1 Samuel 18:1-30

  • David kɛ Yonatan bɔ naanyo (1-4)

  • David kunimyelii lɛ hã Saul ye awuŋa (5-9)

  • Saul ka akɛ ebaagbe David (10-19)

  • David kɛ Saul biyoo Mikal bote gbalashihilɛ mli (20-30)

18  Be ni David kɛ Saul wie egbe naa nɔŋŋ lɛ, Yonatan+ kɛ David batsɔmɔ nanemɛi kpaakpa,* ni Yonatan sumɔ lɛ tamɔ esumɔɔ lɛ diɛŋtsɛ ehe lɛ.*+  Kɛjɛ nakai gbi lɛ nɔ kɛyaa lɛ, Saul hã David kɛ lɛ hi shi, ni eŋmɛɛɛ lɛ gbɛ ni eya etsɛ shĩa lɛ dɔŋŋ.+  Ni Yonatan kɛ David kpaŋ kpaŋmɔ,+ ejaakɛ esumɔɔ lɛ tamɔ esumɔɔ lɛ diɛŋtsɛ ehe lɛ.*+  Yonatan jie atade ni nine bɛ he ni ewo lɛ ni ekɛhã David, ni ekɛ etawuu atade lɛ, eklante lɛ, egãi lɛ, kɛ ehɛfiinɔ lɛ hu fata he ehã lɛ.  David jeɔ kpo kɛyaa ta, ni he fɛɛ he ni Saul baatsu lɛ lɛ, eyeɔ omanye.*+ No hewɔ lɛ, Saul wó lɛ eto hii ni wuɔ ta lɛ anɔ,+ ni enɛ sa mɛi lɛ fɛɛ kɛ Saul tsuji lɛ hu ahiɛ.  Kɛ́ David kɛ mɛi lɛ tee amɛyagbe Filistibii lɛ ni amɛmiiku amɛsɛɛ kɛmiiba lɛ, yei lɛ kɛ lala+ kɛ joi jeɔ kpo kɛjɛɔ Israel maji lɛ fɛɛ amli ni amɛkɛ akashaa+ kɛ kpãi etɛ saŋku bakpeɔ Maŋtsɛ Saul kɛ nyamɔ.  Yei lɛ ni shwɛɔ joo lɛ láa akɛ: “Saul egbe akpei,Ni David egbe akpei nyɔŋmai.”+  Saul mli wo la waa,+ ni enyaaa lala nɛɛ he, ejaakɛ ewie akɛ: “Amɛkɛ akpei nyɔŋmai ehã David, shi mi lɛ, amɛhã mi akpei. Nɔ pɛ ni eshwɛ ni amɛkɛbaahã lɛ ji maŋtsɛyeli lɛ!”+  Kɛjɛ nakai gbi lɛ nɔ kɛyaa lɛ, Saul kɛ hiŋmɛi ko kwɛɔ David daa nɛɛ. 10  Enɔ jetsɛremɔ lɛ, mumɔ gbonyo ni jɛ Nyɔŋmɔ ŋɔɔ bayi Saul nɔ,+ ni ebɔi basabasafeemɔ* yɛ shĩa lɛ mli, no mli lɛ, David miitswa saŋku+ lɛ tamɔ efɔɔ feemɔ lɛ. Ni Saul hiɛ akpɔlɔ yɛ edɛŋ,+ 11  ni efɔ̃+ ni ekɛɛ ehe akɛ: ‘Mikɛbaatsu David kɛmɔ gbogbo lɛ!’ Shi David je mli ehã lɛ shii enyɔ sɔŋŋ. 12  Kɛkɛ ni Saul she David gbeyei ejaakɛ Yehowa kɛ lɛ yɛ,+ shi Saul lɛ, eje esɛɛ.+ 13  No hewɔ lɛ, Saul jie lɛ kɛje ehiɛ, ni ehala lɛ akɛ asraafoi akpetsɛ, ni David nyiɛɔ asraafoi lɛ ahiɛ kɛyaa ta.*+ 14  David tee nɔ eye omanye*+ yɛ nɔ fɛɛ nɔ ni efee lɛ mli, ni Yehowa kɛ lɛ yɛ.+ 15  Ni be ni Saul na akɛ eeye omanye sɔŋŋ lɛ, eshe lɛ gbeyei. 16  Shi Israel kɛ Yuda fɛɛ sumɔɔ David, ejaakɛ lɛ enyiɛɔ amɛhiɛ kɛyaa ta. 17  Sɛɛ mli lɛ, Saul kɛɛ David akɛ: “Mibiyoo nukpa, Merab+ nɛ. Mikɛ lɛ baahã bo akɛ oŋa.+ Bo lɛ yaa nɔ ofee ekãa ohã mi kɛkɛ ni owu Yehowa tai lɛ.”