1 Samuel 26:1-25

  • Shi kome ekoŋŋ lɛ, David egbeee Saul (1-25)

    • David jie bulɛ kpo etsɔɔ mɔ ni Yehowa efɔ lɛ mu lɛ (11)

26  Be ko sɛɛ lɛ, Zifbii+ lɛ ba Saul ŋɔɔ yɛ Gibea,+ amɛbakɛɛ: “Naa! David ebatee yɛ Hakila gɔŋkpɔ ni yɔɔ Yeshimon* hiɛ lɛ nɔ.”+  No hewɔ lɛ, Saul te shi ni ekɛ Israel hii 3,000 ni he esa ni ahala kpeleke shi kɛtee Zif ŋa lɛ nɔ koni eyatao David yɛ Zif ŋa lɛ nɔ.+  Saul yabɔ nsara yɛ gbɛ lɛ he yɛ Hakila gɔŋkpɔ ni yɔɔ Yeshimon hiɛ lɛ nɔ. No mli lɛ, ŋa lɛ nɔ ji he ni David yɔɔ, ni ená ele akɛ Saul eba ŋa lɛ nɔ koni ebatao lɛ.  No hewɔ lɛ, David tsu mɛi koni amɛyakwɛ akɛ Saul eba lɛɛlɛŋ lo.  Sɛɛ mli lɛ, David tee he ni Saul ebabɔ nsara lɛ yɛ lɛ, ni David na he ni Saul kɛ Ner binuu Abner,+ ni ji etatsɛ lɛ kamɔ lɛ; Saul ewɔ yɛ nsara lɛ mli ni asraafoi lɛ fɛɛ ebɔle lɛ kɛkpe.  Kɛkɛ ni David bi Ahimelek, Hitnyo+ lɛ kɛ Zeruia+ binuu Abishai,+ ni ji Yoab nyɛmi nuu lɛ akɛ: “Namɔ kɛ mi baakpeleke shi kɛya Saul nsara lɛ mli?” Ni Abishai kɛɛ akɛ: “Mi kɛ bo baakpeleke shi kɛya.”  No hewɔ lɛ, nyɔɔŋ lɛ, David kɛ Abishai tee he ni asraafoi lɛ yɔɔ lɛ, ni amɛyana ni Saul ewɔ yɛ nsara lɛ mli, ni ekpɔlɔ lɛ tsɛkɛ shikpɔŋ yɛ eyitsogbɛ; ni Abner kɛ asraafoi lɛ hu kamɔ shi yɛ ehe kɛbɔle lɛ kɛkpe.  Kɛkɛ ni Abishai kɛɛ David akɛ: “Ŋmɛnɛ lɛ, Nyɔŋmɔ ejie ohenyɛlɔ lɛ ewo odɛŋ.+ No hewɔ lɛ, ofainɛ hã mikɛ akpɔlɔ lɛ atsu lɛ kɛmɔ shikpɔŋ shi kome pɛ, ni ehe ebahiaŋ ni mikɛtsu lɛ shii enyɔ.”  Shi David kɛɛ Abishai akɛ: “Kaaye lɛ awui, ejaakɛ namɔ wóɔ enine nɔ yɛ mɔ ni Yehowa efɔ lɛ mu+ lɛ nɔ ni eyeɔ ehe?”+ 10  David wie kɛtsa nɔ akɛ: “Gbii abɔ ni Yehowa hiɛ kã nɛɛ, Yehowa diɛŋtsɛ baatswa lɛ nɔ ni egbo,+ aloo be ko baashɛ ni lɛ diɛŋtsɛ ebaagbo,+ aloo ebaakpeleke shi kɛya ta ni ebaayagbo.+ 11  Ekaba lɛ nakai kɔkɔɔkɔ yɛ Yehowa hiɛ akɛ mawó minine nɔ yɛ mɔ ni Yehowa efɔ lɛ mu lɛ nɔ!+ No hewɔ lɛ, ofainɛ, kɔ akpɔlɔ ni yɔɔ eyitsogbɛ lɛ, ni owó nu kɔɔpoo lɛ, ni wɔya.” 12  No hewɔ lɛ, David kɔ akpɔlɔ lɛ ni ewó nu kɔɔpoo lɛ yɛ Saul yitsogbɛ ni amɛtee. Mɔ ko mɔ ko enaaa amɛ,+ ni mɔ ko hu jwɛŋmɔ eyaaa amɛnɔ, ni mɔ ko mɔ ko hu eteee shi; amɛ fɛɛ amɛwɔ, ejaakɛ Yehowa ehã wɔ ni tsii enyɔ amɛnɔ. 