1 Samuel 9:1-27

  • Samuel kɛ Saul kpe (1-27)

9  Nuu ko yɛ Benyamin ni atsɛɔ lɛ Kish,+ etsɛ ji Abiel. Abiel tsɛ ji Zeror, Zeror tsɛ ji Bekorat, ni Bekorat tsɛ ji Afiya. Benyaminnyo+ ji Kish, ni eyɛ nii waa.  Eyɛ binuu ko ni atsɛɔ lɛ Saul,+ eji oblanyo ni ehe yɛ fɛo—nuu ko nuu ko bɛ Israel ni he yɛ fɛo fe lɛ—ni ekwɔ* fe maŋbii lɛ fɛɛ.  Be ni Saul tsɛ Kish tejiyei lɛ laaje lɛ, Kish kɛɛ ebinuu Saul akɛ: “Ofainɛ ŋɔɔ sɔɔlɔi lɛ ateŋ mɔ kome ofata ohe koni nyɛyatao tejiyei lɛ.”  Amɛyakpa Efraim gɔji lɛ anɔ ni amɛyakpa Shalisha shikpɔŋ lɛ nɔ, shi amɛnaaa amɛ. Amɛyakpa Shaalim shikpɔŋ lɛ nɔ, shi amɛnaaa tejiyei lɛ yɛ jɛmɛ hu. Amɛyakpa Benyamin shikpɔŋ lɛ nɔ fɛɛ, shi amɛnaaa amɛ.  Amɛba Zuf shikpɔŋ lɛ nɔ, ni Saul kɛɛ esɔɔlɔ lɛ ni kɛ lɛ nyiɛ lɛ akɛ: “Ole, hã wɔku wɔsɛɛ, kɛjeee nakai lɛ, mitsɛ baaye etsui yɛ wɔhewɔ moŋ fe tejiyei lɛ.”+  Shi sɔɔlɔ lɛ kɛɛ akɛ: “Naa, Nyɔŋmɔ gbɔmɔ ko yɛ maŋ nɛɛ mli, eji nuu ko ni abuɔ waa. Nɔ fɛɛ nɔ ni ekɛɔ lɛ baa mli pɛpɛɛpɛ.+ Hã wɔya jɛmɛ bianɛ nɔŋŋ. Ekolɛ ebaatsɔɔ wɔ he ni esa akɛ wɔya.”  Kɛkɛ ni Saul kɛɛ esɔɔlɔ lɛ akɛ: “Kɛ́ wɔtee lɛ, mɛni wɔkɛbaayahã nuu lɛ, wɔhiɛɛɛ blodo ko yɛ wɔbaagii lɛ amli; nɔ ko nɔ ko bɛ ni wɔkɛbaake anɔkwa Nyɔŋmɔ lɛ gbɔmɔ lɛ. Mɛni wɔyɔɔ?”  No hewɔ lɛ, sɔɔlɔ lɛ kɛɛ Saul ekoŋŋ akɛ: “Naa! Mihiɛ jwiɛtɛi shekel* mlijai ejwɛ mli ekome. Mikɛ no baahã anɔkwa Nyɔŋmɔ lɛ gbɔmɔ lɛ, ni ebaatsɔɔ wɔ he ni esa akɛ wɔya.”  (Yɛ blema lɛ, kɛji mɔ ko miiya eyabi Nyɔŋmɔ nii yɛ Israel lɛ, nɔ ni ekɛɔ ji: “Ba ni wɔyana ninalɔ lɛ.”+ Ejaakɛ blema lɛ, atsɛɔ mɛi ni ŋmɛnɛ lɛ wɔtsɛɔ amɛ gbalɔi lɛ akɛ ninalɔi.) 10  Kɛkɛ ni Saul kɛɛ esɔɔlɔ lɛ akɛ: “Nɔ ni owie lɛ hi. Wɔya.” No hewɔ lɛ, amɛtee maŋ lɛ mli he ni anɔkwa Nyɔŋmɔ lɛ gbɔmɔ lɛ yɔɔ lɛ. 11  Be ni amɛkwɔɔ kɛyaa maŋ lɛ mli lɛ, amɛkɛ oblayei komɛi kpe ni amɛjɛ maŋ lɛ mli amɛmiiya amɛyayɛ nu. No hewɔ lɛ, amɛbi amɛ akɛ: “Biɛ ninalɔ+ lɛ yɔɔ lo?” 12  Amɛhã hetoo akɛ: “Hɛɛ, biɛ eyɔɔ. Naa, eyɛ nyɛhiɛ nɔŋŋ. Nyɛfea oya, ejaakɛ ŋmɛnɛ lɛ, eba maŋ lɛ mli ejaakɛ mɛi lɛ miishã afɔle+ ŋmɛnɛ yɛ he grɔŋŋ* lɛ.+ 13  Kɛ́ nyɛbote maŋ lɛ mli nɔŋŋ lɛ, nyɛbaana lɛ dani ebaakwɔ kɛya he grɔŋŋ lɛ ni eyaye nii. Mɛi lɛ yeŋ nii ja eba dã, ejaakɛ lɛ ji mɔ ni jɔɔ afɔle lɛ nɔ. Kɛ́ egbe naa lɛ, no dani mɛi ni afɔ̃ amɛ nine lɛ baaye nii. No hewɔ lɛ, nyɛkwɔa kɛyaa bianɛ nɔŋŋ, ni nyɛbaayana lɛ.” 14  No hewɔ lɛ, amɛkwɔ kɛtee maŋ lɛ mli. Be ni eshwɛ fioo ni amɛbaashɛ maŋ lɛ teŋ lɛ, naa Samuel ni eeba ekɛ amɛ abakpe koni ekwɔ kɛya he grɔŋŋ lɛ. 15  Gbi ni tsɔ hiɛ dani Saul ba lɛ, Yehowa kɛɛ Samuel* akɛ: 16  “Wɔ́ nɛkɛ beiaŋ lɛ, matsu nuu ko ni jɛ Benyamin shikpɔŋ+ lɛ nɔ lɛ oŋɔɔ. Fɔɔ lɛ mu akɛ mimaŋ Israel hiɛnyiɛlɔ,+ ni lɛ ebaahere mimaŋ lɛ kɛje Filistibii lɛ adɛŋ. Ejaakɛ mina amanehulu ni mimaŋ lɛ naa lɛ, ni amɛyaafo lɛ eshɛ miŋɔɔ.”