1 Samuel 30:1-31

  • Amalekbii lɛ yaloo nibii yɛ Ziklag ni amɛshã maŋ lɛ (1-6)

    • David waje ehe yɛ Nyɔŋmɔ mli (6)

  • David ye Amalekbii lɛ anɔ kunim (7-31)

    • David yashɔ̃ mɛi ni aŋɔ amɛ nom lɛ (18, 19)

    • David kɛ gbɛtsɔɔmɔ hã yɛ ta mli nibii ahe (23, 24)

30  Be ni David kɛ ehii lɛ bashɛ Ziklag+ yɛ gbi ni ji etɛ lɛ nɔ lɛ, no mli lɛ, Amalekbii+ lɛ ebaloo ta mli nii yɛ wuoyi* kɛ Ziklag, ni amɛtutua Ziklag ni amɛkɛ la eshã maŋ lɛ.  Amɛŋɔ yei+ lɛ kɛ mɔ fɛɛ mɔ ni yɔɔ maŋ lɛ mli lɛ nom, amɛshiii nɔ ko nɔ ko, bibioo jio, ewulu jio. Amɛgbeee mɔ ko mɔ ko, shi amɛloo amɛ, ni amɛkɛ amɛ tee.  Be ni David kɛ ehii lɛ bashɛ maŋ lɛ mli lɛ, amɛna akɛ ashã maŋ lɛ, ni aŋɔ amɛŋamɛi, kɛ amɛbihii kɛ amɛbiyei lɛ nom kɛtee.  No hewɔ lɛ, David kɛ hii ni fata ehe lɛ wo yara ni amɛfó waa kɛyashi amɛhewalɛ fɛɛ tã yɛ amɛmli bɔ ni amɛnyɛɛɛ amɛfó dɔŋŋ.  Aŋɔ David ŋamɛi enyɔ lɛ, Ahinoam ni jɛ Yezreel lɛ, kɛ Abigail, ni ji Karmelnyo Nabal ni egbo lɛ ŋa lɛ hu nom kɛtee.+  David hao waa, ejaakɛ hii lɛ miikɛɛkɛɛ akɛ amɛbaatswia lɛ tɛi, ejaakɛ hii lɛ fɛɛ* awerɛ eho amɛhe waa yɛ amɛbihii kɛ amɛbiyei ni aloo kɛtee lɛ hewɔ. Shi David waje ehe yɛ Yehowa, e-Nyɔŋmɔ lɛ mli.+  Kɛkɛ ni David kɛɛ osɔfo Abiatar,+ Ahimelek binuu lɛ akɛ: “Ofainɛ, okɛ efɔd lɛ aba biɛ.”+ No hewɔ lɛ, Abiatar kɛ efɔd lɛ tee David ŋɔɔ.  David bi Yehowa nii+ akɛ: “Mitiu nɛkɛ ojotswalɔi ata nɛɛ lo? Ani mayanina amɛ?” Kɛkɛ ni Nyɔŋmɔ kɛɛ lɛ akɛ: “Tiumɔ amɛ, ejaakɛ obaayanina amɛ kɛ̃, ni obaahere mɛi lɛ.”+  Oya nɔŋŋ ni David kɛ hii 600 ni fata ehe lɛ yiŋ,+ ni amɛtee aahu kɛyashɛ Besor Nujɔɔ lɛ he, he ni hii lɛ ekomɛi wa damɔ shi yɛ lɛ. 10  David kɛ hii 400 tee nɔ amɛtiu mɛi lɛ, shi no mli lɛ etɔ hii 200 ni eshwɛ lɛ aahu akɛ amɛnyɛɛɛ amɛfo Besor Nujɔɔ lɛ, no hewɔ lɛ, amɛhi shi yɛ sɛɛ.+ 11  Amɛna Ejipt nuu ko yɛ ŋa lɛ nɔ ni amɛŋɔ lɛ kɛtee David ŋɔɔ. Amɛhã lɛ niyenii koni eye kɛ nu koni enu, 12  ni amɛku agbami keekii* fioo amɛhã lɛ, ni amɛhã lɛ wain yibii keekii* enyɔ hu. Be ni eye egbe naa lɛ, ená hewalɛ* ejaakɛ eyeko nii ni enuko nu hu jetsɛremɔ kɛ jenamɔ gbii etɛ sɔŋŋ. 13  Agbɛnɛ David bi lɛ akɛ: “Namɔ tsulɔ ji bo, ni nɛgbɛ ojɛ?” Ni ekɛɛ lɛ akɛ: “Miji sɔɔlɔ ni jɛ Ejipt, Amalek nuu ko nyɔŋ ji mi, hela bamɔ mi ŋmɛnɛ ji gbii etɛ, ni no hewɔ lɛ, minuŋtsɔ lɛ shi mi etee. 14  Wɔyaloo nii yɛ Keretifoi+ lɛ awuoyi,* kɛ Yuda shikpɔŋ lɛ nɔ, kɛ Kaleb+ wuoyi,* ni wɔkɛ la shã Ziklag.” 