1 Samuel 4:1-22

  • Filistibii lɛ shɔ̃ Adeka lɛ (1-11)

  • Eli kɛ ebihii lɛ gboi (12-22)

4  Ni Samuel wiemɔ lɛ yashɛ Israelbii lɛ fɛɛ aŋɔɔ. Kɛkɛ ni Israelbii lɛ tee koni amɛkɛ Filistibii lɛ ayawu; amɛbɔ nsara yɛ Ebenezer masɛi, ni Filistibii lɛ hu bɔ nsara yɛ Afek.  Filistibii lɛ bua amɛhe naa kɛhã ta koni amɛkɛ Israel akpe, shi ta lɛ eyaaa lɛ jogbaŋŋ, ni Filistibii lɛ ye Israelbii lɛ anɔ kunim, ni amɛgbe Israel hii aaafee 4,000 yɛ he ni agba ta lɛ yɛ lɛ.  Be ni mɛi lɛ ku amɛsɛɛ kɛtee nsara lɛ mli lɛ, Israel onukpai lɛ kɛɛ akɛ: “Mɛni hewɔ Yehowa ehã Filistibii lɛ eye wɔnɔ kunim ŋmɛnɛ?*+ Nyɛhãa wɔyawóa Yehowa kpaŋmɔ adeka lɛ kɛjɛa Shilo kɛbaa,+ koni ebahi wɔteŋ, ni ehere wɔ kɛje wɔhenyɛlɔi lɛ adɛŋ.”  No hewɔ lɛ, mɛi lɛ tsu hii kɛtee Shilo, ni amɛyawó Yehowa, taiatsɛ lɛ, ni taa maŋtsɛ sɛi nɔ yɛ kerubim lɛ anɔ*+ lɛ kpaŋmɔ adeka lɛ kɛba. Eli bihii enyɔ lɛ, Hofni kɛ Finehas+ fata he ni akɛ anɔkwa Nyɔŋmɔ lɛ kpaŋmɔ adeka lɛ ba.  Be ni Yehowa kpaŋmɔ adeka lɛ bashɛ nsara lɛ mli nɔŋŋ lɛ, Israelbii lɛ fɛɛ bɔ oshe waa, ni ehã shikpɔŋ lɛ hoso.  Be ni Filistibii lɛ nu oshebɔɔ lɛ he lɛ, amɛbi akɛ: “Mɛni hewɔ abɔɔ oshe waa nɛkɛ yɛ Hebribii lɛ ansara lɛ mli lɛ?” Sɛɛ mli lɛ, amɛná amɛle akɛ Yehowa Adeka lɛ eba nsara lɛ mli.  Ni Filistibii lɛ she gbeyei, ejaakɛ amɛkɛɛ akɛ: “Nyɔŋmɔ eba nsara lɛ mli!”+ No hewɔ lɛ, amɛkɛɛ akɛ: “Sane eye wɔ, ejaakɛ nɔ ko tamɔ nɛkɛ bako pɛŋ!  Sane eye wɔ! Namɔ baahere wɔ kɛje Nyɔŋmɔ ni he wa nɛɛ dɛŋ? Nyɔŋmɔ nɛɛ ji mɔ ni gbe Ejiptbii babaoo yɛ ŋa lɛ nɔ lɛ.+  Nyɛ Filistibii, nyɛfea ekãa ni nyɛfea hii, koni nyɛkasɔmɔ Hebribii lɛ tamɔ bɔ ni amɛsɔmɔɔ nyɛ lɛ.+ Nyɛfea hii ni nyɛwua!” 10  No hewɔ lɛ, Filistibii lɛ wu, ni amɛye Israel nɔ kunim,+ ni mɔ fɛɛ mɔ jo foi kɛtee emama tsũ mli. Agbe mɛi babaoo diɛŋtsɛ; yɛ Israelbii lɛ ateŋ lɛ, asraafoi 30,000 sɔŋŋ ni nyiɛɔ amɛnane nɔ gboi. 11  Agbɛnɛ hu, ashɔ̃ Nyɔŋmɔ Adeka lɛ, ni agbe Eli bihii enyɔ lɛ, Hofni kɛ Finehas hu.