+ 17  Be ni Samuel na Saul lɛ, Yehowa kɛɛ lɛ akɛ: “Nuu lɛ ni mikɛɛ bo yɛ ehe akɛ, ‘Mɔ nɛ ji mɔ ni baaye mimaŋ lɛ nɔ’* lɛ nɛ.”+ 18  Kɛkɛ ni Saul tsi bɛŋkɛ Samuel yɛ agbó lɛ mli, ni ebi lɛ akɛ: “Ofainɛ, nɛgbɛ ninalɔ lɛ shĩa yɔɔ?” 19  Samuel kɛɛ Saul akɛ: “Miji ninalɔ lɛ. Nyɛtsɔa mihiɛ ni nyɛkwɔa kɛyaa he grɔŋŋ lɛ; nyɛkɛ mi baaye nii ŋmɛnɛ.+ Mawo bo gbɛ wɔ leebi, ni makɛɛ bo nɔ fɛɛ nɔ ni otaoɔ ole.* 20  Ni kaaye otsui yɛ tejiyei ni laaje ŋmɛnɛ ji gbii etɛ lɛ ahe,+ ejaakɛ ana amɛ. Ni namɔ nɔ ji nibii kpakpai fɛɛ ni yɔɔ Israel lɛ? Ani jeee bo kɛ otsɛ shĩa lɛ nɔ ni?”+ 21  Kɛkɛ ni Saul hã hetoo akɛ: “Ani jeee Benyaminnyo ji mi, ni Israel wekui lɛ ateŋ bibioo lɛ mli mijɛ,+ ni ani jeee mishĩa lɛ ji bibioo kwraa yɛ shĩai fɛɛ ni yɔɔ Benyamin weku lɛ mli lɛ mli? No hewɔ lɛ, mɛni hewɔ okɛ mi wieɔ wiemɔi nɛɛ?” 22  Kɛkɛ ni Samuel ŋɔ Saul kɛ esɔɔlɔ lɛ kɛba niyelihe lɛ, ni ehã amɛtara mɛi ni afɔ̃ amɛ nine kɛba lɛ ayitso yɛ okpɔlɔ lɛ he; no mli lɛ, hii aaafee 30 ni yɔɔ jɛmɛ. 23  Samuel kɛɛ nihoolɔ lɛ akɛ: “Okɛ loo lɛ fã ni mikɛhã bo, ni mikɛɛ bo akɛ, ‘Kɛma afã,’ lɛ aba.” 24  Kɛkɛ ni nihoolɔ lɛ wó shuɔ lɛ kɛ nɔ ni yɔɔ nɔ lɛ nɔ ni ekɛbama Saul hiɛ. Ni Samuel kɛɛ akɛ: “Nɔ ni akɛto lɛ, no akɛbama ohiɛ lɛ. Ye, ejaakɛ amɛkɛto kɛhã bo yɛ ŋmɛnɛ gbi nɛɛ hewɔ. Ejaakɛ mikɛɛ amɛ akɛ, ‘Mifɔ̃ mɛi nine.’” No hewɔ lɛ, Saul kɛ Samuel ye nii nakai gbi lɛ. 25  Kɛkɛ ni amɛkpeleke shi kɛjɛ he grɔŋŋ+ lɛ kɛtee maŋ lɛ mli, ni etee nɔ ekɛ Saul wie yɛ tsũ lɛ yiteŋ. 26  Amɛte shi mra, ni be ni je tsɛre lɛ, Samuel tsɛ Saul yɛ tsũ lɛ yiteŋ ni ekɛɛ: “Saamɔ ohe, koni mawo bo gbɛ.” No hewɔ lɛ, Saul saa ehe, ni ekɛ Samuel fɛɛ je kpo. 27  Be ni amɛkpelekeɔ shi kɛyaa maŋ lɛ klotia lɛ, Samuel kɛɛ Saul akɛ: “Kɛɛmɔ sɔɔlɔ+ lɛ ni ekitee. Shi bo lɛ, daamɔ shi, koni mahã onu Nyɔŋmɔ wiemɔ lɛ.” No hewɔ lɛ, sɔɔlɔ lɛ kitee.

Shishigbɛ Niŋmaa

Hebri sht. ŋm., “kɛjɛ ekɔɔŋ nɔ kɛyaa lɛ, ekwɔ.”
Shekel kome feɔ gram 11.4 (oz t 0.367). Kwɛmɔ Saji Krokomɛi B14 lɛ.
Hebri sht. ŋm., “Yehowa gbele Samuel toi naa.”
Loo “mɔ ni baakudɔ mimaŋ lɛ.”
Hebri sht. ŋm., “makɛɛ bo nɔ fɛɛ nɔ ni yɔɔ otsui mli.”