+ Ejaakɛ Saul kɛɛ ehe akɛ: ‘Mi lɛ, mikɛ minine etaŋ ehe. Shi Filistibii lɛ adɛŋ ebaagbo yɛ.’+ 18  Kɛkɛ ni David kɛɛ Saul akɛ: “Namɔ ji mi, ni namɛi ji miwekumɛi, ni ji mipapa shĩa ni yɔɔ Israel lɛ, ni mibatsɔ maŋtsɛ shaanuu?”+ 19  Shi be ni be shɛ ni akɛ Saul biyoo, Merab baahã David lɛ, no mli lɛ, akɛ lɛ ehã Adriel,+ Meholatnyo lɛ, akɛ eŋa momo. 20  No mli lɛ, Saul biyoo, Mikal+ miisumɔ David, ni ayabɔ Saul, ni enɛ sa ehiɛ jogbaŋŋ. 21  No hewɔ lɛ, Saul kɛɛ akɛ: “Mikɛ lɛ baahã lɛ koni etsɔ tamɔ tsɔne ehã lɛ, koni Filistibii lɛ anine ashɛ enɔ.”+ Kɛkɛ ni Saul kɛɛ David nɔ ni ji shii enyɔ nɔ akɛ: “Ŋmɛnɛ lɛ, obaatsɔ mishaanuu.”* 22  Agbɛnɛ hu, Saul fã etsuji lɛ akɛ: “Nyɛkɛ David awiea yɛ teemɔŋ akɛ, ‘Naa! Maŋtsɛ lɛ yɛ ohe miishɛɛ, ni etsuji lɛ fɛɛ sumɔɔ osane. No hewɔ lɛ, okɛ maŋtsɛ lɛ akpaŋ gbãla kpaŋmɔ.’” 23  Be ni Saul tsuji lɛ kɛɛ David saji nɛɛ, David kɛɛ akɛ: “Ani efeɔ nyɛ akɛ maŋtsɛ shaanuu tsɔmɔ lɛ shwɛmɔ sane ni, be mli ni miji ohiafo ni abuuu mi nɛɛ?”+ 24  Kɛkɛ ni Saul tsuji lɛ bakɛɛ lɛ akɛ: “Nɔ ni David wie nɛ.” 25  Kɛkɛ ni Saul kɛɛ akɛ: “Nyɛkɛa David akɛ, ‘Maŋtsɛ lɛ taooo gbãla yinii+ ko akɛ ja Filistibii aketia naa loi+ 100 kɛkɛ, koni maŋtsɛ lɛ kɛtɔ ehenyɛlɔi lɛ anɔ owele.’” Ejaakɛ no mli lɛ, Saul miitsɔ̃ ŋaa koni David agbo yɛ Filistibii lɛ anine nɔ. 26  No hewɔ lɛ, etsuji lɛ bakɛɛ David wiemɔi nɛɛ, ni esa David hiɛ akɛ eeetsɔ maŋtsɛ lɛ shaanuu.+ Shi dani be ni ato lɛ baashɛ lɛ, 27  David kɛ ehii lɛ tee ni amɛyagbe Filisti hii 200, ni David kɛ amɛketiai anaa loi lɛ ba, ni ebakane fɛɛ pɛpɛɛpɛ ehã maŋtsɛ lɛ koni ekɛ lɛ akpaŋ gbãla kpaŋmɔ. No hewɔ lɛ, Saul kɛ ebiyoo Mikal hã lɛ akɛ eŋa.+ 28  Saul na akɛ Yehowa kɛ David yɛ,+ ni agbɛnɛ hu, ebiyoo Mikal sumɔɔ lɛ.+ 29  Enɛ hã Saul she David gbeyei fe tsutsu lɛ, ni David batsɔ Saul henyɛlɔ kɛyashi egbo.+ 30  Filistibii lɛ anɔyelɔi lɛ baa amɛbawuɔ, shi be fɛɛ be ni amɛbaaba amɛbawu lɛ, David yeɔ omanye* fe Saul tsuji lɛ fɛɛ;+ ni awó egbɛ́i nɔ gojoo.+

Shishigbɛ Niŋmaa

Loo “Yonatan susuma mɔ David susuma.”
Loo “lɛ diɛŋtsɛ esusuma lɛ.”
Loo “lɛ diɛŋtsɛ esusuma lɛ.”
Loo “ekɛ hiɛshikamɔ tsuɔ nii.”
Loo “ ni efee enii tamɔ gbalɔ.”
Hebri sht. ŋm., “ni enyiɛɔ mɛi lɛ ahiɛ kɛyaa kɛbaa.”
Loo “ekɛ hiɛshikamɔ tsu nii.”
Loo “mikɛ bo baakpaŋ gbãla kpaŋmɔ.”
Loo “David kɛ hiɛshikamɔ tsuɔ nii.”