1 Samuel 6:1-21

  • Filistibii lɛ kɛ Adeka lɛ ku sɛɛ kɛtee Israel (1-21)

6  Yehowa Adeka+ lɛ hi Filistibii lɛ ashikpɔŋ lɛ nɔ nyɔji kpawo.  Ni Filistibii lɛ tsɛ osɔfoi lɛ kɛ klamɔfoi+ lɛ ni amɛbi amɛ akɛ: “Mɛni esa akɛ wɔfee yɛ Yehowa Adeka lɛ he? Nyɛhãa wɔlea bɔ ni esa akɛ wɔkɛku sɛɛ kɛya he ni ejɛ.”  Amɛhã hetoo akɛ: “Kɛ́ nyɛkɛ Yehowa, Israel Nyɔŋmɔ lɛ kpaŋmɔ adeka lɛ miiya lɛ, nyɛkɛkayaa efolo ni nikeenii ko fataaa he. Bɔ fɛɛ bɔ ni fee lɛ, esa akɛ nyɛkɛ sɔ̃ afɔle afata he kɛku sɛɛ kɛyahã lɛ.+ No dani nyɛhe baawa nyɛ, ni nyɛbaale nɔ hewɔ ni enine ejeko nyɛnɔ lɛ.”  No hewɔ lɛ, amɛbi akɛ: “Mɛɛ sɔ̃ afɔle wɔkɛyahã lɛ?” Amɛkɛɛ akɛ: “Nyɛkɛ shika tsuru kookoi enumɔ kɛ shika tsuru kwakwei enumɔ afataa he kɛyaa yɛ Filistibii lɛ anɔyelɔi lɛ ayifalɛ lɛ naa,+ ejaakɛ nakai amanehulu lɛ nɔŋŋ ba nyɛ kɛ nyɛnɔyelɔi lɛ fɛɛ nɔ.  Nyɛsɔ̃a kookoi ni fee nyɛ lɛ kɛ kwakwei+ ni fiteɔ nyɛshikpɔŋ lɛ ahe amagai, ni nyɛwoa Israel Nyɔŋmɔ lɛ hiɛ nyam. Ekolɛ ebaagbɔjɔ enine mli yɛ nyɛ kɛ nyɛnyɔŋmɔ lɛ kɛ nyɛshikpɔŋ lɛ nɔ.+  Mɛni hewɔ esa akɛ nyɛkpiliŋ nyɛtsui tamɔ bɔ ni Ejipt kɛ Farao kpiliŋ amɛtsui lɛ?+ Be ni enineshi wa yɛ amɛnɔ lɛ,+ amɛshwie Israelbii lɛ, ni amɛtee.+  No hewɔ lɛ, nyɛkpɛa shwiili hee ni nyɛŋɔa tsinayei enyɔ ni miihã bii fufɔ ni akɛ kɔɔŋtso efɔ̃ko amɛkuɛ pɛŋ. Ni nyɛfĩmɔa tsinayei lɛ nyɛwoa shwiili lɛ he, ni nyɛjiea amɛbii lɛ yɛ amɛhe ni nyɛkɛ amɛ ayaa shĩa.  Nyɛwóa Yehowa Adeka lɛ ni nyɛkɛmaa shwiili lɛ nɔ, ni nyɛkɛ nibii ni nyɛkɛ shika tsuru efee ni nyɛkɛyaahã lɛ akɛ sɔ̃ afɔle lɛ awoa adeka ko mli kɛmaa emasɛi.+ Ni nyɛwoa lɛ gbɛ  ni nyɛkwɛa eyisɛɛ: Kɛ́ ekwɔ kɛtsɔ gbɛ ni yaa Bet-shemesh+ lɛ nɔ, kɛtee lɛ diɛŋtsɛ eshikpɔŋ lɛ nɔ lɛ, belɛ lɛ ji mɔ ni fee wɔ efɔŋ kpele nɛɛ. Shi kɛjeee nakai lɛ, wɔbaaná wɔle akɛ jeee enine ni kɛ efɔŋ nɛɛ ba wɔnɔ, shi nɔ ko ni ba kɛkɛ ni.” 10  Hii lɛ fee nakai pɛpɛɛpɛ. Amɛŋɔ tsinayei enyɔ ni miihã bii fufɔ ni amɛfĩmɔ amɛ amɛwo shwiili lɛ he, ni amɛŋamɔ amɛbii lɛ ayi yɛ shĩa. 11  Kɛkɛ ni amɛkɛ Yehowa Adeka lɛ ma shwiili lɛ nɔ, ni