2 Maŋtsɛmɛi 12:1-21

  • Yehoash batsɔ Yuda maŋtsɛ (1-3)

  • Yehoash saa sɔlemɔ shĩa lɛ (4-16)

  • Siriabii lɛ batutua Yerusalem (17, 18)

  • Agbe Yehoash (19-21)

12  Yɛ Yehu+ nɔyeli afi ni ji kpawo lɛ nɔ lɛ, Yehoash+ batsɔ maŋtsɛ, ni eye maŋtsɛ afii 40 yɛ Yerusalem. Atsɛɔ emami Zibia, ni ejɛ Beer-sheba.+  Yehoash tee nɔ efee nɔ ni ja yɛ Yehowa hiɛ yɛ gbii fɛɛ ni osɔfo Yehoiada tsɔɔ lɛ nii lɛ amli.  Shi ajieee hei grɔŋŋi+ lɛ, ni no mli lɛ, maŋbii lɛ miishã afɔlei kɛ lasu afɔlei yɛ hei grɔŋŋi lɛ lolo.  Yehoash kɛɛ osɔfoi lɛ akɛ: “Nyɛhea shika fɛɛ ni akɛbaa Yehowa shĩa lɛ kɛhã afɔlei krɔŋkrɔŋi+ lɛ, ni ji too ni esa akɛ mɔ fɛɛ mɔ awo,+ mɔ aŋkro fɛɛ mɔ aŋkro yi jara,* kɛ shika fɛɛ shika ni mɔ tsui tsirɛɔ lɛ akɛ ekɛba Yehowa shĩa lɛ.+  Osɔfoi lɛ ateŋ mɔ fɛɛ mɔ baahe yɛ mɛi ni kɛ shika lɛ baa lɛ* adɛŋ koni amɛkɛsaa shĩa lɛ he fɛɛ he ni abaana akɛ efite lɛ.”*+  Be ni shɛɔ Maŋtsɛ Yehoash nɔyeli afi ni ji 23 lɛ nɔ lɛ, no mli lɛ, osɔfoi lɛ esako shĩa lɛ hei ni efite lɛ lolo.+  No hewɔ lɛ, Maŋtsɛ Yehoash tsɛ osɔfo Yehoiada+ kɛ osɔfoi krokomɛi lɛ ni ekɛɛ amɛ akɛ: “Mɛni hewɔ nyɛsaaa shĩa lɛ hei ni efite lɛ? No hewɔ lɛ, nyɛkahea shika yɛ mɛi ni kɛ shika lɛ baa lɛ adɛŋ dɔŋŋ, ja akɛbaasaa shĩa lɛ.”+  Ni osɔfoi lɛ kpɛlɛ nɔ akɛ amɛheŋ shika dɔŋŋ yɛ maŋbii lɛ adɛŋ ni agbɛnɛ hu, shĩa lɛ saamɔ lɛ kãaa amɛnɔ dɔŋŋ.  Ni osɔfo Yehoiada wó adeka+ ko, ni egbu enaanɔ lɛ mli fɔlɔ, ni ekɛma afɔleshaa latɛ lɛ masɛi, ni kɛ́ mɔ ko miibote Yehowa shĩa lɛ mli lɛ, eyɛ eninejurɔgbɛ. Osɔfoi ni sɔmɔɔ akɛ shinaanaakwɛlɔi lɛ kɛ shika fɛɛ ni akɛbaa Yehowa shĩa lɛ woɔ adeka nɛɛ mli.+ 10  Be fɛɛ be ni amɛbaana akɛ shika pii eba adeka lɛ mli lɛ, maŋtsɛ lɛ woloŋmalɔ lɛ kɛ osɔfonukpa lɛ baa ni amɛbajieɔ* ni amɛkaneɔ shika ni akɛba Yehowa shĩa lɛ.+ 11  Amɛkɛ shika ni akane lɛ hãa mɛi ni kwɛɔ nitsumɔ ni atsuɔ yɛ Yehowa shĩa lɛ nɔ lɛ. Ni amɛ hu amɛkɛwoɔ mɛi ni tsuɔ tsei ahe nii lɛ, kɛ tsumalɔi ni miitsu nii yɛ Yehowa shĩa lɛ anyɔmɔ.