1 Samuel 19:1-24

  • Saul tee nɔ enyɛ David (1-13)

  • David je Saul dɛŋ (14-24)

19  Sɛɛ mli lɛ, Saul kɛɛ ebinuu Yonatan kɛ etsuji lɛ fɛɛ akɛ eetao egbe David.+  Akɛni Saul binuu Yonatan sumɔɔ David sane waa+ hewɔ lɛ, Yonatan kɛɛ David akɛ: “Mipapa Saul miitao bo egbe. Ofainɛ wɔ leebi lɛ kwɛmɔ ohe nɔ jogbaŋŋ, ni oyatao he ko ni otee ohe yɛ jɛmɛ.  Maje kpo ni mayadamɔ mitsɛ masɛi yɛ ŋa lɛ nɔ he ni obaaya lɛ. Mikɛ mitsɛ baagba ohe sane, ni bɔ ni mana lɛ lɛ, mahã ole.”+  No hewɔ lɛ, Yonatan wie David he ekpakpa+ etsɔɔ epapa Saul. Ekɛɛ lɛ akɛ: “Maŋtsɛ akafee esha eshi etsulɔ David, ejaakɛ efeko bo efɔŋ ko, ni oná nɔ ni efee ehã bo lɛ moŋ he sɛɛ.  Ekɛ ewala wo oshãra mli* ni egbe Filistinyo lɛ,+ ni Yehowa ye kunim kpele ehã Israel fɛɛ.* Ona, ni oná miishɛɛ waa diɛŋtsɛ. No hewɔ lɛ, mɛni hewɔ obaagbe David yakatswaa, ni ofee efɔŋ oshi mɔ ni efeko nɔ ko lɛ lá?”+  Saul bo Yonatan toi, ni Saul kã kitã akɛ: “Gbii abɔ ni Yehowa hiɛ kã nɛɛ, agbeŋ lɛ.”  Enɛ sɛɛ lɛ, Yonatan tsɛ David ni ebɔ lɛ nibii nɛɛ fɛɛ. No hewɔ lɛ, Yonatan kɛ David ba Saul ŋɔɔ, ni etee nɔ esɔmɔ lɛ tamɔ tsutsu lɛ.+  Be ko sɛɛ lɛ, ta te shi ekoŋŋ, ni David je kpo etee ni ekɛ Filistibii lɛ yawu ni egbe amɛteŋ mɛi babaoo, ni amɛjo foi yɛ ehiɛ.  Ni mumɔ gbonyo ni jɛ Yehowa ŋɔɔ bayi Saul nɔ+ be ni eta eshĩa ni ehiɛ akpɔlɔ yɛ edɛŋ lɛ, no mli lɛ, David miitswa saŋku lɛ.+ 10  Saul ka akɛ ekɛ akpɔlɔ lɛ baatsu David kɛmɔ gbogbo lɛ, shi esha ehe kɛje Saul hiɛ, ni akpɔlɔ lɛ yatsu gbogbo lɛ. David jo foi ni eshi nakai nyɔɔŋ lɛ mli. 11  Sɛɛ mli lɛ, Saul tsu mɛi kɛtee David shĩa lɛ koni amɛyabu shĩa lɛ he, ni amɛgbe lɛ enɔ jetsɛremɔ leebi,+ shi David ŋa Mikal kɛɛ lɛ akɛ: “Kɛ́ oshiii* nyɔɔŋ nɛɛ mli lɛ, wɔ́ lɛ, abaagbe bo.” 12  Amrɔ nɔŋŋ lɛ, Mikal hã David tsɔ samfɛlɛ lɛ mli kɛyi shi, koni ejo foi. 13  Mikal wó terafim amaga* lɛ ni ekɛfɔ̃ saatso lɛ nɔ, ni ekɛ abotia hetsɔi nɔhaanɔ ha eyitsogbɛ ni ekɛ mama ha he. 14  Agbɛnɛ Saul tsu mɛi koni amɛyamɔ David, shi yoo lɛ kɛɛ akɛ: “Ebɛ hewalɛ.” 