15  Kɛkɛ ni David bi lɛ akɛ: “Ani obaanyiɛ mihiɛ kɛkpeleke shi kɛya ojotswalɔi ata nɛɛ ŋɔɔ?” Ehã hetoo akɛ: “Kɛ́ okɛ Nyɔŋmɔ kã mi kitã akɛ ogbeŋ mi, ni oŋɔŋ mi owoŋ minuŋtsɔ lɛ dɛŋ lɛ, no lɛ, manyiɛ ohiɛ kɛkpeleke shi kɛya ojotswalɔi ata nɛɛ ŋɔɔ.” 16  No hewɔ lɛ, enyiɛ ehiɛ kɛkpeleke shi kɛtee he ni amɛgbɛ amɛshwã yɛ shikpɔŋ lɛ nɔ fɛɛ lɛ, ni amɛmiiyeyee nii ni amɛmiinunuu dãi, ni amɛmiinya yɛ ta mli nii babaoo ni amɛyaloo kɛjɛ Filistibii lɛ ashikpɔŋ lɛ nɔ kɛ Yuda shikpɔŋ lɛ nɔ lɛ hewɔ. 17  Kɛkɛ ni David gbegbee amɛ kɛjɛ leebi be ni hiɛ gbeleko aahu kɛyashi enɔ jetsɛremɔ gbɛkɛ; nuu ko nuu ko ejeee mli,+ ja hii 400 ni ho amɛtara afukpɔŋɔi anɔ amɛjo foi lɛ pɛ. 18  David shɔ̃ nibii fɛɛ ni Amalekbii lɛ baloo lɛ,+ ni David here eŋamɛi enyɔ lɛ hu. 19  Amɛnine shɛ nɔ fɛɛ nɔ nɔ, bibioo jio, ewulu jio. Amɛshɔ̃ amɛbihii kɛ amɛbiyei kɛ amɛnibii ni abaha lɛ fɛɛ;+ David shɔ̃ nibii fɛɛ ni amɛbaloo lɛ. 20  No hewɔ lɛ, David loo tookui kɛ tsinai lɛ fɛɛ, ni amɛkpala amɛ kɛnyiɛ amɛ diɛŋtsɛ amɛkooloi lɛ ahiɛ kɛtee. Amɛkɛɛ akɛ: “David ta mli nii nɛ.” 21  Kɛkɛ ni David bashɛ hii 200 ni no mli lɛ, etɔ amɛ aahu akɛ amɛnyɛɛɛ amɛkɛ David aya, ni wa kɛdamɔ sɛɛ yɛ Besor Nujɔɔ lɛ he lɛ aŋɔɔ,+ ni amɛba amɛbakpee David kɛ mɛi lɛ. Be ni David shɛ amɛmasɛi lɛ, ehã amɛ sɛɛ fɛɛ. 22  Shi hii ni fata David he kɛtee lɛ ateŋ hii yitseiaŋwalɔi ni bɛ subaŋ lɛ kɛɛ akɛ: “Akɛni amɛkɛ wɔ eyaaa hewɔ lɛ, wɔhãŋ amɛ ta mli nii ni wɔyaloo lɛ eko, akɛ ja mɔ fɛɛ mɔ lɛ, eŋa kɛ ebii pɛ wɔkɛbaahã lɛ ni eya.” 23  Shi David kɛɛ akɛ: “Minyɛmimɛi, nyɛkɛ nɔ ni Yehowa ehã wɔ lɛ akafea nakai. Ebu wɔhe ni eŋɔ ojotswalɔi ata ni batutua wɔ lɛ ewo wɔdɛŋ.+ 24  Namɔ po baakpɛlɛ nɔ ni nyɛwieɔ nɛɛ nɔ? Bɔ ni mɔ ni kpeleke shi kɛtee ta lɛ baaná lɛ, nakai nɔŋŋ mɔ ni ta jatsu lɛ he lɛ hu baaná.+ Wɔ fɛɛ wɔbaaja lɛ pɛpɛɛpɛ.”+ 25  Ni kɛjɛ nakai gbi lɛ nɔ kɛyaa lɛ, ehã enɛ batsɔ taomɔ nii kɛ mla yɛ Israel kɛbashi ŋmɛnɛ. 26  Be ni David ku esɛɛ kɛba Ziklag lɛ, ekɛ ta mli nii lɛ eko tsu kɛyahã Yuda onukpai lɛ ni ji enanemɛi lɛ, ni ekɛɛ akɛ: “Nikeenii* ni jɛ nibii ni miyaloo yɛ Yehowa henyɛlɔi lɛ adɛŋ lɛ mli lɛ nɛ.” 27  Ekɛtsu kɛyahã mɛi ni yɔɔ Betel,+ mɛi ni yɔɔ Ramot yɛ Negeb lɛ,* kɛ mɛi ni yɔɔ Yatir,+ 28  kɛ mɛi ni yɔɔ Aroer, kɛ mɛi ni yɔɔ Sifmot, kɛ mɛi ni yɔɔ Eshtemoa,+ 29  kɛ mɛi ni yɔɔ Rakal, kɛ mɛi ni yɔɔ Yerameelbii+ lɛ amaji lɛ amli, kɛ mɛi ni yɔɔ Kenbii+ lɛ amaji lɛ amli, 30  kɛ mɛi ni yɔɔ Horma,+ kɛ mɛi ni yɔɔ Borashan, kɛ mɛi ni yɔɔ Atak, 31  kɛ mɛi ni yɔɔ Hebron,+ kɛ mɛi ni yɔɔ hei fɛɛ ni David kɛ ehii lɛ eyanyiɛnyiɛ lɛ.

Shishigbɛ Niŋmaa

Loo “Negeb lɛ.”
Loo “ejaakɛ mɛi lɛ fɛɛ asusumai.”
Keeki nɛɛ ji agbamii ni egbi ni anyɛmɔ nɔ afee lɛ ekome tamɔ pan keeki.
Keeki nɛɛ ji wain yibii ni egbi ni anyɛmɔ nɔ afee lɛ ekome tamɔ pan keeki.
Hebri sht. ŋm., “emumɔ ba emli.”
Loo “Negeb lɛ.”
Loo “Negeb lɛ.”
Hebri sht. ŋm., “Jɔɔmɔ.”
Loo “wuoyi lɛ.”