+ 12  Amɛkɛ eko hu woɔ gbogbotswalɔi kɛ tɛgbalɔi lɛ anyɔmɔ. Agbɛnɛ hu, amɛhé mplaŋi kɛ tɛi ni akpɛ́ koni akɛsaa Yehowa shĩa lɛ hei ni efite lɛ, ni amɛkɛ shika lɛ hu wo nibii krokomɛi fɛɛ ni afee kɛsaa shĩa lɛ he nyɔmɔ. 13  Shi akɛ shika ni akɛbaa Yehowa shĩa lɛ eko efeee jwiɛtɛi okpolui, loo lagbeenii, loo tsɛnsii, loo tɛtɛrɛmantɛrɛi,+ aloo shika tsuru loo jwiɛtɛi nɔ ko koni akɛtsu nii yɛ Yehowa shĩa lɛ.+ 14  Amɛkɛ shika lɛ hãa mɛi ni tsuɔ nii lɛ pɛ, ni amɛkɛsaa Yehowa shĩa lɛ. 15  Amɛbiii ni hii ni akɛ shika lɛ wo amɛdɛŋ koni amɛkɛhã nitsulɔi lɛ ababu akɔntaa, ejaakɛ amɛji hii ni amuɔ afɔ̃ɔ amɛnɔ.+ 16  Shi sɔ̃ afɔle+ shika lɛ kɛ tɔmɔ afɔle shika lɛ, akɛbaaa Yehowa shĩa lɛ; no lɛ osɔfoi lɛ anɔ ni.+ 17  Nakai beiaŋ ni Hazael,+ Siria maŋtsɛ lɛ, kwɔ kɛtee ni ekɛ Gat+ yawu lɛ, ni eŋɔ maŋ lɛ, no sɛɛ lɛ, ekpɛ eyiŋ akɛ ebaaya koni eyatutua Yerusalem.*+ 18  Kɛkɛ ni Yuda maŋtsɛ Yehoash ŋɔ afɔlei krɔŋkrɔŋi lɛ fɛɛ ni Yehoshafat, kɛ Yehoram, kɛ Ahazia, etsɛmɛi ni ji Yuda maŋtsɛmɛi lɛ ejɔɔ nɔ lɛ, kɛ lɛ diɛŋtsɛ efɔlei krɔŋkrɔŋi lɛ, kɛ shika tsuru fɛɛ ni ana yɛ Yehowa shĩa lɛ nitoohei lɛ kɛ maŋtsɛ shĩa lɛ nitoohei lɛ fɛɛ, ni ekɛtsu ni akɛyahã Hazael, Siria maŋtsɛ lɛ.+ No hewɔ lɛ, Hazael shi Yerusalem ni etee. 19  Shi Yehoash shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli. 20  Shi etsuji lɛ kpaŋ eyi nɔ,+ ni amɛgbe lɛ yɛ Bet-milo*+ yɛ gbɛ ni kpelekeɔ shi kɛyaa Sila lɛ nɔ. 21  Etsuji ni ji Yozakar, Shimeat binuu lɛ, kɛ Yehozabad, Shomer binuu lɛ, ji mɛi ni tswa lɛ nɔ ni amɛgbe lɛ.+ Amɛfu lɛ yɛ etsɛmɛi lɛ amasɛi yɛ David Maŋ lɛ mli, ni ebinuu Amazia baye maŋtsɛ yɛ esɛɛ.+

Shishigbɛ Niŋmaa

Loo “susuma fɛɛ susuma yi jara.”
Loo “mɛi ni ele lɛ; omaŋfoi.”
Loo “ekumɔ lɛ.”
Loo “ni amɛkɛwoɔ kotokui amli.” Hebri sht. ŋm., “amɛbafimɔɔ.”
Hebri sht. ŋm., “Hazael kɛma ehiɛ akɛ ebaakwɔ kɛya koni eyatutua Yerusalem.”
Loo “yɛ Milo lɛ shĩa lɛ.”