2 Maŋtsɛmɛi 1:1-18

  • Elia gba Ahazia gbele lɛ (1-18)

1  Yɛ Ahab gbele sɛɛ lɛ, Moab+ tse Israel hiɛ atua.  Nakai beiaŋ ni Ahazia jɛ fɔlɔ ko ni yɔɔ etsũ ni yɔɔ Samaria lɛ yiteŋ asa lɛ mli ebagbee shi ni epila lɛ. No hewɔ lɛ, etsu mɛi ni ekɛɛ amɛ akɛ: “Nyɛyaa ni nyɛyabia Baal-zebub, Ekron+ nyɔŋmɔ lɛ, kɛji maná hewalɛ ekoŋŋ.”+  Shi Yehowa bɔfo lɛ kɛɛ Elia,*+ Tishbinyo lɛ akɛ: “Tee shi, yaa ni okɛ mɛi ni Samaria* maŋtsɛ lɛ etsu lɛ ayakpe ni okɛɛ amɛ akɛ, ‘Ani Nyɔŋmɔ ko bɛ Israel hewɔ ni nyɛyaa nyɛyabi Baal-zebub, Ekron nyɔŋmɔ lɛ nii lɛ?+  No hewɔ lɛ, nɔ ni Yehowa kɛɛ nɛ: “Oteŋ shi yɛ saatso ni okã nɔ lɛ nɔ, ejaakɛ bɔ fɛɛ bɔ ni fee lɛ, obaagbo.”’” Kɛkɛ ni Elia shi amɛ ni etee.  Be ni mɛi ni maŋtsɛ lɛ tsu lɛ ku amɛsɛɛ kɛba eŋɔɔ lɛ, ebi amɛ oya nɔŋŋ akɛ: “Mɛni hewɔ nyɛku nyɛsɛɛ?”  Amɛkɛɛ lɛ akɛ: “Nuu ko kɛ wɔ bakpe ni ekɛɛ wɔ akɛ, ‘Nyɛkua nyɛsɛɛ kɛyaa maŋtsɛ lɛ ni tsu nyɛ lɛ ŋɔɔ ni nyɛyakɛa lɛ akɛ, “Nɔ ni Yehowa kɛɛ nɛ: ‘Ani Nyɔŋmɔ ko bɛ Israel hewɔ ni otsu koni ayabi Baal-zebub, Ekron nyɔŋmɔ lɛ nii lɛ? No hewɔ lɛ, oteŋ shi yɛ saatso ni okã nɔ lɛ nɔ, ejaakɛ bɔ fɛɛ bɔ ni fee lɛ, obaagbo.’”’”+  Kɛkɛ ni ebi amɛ akɛ: “Te nuu ni kɛ nyɛ bakpe ni ekɛ nyɛ wie wiemɔi nɛɛ yɔɔ hã tɛŋŋ?”  Ni amɛkɛɛ lɛ akɛ: “Nuu lɛ wo kooloo hetsɔi atade+ ni ekɛ kooloo hewolo bɛlti efi emli.”+ Amrɔ nɔŋŋ ni ekɛɛ akɛ: “Elia, Tishbinyo lɛ ni.”  Kɛkɛ ni maŋtsɛ lɛ tsu asraafoi 50 anɔkwɛlɔ kɛ ehii 50. Be ni asraafoi 50 anɔkwɛlɔ lɛ kwɔ kɛtee Elia ŋɔɔ lɛ, no mli lɛ, Elia ta gɔŋ lɛ yiteŋ. Ekɛɛ Elia akɛ: “Anɔkwa Nyɔŋmɔ lɛ gbɔmɔ,+ maŋtsɛ lɛ kɛɛ, ‘Kpelekemɔ shi ni oba.’” 10  Shi Elia kɛɛ asraafoi 50 anɔkwɛlɔ lɛ akɛ: “Kɛ́ anɔkwa Nyɔŋmɔ lɛ gbɔmɔ ji mi lɛɛlɛŋ lɛ, no lɛ, la ajɛ ŋwɛi ayi shi+ ni ebashã bo kɛ ohii 50 