amɛkɛ adeka ni shika tsuru kwakwei kɛ kookoi ni fee amɛ lɛ ahe amagai yɔɔ mli lɛ hu ma nɔ. 12  Ni tsinayei lɛ yi gbɛ ni yaa Bet-shemesh+ lɛ nɔ trɔmɔɔ. Amɛnyiɛ gbɛjegbɛ kome lɛ nɔ, ni amɛmiibo muu muu be ni amɛyaa lɛ; amɛgbaaa ninejurɔ loo abɛku. Be nɛɛ mli fɛɛ lɛ, Filistibii lɛ anɔyelɔi lɛ nyiɛ amɛsɛɛ aahu kɛyashi Bet-shemesh husu lɛ nɔ. 13  No mli lɛ, mɛi ni yɔɔ Bet-shemesh lɛ miikpa wiiti yɛ jɔɔ lɛ mli. Be ni amɛhole amɛhiŋmɛii anɔ lɛ, amɛna Adeka lɛ. Be ni amɛna lɛ, amɛná miishɛɛ waa. 14  Shwiili lɛ ba Yoshua, Bet-shemeshnyo lɛ shikpɔŋ lɛ nɔ, ni ebawa jɛmɛ yɛ tɛ agbo ko masɛi. No hewɔ lɛ, amɛfolɔ tsei ni akɛkpɛ shwiili lɛ ni amɛkɛ tsinayei+ lɛ shã shãa afɔle amɛhã Yehowa. 15  Levibii+ lɛ wó Yehowa Adeka lɛ kɛ adeka ni fata he, ni nibii ni akɛ shika tsuru fee lɛ yɔɔ mli lɛ, ni amɛkɛmamɔ tɛ agbo lɛ nɔ. Bet-shemesh+ hii lɛ shã shãa afɔlei kɛ afɔlei krokomɛi amɛhã Yehowa yɛ nakai gbi lɛ nɔ. 16  Be ni Filistibii lɛ anɔyelɔi enumɔ lɛ na lɛ, amɛku amɛsɛɛ kɛtee Ekron nakai gbi lɛ. 17  Shika tsuru kookoi ni Filistibii lɛ kɛyahã Yehowa+ akɛ sɔ̃ afɔle lɛ nɛ: Ashdod+ nɔ kome, Gaza nɔ kome, Ashkelon nɔ kome, Gat+ nɔ kome, kɛ Ekron+ hu nɔ kome. 18  Nakai nɔŋŋ akɛ shika tsuru kwakwei lɛ hu yahã yɛ Filistibii lɛ amaji fɛɛ ni yɔɔ nɔyelɔi enumɔ lɛ ashishi lɛ ayifalɛ naa—maji ni atswa gbogboi awo amɛhe kɛ akrowai ni atswako gbogboi awoko amɛhe lɛ fɛɛ. Ni tɛ agbo lɛ ni akɛ Yehowa Adeka lɛ ma nɔ yɛ Yoshua, Bet-shemeshnyo lɛ shikpɔŋ lɛ nɔ lɛ yeɔ enɛ he odase kɛbashi ŋmɛnɛ. 19  Shi Nyɔŋmɔ gbe Bet-shemesh hii lɛ ejaakɛ amɛkwɛ Yehowa Adeka lɛ. Egbe amɛteŋ mɛi 50,070,* ni mɛi lɛ wo yara ejaakɛ Yehowa egbe amɛteŋ mɛi babaoo.+ 20  No hewɔ lɛ, Bet-shemesh hii lɛ bi akɛ: “Namɔ baanyɛ adamɔ Yehowa, Nyɔŋmɔ krɔŋkrɔŋ+ nɛɛ hiɛ, ni namɔ ŋɔɔ eeeje wɔnɔ kɛya?”+ 21  No hewɔ lɛ, amɛtsu mɛi kɛtee mɛi ni yɔɔ Kiriat-yearim+ lɛ ŋɔɔ ayakɛɛ: “Filistibii lɛ kɛ Yehowa Adeka lɛ eba. Nyɛkpelekea shi kɛbaa ni nyɛbawóa kɛkwɔa kɛyaa nyɛŋɔɔ.”+

Shishigbɛ Niŋmaa

Hebri sht. ŋm., “hii 70, hii 50,000.”