1 Samuel 7:1-17

  • Adeka lɛ yaje Kiriat-yearim (1)

  • Samuel kɛɛ Israelbii akɛ: ‘Nyɛsɔmɔa Yehowa kome too’ (2-6)

  • Israel ye kunim yɛ Mizpa (7-14)

  • Samuel kojo Israel (15-17)

7  No hewɔ lɛ, Kiriat-yearim hii lɛ ba ni amɛbawó Yehowa Adeka lɛ kɛkwɔ kɛtee Abinadab shĩa+ lɛ yɛ gɔŋkpɔ lɛ nɔ, ni amɛhala ebinuu Eleazar* koni ebu Yehowa Adeka lɛ he.  Kɛjɛ gbi nɔ ni akɛ Adeka lɛ ba Kiriat-yearim lɛ, ehi jɛmɛ be kplaŋŋ, afii ni eye yɛ jɛmɛ lɛ fɛɛ ji afii 20, ni Israel shĩa lɛ fɛɛ bɔi Yehowa sɛɛgbɛtaomɔ.*+  Kɛkɛ ni Samuel kɛɛ Israel shĩa lɛ fɛɛ akɛ: “Kɛ́ nyɛkɛ nyɛtsui fɛɛ miiku nyɛsɛɛ kɛmiiba Yehowa ŋɔɔ lɛ,+ belɛ nyɛjiea jeŋmaji krokomɛi anyɔŋmɔi+ lɛ kɛ Ashtoret amagai+ lɛ kɛjea nyɛteŋ, ni nyɛkɛ nyɛtsui fɛɛ ahãa Yehowa ni nyɛsɔmɔa ekome too,+ ni ebaajie nyɛ kɛje Filistibii lɛ adɛŋ.”+  Kɛkɛ ni Israelbii lɛ jie Baal srɔtoi lɛ kɛ Ashtoret amagai lɛ kɛje amɛteŋ ni amɛsɔmɔ Yehowa kome too.+  Kɛkɛ ni Samuel kɛɛ akɛ: “Nyɛbuaa Israel fɛɛ naa yɛ Mizpa,+ ni masɔle mahã Yehowa mahã nyɛ.”+  No hewɔ lɛ, amɛbua amɛhe naa yɛ Mizpa, ni amɛyayɛ nu ni amɛfɔse amɛshwie shi yɛ Yehowa hiɛ, ni amɛhi ŋmaa nakai gbi lɛ.+ Amɛwie yɛ jɛmɛ akɛ: “Wɔtɔ̃ Yehowa nɔ.”+ Ni Samuel bɔi sɔɔmɔ akɛ kojolɔ+ kɛhã Israelbii lɛ yɛ Mizpa.  Be ni Filistibii lɛ nu akɛ Israelbii lɛ ebua amɛhe naa yɛ Mizpa lɛ, Filistibii lɛ anɔyelɔi+ lɛ kwɔ kɛtee koni amɛkɛ amɛ ayawu. Be ni Israelbii lɛ nu he lɛ, ŋmiŋmi mɔmɔ amɛ yɛ Filistibii lɛ ahewɔ.  No hewɔ lɛ, Israelbii lɛ kɛɛ Samuel akɛ: “Yaa nɔ otsɛ Yehowa, wɔ-Nyɔŋmɔ lɛ, koni ebaye ebua wɔ,+ ni ehere wɔ kɛje Filistibii lɛ adɛŋ.”  Kɛkɛ ni Samuel ŋɔ gwantɛŋbi ni atseko lɛ fufɔ, ni ekɛshã shãa afɔle+ ehã Yehowa; ni Samuel tsɛ Yehowa ehã Israelbii lɛ koni ebaye ebua amɛ, ni Yehowa bo lɛ toi.+ 10  Be ni Samuel shãa shãa afɔle lɛ, Filistibii lɛ ba koni amɛkɛ Israelbii lɛ abawu. Ni Yehowa hã nugbɔ shimɔ waa+ ewo Filistibii lɛ yɛ nakai gbi lɛ nɔ, ni ehã amɛjijaa,+ ni aye amɛnɔ kunim yɛ Israel hiɛ.+ 11  Kɛkɛ ni Israel hii lɛ fã kɛjɛ Mizpa ni amɛtiu Filistibii lɛ, ni amɛgbegbee amɛ aahu kɛyashi Bet-kar wuoyi. 12  Kɛkɛ ni Samuel wó tɛ+ ko ni ekɛma Mizpa kɛ Yeshana teŋ ni etsɛ lɛ Ebenezer,* ejaakɛ ekɛɛ: “Yehowa eye ebua wɔ kɛbashi bianɛ.”+ 13  No hewɔ lɛ, aba Filistibii lɛ ashi, ni amɛbaaa Israel kpokpai lɛ anɔ dɔŋŋ;+ ni Yehowa tee nɔ ehã enineshi wa yɛ Filistibii lɛ anɔ yɛ Samuel gbii lɛ amli fɛɛ.+ 14  Ni akɛ maji ni Filistibii lɛ shɔ̃ yɛ Israel dɛŋ lɛ hu hã Israel ekoŋŋ, kɛjɛ Ekron kɛyashi Gat, ni Israelbii lɛ shɔ̃ maji nɛɛ ahe shikpɔji lɛ ekoŋŋ yɛ Filistibii lɛ adɛŋ. Agbɛnɛ hu, toiŋjɔlɛ ba Israel kɛ Amorbii lɛ ateŋ.+ 15  Samuel tee nɔ ekojo Israel ewala gbii abɔ fɛɛ.+ 16  Daa afi lɛ, eyasaraa Betel,+ Gilgal,+ kɛ Mizpa+ kɛbɔleɔ, ni ekojo Israel yɛ hei nɛɛ fɛɛ. 17  Shi ekuɔ esɛɛ kɛbaa Rama,+ ejaakɛ jɛmɛ eshĩa yɔɔ, ni ekojo Israel yɛ jɛmɛ hu. Ema afɔleshaa latɛ ehã Yehowa yɛ jɛmɛ.+

Shishigbɛ Niŋmaa

Hebri sht. ŋm., “amɛfee ebinuu Eleazer krɔŋkrɔŋ.”
Loo “Israel shĩa lɛ fɛɛ fó kɛtsɛ Yehowa.”
Eshishi ji, “Yelikɛbuamɔ Tɛ.”