15  No hewɔ lɛ, Saul tsu mɛi lɛ kɛtee koni amɛyana David, ni ekɛɛ amɛ akɛ: “Nyɛwóa lɛ kɛ saatso lɛ fɛɛ nyɛbahãa mi koni agbe lɛ.”+ 16  Be ni mɛi ni atsu lɛ bote tsũ lɛ mli lɛ, amɛyana terafim amaga* lɛ kã saatso lɛ nɔ ni akɛ abotia hetsɔi nɔhaanɔ eha eyitsogbɛ. 17  Saul kɛɛ Mikal akɛ: “Mɛni hewɔ olaka mi nɛkɛ, ni owo mihenyɛlɔ+ lɛ gbɛ ni eje midɛŋ lɛ?” Mikal kɛɛ Saul akɛ: “Ekɛɛ mi akɛ, ‘Hã maya, kɛjeee nakai lɛ, magbe bo!’” 18  Ni David jo foi etee, ni eba Samuel ŋɔɔ yɛ Rama.+ Egba lɛ nibii fɛɛ ni Saul efee lɛ lɛ. Kɛkɛ ni ekɛ Samuel yiŋ kɛtee ni amɛyahi Naiot.+ 19  Be ko sɛɛ lɛ, ayabɔ Saul amaniɛ akɛ: “Naa! David yɛ Naiot yɛ Rama.” 20  Amrɔ nɔŋŋ ni Saul tsu mɛi koni amɛyamɔ David. Be ni amɛna gbalɔi onukpai lɛ ni amɛmiigba ni Samuel damɔ shi ni eekwɛ amɛnɔ lɛ, Nyɔŋmɔ mumɔ lɛ bayi mɛi ni Saul tsu lɛ anɔ ni amɛ hu amɛfee amɛnii tamɔ gbalɔi. 21  Be ni abɔ Saul amaniɛ lɛ, amrɔ nɔŋŋ ni etsu mɛi krokomɛi kɛtee ni amɛ hu amɛfee amɛnii tamɔ gbalɔi. No hewɔ lɛ, Saul tsu mɛi krokomɛi kɛtee ekoŋŋ nɔ ni ji shii etɛ nɔ, ni amɛ hu amɛfee amɛnii tamɔ gbalɔi. 22  Naagbee lɛ, lɛ diɛŋtsɛ hu etee Rama. Be ni eshɛ bu agbo ni atoɔ nu yɛ mli ni yɔɔ Seku lɛ he lɛ, ebi akɛ: “Nɛgbɛ Samuel kɛ David yɔɔ?” Amɛkɛɛ akɛ: “Amɛyɛ Naiot+ yɛ Rama.” 23  Be ni Saul nyiɛ gbɛ kɛjɛ jɛmɛ kɛyaa Naiot yɛ Rama lɛ, Nyɔŋmɔ mumɔ lɛ bayi lɛ hu enɔ, ni be ni eyaa lɛ efee enii tamɔ gbalɔ aahu kɛyashi eshɛ Naiot yɛ Rama. 24  Lɛ hu ejie etadei lɛ yɛ ehe, ni efee enii tamɔ gbalɔ yɛ Samuel hiɛ, ni ekã shi kɛ ehe folo* nakai gbi lɛ mli fɛɛ kɛ nakai nyɔɔŋ lɛ mli fɛɛ. No hewɔ ni amɛkɛɔ akɛ: “Ani Saul hu yɛ gbalɔi lɛ ateŋ?”+ lɛ.

Shishigbɛ Niŋmaa

Loo “Ekɛ esusuma wo edɛŋ.”
Loo “ni Yehowa here Israel fɛɛ yiwala.”
Loo “Kɛ́ ohãaa osusuma ashi.”
Loo “shĩa nyɔŋmɔ; shĩa amaga.”
Loo “shĩa nyɔŋmɔ; shĩa amaga.”
Loo “eka shi kɛ epioto folo.”