13  Kɛkɛ ni David fo mli kɛtee fã kroko, ni eyadamɔ he ko shɔŋŋ yɛ gɔŋ lɛ nɔ, he ko ni kɛ amɛ teŋ jekɛ saŋŋ. 14  David bolɔ etsɛ asraafoi lɛ kɛ Abner,+ Ner binuu lɛ ekɛɛ: “Abner, ohereee nɔ?” Abner hã hetoo akɛ: “Bo namɔ obolɔɔ otsɛɔ maŋtsɛ lɛ?” 15  David kɛɛ Abner akɛ: “Jeee nuu ji bo? Namɔ tamɔ bo yɛ Israel? No hewɔ lɛ, mɛni hewɔ obuuu onuŋtsɔ maŋtsɛ he? Ejaakɛ asraafoi lɛ ateŋ mɔ ko ba koni ebagbe onuŋtsɔ maŋtsɛ.+ 16  Nɔ ni ofee lɛ ehiii kwraa. Gbii abɔ ni Yehowa hiɛ kã nɛɛ, osa gbele, ejaakɛ obuuu onuŋtsɔ, mɔ ni Yehowa efɔ lɛ mu+ lɛ he. Agbɛnɛ, kwɛmɔ ohe! Nɛgbɛ maŋtsɛ lɛ akpɔlɔ lɛ kɛ enu kɔɔpoo+ lɛ ni ma eyitsogbɛ lɛ yɔɔ?” 17  Kɛkɛ ni Saul yoo David gbee ni ebi akɛ: “Mibinuu David, bo ogbee minuɔ lɛ?”+ David hã hetoo akɛ: “Migbee ni, minuŋtsɔ maŋtsɛ.” 18  Ekɛɛ kɛshi sɛɛ akɛ: “Mɛni hewɔ minuŋtsɔ tiuɔ etsulɔ,+ mɛni mifee, aloo mɛɛ efɔŋ po mifee?+ 19  Ofainɛ, minuŋtsɔ maŋtsɛ abo etsulɔ toi: Kɛ́ Yehowa ji mɔ ni tsirɛ bo koni ote shi owo mi lɛ, no lɛ, ehé* miniyenii afɔle lɛ. Shi kɛ́ gbɔmɛi ni tsirɛ bo koni ote shi owo mi lɛ,+ no lɛ, alomɔ amɛ yɛ Yehowa hiɛ, ejaakɛ ŋmɛnɛ lɛ, amɛshwie mi koni mikaná gbɛfaŋnɔ ko yɛ Yehowa gboshinii+ lɛ mli, ejaakɛ amɛmiikɛɛ akɛ: ‘Yaa ni oyasɔmɔ nyɔŋmɔi krokomɛi!’ 20  No hewɔ lɛ, kaahã milá miishwie shi kɛmiije Yehowa hiɛ, ejaakɛ Israel maŋtsɛ lɛ eje kpo koni eyatao ŋmoŋ,+ oookɛɛ eegbɔbi afi yɛ gɔji lɛ anɔ.” 21  Kɛkɛ ni Saul kɛɛ akɛ: “Mifee esha.+ Kuu osɛɛ ni oba, mibinuu David, miyeŋ bo awui ko dɔŋŋ, ejaakɛ ŋmɛnɛ gbi nɛɛ ohã miwala* jara ewa yɛ ohiɛ.+ Lɛɛlɛŋ, miye kwashiai asane ni mitɔ̃ agbo diɛŋtsɛ.” 22  David kɛɛ akɛ: “Maŋtsɛ lɛ akpɔlɔ lɛ nɛ. Hã oblahii lɛ ateŋ mɔ kome aba ni ebakɔ. 23  Yehowa ji mɔ ni baato mɔ fɛɛ mɔ najiaŋ yɛ mɔ lɛ diɛŋtsɛ jalɛ+ kɛ enɔkwayeli naa, ejaakɛ ŋmɛnɛ gbi nɛɛ, Yehowa jie bo ewo midɛŋ, shi misumɔɔɔ akɛ miwóɔ minine nɔ yɛ mɔ ni Yehowa efɔ lɛ mu lɛ nɔ.+ 24  Naa! Bɔ ni owala* jara wa yɛ mihiɛ ŋmɛnɛ gbi nɛɛ, nakai nɔŋŋ miwala* jara aaawa yɛ Yehowa hiɛ, ni lɛ eeejie mi kɛaaje amanehului fɛɛ amli.”+ 25  Saul kɛɛ David akɛ: “Ajɔɔ bo, mibinuu David. Bɔ fɛɛ bɔ ni fee lɛ, obaafee nibii wuji ni obaaye kunim.”+ Kɛkɛ ni David yiŋ etee, ni Saul hu ku esɛɛ kɛtee ejɛɛhe.+

Shishigbɛ Niŋmaa

Shishitsɔɔmɔi komɛi kɛɔ akɛ, “shia ŋa lɛ; ŋa lɛ.”
Hebri sht. ŋm., “efu.”
Loo “misusuma.”
Loo “osusuma.”
Loo “misusuma.”