1 Samuel 28:1-25
-
Saul tee mumɔi atsɛlɔ ko ŋɔɔ yɛ En-dor (1-25)
28 Yɛ nakai gbii lɛ amli lɛ, Filistibii lɛ bua amɛsraafoi akui lɛ anaa koni amɛkɛ Israel ayawu.+ No hewɔ lɛ, Akish kɛɛ David akɛ: “Bɛ ole akɛ, bo kɛ ohii lɛ baafata mihe kɛya ta lɛ?”+
2 Kɛkɛ ni David kɛɛ Akish akɛ: “Bɛ bo diɛŋtsɛ ole nɔ ni otsulɔ baafee?” Akish kɛɛ David akɛ: “Enɛ hewɔ ni mahã otsɔ mihebulɔ daa lɛ.”* +
3 No mli lɛ, Samuel egbo ni Israel fɛɛ efó lɛ ni amɛfu lɛ yɛ Rama, ni ji lɛ diɛŋtsɛ emaŋ lɛ mli.+ No mli lɛ, Saul ejie mumɔi atsɛlɔi lɛ kɛ klamɔfoi lɛ kɛje shikpɔŋ lɛ nɔ.+
4 Filistibii lɛ bua amɛhe naa ni amɛyabɔ nsara yɛ Shunem.+ No hewɔ lɛ, Saul bua Israel fɛɛ naa ni amɛyabɔ nsara yɛ Gilboa.+
5 Be ni Saul na Filistibii lɛ ansara lɛ, eshe gbeyei ni etsui fã waa.+
6 Eyɛ mli akɛ Saul biɔ Yehowa nii+ moŋ, shi Yehowa hãaa lɛ hetoo, yɛ lamɔi amli jio, Urim+ lɛ naa jio, gbalɔi lɛ anaa jio.
7 Agbɛnɛ Saul kɛɛ etsuji lɛ akɛ: “Nyɛtaoa yoo ko ni ji mumɔi atsɛlɔ+ nyɛhãa mi koni maya eŋɔɔ ni mayabi lɛ nii.” Etsuji lɛ kɛɛ lɛ akɛ: “Naa! Yoo ko ni ji mumɔi atsɛlɔ yɛ En-dor.”+
8 No hewɔ lɛ, Saul tsake ehe ni ewo atadei krokomɛi koni akayoo lɛ, ni ekɛ ehii lɛ ateŋ mɛi enyɔ tee yoo lɛ ŋɔɔ nyɔɔŋ. Ekɛɛ akɛ: “Ofainɛ, ye ŋkunyaa kɛtsɔ mumɔi atsɛmɔ+ nɔ koni ohã mɔ ni matsɔɔ bo lɛ akwɔ kɛba.”
9 Shi yoo lɛ kɛɛ lɛ akɛ: “Bɛ ole nɔ ni Saul fee, bɔ ni ejie mumɔi atsɛlɔi kɛ klamɔfoi lɛ kɛje shikpɔŋ lɛ nɔ lɛ?+ Mɛni hewɔ ni otsɔɔ mi* tsɔne koni agbe mi lɛ?”+
10 Kɛkɛ ni Saul tsɛ Yehowa kɛkã yoo lɛ kitã ekɛɛ: “Gbii abɔ ni Yehowa hiɛ kã nɛɛ, otereŋ sɔ̃ ko kwraa yɛ sane nɛɛ mli!”
11 Kɛkɛ ni yoo lɛ bi lɛ akɛ: “Namɔ mihã ekwɔ kɛba?” Ni Saul kɛɛ akɛ: “Hã Samuel akwɔ kɛba.”
12 Be ni yoo lɛ na “Samuel”*+ lɛ, ebo waa ni ekɛɛ Saul akɛ: “Mɛni hewɔ olaka mi? Bo ji Saul!”
13 Maŋtsɛ lɛ kɛɛ lɛ akɛ: “Kaashe gbeyei, mɛni onaa?” Yoo lɛ kɛɛ Saul akɛ: “Miina mɔ ko tamɔ nyɔŋmɔ ko miifã kpo kɛmiijɛ shikpɔŋ lɛ kɛmiiba.”
14 Amrɔ nɔŋŋ ni ebi yoo lɛ akɛ: “Te etamɔ tɛŋŋ?” ni yoo lɛ kɛɛ akɛ: “Nuumo ko miifã kpo kɛmiiba, ni ewo atade ni nine bɛ he.”+ Kɛkɛ ni Saul yoo akɛ “Samuel” ni, ni ekula shi ni ekɛ ehiɛ bu shikpɔŋ ni ekoto lɛ.
