1 Samuel 22:1-23

  • David tee Adulam kɛ Mizpe (1-5)

  • Saul hã agbe osɔfoi ni yɔɔ Nob lɛ (6-19)

  • Abiatar jo foi (20-23)

22  No hewɔ lɛ, David shi jɛmɛ+ ni ejo foi kɛtee Adulam tɛkplo+ lɛ mli. Be ni enyɛmimɛi hii lɛ kɛ etsɛ shĩa lɛ fɛɛ nu he lɛ, amɛkpeleke shi kɛtee eŋɔɔ yɛ jɛmɛ.  Ni mɛi fɛɛ ni ehao kɛ mɛi fɛɛ ni hiɛ nyɔji kɛ mɛi fɛɛ ni bɛ miishɛɛ yɛ shihilɛ mli lɛ* bua amɛhe naa kɛba eŋɔɔ, ni etsɔ amɛnɔkwɛlɔ. Hii aaafee 400 fata ehe.  Sɛɛ mli lɛ, David shi jɛmɛ kɛtee Mizpe yɛ Moab ni eyakɛɛ Moab+ maŋtsɛ lɛ akɛ: “Ofainɛ, hã mipapa kɛ mimami kɛ nyɛ abahi shi kɛyashi male nɔ ni Nyɔŋmɔ baafee ehã mi.”  No hewɔ lɛ, eshi amɛ ehã Moab maŋtsɛ lɛ, ni amɛkɛ lɛ hi shi gbii abɔ fɛɛ ni David yɔɔ teemɔhe* lɛ.+  Be ko sɛɛ lɛ, gbalɔ Gad+ kɛɛ David akɛ: “Kaahi teemɔhe* lɛ dɔŋŋ. Shi jɛmɛ kɛya Yuda+ shikpɔŋ lɛ nɔ.” No hewɔ lɛ, David shi jɛmɛ kɛtee Heret koo lɛ mli.  Saul nu akɛ ana David kɛ hii ni fata ehe lɛ. No mli lɛ, Saul ta Gibea+ yɛ tamariske tso lɛ shishi yɛ he grɔŋŋ lɛ nɔ, ni ehiɛ ekpɔlɔ lɛ yɛ edɛŋ, ni etsuji lɛ fɛɛ damɔ emasɛi.  Kɛkɛ ni Saul kɛɛ etsuji lɛ ni damɔ emasɛi lɛ akɛ: “Nyɛ Benyaminbii, nyɛfainɛ, nyɛboa toi. Ani Yishai+ binuu lɛ hu baahã nyɛ fɛɛ shikpɔji kɛ wain ŋmɔji? Ani ebaahole nyɛ fɛɛ asraafoi akpe nɔkwɛlɔi kɛ oha nɔkwɛlɔi?+  Nyɛ fɛɛ nyɛkpaŋ miyi nɔ! Nyɛteŋ mɔ ko mɔ ko wooo mitoi nɔ be ni mi diɛŋtsɛ mibinuu kɛ Yishai binuu lɛ kpaŋ kpaŋmɔ lɛ!+ Nyɛteŋ mɔ kome folo po enaaa mli ehãaa mi ni ebaaba ebawó mitoi nɔ akɛ mi diɛŋtsɛ mibinuu lɛ ewo mi diɛŋtsɛ mitsulɔ lɛ yiŋ koni enyiɛ mishishi, tamɔ bɔ ni eji ŋmɛnɛ nɛɛ.”  Kɛkɛ ni Doeg,+ Edomnyo lɛ ni kwɛɔ Saul tsuji lɛ anɔ yɛ jɛmɛ lɛ kɛɛ akɛ:+ “Mina akɛ Yishai binuu lɛ eba Ahitub binuu Ahimelek ŋɔɔ yɛ Nob.+ 10  Ni ebi Yehowa nii ehã lɛ, ni ehã lɛ niyenii. Ekɛ Goliat, Filistinyo lɛ klante lɛ po hã lɛ.”+ 11  Oya nɔŋŋ ni maŋtsɛ lɛ tsu ni ayatsɛ Ahitub binuu, osɔfo Ahimelek kɛ epapa shĩa lɛ osɔfoi lɛ fɛɛ ni yɔɔ Nob lɛ kɛba. No hewɔ lɛ, amɛ fɛɛ amɛba maŋtsɛ lɛ ŋɔɔ. 12  Agbɛnɛ Saul kɛɛ akɛ: “Ahitub binuu, ofainɛ, bo toi!” ni ehere lɛ nɔ akɛ: “Naa mi, minuŋtsɔ.” 