1 Samuel 20:1-42

  • Yonatan ye David anɔkwa (1-42)

20  Kɛkɛ ni David jo foi kɛshi Naiot yɛ Rama. Shi eba Yonatan ŋɔɔ ni ebabi lɛ akɛ: “Mɛni mifee?+ Mɛɛ tɔmɔ mitɔ̃, ni mɛɛ esha mifee opapa hewɔ ni etaoɔ mi egbe nɛɛ?”*  Kɛkɛ ni Yonatan kɛɛ lɛ akɛ: “Ebaŋ lɛ nakai kɔkɔɔkɔ!+ Ogboŋ. Naa! Mipapa efeee nɔ ko wulu loo nɔ ko bibioo, ja ewó mitoi nɔ dã. Mɛni hewɔ mipapa kɛ sane nɛɛ baatee mi? Ebaŋ lɛ nakai.”  Shi David kã kitã ekɛɛ: “Opapa le jogbaŋŋ akɛ osumɔɔ misane,*+ no hewɔ lɛ, ebaakɛɛ akɛ, ‘Esaaa akɛ Yonatan leɔ sane nɛɛ, kɛjeee nakai lɛ ebaŋɔŋ enaa.’ Shi gbii abɔ ni Yehowa hiɛ kã nɛɛ, ni bo hu ohiɛ* kã nɛɛ, nanefãa kome pɛ kã mi kɛ gbele teŋ!”+  Kɛkɛ ni Yonatan kɛɛ David akɛ: “Nɔ fɛɛ nɔ ni obaawie lɛ,* mafee mahã bo.”  David kɛɛ Yonatan akɛ: “Nyɔɔŋ hee+ lɛ baaje wɔ́, ni bɔ fɛɛ bɔ ni fee lɛ, esa akɛ mikɛ maŋtsɛ lɛ ata shi kɛye nii; hã maya ni miyatee yɛ ŋa lɛ nɔ kɛyashi gbi ni ji etɛ lɛ gbɛkɛ.  Kɛ́ opapa bi mishi lɛ, kɛɛmɔ lɛ akɛ, ‘David kpa mi fai ni miŋmɛ lɛ gbɛ ni esha foi kɛya emaŋ Betlehem,+ ejaakɛ aashã daa afi afɔle aahã eshĩabii lɛ fɛɛ yɛ jɛmɛ.’+  Kɛ́ ekɛɛ, ‘Yoo, efeee nɔ ko’ lɛ, belɛ otsulɔ baaná toiŋjɔlɛ. Shi kɛ́ emli fu lɛ, belɛ ná ole akɛ etswa efai shi akɛ ebaafee mi efɔŋ.  Jiemɔ suɔmɔ ni tsakeee kpo otsɔɔ otsulɔ,+ ejaakɛ okɛ otsulɔ ekpaŋ Yehowa kpaŋmɔ.+ Shi kɛ́ sane ko yɛ mihe lɛ,+ belɛ bo diɛŋtsɛ gbee mi mɔ. Shi mɛni hewɔ esa akɛ oŋɔ mi ohã opapa?”  Kɛkɛ ni Yonatan kɛɛ akɛ: “Ekaba lɛ nakai kɔkɔɔkɔ! Kɛ́ miná mile akɛ mipapa etswa efai shi akɛ ebaafee bo efɔŋ lɛ, ani mikɛŋ bo?”+ 10  Kɛkɛ ni David bi Yonatan akɛ: “Kɛ́ aleenɔ ni opapa kɛ bo wie bɔ ni esaaa lɛ, namɔ baabakɛɛ mi?” 11  Yonatan kɛɛ David akɛ: “Ba, hã wɔje kpo kɛya ŋa lɛ nɔ.” No hewɔ lɛ, amɛyi enyɔ lɛ fɛɛ amɛje kpo kɛtee ŋa lɛ nɔ. 12  Ni Yonatan kɛɛ David akɛ: “Yehowa, Israel Nyɔŋmɔ lɛ aye odase kɛji mibiii mipapa jwɛŋmɔ yɛ ohe wɔ loo yɛ gbi ni ji etɛ lɛ nɔ. Kɛ́ ewie David he ekpakpa lɛ, ani mitsuŋ kɛbaŋ oŋɔɔ ni abakɛɛ bo? 13  Shi kɛ́ mipapa ekpɛ eyiŋ akɛ ebaafee bo efɔŋ ko ni mikɛɛɛ bo, ni mawo bo gbɛ yɛ toiŋjɔlɛ mli lɛ, no lɛ, Yehowa kɛ Yonatan aye ni ekɛ lɛ aye ekoŋŋ. Yehowa kɛ bo ahi shi+ tamɔ bɔ ni ekɛ mipapa hi shi lɛ.+ 14  Ni ani ojieŋ suɔmɔ ni tsakeee ni tamɔ Yehowa nɔ lɛ kpo otsɔŋ mi be ni mihiɛ kã kɛ be ni migbo po?