1 Samuel 3:1-21

  • Awó Samuel gbalɔ (1-21)

3  No mli lɛ, gbekɛ nuu Samuel miisɔmɔ+ yɛ Yehowa hiɛ yɛ Eli shishi, shi nakai beiaŋ lɛ, anáaa wiemɔ kɛjɛɛɛ Yehowa ŋɔɔ; ninaa+ hu efɔɔɔ kaa.  Gbi ko lɛ, Eli kã he ni efɔɔ kãmɔ lɛ, ni ehiŋmɛii anɔ eha; ni enaaa nii jogbaŋŋ.+  No mli lɛ, Samuel kã Yehowa sɔlemɔ shĩa*+ lɛ mli, he ni Nyɔŋmɔ Adeka lɛ yɔɔ lɛ, ni agbeko Nyɔŋmɔ kane+ lɛ.  Kɛkɛ ni Yehowa tsɛ Samuel. Ehere nɔ akɛ: “Naa mi.”  Esha foi kɛtee Eli ŋɔɔ eyakɛɛ: “Minu akɛ ootsɛ mi, naa mi.” Shi ekɛɛ lɛ akɛ: “Mitsɛko bo. Yaakã shi ekoŋŋ.” No hewɔ lɛ, etee eyakã shi.  Yehowa tsɛ lɛ ekoŋŋ akɛ: “Samuel!” Kɛkɛ ni Samuel te shi kɛtee Eli ŋɔɔ eyakɛɛ: “Minu akɛ ootsɛ mi, naa mi.” Shi ekɛɛ lɛ akɛ: “Mitsɛko bo, mibi. Yaakã shi ekoŋŋ.”  (No mli lɛ, Samuel náko ale Yehowa,* ni anáko ajie Yehowa wiemɔ lɛ kpo atsɔɔ lɛ.)+  No hewɔ lɛ, Yehowa tsɛ lɛ ekoŋŋ, nɔ ni ji shii etɛ nɔ akɛ: “Samuel!” Kɛkɛ ni ete shi kɛtee Eli ŋɔɔ eyakɛɛ: “Minu akɛ ootsɛ mi, naa mi.” Kɛkɛ ni Eli yɔse akɛ Yehowa ji mɔ ni tsɛɔ gbekɛ nuu lɛ.  No hewɔ lɛ, Eli kɛɛ Samuel akɛ: “Yaa ni oyakã shi, ni kɛ́ etsɛ bo lɛ, kɛɛmɔ akɛ, ‘Yehowa, wiemɔ, ejaakɛ otsulɔ miibo bo toi.’” Ni Samuel tee ni eyakã shi yɛ he ni ekãa lɛ. 10  Yehowa ba ni ebadamɔ jɛmɛ, ni etsɛ lɛ tamɔ tsutsu lɛ akɛ: “Samuel, Samuel!” Kɛkɛ ni Samuel kɛɛ akɛ: “Wiemɔ, ejaakɛ otsulɔ miibo bo toi.” 11  Yehowa kɛɛ Samuel akɛ: “Naa! miifee nɔ ko yɛ Israel ni baahã mɛi fɛɛ ni baanu lɛ ahe ajɔ̃ amɛhe.*+ 12  Nakai gbi lɛ nɔ lɛ, mafee Eli nibii fɛɛ ni miwie mishi eshĩa lɛ, kɛjɛ shishijee kɛyashi naagbee.+ 13  Kɛɛmɔ lɛ akɛ, makojo eshĩa lɛ kɛya naanɔ yɛ esha lɛ ni ele lɛ hewɔ,+ ejaakɛ ebihii lɛ miilomɔ Nyɔŋmɔ,+ shi ekãko amɛhiɛ.+ 14  No hewɔ ni mikã Eli shĩa lɛ kitã akɛ, akɛ afɔle ko loo nikeenii ko kpãtãŋ esha ni Eli shĩa lɛ efee lɛ kɔkɔɔkɔ.”+ 15  Samuel kã shi kɛyashi leebi; kɛkɛ ni egbele Yehowa shĩa lɛ shinai lɛ. No mli lɛ, Samuel miishe gbeyei akɛ ebaakɛɛ Eli ninaa lɛ. 16  Shi Eli tsɛ Samuel ekɛɛ: “Mibi, Samuel!” Kɛkɛ ni ehere nɔ akɛ: “Naa mi.” 17  Ebi lɛ akɛ: “Mɛɛ sane ekɛɛ bo? Ofainɛ, okɛ nɔ ko nɔ ko akatee mi. Nyɔŋmɔ kɛ bo aye ni ekɛ bo aye ekoŋŋ kɛ́ okɛ nɔ ko tee mi yɛ nɔ ni ekɛɛ bo lɛ fɛɛ mli.” 18  No hewɔ lɛ, Samuel kɛɛ lɛ nɔ fɛɛ nɔ, ni ekɛ nɔ ko nɔ ko eteee lɛ. Eli kɛɛ akɛ: “Yehowa ni. Efee nɔ ni sa ehiɛ.” 19  Samuel tee nɔ eda, ni Yehowa kɛ lɛ yɛ+ ni ehãaa ewiemɔi lɛ ekome po afee efolo.* 20  Israel fɛɛ, kɛjɛ Dan kɛyashi Beer-sheba ná le akɛ awó Samuel Yehowa gbalɔ. 21  Ni Yehowa tee nɔ ejie ehe kpo yɛ Shilo, ejaakɛ Yehowa jie ehe kpo etsɔɔ Samuel yɛ Shilo kɛtsɔ Yehowa wiemɔ lɛ nɔ.+

Shishigbɛ Niŋmaa

Ni ji, sɔlemɔ buu lɛ.
Loo “Samuel náko ale Yehowa jogbaŋŋ.”
Hebri sht. ŋm., “mɛi fɛɛ ni baanu lɛ, atoii enyɔ lɛ fɛɛ amli baafɛ̃lɛ amɛ.”
Hebri sht. ŋm., “ekome folo agbee shi.”