1 Samuel 23:1-29
23 Be ko sɛɛ lɛ, ayakɛɛ David akɛ: “Filistibii lɛ kɛ Keila+ miiwu ni amɛmiiloo ta mli nii yɛ ŋmaagbeemɔhe lɛ.”
2 No hewɔ lɛ, David bi Yehowa nii+ akɛ: “Miya ni miyagbe Filistibii nɛɛ lo?” Yehowa kɛɛ David akɛ: “Yaa ni oyagbe Filistibii lɛ ni okɛhere Keila.”
3 Shi David hii lɛ kɛɛ lɛ akɛ: “Naa! He ni wɔyɔɔ yɛ Yuda+ nɛɛ po lɛ, wɔmiishe gbeyei; enyiɛ nɔŋŋ ni wɔɔya Keila ni wɔkɛ Filistibii lɛ asraafoi lɛ ayawu!”+
4 No hewɔ lɛ, David bi Yehowa nii ekoŋŋ.+ Ni Yehowa kɛɛ lɛ akɛ: “Tee shi; kpelekemɔ shi kɛya Keila, ejaakɛ mikɛ Filistibii lɛ baawo odɛŋ.”+
5 No hewɔ lɛ, David kɛ ehii lɛ tee Keila ni amɛkɛ Filistibii lɛ yawu; eloo amɛkooloi lɛ ni egbe amɛteŋ mɛi babaoo, ni David here mɛi ni yɔɔ Keila lɛ.+
6 Agbɛnɛ, be ni Ahimelek binuu Abiatar+ jo foi kɛtee David ŋɔɔ yɛ Keila lɛ, ehiɛ efɔd kɛtee.
7 Ayakɛɛ Saul akɛ: “David eba Keila.” Kɛkɛ ni Saul kɛɛ akɛ: “Nyɔŋmɔ ejie lɛ ewo midɛŋ,*+ ejaakɛ eyabote maŋ kɛ enaa agbói kɛ amɛsɛɛ adabaŋi* lɛ mli, no hewɔ lɛ, esa lɛ diɛŋtsɛ eyi.”
8 No hewɔ lɛ, Saul bua mɛi lɛ fɛɛ anaa kɛhã ta koni amɛkpeleke shi kɛya Keila ni amɛyasa David kɛ ehii lɛ ayi.
9 Be ni David ná ele akɛ Saul miikpaŋ eyi nɔ lɛ, ekɛɛ osɔfo Abiatar akɛ: “Okɛ efɔd lɛ aba biɛ.”+
10 Kɛkɛ ni David kɛɛ akɛ: “Ao Yehowa, Israel Nyɔŋmɔ, otsulɔ enu akɛ Saul miitao eba Keila koni ebakpãtã maŋ lɛ hiɛ yɛ mihewɔ.+
11 Ani Keila onukpai lɛ baajie mi awo edɛŋ? Ani Saul baakpeleke shi kɛba tamɔ bɔ ni otsulɔ enu lɛ? Ao Yehowa, Israel Nyɔŋmɔ, ofainɛ kɛɛmɔ otsulɔ.” Kɛkɛ ni Yehowa kɛɛ akɛ: “Ebaakpeleke shi kɛba.”
12 David bi akɛ: “Ani Keila onukpai lɛ baajie mi kɛ mihii lɛ amɛwo Saul dɛŋ?” Yehowa hã hetoo akɛ: “Amɛbaajie bo amɛwo edɛŋ.”
13 Amrɔ nɔŋŋ kɛkɛ ni David kɛ ehii aaafee 600+ lɛ te shi ni amɛshi Keila ni amɛtee he fɛɛ he ni amɛbaaná. Be ni ayakɛɛ Saul akɛ David eshi Keila lɛ, eyanyiɛɛɛ esɛɛ.
14 David yahi ŋa lɛ nɔ hei ni yaa wa, yɛ Zif+ ŋa lɛ nɔ yɛ gɔji lɛ anɔ. Saul tee nɔ etao lɛ,+ shi Yehowa ejieee lɛ ewooo edɛŋ.
