1 Samuel 29:1-11

  • Filistibii lɛ heee David amɛyeee (1-11)

29  Agbɛnɛ Filistibii+ lɛ bua amɛsraafoi akui lɛ anaa yɛ Afek, no mli lɛ, Israelbii lɛ hu ebɔ nsara yɛ nuhiŋmɛi ko ni yɔɔ Yezreel+ lɛ he.  Ni Filistibii lɛ anɔyelɔi lɛ kɛ amɛsraafoi akui ni ato amɛ yɛ ohai kɛ akpei anaa lɛ miiho, ni David kɛ ehii lɛ fata Akish+ he ni amɛnyiɛ asraafoi lɛ fɛɛ asɛɛ.  Shi Filistibii lɛ alumɛi lɛ bi akɛ: “Mɛni Hebribii nɛɛ feɔ yɛ biɛ?” Ni Akish hã Filistibii lɛ alumɛi lɛ hetoo akɛ: “David ni, Israel maŋtsɛ Saul tsulɔ lɛ, ni ekɛ mi ebahi shi afi kome loo nɔ nɛ.+ Kɛjɛ gbi nɔ ni etse ehe ni ekɛ ehe badɔmɔ mi nɛɛ, minako tɔmɔ ko yɛ ehe kɛbashi ŋmɛnɛ.”  Shi Filistibii lɛ alumɛi lɛ amli fu lɛ, ni amɛkɛɛ lɛ akɛ: “Hã nuu lɛ aku esɛɛ.+ Hã eku esɛɛ kɛya he ni okɛhã lɛ lɛ. Kaahã efata wɔhe kɛkpeleke shi kɛtee ta lɛ, koni ekatsɔ ehiɛ ewo wɔ yɛ ta lɛ mli.+ Ejaakɛ, mɛni osusuɔ akɛ ehi fe fɛɛ ni nuu nɛɛ kɛaakpãtã enuŋtsɔ lɛ, fe wɔhii lɛ ayitsei?  Ani jeee David nɛɛ he lala alá ni akɛjo akɛ: ‘Saul egbe akpei,Ni David egbe akpei nyɔŋmai’ lɛ?”+  No hewɔ lɛ, Akish+ tsɛ David ni ekɛɛ lɛ akɛ: “Gbii abɔ ni Yehowa hiɛ kã nɛɛ, anɔkwafo ji bo, ni kulɛ miisumɔ akɛ ofata misraafoi akuu lɛ he kɛya ta lɛ,+ ejaakɛ kɛjɛ gbi nɔ ni okɛ mi bahi shi nɛɛ minako tɔmɔ ko yɛ ohe kɛbashi ŋmɛnɛ.+ Shi nɔyelɔi lɛ heee bo amɛyeee.+  No hewɔ lɛ, kuu osɛɛ kɛya yɛ toiŋjɔlɛ mli, ni kaafee nɔ ko ni esaaa Filistibii lɛ anɔyelɔi lɛ ahiɛ.”  Shi David kɛɛ Akish akɛ: “Mɛni hewɔ, mɛni mifee? Kɛjɛ gbi nɔ ni mibahi oŋɔɔ kɛbashi ŋmɛnɛ gbi nɛɛ, mɛɛ tɔmɔ ona yɛ otsulɔ he? Mɛni hewɔ esaaa akɛ mifataa ohe ni mikɛ minuŋtsɔ maŋtsɛ henyɛlɔi lɛ yawuɔ?”  Akish here nɔ akɛ: “Mi lɛ, mile akɛ ohi tamɔ Nyɔŋmɔ bɔfo.+ Shi Filistibii lɛ alumɛi lɛ kɛɛ akɛ: ‘Kaahã ekɛ wɔ kwɔ kɛtee ta lɛ.’ 10  No hewɔ lɛ, okɛ onuŋtsɔ tsuji ni kɛ bo ba lɛ ate shi leebi maŋkpa; nyɛtea shi leebi maŋkpa kɛ́ jeŋ tse nɔŋŋ, ni nyɛyi mli.” 11  No hewɔ lɛ, David kɛ ehii lɛ te shi leebi maŋkpa koni amɛku amɛsɛɛ kɛya Filistibii lɛ ashikpɔŋ lɛ nɔ, ni Filistibii lɛ kwɔ kɛtee Yezreel.+

Shishigbɛ Niŋmaa