15 Kɛkɛ ni “Samuel” bi Saul akɛ: “Mɛni hewɔ obagba minaa ni ohã mifã kpo kɛba nɛɛ?” Saul kɛɛ lɛ akɛ: “Mihe efĩ mi waa. Filistibii lɛ kɛ mi miiwu, ni Nyɔŋmɔ eshi mi ni ehereee mi nɔ dɔŋŋ, yɛ gbalɔi lɛ anaa jio, lamɔi amli jio;+ enɛ hewɔ ni mitsɛɔ bo koni ohã male nɔ ni esa akɛ mafee lɛ.”+
16 Ni “Samuel” kɛɛ akɛ: “Mɛni hewɔ obiɔ mi nii be ni Yehowa eshi bo+ ni ebatsɔ ohenyɛlɔ lɛ?
17 Yehowa baafee nɔ ni egba kɛtsɔ minɔ lɛ: Yehowa baashɔ̃ maŋtsɛyeli lɛ yɛ odɛŋ ni ekɛbaahã onyɛmi gbɔmɔ, David.+
18 Akɛni obooo Yehowa gbee toi, ni oyatsuuu emli ni wo Amalekbii lɛ la lɛ he nii lɛ hewɔ+ ni Yehowa feɔ bo enɛ ŋmɛnɛ gbi nɛɛ.
19 Agbɛnɛ hu, Yehowa baajie bo kɛ Israel fɛɛ awo Filistibii+ lɛ adɛŋ, ni wɔ ni ji wɔ lɛ, bo+ kɛ obihii+ lɛ baabafata mihe. Kɛfata he lɛ, Yehowa kɛ Israel asraafoi lɛ baawo Filistibii lɛ adɛŋ.”+
20 Amrɔ nɔŋŋ kɛkɛ ni Saul gbee shi shwɛtɛɛ ni gbeyei mɔ lɛ waa yɛ “Samuel” wiemɔi lɛ ahewɔ. Ni ehewalɛ fɛɛ tã, ejaakɛ eyeko nii gbi muu lɛ fɛɛ kɛ nyɔɔŋ muu lɛ fɛɛ.
21 Be ni yoo lɛ ba Saul ŋɔɔ ni ena akɛ ehao waa lɛ, ekɛɛ Saul akɛ: “Naa! Otsulɔ yoo ebo nɔ ni okɛɛ lɛ toi, ni mikɛ miwala ewo oshãra mli*+ ni mifee nɔ ni obi lɛ.
22 No hewɔ lɛ, ofainɛ, bo nɔ ni otsulɔ yoo baakɛɛ lɛ toi. Hã mikɛ blodo fioo ko abama ohiɛ; koni oye ni oná hewalɛ ni oyi gbɛ ni oya.”
23 Shi ekpoo ni ekɛɛ akɛ: “Miyeee.” Shi etsuji lɛ kɛ yoo lɛ fɛɛ nyɛ enɔ aahu koni eye nii. Naagbee lɛ, ebo amɛ toi ni ete shi yɛ shikpɔŋ lɛ ni eho eta saatso lɛ nɔ.
24 No mli lɛ, yoo lɛ yɛ tsinabi ko ni eshwi yɛ eshĩa lɛ, no hewɔ lɛ, ehe fee oya ni egbe lɛ* ni eŋɔ ashikishaŋ ni ekpɔtɔ ni ekɛshã blodo ni ashikishaŋ-sha* bɛ mli.
25 Yoo lɛ kɛma Saul kɛ etsuji lɛ ahiɛ, ni amɛye. No sɛɛ lɛ, amɛte shi ni amɛshi nakai nyɔɔŋ lɛ mli.+
Shishigbɛ Niŋmaa
^ Hebri sht. ŋm., “miyitso hebulɔ yɛ gbii lɛ fɛɛ mli lɛ.”
^ Loo “misusuma.”
^ Loo “nɔ ko ni tamɔ Samuel.”
^ Loo “mikɛ misusuma ewo midɛŋ.”
^ Hebri sht. ŋm., “eŋɔshã afɔle.”
^ Kwɛmɔ Wiemɔi Titrii Amligbalamɔ lɛ.