+ 12  Nuu ko ni jɛ Benyamin wó foi kɛjɛ he ni agba ta lɛ yɛ lɛ kɛba Shilo nakai gbi lɛ nɔŋŋ kɛ etadei ni egbála kɛ eyiteŋ shia.+ 13  Be ni nuu lɛ bashɛ shi lɛ, no mli lɛ, Eli ta sɛi nɔ yɛ gbɛ lɛ toi eebo ehe toi, ejaakɛ etsui miiye waa yɛ Nyɔŋmɔ Adeka lɛ hewɔ.+ Nuu lɛ tee maŋ lɛ mli ni eyabɔ amaniɛ, ni maŋ muu lɛ fɛɛ wo yara. 14  Be ni Eli nu bolɔmɔ lɛ, ebi akɛ: “Mɛni ji bolɔmɔ ni minuɔ nɛɛ?” Nakai nuu lɛ nɔŋŋ sha foi ni eyabɔ Eli amaniɛ. 15  (No mli lɛ, Eli eye afii 98, ni ehiŋmɛii jwere nɔ kɛkɛ, shi enaaa nii.)+ 16  Kɛkɛ ni nuu lɛ kɛɛ Eli akɛ: “Miji mɔ ni jɛ tagbamɔhe lɛ kɛba lɛ! Ŋmɛnɛ nɔŋŋ mijo foi kɛjɛ he ni agba ta lɛ yɛ lɛ.” Ni ebi lɛ akɛ: “Mibi, mɛni eba?” 17  No hewɔ lɛ, mɔ ni babɔ amaniɛ lɛ kɛɛ akɛ: “Israel ejo foi yɛ Filistibii lɛ ahiɛ, ni maŋbii lɛ ateŋ mɛi babaoo egboi;+ agbɛnɛ hu, bo diɛŋtsɛ obihii enyɔ lɛ, Hofni kɛ Finehas egboi,+ ni ashɔ̃ anɔkwa Nyɔŋmɔ lɛ Adeka lɛ.”+ 18  Be ni etsĩ anɔkwa Nyɔŋmɔ lɛ Adeka lɛ tã nɔŋŋ lɛ, Eli kpa kɛtee sɛɛ yɛ esɛi lɛ nɔ ni egbee shi yɛ agbó lɛ masɛi ni ekuɛ mli ku ni egbo, ejaakɛ egbɔ ni emli tsii. Ekojo Israel afii 40. 19  No mli lɛ, eshaayoo, ni ji Finehas ŋa lɛ hiɛ musu ni eshwɛ fioo ebaafɔ. Be ni enu amaniɛbɔɔ lɛ akɛ ashɔ̃ anɔkwa Nyɔŋmɔ lɛ Adeka lɛ, ni eshaanuu kɛ ewu fɛɛ egboi lɛ, fɔmɔ ta ehe amrɔ ni esɔ̃ shi efɔ. 20  Be ni eheɔ egbo lɛ, yei ni damɔ emasɛi lɛ kɛɛ lɛ akɛ: “Kaashe gbeyei, ejaakɛ ofɔ binuu.” Shi ewieee ni ekɛ ejwɛŋmɔ eyaaa nɔ.* 21  Shi ewo gbekɛ nuu lɛ gbɛ́i Ikabod,*+ ekɛɛ: “Aŋɔ Israel anunyam lɛ nom,”+ no mli lɛ, eewie anɔkwa Nyɔŋmɔ lɛ Adeka lɛ ni ashɔ̃ lɛ kɛ nɔ ni eba eshaanuu kɛ ewu nɔ lɛ he.+ 22  Ekɛɛ akɛ: “Aŋɔ Israel anunyam lɛ nom, ejaakɛ ashɔ̃ anɔkwa Nyɔŋmɔ lɛ Adeka lɛ.”+

Shishigbɛ Niŋmaa

Hebri sht. ŋm., “Mɛni hewɔ Yehowa eye wɔnɔ kunim yɛ Filistibii lɛ ahiɛ ŋmɛnɛ?
Loo eeenyɛ efee akɛ, “ateŋ.”
Loo “ekɛ etsui efɔ̃ɔɔ nɔ.”
Eshishi ji, “Nɛgbɛ Anunyam Lɛ Yɔɔ?”