1 Samuel 8:1-22

  • Israelbii lɛ bi ni awó maŋtsɛ ahã amɛ (1-9)

  • Samuel bɔ maŋbii lɛ kɔkɔ (10-18)

  • Yehowa kpɛlɛ ni awó maŋtsɛ ahã Israelbii lɛ (19-22)

8  Be ni Samuel gbɔ lɛ, ehala ebihii lɛ akɛ kojolɔi kɛhã Israel.  Atsɛɔ ekromɔ binuu lɛ Yoel, ni atsɛɔ ebinuu ni ji enyɔ lɛ Abiya;+ amɛji kojolɔi yɛ Beer-sheba.  Shi ebihii lɛ efeee amɛnii tamɔ lɛ; amɛsumɔɔ ni amɛye mɛi ahe nii,+ amɛheɔ nyɔɔŋnii,+ ni amɛtsɔɔ kojomɔ hiɛ amɛbuɔ shi.+  Be ko sɛɛ lɛ, Israel onukpai lɛ fɛɛ bua amɛhe naa ni amɛtee Samuel ŋɔɔ yɛ Rama.  Amɛyakɛɛ lɛ akɛ: “Naa! Ogbɔ, ni obihii lɛ efeko amɛnii tamɔ bo. No hewɔ lɛ, wó maŋtsɛ ohã wɔ koni ekojo wɔ tamɔ bɔ ni jeŋmaji krokomɛi lɛ feɔ lɛ.”+  Shi eŋɔɔɔ Samuel naa* akɛ amɛkɛɛ: “Wó maŋtsɛ ohã wɔ koni ekojo wɔ.” Kɛkɛ ni Samuel sɔle ehã Yehowa,  ni Yehowa kɛɛ Samuel akɛ: “Bo nɔ fɛɛ nɔ ni maŋbii lɛ ewie lɛ toi; ejaakɛ jeee bo amɛkwa lɛ, shi mi moŋ amɛkwa akɛ mikaye amɛnɔ maŋtsɛ.+  Bɔ ni amɛfee amɛnii kɛjɛ gbi nɔ ni miwó amɛ kɛje Ejipt lɛ, nakai nɔŋŋ amɛkã he amɛfeɔ kɛbashi ŋmɛnɛ nɛɛ; amɛkwaa mi+ ni amɛyasɔmɔɔ nyɔŋmɔi krokomɛi,+ ni no nɔŋŋ ji nɔ ni amɛfeɔ bo hu nɛɛ.  No hewɔ lɛ, bo amɛ toi. Shi jee gbɛ obɔ amɛ kɔkɔ; hã amɛle nɔ ni maŋtsɛ ni baaye amɛnɔ lɛ yɔɔ hegbɛ akɛ ebiɔ kɛjɛɔ amɛdɛŋ.” 10  No hewɔ lɛ, Samuel jaje Yehowa wiemɔi lɛ fɛɛ etsɔɔ mɛi ni biɔ lɛ ni ewó maŋtsɛ ehã amɛ lɛ. 11  Ekɛɛ akɛ: “Enɛ ji nɔ ni maŋtsɛ ni baaye nyɛnɔ lɛ yɔɔ hegbɛ akɛ ebiɔ kɛjɛɔ nyɛdɛŋ:+ Ebaaŋɔ nyɛbihii lɛ+ ni ekɛ amɛ baawo eshwiilii lɛ amli,+ ni ebaafee amɛ ekpɔŋɔnɔtaralɔi hu,+ ni amɛteŋ mɛi komɛi hu baajo foi kɛnyiɛ eshwiilii lɛ ahiɛ. 12  Ni ebaawó mɛi komɛi ehã ehe akɛ mɛi akpei anɔkwɛlɔi+ kɛ mɛi nyɔŋmai enumɔ anɔkwɛlɔi,+ ni mɛi komɛi baahu amɛhã lɛ,+ amɛbaakpa eŋmɔshi nii amɛhã lɛ,+ ni amɛbaafee etawuu nii kɛ eshwiilii lɛ ahe nibii hu amɛhã lɛ.+ 13  Ebaaŋɔ nyɛbiyei lɛ, ni amɛbaafutu tsofa-kɛ-ŋma,* amɛbaahoo nii, ni amɛbaashã nii hu amɛhã lɛ.+ 14  Ebaaŋɔ nyɛŋmɔji, nyɛwain ŋmɔji, kɛ oliv ŋmɔji ni hi fe fɛɛ lɛ,+ ni ekɛbaahã etsuji lɛ. 15  Ebaaŋɔ nyɛŋmɔshi nii kɛ nyɛwain ŋmɔji lɛ amlijai nyɔŋma mli ekome, ni ekɛbaahã emaŋtsɛ shĩa onukpai* lɛ kɛ etsuji lɛ. 16  Ni ebaaŋɔ nyɛtsuji hii kɛ yei lɛ, nyɛkooloi ni hi fe fɛɛ lɛ, kɛ nyɛtejii lɛ ni ekɛbaatsu nii ehã ehe.+ 17  Ebaaŋɔ nyɛtooku lɛ mlijai nyɔŋma mli ekome,+ ni nyɛbaatsɔmɔ etsuji. 18  Gbi ko baaba ni nyɛbaawo yara yɛ maŋtsɛ ni nyɛhala nyɛhã nyɛhe lɛ hewɔ,+ shi Yehowa efoŋ nyɛdaaŋ yɛ nakai gbi lɛ nɔ.” 19  Shi mɛi lɛ booo nɔ ni Samuel kɛɛ amɛ lɛ toi, ni amɛkɛɛ akɛ: “Dabi, wɔmiisumɔ ni owó maŋtsɛ ohã wɔ. 20  Kɛkɛ lɛ, wɔbaatsɔ tamɔ jeŋmaji krokomɛi lɛ nɔŋŋ, ni wɔmaŋtsɛ lɛ baakojo wɔ ni ebaanyiɛ wɔhiɛ, ni ebaawu wɔtai lɛ hu ehã wɔ.” 21  Be ni Samuel nu mɛi lɛ awiemɔi lɛ fɛɛ lɛ, ekɛɛ Yehowa. 22  Yehowa kɛɛ Samuel akɛ: “Bo amɛ toi ni owó maŋtsɛ ohã amɛ ni eye amɛnɔ.”+ Kɛkɛ ni Samuel kɛɛ Israel hii lɛ akɛ: “Nyɛteŋ mɔ fɛɛ mɔ akua esɛɛ kɛyaa emaŋ.”

Shishigbɛ Niŋmaa

Hebri sht. ŋm., “ehiii yɛ Samuel hiŋmɛiiaŋ.”
Loo “amɛbaafee ojeŋma; amɛbaafee anowatrɛ.”
Loo “epiafoi.”