13  Saul kɛɛ lɛ akɛ: “Mɛni hewɔ nyɛkpaŋ miyi nɔ, bo kɛ Yishai binuu lɛ, ni ohã lɛ blodo kɛ klante ni obi Nyɔŋmɔ nii ohã lɛ lɛ? Eteɔ shi ewoɔ mi, ni enyiɛɔ mishishi, tamɔ bɔ ni eji ŋmɛnɛ nɛɛ.” 14  Kɛkɛ ni Ahimelek hã maŋtsɛ lɛ hetoo akɛ: “Otsuji lɛ ateŋ namɔ amuɔ afɔ̃ɔ enɔ* tamɔ David?+ Eji maŋtsɛ shaanuu+ kɛ ohebulɔi lɛ anɔkwɛlɔ, ni eji mɔ ko hu ni abuɔ lɛ waa yɛ oshĩa lɛ.+ 15  Ani ŋmɛnɛ ji klɛŋklɛŋ be ni mibi Nyɔŋmɔ nii mihã lɛ?+ Nɔ ni owieɔ lɛ, ebaŋ lɛ nakai kɔkɔɔkɔ akɛ mafee nakai! Maŋtsɛ kɛ sane akafɔ̃ etsulɔ kɛ mipapa shĩa lɛ fɛɛ nɔ, ejaakɛ otsulɔ leee sane nɛɛ he nɔ ko nɔ ko kwraa.”+ 16  Shi maŋtsɛ lɛ kɛɛ akɛ: “Ahimelek, bɔ fɛɛ bɔ ni fee lɛ abaagbe bo,+ bo kɛ opapa shĩa lɛ fɛɛ.”+ 17  Kɛkɛ ni maŋtsɛ lɛ kɛɛ bulɔi* lɛ ni damɔ emasɛi lɛ akɛ: “Nyɛtsɔa nyɛhe ni nyɛgbea Yehowa osɔfoi lɛ, ejaakɛ amɛmiifĩ David sɛɛ! Amɛle akɛ eji mɔ ko ni miijo foi shi amɛwóoo mitoi nɔ!” Shi maŋtsɛ lɛ tsuji lɛ sumɔɔɔ akɛ amɛholeɔ amɛniji anɔ yɛ Yehowa osɔfoi lɛ anɔ ni amɛgbe amɛ. 18  Kɛkɛ ni maŋtsɛ lɛ kɛɛ Doeg+ akɛ: “Tsɔ ohe ni ogbe osɔfoi lɛ!” Oya nɔŋŋ ni Doeg, Edomnyo+ lɛ tee ni eyagbe osɔfoi lɛ. Nakai gbi lɛ, egbe hii 85 ni wo klala efɔd.+ 19  Agbɛnɛ hu, Nob+ ni ji osɔfoi lɛ amaŋ lɛ, ekɛ klante gbe emli bii lɛ; nuu jio, yoo jio, gbekɛ jio, abifao jio, tsinanuu jio, teji jio, gwantɛŋ jio, ekɛ klante gbe amɛ fɛɛ. 20  Shi Ahitub binuu Ahimelek bihii lɛ ateŋ mɔ kome ni atsɛɔ lɛ Abiatar+ lɛ je mli, ni ejo foi koni eyafata David he. 21  Abiatar kɛɛ David akɛ: “Saul egbe Yehowa osɔfoi lɛ.” 22  Kɛkɛ ni David kɛɛ Abiatar akɛ: “Nakai gbi lɛ+ ni mina Doeg, Edomnyo lɛ yɛ jɛmɛ lɛ, mile jogbaŋŋ akɛ bɔ fɛɛ bɔ ni fee lɛ ebaayakɛɛ Saul. Mi ejɛ ni agbe opapa shĩa lɛ mli bii lɛ fɛɛ* lɛ. 23  Okɛ mi ahi shi, kaashe gbeyei, ejaakɛ mɔ fɛɛ mɔ ni taoɔ bo agbe* lɛ, eetao mi egbe;* mabu ohe.”+

Shishigbɛ Niŋmaa

Hebri sht. ŋm., “mɛi fɛɛ ni susuma miijoo lɛ.”
Loo “he ni yɔɔ shweshweeshwe.”
Loo “he ni yɔɔ shweshweeshwe.”
Loo “yeɔ anɔkwa.”
Hebri sht. ŋm., “foijelɔi.”
Loo “shĩa lɛ mli susumai lɛ fɛɛ.”
Loo “taoɔ osusuma.”
Loo “eetao misusuma.”