lɛ.” Ni la jɛ ŋwɛi yi shi ni ebashã lɛ kɛ ehii 50 lɛ. 11  No hewɔ lɛ, maŋtsɛ lɛ tsu asraafoi 50 anɔkwɛlɔ kroko kɛ ehii 50 kɛtee eŋɔɔ ekoŋŋ. Asraafoi 50 anɔkwɛlɔ lɛ kɛɛ Elia akɛ: “Anɔkwa Nyɔŋmɔ lɛ gbɔmɔ, maŋtsɛ lɛ kɛɛ, ‘Kpelekemɔ shi ni oba oya nɔŋŋ.’” 12  Shi Elia kɛɛ amɛ akɛ: “Kɛ́ anɔkwa Nyɔŋmɔ lɛ gbɔmɔ ji mi lɛɛlɛŋ lɛ, no lɛ, la ajɛ ŋwɛi ayi shi ni ebashã bo kɛ ohii 50 lɛ.” Ni Nyɔŋmɔ la jɛ ŋwɛi yi shi ni ebashã lɛ kɛ ehii 50 lɛ. 13  Kɛkɛ ni maŋtsɛ lɛ tsu asraafoi 50 anɔkwɛlɔ kroko kɛ ehii 50 kɛtee eŋɔɔ nɔ ni ji shii etɛ nɔ. Shi asraafoi 50 anɔkwɛlɔ ni ji etɛ lɛ kwɔ kɛtee ni eyakula shi yɛ Elia hiɛ ni ekpa lɛ fai koni ena lɛ mɔbɔ, ekɛɛ: “Anɔkwa Nyɔŋmɔ lɛ gbɔmɔ, ofainɛ, hã miwala kɛ otsuji 50 nɛɛ awala* jara awa yɛ ohiɛ. 14  La ejɛ ŋwɛi eyi shi ebashã asraafoi 50 anɔkwɛlɔi enyɔ ni ba klɛŋklɛŋ lɛ kɛ amɛhii 50 lɛ fɛɛ momo, shi hã miwala* jara awa yɛ ohiɛ.” 15  Yehowa bɔfo lɛ kɛɛ Elia akɛ: “Okɛ lɛ akpeleke shi kɛya. Kaashe lɛ gbeyei.” No hewɔ lɛ, Elia te shi ni ekɛ lɛ kpeleke shi kɛtee maŋtsɛ lɛ ŋɔɔ. 16  Kɛkɛ ni Elia kɛɛ maŋtsɛ lɛ akɛ, “Nɔ ni Yehowa kɛɛ nɛ: ‘Otsu mɛi koni ayabi Baal-zebub, Ekron+ nyɔŋmɔ lɛ nii. Ani Nyɔŋmɔ ko bɛ Israel?+ Mɛni hewɔ obiii lɛ nii? Enɛ hewɔ lɛ, oteŋ shi yɛ saatso ni okã nɔ lɛ nɔ, ejaakɛ bɔ fɛɛ bɔ ni fee lɛ, obaagbo.’” 17  No hewɔ lɛ, egbo tamɔ bɔ ni Yehowa tsɔ Elia nɔ ewie lɛ; ni akɛni ebɛ binuu hewɔ lɛ, Yehoram*+ baye maŋtsɛ yɛ esɛɛ yɛ Yuda maŋtsɛ Yehoram,+ Yehoshafat binuu lɛ nɔyeli afi ni ji enyɔ lɛ nɔ. 18  Ahazia+ shihilɛ mli saji krokomɛi fɛɛ, nɔ ni efee lɛ, aŋmala yɛ Israel maŋtsɛmɛi ayinɔsaji awolo lɛ mli.

Shishigbɛ Niŋmaa

Eshishi ji, “Yehowa Ji Mi-Nyɔŋmɔ.”
Loo “hã misusuma kɛ otsuji 50 nɛɛ asusuma.”
Loo “misusuma.”
Ni ji, Ahazia nyɛmi nuu.