekɛɛ akɛ: “Kulɛ esa akɛ okɛtswia shikpɔŋ shii enumɔ loo shii ekpaa! Kɛkɛ lɛ obaatswia Siria nii kɛyashi obaakpãtã amɛhiɛ kwraa, shi amrɔ nɛɛ obaatswia Siria nii shii etɛ pɛ.”+ 20  No sɛɛ lɛ, Elisha gbo ni afu lɛ. Nakai beiaŋ lɛ, Moabbii ojotswalɔi ata+ baa shikpɔŋ lɛ nɔ yɛ afi lɛ shishijee mli.* 21  Be ni hii komɛi yaafu nuu ko lɛ, amɛna ojotswalɔi ata lɛ, no hewɔ lɛ amɛhe fee oya ni amɛshɛ nuu lɛ gbonyo lɛ amɛwo Elisha fuuhe lɛ, ni amɛjo foi. Be ni nuu lɛ gbonyo lɛ he yasa Elisha wui lɛ ahe lɛ, nuu lɛ ba wala mli,+ ni ete shi edamɔ enaji anɔ. 22  Siria maŋtsɛ Hazael+ wa Israel yi+ yɛ Yehoahaz gbii lɛ amli fɛɛ. 23  Shi Yehowa dro amɛ, ni ena amɛ mɔbɔ+ ni egbala ejwɛŋmɔ kɛba amɛnɔ yɛ ekpaŋmɔ ni ekɛ Abraham,+ kɛ Isak,+ kɛ Yakob kpaŋ lɛ hewɔ.+ Esumɔɔɔ ni amɛhiɛ kpãtãa, ni eshwieko amɛ kɛjeko ehiɛ kɛbashi ŋmɛnɛ. 24  Be ni Siria maŋtsɛ Hazael gbo lɛ, ebinuu Ben-hadad baye maŋtsɛ yɛ esɛɛ. 25  Kɛkɛ ni Yehoash, Yehoahaz binuu lɛ shɔ̃ maji ni Hazael shɔ̃ yɛ etsɛ Yehoahaz dɛŋ yɛ ta mli lɛ kɛjɛ Ben-hadad, Hazael binuu lɛ dɛŋ. Yehoash tswia lɛ nii* shii etɛ+ ni eshɔ̃ Israel maji lɛ ekoŋŋ.

Shishigbɛ Niŋmaa

Ni tsɔɔ akɛ amɛná toiŋjɔlɛ ni amɛhi shi shweshweeshwe.
Hebri sht. ŋm., “Enyiɛ yɛ mli.”
Loo “kɛ etsɛmɛi lɛ yawɔ.”
Hebri sht. ŋm., “Enyiɛ yɛ eshai nɛɛ amli.”
Loo “kɛ etsɛmɛi lɛ yawɔ.”
Ni ji, Yeroboam ni ji enyɔ.
Loo “yiwalaheremɔ.”
Loo “yiwalaheremɔ.”
Loo “Obaaye Siria nɔ kunim.”
Hebri sht. ŋm., “kɛ́ afi lɛ ba lɛ,” ekã shi faŋŋ akɛ Yudafoi anyɔɔŋ ni ji Abib (Nisan) lɛ mli.
Loo “Yehoash ye enɔ kunim.”