+ 15  Ni kɛ́ Yehowa gbe David henyɛlɔi lɛ ateŋ mɔ fɛɛ mɔ yɛ shikpɔŋ lɛ nɔ po lɛ, kaajie osuɔmɔ ni tsakeee lɛ kɛje mishĩabii lɛ anɔ kɔkɔɔkɔ.”+ 16  No hewɔ lɛ, Yonatan kɛ David shĩa lɛ kpaŋ akɛ, “Yehowa baabi shi yɛ David henyɛlɔi lɛ adɛŋ.” 17  No hewɔ lɛ, Yonatan hã David kɛ suɔmɔ ni eyɔɔ kɛhã lɛ lɛ kã kitã ekoŋŋ, ejaakɛ esumɔɔ lɛ tamɔ esumɔɔ lɛ diɛŋtsɛ ehe.*+ 18  Kɛkɛ ni Yonatan kɛɛ lɛ akɛ: “Nyɔɔŋ hee+ lɛ baaje wɔ́, ni no hewɔ lɛ abaabi oshi, ejaakɛ osɛi lɛ nɔ baakã shi efolo. 19  Ni yɛ gbi ni ji etɛ lɛ nɔ lɛ, bɔ fɛɛ bɔ ni fee lɛ abaabi oshi, no hewɔ lɛ, yaa he ni nyɛsɛɛ lɛ* oyatee ohe yɛ lɛ, ni ohi tɛ lɛ ni yɔɔ biɛ lɛ masɛi. 20  Matsɛ̃rɛ̃ gãimlibii etɛ mawo tɛ lɛ afã kome, tamɔ nɔ ni miitsɛ̃ nɔ ko pɔtɛɛ gãi. 21  Kɛ́ mitsu sɔɔlɔ lɛ, makɛɛ lɛ akɛ, ‘Yaa ni oyatao gãimlibii lɛ.’ Kɛ́ mikɛɛ sɔɔlɔ lɛ akɛ, ‘Naa! Gãimlibii lɛ yɛ obiɛgbɛ, yaakɔlɔ’ lɛ, no lɛ, obaanyɛ oku osɛɛ oba, ejaakɛ no tsɔɔ akɛ, gbii abɔ ni Yehowa hiɛ kã nɛɛ, obaaná toiŋjɔlɛ ni sane fɔŋ ko kwraa baŋ onɔ. 22  Shi kɛ́ mikɛɛ oblanyo lɛ akɛ, ‘Gãimlibii lɛ etɛke bo’ lɛ, no lɛ, yaa, ejaakɛ Yehowa ewo bo gbɛ. 23  Yehowa afee mi kɛ bo teŋ odasefonyo kɛya naanɔ+ yɛ shi ni wɔwo wɔhe+ lɛ mli.” 24  No hewɔ lɛ, David yatee ehe yɛ ŋa lɛ nɔ. Be ni nyɔɔŋ hee lɛ je lɛ, maŋtsɛ lɛ yata niyenii lɛ sɛɛ koni eye nii.+ 25  No mli lɛ, maŋtsɛ lɛ ta shi yɛ he ni efɔɔ tamɔ yɛ gbogbo lɛ he lɛ. He ni Yonatan ta lɛ, ehiɛ miikwɛ maŋtsɛ lɛ hiɛ, ni Abner+ ta Saul masɛi, shi David gbɛhe lɛ kã shi efolo. 26  Saul ewieee nɔ ko nɔ ko yɛ nakai gbi lɛ nɔ, ejaakɛ ekɛɛ ehe akɛ: ‘Benɛ nɔ ko eba ni no ehã ehe tseee.+ Hɛɛ, ehe tseee.’ 27  Ni nyɔɔŋ hee lɛ nɔ jetsɛremɔ, ni ji gbi ni ji enyɔ lɛ nɔ lɛ, David gbɛhe lɛ kã shi efolo lolo. Kɛkɛ ni Saul bi ebinuu Yonatan akɛ: “Mɛni hewɔ Yishai+ binuu lɛ baaa niyeli nyɛ kɛ ŋmɛnɛ fɛɛ lɛ?” 28  Yonatan kɛɛ Saul akɛ: “David kpa mi fai koni miŋmɛ lɛ gbɛ ni eya Betlehem.+ 29  Ekɛɛ mi akɛ, ‘Ofainɛ, ŋmɛɛ mi gbɛ ni maya, ejaakɛ aashã afɔle aahã miweku lɛ yɛ maŋ lɛ mli, ni mi diɛŋtsɛ minyɛmi nuu lɛ tsu ni abatsɛ mi. No hewɔ lɛ, kɛ́ mihiɛ eba nyam yɛ ohiɛ lɛ, hã mayasara minyɛmimɛi hii lɛ shwiaa maba.’ Enɛ hewɔ ni ebako maŋtsɛ lɛ okpɔlɔ lɛ he lɛ.” 30  Kɛkɛ ni Saul mli fu Yonatan waa, ni ekɛɛ lɛ akɛ: “Bo yoo atuatselɔ binuu, ani osusuɔ akɛ mileee akɛ okpɛ mli akɛ okɛ Yishai binuu lɛ baafee ekome kɛwo bo diɛŋtsɛ kɛ omami hiɛgbele?* 31  Gbii abɔ ni Yishai binuu lɛ hiɛ kã yɛ shikpɔŋ lɛ nɔ nɛɛ, bo kɛ omaŋtsɛyeli lɛ fɛɛ damɔŋ shi kɔkɔɔkɔ.+ No hewɔ lɛ, tsu ni ayaŋɔ lɛ kɛba, ejaakɛ esa akɛ egbo.”*+ 32  Shi Yonatan bi etsɛ Saul akɛ: “Mɛni hewɔ esa akɛ agbe lɛ?+ Mɛni efee?” 33  Kɛkɛ ni Saul fɔ̃ akpɔlɔ koni ekɛtsu lɛ,+ no hewɔ lɛ, Yonatan na akɛ, epapa etswa efai shi akɛ ebaagbe David.+ 34  Amrɔ nɔŋŋ ni Yonatan kɛ mlifu te shi yɛ okpɔlɔ lɛ sɛɛ, ni eyeee niyenii ko yɛ gbi ni ji enyɔ lɛ nɔ, ni ji nyɔɔŋ hee lɛ nɔ jetsɛremɔ lɛ, ejaakɛ David sane miidɔ lɛ,+ ni lɛ diɛŋtsɛ epapa eshwie ehiɛ shi. 35  Ni enɔ jetsɛremɔ leebi lɛ, Yonatan tee ŋa lɛ nɔ tamɔ bɔ ni ekɛ David eto lɛ, ni sɔɔlɔ oblanyo ko fata ehe kɛtee.+ 36  Ni ekɛɛ esɔɔlɔ lɛ akɛ: “Ofainɛ joo foi ni oyatao gãimlibii ni mibatsɛ̃rɛ̃ lɛ.” Ni sɔɔlɔ lɛ jo foi ni Yonatan tsɛ̃ gãi lɛ kɛtɛke lɛ. 37  Be ni sɔɔlɔ lɛ shɛ he ni Yonatan tsɛ̃ gãi lɛ kɛtee lɛ, Yonatan bo etsɛ sɔɔlɔ lɛ ekɛɛ: “Jeee mikɛɛ gãimlibi lɛ etɛke bo?” 38  Yonatan bo etsɛ sɔɔlɔ lɛ ekɛɛ: “Feemɔ mramra! Ohe afee oya! Kaashashao shi!” Ni Yonatan sɔɔlɔ lɛ kɔlɔ gãimlibii lɛ ni eku esɛɛ eba enuŋtsɔ lɛ ŋɔɔ. 39  Sɔɔlɔ lɛ leee nɔ ni yaa nɔ lɛ he nɔ ko kwraa; Yonatan kɛ David pɛ nuɔ shishi. 40  Kɛkɛ ni Yonatan kɛ etawuu nii lɛ hã esɔɔlɔ lɛ ni ekɛɛ lɛ akɛ: “Kɛya, kɛya maŋ lɛ mli.” 41  Be ni sɔɔlɔ lɛ shi lɛ, David fã kpo kɛjɛ he ko yɛ jɛmɛ wuoyigbɛ. Kɛkɛ ni ekula shi ni ekɛ ehiɛ bu shi shii etɛ, ni amɛshɔshɔɔ amɛnaa ni amɛfó waa, shi David ni fó fe fɛɛ. 42  Yonatan kɛɛ David akɛ: “Yaa yɛ toiŋjɔlɛ mli, ejaakɛ wɔ fɛɛ wɔkã kitã+ yɛ Yehowa gbɛ́i mli akɛ, ‘Yehowa afee odasefonyo yɛ mi kɛ bo teŋ, kɛ agbɛnɛ hu, yɛ miseshi* kɛ oseshi* teŋ kɛya naanɔ.’”+ Kɛkɛ ni David te shi ni etee, ni Yonatan hu ku esɛɛ kɛtee maŋ lɛ mli.

Shishigbɛ Niŋmaa

Loo “hewɔ ni etaoɔ misusuma nɛɛ?”
Loo “mihiɛ eba nyam yɛ ohiɛ.”
Loo “osusuma hiɛ.”
Loo “osusuma baawie lɛ.”
Loo “lɛ diɛŋtsɛ esusuma lɛ.”
Hebri sht. ŋm., “he ni yɛ nitsumɔ gbi lɛ lɛ nɔ lɛ.”
Hebri sht. ŋm., “omami yayaiaŋ hiɛgbele?”
Hebri sht. ŋm., “ejaakɛ eji gbele bi.”
Hebri sht. ŋm., “midumɔwu.”
Hebri sht. ŋm., “odumɔwu.”