Klɛŋklɛŋ Wolo Ni Akɛmaje Timoteo 3:1-16

  • Taomɔ nii ni esa akɛ nɔkwɛlɔi ashɛ he (1-7)

  • Taomɔ nii ni esa akɛ asafoŋ sɔɔlɔi ashɛ he (8-13)

  • Nyɔŋmɔjamɔ he teemɔŋ sane krɔŋkrɔŋ lɛ (14-16)

3  Anɔkwa wiemɔ nɛ: Kɛ́ mɔ ko miitao etsɔ nɔkwɛlɔ lɛ,+ eetao nitsumɔ kpakpa.  Esa akɛ nɔkwɛlɔ lɛ afee mɔ ko ni anáŋ ehe sane fɔŋ ko awie, wu ni yɔɔ ŋa kome, mɔ ni ŋmɛɔ pɛpɛɛpɛ yɛ enifeemɔi amli, mɔ ni jwɛŋɔ jogbaŋŋ,*+ mɔ ni nyiɛɔ yɛ gbɛjianɔtoo naa,* gbɔfeelɔ,+ mɔ ni baanyɛ atsɔɔ nii,+  jeee dãatɔlɔ,+ jeee mɔ ko ni sumɔɔ nɔmɔ,* shi moŋ mɔ ni nuɔ nii ashishi,+ jeee béilɔ,+ jeee shikasuɔlɔ,+  mɔ ni kwɛɔ lɛ diɛŋtsɛ eshĩa nɔ jogbaŋŋ, ni ebii boɔ lɛ toi ni amɛkɛ nibii efeee shwɛmɔ+  (ejaakɛ kɛ́ mɔ ko leee bɔ ni eeefee ekwɛ lɛ diɛŋtsɛ eshĩa nɔ lɛ, te eeefee tɛŋŋ ekwɛ Nyɔŋmɔ asafo lɛ nɔ lɛ?),  jeee mɔ ni batsɔ Kristo kaselɔ etsɛko+ koni ekawó ehe nɔ ni egbee kojomɔ ni Abonsam gbee mli lɛ mli.  Agbɛnɛ hu, esa akɛ mɛi ni yɔɔ sɛɛ lɛ* hu aye ehe odase kpakpa*+ koni ekawo ehe hiɛgbele* ni egbee Abonsam tsɔne mli.  Nakai nɔŋŋ esa akɛ asafoŋ sɔɔlɔi afee mɛi ni kɛ nibii efeee shwɛmɔ,* jeee mɛi ni kɛ amɛwiemɔi lakaa mɛi,* jeee mɛi ni nuɔ dãa babaoo, jeee mɛi ni kɛ amimyeli tiuɔ sɛɛnamɔ gbonyo sɛɛ,+  shi mɛi ni hiɛɔ hemɔkɛyeli lɛ he teemɔŋ sane krɔŋkrɔŋ lɛ yɛ henilee ni he tse mli.+ 10  Shi esa akɛ aka mɛnɛɛmɛi hu akwɛ akɛ amɛsa* dã; no sɛɛ lɛ, bei abɔ ni sane ko bɛ amɛhe lɛ, ahã amɛsɔmɔ akɛ sɔɔlɔi.+ 11  Nakai nɔŋŋ yei lɛ hu afee mɛi ni kɛ nibii shwɛɛɛ,* jeee mɛi ni wieɔ mɛi ahe efɔŋ,+ amɛfee mɛi ni ŋmɛɔ pɛpɛɛpɛ yɛ amɛnifeemɔi amli, mɛi ni yeɔ anɔkwa yɛ nibii fɛɛ amli.+ 12  Asafoŋ sɔɔlɔi lɛ afee wumɛi ni yɔɔ ŋa komekome, mɛi ni kwɛɔ amɛbii kɛ amɛ diɛŋtsɛ amɛshĩai anɔ jogbaŋŋ. 13  Ejaakɛ mɛi ni sɔmɔɔ jogbaŋŋ lɛ miiná gbɛ́i kpakpa amɛmiihã amɛhe, ni agbɛnɛ hu, amɛnyɛɔ amɛwieɔ kɛ nɔmimaa babaoo* yɛ hemɔkɛyeli ni yɔɔ Kristo Yesu mli lɛ mli. 14  Eyɛ mli akɛ mihiɛ kã nɔ akɛ etsɛŋ ni maba oŋɔɔ moŋ, shi miiŋma bo nibii nɛɛ, 15  koni kɛ́ mitsɛ lɛ, ole bɔ ni sa akɛ ofee onii ohã yɛ Nyɔŋmɔ shĩa,+ ni ji Nyɔŋmɔ hiɛkãalɔ lɛ asafo lɛ, anɔkwale lɛ akulashiŋ kɛ enɔdaamɔnɔ lɛ mli. 16  Anɔkwa, ekã shi faŋŋ akɛ Nyɔŋmɔjamɔ he teemɔŋ sane krɔŋkrɔŋ nɛɛ ji nɔ ko kpele: ‘Ajie lɛ kpo yɛ heloo mli,+ abu lɛ jalɔ yɛ mumɔ mli,+ ejie ehe kpo etsɔɔ ŋwɛibɔfoi,+ ashiɛ lɛ yɛ jeŋmaji ateŋ,+ ahe enɔ aye yɛ je lɛŋ,+ awó lɛ kɛtee ŋwɛi yɛ anunyam mli.’

Shishigbɛ Niŋmaa

Loo “mɔ ni kpɛɔ eyiŋ jogbaŋŋ; mɔ ni hiɛ kã shi.”
Loo “mɔ ni toɔ nibii ahe gbɛjianɔ jogbaŋŋ.”
Loo “jeee ninekpokpookpotsɛ.”
Loo “mɛi ni bɛ Kristofoi asafo lɛ mli lɛ.”
Loo “esa akɛ ená gbɛ́i kpakpa yɛ mɛi ni yɔɔ sɛɛ lɛ ateŋ.”
Loo “ekashwie ehiɛ shi.”
Loo “afee mɔdɛŋbɔlɔi.”
Loo “jeee lilɛi-nta-tsɛmɛi.”
Loo “aka mɛnɛɛmɛi hu akwɛ akɛ amɛshɛɔ nɔ ni ataoɔ lɛ he lo.”
Loo “afee mɔdɛŋbɔlɔi.”
Kwɛmɔ Wiemɔi Titrii Amligbalamɔ lɛ, “Wieɔ kɛ nɔmimaa.”