15 Be ni David yɔɔ Zif ŋa lɛ nɔ yɛ Horesh lɛ fɛɛ lɛ, David le akɛ* Saul miitao lɛ agbe.*
16 Agbɛnɛ, Saul binuu Yonatan yiŋ kɛtee David ŋɔɔ yɛ Horesh, ni eyaye ebua lɛ koni ená hewalɛ* yɛ Yehowa mli.+
17 Ekɛɛ lɛ akɛ: “Kaashe gbeyei, ejaakɛ mitsɛ Saul nine shɛŋ onɔ; obaaye Israel nɔ maŋtsɛ,+ ni mi matsɔ osɛɛmɔ; ni mitsɛ Saul hu le nakai.”+
18 Kɛkɛ ni amɛyi enyɔ lɛ fɛɛ kpaŋ kpaŋmɔ+ yɛ Yehowa hiɛ, ni David hi Horesh, ni Yonatan yiŋ etee eshĩa.
19 Sɛɛ mli lɛ, Zif hii lɛ kwɔ kɛtee Saul ŋɔɔ yɛ Gibea,+ ni amɛyakɛɛ akɛ: “Naa! David ebatee yɛ wɔmasɛi+ yɛ hei ni yaa wa yɛ Horesh,+ yɛ Hakila+ gɔŋkpɔ ni yɔɔ Yeshimon* wuoyigbɛ*+ lɛ nɔ.
20 Maŋtsɛ, be fɛɛ be ni osumɔɔ* ni okpeleke shi kɛba lɛ, ba, ni wɔbaajie lɛ wɔwo maŋtsɛ dɛŋ.”+
21 Kɛkɛ ni Saul kɛɛ akɛ: “Yehowa ajɔɔ nyɛ, ejaakɛ nyɛjie musuŋtsɔlɛ kpo nyɛtsɔɔ mi.
22 Nyɛfainɛ, nyɛyaa nyɛyataoa he tuuntu ni eyɔɔ kɛ mɔ ni na lɛ yɛ jɛmɛ, ejaakɛ akɛɛ mi akɛ ehiɛ tɛ̃ waa.
23 Nyɛyataoa hei ni eteɔ ehe yɛ lɛ fɛɛ fitsofitso, ni kɛ́ nyɛná nɔmimaa yɛ he lɛ, nyɛkua nyɛsɛɛ nyɛbakɛa mi. Kɛkɛ lɛ mikɛ nyɛ baaya, ni kɛ́ eyɛ shikpɔŋ lɛ nɔ lɛ, matao lɛ yɛ Yuda shĩai* lɛ fɛɛ amli.”
24 No hewɔ lɛ, amɛtsɔ Saul hiɛ kɛtee Zif;+ no mli lɛ, David kɛ ehii lɛ yɛ Maon+ ŋa lɛ nɔ yɛ Araba+ lɛ nɔ, yɛ Yeshimon wuoyigbɛ.
25 Kɛkɛ ni Saul kɛ ehii lɛ ba koni amɛbatao lɛ.+ Be ni akɛɛ David lɛ, amrɔ nɔŋŋ kɛkɛ ni ekpeleke shi kɛtee tɛsaa+ lɛ mli ni eyahi Maon ŋa lɛ nɔ. Be ni Saul nu enɛ lɛ, enyiɛ David sɛɛ kɛtee Maon ŋa lɛ nɔ.
26 Be ni Saul bashɛ gɔŋ lɛ afã kome lɛ, no mli lɛ, David kɛ ehii lɛ hu nyiɛ gɔŋ lɛ afã kroko. David he miitswa shi koni ejo foi kɛshi jɛmɛ+ yɛ Saul hewɔ, shi fiofio lɛ, Saul kɛ ehii lɛ miibɛŋkɛ David kɛ ehii lɛ koni amɛmɔmɔ amɛ.+
27 Shi atsu mɔ ko, ni ebakɛɛ Saul akɛ: “Ba oya, ejaakɛ Filistibii lɛ eba amɛmiiloo ta mli nii yɛ shikpɔŋ lɛ nɔ!”
28 Kɛkɛ ni Saul kpa David sɛɛnyiɛmɔ+ ni etee koni ekɛ Filistibii lɛ ayawu. No hewɔ ni atsɛɔ jɛmɛ akɛ, Mligbalamɔi Tɛsaa lɛ.
29 Kɛkɛ ni David kwɔ kɛshi jɛmɛ ni eyahi hei ni yaa wa ni yɔɔ En-gedi+ lɛ.
Shishigbɛ Niŋmaa
^ Hebri sht. ŋm., “ehɔ̃ɔ lɛ ewo midɛŋ.”
^ Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
^ Shishitsɔɔmɔi komɛi kɛɔ akɛ, “miishe gbeyei ejaakɛ.”
^ Loo “miitao esusuma.”
^ Hebri sht. ŋm., “eyawo enine mli hewalɛ.”
^ Shishitsɔɔmɔi komɛi kɛɔ akɛ, “shia ŋa lɛ; ŋa lɛ.”
^ Hebri sht. ŋm., “ninejurɔgbɛ.”
^ Loo “osusuma sumɔɔ.”
^ Loo “akpei abɔ.”
