1 Samuel 5:1-12

  • Adeka lɛ yaje Filistibii lɛ aŋɔɔ (1-12)

    • Ashwie Dagon hiɛ shi (1-5)

    • Kookoo kwɛ̃ yɛ Filistibii lɛ adunaa (6-12)

5  Be ni Filistibii lɛ shɔ̃ anɔkwa Nyɔŋmɔ lɛ Adeka+ lɛ, amɛwó kɛjɛ Ebenezer kɛtee Ashdod.  Filistibii lɛ wó anɔkwa Nyɔŋmɔ lɛ Adeka lɛ ni amɛkɛyama Dagon masɛi yɛ Dagon+ shĩa* lɛ.  Enɔ jetsɛremɔ leebi maŋkpa be ni Ashdodbii lɛ te shi lɛ, naa Dagon ni egbee shi ni ehiɛ bu shikpɔŋ yɛ Yehowa Adeka lɛ hiɛ.+ No hewɔ lɛ, amɛwó Dagon ni amɛkɛ lɛ ma emaahe lɛ ekoŋŋ.+  Enɔ jetsɛremɔ leebi maŋkpa be ni amɛte shi lɛ, naa Dagon ni egbee shi ekoŋŋ, ni ehiɛ bu shikpɔŋ yɛ Yehowa Adeka lɛ hiɛ. Afolɔ Dagon yitso kɛ edɛ̃ enyɔ lɛ yɛ eniji ahe ni amɛjwere kpoku lɛ nɔ. Egbɔmɔtso lɛ fã ni tamɔ ŋshɔŋ loo lɛ pɛ ji he ni shwɛ.*  No hewɔ ni Dagon osɔfoi lɛ kɛ mɛi fɛɛ ni yaa Dagon shĩa lɛ enyiɛɛɛ Dagon kpoku lɛ nɔ yɛ Ashdod kɛbashi ŋmɛnɛ lɛ.  Yehowa nine tsii yɛ Ashdodbii lɛ anɔ, ni ehã kookoo kwɛ̃kwɛ̃ɛ yɛ mɛi ni yɔɔ Ashdod kɛ ehe kpokpai lɛ anɔ lɛ adunaa ni ekɛhao amɛ.+  Be ni Ashdod hii lɛ na nɔ ni yaa nɔ lɛ, amɛkɛɛ akɛ: “Nyɛkahãa Israel Nyɔŋmɔ lɛ Adeka lɛ miihia wɔŋɔɔ dɔŋŋ, ejaakɛ enineshi wa tsɔ yɛ wɔ kɛ wɔnyɔŋmɔ Dagon lɛ nɔ.”  No hewɔ lɛ, amɛtsu ni ayatsɛ Filistibii lɛ anɔyelɔi lɛ kɛba ni amɛbi amɛ akɛ: “Mɛni esa akɛ wɔfee yɛ Israel Nyɔŋmɔ lɛ Adeka lɛ he?” Ni amɛhã hetoo akɛ: “Nyɛwóa Israel Nyɔŋmɔ lɛ Adeka lɛ kɛyaa Gat.”+ No hewɔ lɛ, amɛwó Israel Nyɔŋmɔ lɛ Adeka lɛ kɛtee jɛmɛ.  Be ni amɛkɛtee jɛmɛ lɛ, Yehowa wó enine nɔ eshi maŋ lɛ, ni ŋmiŋmi mɔmɔ amɛ. Ehã kookoo kwɛ̃kwɛ̃ɛ yɛ mɛi ni yɔɔ maŋ lɛ mli lɛ adunaa, kɛjɛ mɔ bibioo nɔ kɛyashi mɔ wulu nɔ.+ 10  No hewɔ lɛ, amɛhã akɛ anɔkwa Nyɔŋmɔ lɛ Adeka lɛ tee Ekron,+ shi be ni anɔkwa Nyɔŋmɔ lɛ Adeka lɛ shɛ Ekron nɔŋŋ ni Ekronbii lɛ bɔi bolɔmɔ akɛ: “Amɛkɛ Israel Nyɔŋmɔ lɛ Adeka lɛ eba wɔŋɔɔ koni amɛkɛbagbe wɔ kɛ wɔmaŋbii lɛ!”+ 11  Kɛkɛ ni amɛtsu ni ayatsɛ Filistibii lɛ anɔyelɔi lɛ kɛba ni amɛkɛɛ: “Nyɛhãa akɛ Israel Nyɔŋmɔ lɛ Adeka lɛ ayaa; akɛku sɛɛ kɛya he ni ejɛ, koni ekabagbe wɔ kɛ wɔmaŋbii lɛ.” Ejaakɛ maŋ lɛ mli bii lɛ fɛɛ miishe gbeyei akɛ amɛbaagboi; anɔkwa Nyɔŋmɔ lɛ nine etsii tsɔ yɛ jɛmɛ,+ 12  ni mɛi ni gboiii lɛ, kookoo kwɛ̃kwɛ̃ɛ yɛ amɛdunaa. Ni maŋ lɛ bolɔmɔ kɛhã yelikɛbuamɔ lɛ kwɔ kɛtee ŋwɛi.

Shishigbɛ Niŋmaa

Loo “jamɔhe; sɔlemɔ shĩa.”
Hebri sht. ŋm., “Dagon pɛ ni eshwɛ.”